Lukaji 18
18
Yofwalrafwaniha ya makwele mmohi wa muhiyana okana ntindi
1Yesu ohowongaga yofwalrafwaniha imohi aaonelrihagamo anamamuharaye ira aliwa kakale atu ohogomana lobela eto ira aliwa kahakukumuwege. 2Liye ohowongaga eraga: <<Muwari mwa sidadi imohi ohokalamo namatonga mmohi. Namatongole kamuova Mulugu nne liye kambalra mutu uli watene. 3Eto musidadi mule mohokala muhiyana mmohi ali makwele. Muhiyanole odowetcha wa namatonga ule ira atongiwe, eraga: <Muditongele mwa ibaribari mulandu dinna miyo na mwidanaga.> 4Mwa enne vohomala tempu ilukulu namatonga ule ahafunaga tonga milandu da muhiyanole. Mbwenye liye oumbuwela ira: <Na ibaribari miyo kannamuova Mulugu nne kannambalra mutu. 5Mbwenye voira muhiyanola unodisimeliha, nnomutongela mwa ibaribari ira ahadisimelihe akoka.> >>
6Nabwiya ohowongagave eraga: <<Muvuruwane pama yawongile namatonga wabure ule. 7Akala namatonga wabure ule ohowanda mutongela mwa ibaribari muhiyanole milandu daye, kodi Mulugu kanaatongela milandu atwaye osakulriwa anno anamuitana ntana na mahiyu? Unoakamiheda mohodibeliwa.#18:7 Unoakamiheda mohodibeliwa. MaBibiliya amohiwa anawonga ira: Masiki liye adibeliwe, unoatongela milandu diwa. 8Miyo nnouwandelani ira Mulugu unoza aatongele mulandu wewa mwa ibaribari mobaranya. Mwa eno, kodi Mwana wa Mutu aza azaga, unoza afwanye nroromelo mwilamboni?>>#18:8 Mwana wa Mutu aza azaga, unoza afwanye nroromelo mwilamboni? Va yofuka ya Yesu, liye kafuna ira arumeliwe. Uhukala jofuka jidjindji mBibiliyani jejo jahanafuna jowakula jiwa. Fendo didjindji dene anafuka ira kawande nfundjiha mutu yengo. Va Yesu afukile yofuka yenna ira awande awandela aliwa kakale olimbene na nroromelo newa ira liye azaga awande afwanya aliwa kagalive oimelene na nroromelo.
Yofwalrafwaniha ya muFarizewu na namasokiha misoko
9Kohokalawo atu kavinyindela, kaumbuwelaga ira: <<Hiyo nili apamene.>> Aliwa eto koalramwisa afwiwa. Evale Yesu ohawandela atu anne yofwalrafwaniha ila, liye ira: 10<<Wohokalaga alombwana ambinli kavenyilege, aliwa dowa Nyumba ya Yehova ira kalobele. Mutu mmohi ali muFarizewu. Mmohiwa ali namasokiha misoko. 11Aliwa kagadowile lobela, muFarizewu ule ohoimelaga vaye vene, alobelaga eraga: <Mulugu miyo nnoutamalelani mwasiwa miyo kadili nnga atu amohiwa. Miyo kadili nnga anno anaadjelra afwiwa na anno anaairela afwiwa ubure na aliba raruwa, nne miyo kadili nnga namasokiha misoko uli vale. 12Miyo nnojejuwari va sumana fendo mbinli eto nnovelela yanekumi ya jatene jinakana miyo.> 13Mbwenye namasokiha misoko ule ohoimelaga olapela wene, nne meswaye kaing'anihile zulu. Liye ohogugudaga vamirimani vaye alobelaga eraga: <Mulugu, mudiwendele tangaranga miyo vano mutu otega.> >> 14Yesu ohomarihaga eraga: <<Miyo na ibaribari nnouwandelani ira mwa alombwana ambinli ale kadowaga vande, adowile agali wapamene vamentoni va Mulugu ali namasokiha misoko, hiya nfwayele. Mwasiwa ule unavitukulela, unoyevihiwa. Eto ule unaviyeviha, unotukuleliwa.>>
Yesu na ahima
Matewuji 19:13-15; Markuji 10:13-16
15Wohokalaga atu kaatukunle ahima a mmandani, aliwa adowagana valigi Yesu ira aahelege ndanda, aarelihe. Anamamuharaye kagaonne makalelo anne, kohoroma asumululaga aliba azana ahimale. 16Mbwenye Yesu ohaitanelaga ahima vali liye vale eraga: <<Kamwakondihe ahima za vali miyo. Ahiyeni ahima kaze mwasiwa Umwene wa Mulugu, annya ba atu okala nnga ha ahima anna.#18:16 annya ba atu okala nnga ha ahima anna: Mazwala kinawonga ira anafuna volowa muUmweneni mwa Mulugu ba ahima bahi. So anawonga ira mutu para avolowe muUmweneni, unaroma kala nnga mwana mung'onong'ono. Tchoira mwana mung'onong'ono awendaga kanakala mutu ovitukulela mbwenye unokala mutu omuroromela babaye. Mutu ira avulusiwe, unaroma kana viyeviha no muroromela Yesu nnga mwana amuroromelaga babaye. 17Na ibaribari nnouwandelani ira mutu wenno ahanawatchele Umwene wa Mulugu mokala nnga mwana, liye kaza avolowa muUmweneni.>>
Istoriya ya mutu mmohi orayela
Matewuji 19:16-30; Markuji 10:17-31
18Evale mundimuwa mmohi ohofukaga, liye ira: <<Namafundjiha wapama, ira miyo dikayena ingumi yohomala, dire avi?>> 19Yesu mbwenye ohowakula, liye ira: <<Kodi unadiirela nni wapama? Kalivo uli wapama ahali Mulugu bahi.>>#18:19 Kalivo uli wapama ahali Mulugu bahi. Yesu awongaga eno kahi ira liye era runiha ira: <<Miyo kadili Mulugu>>, nari. So Yesu awonga eno ira amuxixe mutule. Mutule ahakayena ibaribari, ogowakula ira: <<Miyo nnouirani wapama mwasiwa na nyenne muli Mulugu.>> Eto fwanyeya ira mutule amuirave: <<Namafundjiha.>> Ku wonga liye kaanna ibaribari zela Yesu. 20Evale Yesu ohomuwandelaga ira: <<We umala iziwa jinawonga malamulo ira kuraruwe, kumpe mutu, kube, kumunukede mutu, umurihedege babawo na mmawo.>>#18:20 We umala iziwa jinawonga malamulo: Yesu amuxixa mutu orayela ira amuone akala gu mutu oviyeviha owu mutu ovitukulela. Ahakale mutu owonga ibaribari, ogowonga ira: <<Miyo malamulo kannawanda. Muwari mohowanda, dire avi ira dileveleliwe?>> Tchoira malamulo kinalaba yengo yonivulusa hiyo atu oimwanana kwakwaneliheda. Nione Lukaji 18:9-14; Roma 3:19-22; Galasiya 3:9-12. 21Mundimuwole ohorumelaga, liye ira: <<Miyo jatene ejo nnoirana romela uzombweni waga.>> 22Yesu agavwile enne, ohoira: <<Ihala yengo imohi ira uirena. Udowe wagulihe jatene jinna we, utukule kobiriwa waagawele aliba simela. Waira eno, unokana rayela wawo ilambo ya zulu. Wamala irana jatene jejo, uze udihare.>> 23Mundimuwole agavwile enne, ohokumbanyaga valukulu, tchoira liye ali mutu orayela bure. 24Yesu agaonne kumbanya wa mutule, ohowongaga eraga: <<Ili yorutcha ira mutu orayela avolowe muUmweneni mwa Mulugu. 25Ira kamelo axolre mopovowa mwa singano no ira mutu orayela avolowe muUmweneni mwa Mulugu, inarutcha tchoira mutu orayela avolowe muUmweneni mwa Mulugu.>>
26Atu atene kavwilege mazwale kohofukaga keraga: <<Nnga era eno, unafuna vulusiwa bani?>> 27Yesu ohowakula, liye ira: <<Jengo jejo jahanawandeya na atu, na Mulugu jinowandeya.>>
28Evale Peduru ohowongaga, liye ira: <<Kaing'anani! Hiyo nihiya jatene, hiyo uharagani nyo.>> 29Yesu ohowakula eraga: <<Nnafuna duwandeleni ibaribari ira mutu wenno unahiya nyumbaye, muhiyanaye, abalaye, arongoliye, ababaye nari anaye na mwasa wa Umwene wa Mulugu, 30liye unotambilra jengo jidjindji mwilamboni emuno kwaranya janna liye.#18:30 liye unotambilra jengo jidjindji mwilamboni emuno kwaranya janna liye: Tapulela wa mazwala inaireya nnga imuireyele mulombwana Pawulo. Liye okuma vali liye, wendaga mwatene mwene. Muwari mwa mabasa alaba liye, mwatene mwalaleya liye, atu kagamanle muroromela Yesu, liye ohokana afwaye kamuwatchela, liye kagana abalaye oindjiva, na ababaye oindjiva, na ammaye oindjiva na arongoliye oindjiva na mavande oindjiva mwakala liye kwaranya jatene jahiyile liye vande. Eto fwanyeya ira muwari mwa goyi datene danna Pawulo, hagalala na murendele Mulugu anvahile liye ohokwaranya hagalala na murendele wafuna Pawulo kana ahaire garati vande vaye. Eto vasogolro unotambilra ingumi yohomala.>>
Yesu ohowonga akoka zela kwa no venyihiwa waye
Matewuji 20:17-19; Markuji 10:32-34
31Yesu ohaitanelaga anamamuharaye kumi na ambinli vokala nnga ha vale, liye awandelaga eraga: <<Kavuruwanani pama! Ulrendola eni hiyo nnadowa Jeruzalemu, wewo unafuna ireya jatene jalrembile anamafiyiheda zela Mwana wa Mutu. 32Tchoira Mwana wa Mutu unovahediwa mmandani mwa atu ohokala aJudewu, aliwa anomululuviha, anomuruwana, anomutapela mare, 33anomuwaxula, amala kampe. Mbwenye aliwa kagamanle mpa, siku naneraru, unovenya mokwani.>> 34Anamamuharaye mbwenye tchaonenlremo jawongile Yesu. Yotapulela ya mazwale yaligi yengo yokoyeya.#18:34 Yotapulela ya mazwale yaligi yengo yokoyeya: Mazu a Mulugu anoniwandela ira onelramo ibaribari no twaruwa no kana nroromelo kunazela mofuna wa kada mutu. So mbwenye mutu ira akayena, unavahiwa. Kohokalawo anavahiwa eto kohokalawo kahanavahiwa. Nione Matewuji 19:11; Markuji 4:11-12; Juwawu 6:65; Joira ja Anamarumiwa 16:14; Roma 9:16; 2 Timoteyo 2:25. Aliwa tchawanda onelramo jawongaga liye jile.
Vulumutchiwa wa mulombwana mmohi ohoona
Matewuji 20:29-34; Markuji 10:46-52
35Yesu awandamelaga sidadi ya Jeriko, ohokalawo mulombwana mmohi ohoona agaratilege mmambalo mwa ndila, avepaga kobiri. 36Liye agavwile anamwindji kaviraga, ohofukedaga zela jaireya. 37Evale kohomuwandelaga keraga: <<Yesu wa Nazareti unavira.>> 38Liye agavwile enne, ohoromaga muitana eraga: <<Yesu mwana Davi,#18:38 Yesu mwana Davi: Bartimewu amuitanaga Yesu na nzina na Mwana Davi kahi ira liye esaga ambanle Yesu ali Davi, nari. Tchoira Davi ohokwa yaka didjindji dene Yesu ahanabaliwe. So mbwenye muwari mwa nzina noira Mwana Davi, Bartimewu amuira Yesu Namatikeliwa. Tchoira wanle Mulugu ohomuwandela Davi ira: <<Namatikeliwa unabaliwa muwari mwa ahimawo a musogolro.>> Bartimewu amuira Yesu Namatikeliwa afuna baliwa muzizani mwa Davi nnga mwawongele Mulugu wanle. Zela ibaribari ira Nvulusi afuna akumele muzizani mwa Davi, inafwanela nione eto 2 Samuweli 7:16; Jeremiya 23:5; Salmu 132:10-11; Joira ja Anamarumiwa 13:23; Juwawu 7:42. mudiwendele tangaranga!>>
39Atu kaligi sogolro wa Yesu, komusumululaga ira amiyale. Liye mbwenye kawandaga miyaliheya. Okuwagave eraga: <<Mwana Davi, kadiwendeleni tangaranga miyo vano!>> 40Yesu agavwile enne ohoimelaga, liye ira: <<Kamuzenani uno mutu unadiitana uyo.>> Evale liye agafiyile valigi Yesu vale, Yesu ohonfuka, liye ira: 41<<Kodi weyo unafuna ira miyo duirele nni?>> Liye ohorumelaga, liye ira: <<Nabwiya, miyo nnafuna dionege!>> 42Evale Yesu ohomuwandela eraga: <<Kaonaga! Weyo eni uhuvulumuwa na mwasa wa nroromelo nawo.>> 43Yesu agawongile enne, tempu imohive yenne mutule ohoromaga ona eto ohoromaga mutitimiha Mulugu, liye muharaga Yesu. Atu atene kaonile jatene ejile kohoromaga mutamalela Mulugu.
موجودہ انتخاب:
Lukaji 18: iLolo
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2018 Visão Integral