Lukaji 20
20
Atu kohonfuka Yesu zela utongi waye
Matewuji 21:23-27; Markuji 11:27-33
1Siku nimohi Yesu ohokalaga vatando va Nyumba ya Yehova aafundjihaga anamwindji kaligi vevale, aalaleyaga Muselu Wapama. Evale kohozaga andimuwa a anamakuta na anamafundjiha malamulo, vamohi na andimuwa a aJudewu, 2aliwa nfuka Yesu keraga: <<Kaniwandele! Kodi jatene eji jinera we, unairana na utongi waani? Uuvahile utongi wenna bani?>> 3Evale Yesu ohawakulaga, liye ira: <<Na miyene dihikana yofuka imohi inafuna miyo ufukani. 4Kodi anvahile Juwawu utongi ira aabatizege atu ali ani? Ali Mulugu uli zulu owu ali atu?>> 5Evale aliwa kohoroma wonga oka oka keraga: <<Nnga mutula nimuwakule avi? Nera niwonge ira: <Anvahile utongi ali Mulugu uli zulu>, liye unonifuka ira: <Nnga mwasiwa gwa nni nyo muza mwaharoromelaga jawonga liye?> 6Eto nawonga ira: <Anvahile Juwawu utongi ali atu>, anamwindjala anonipa na mabwe, mwasiwa aliwa kaimenle ira: <Juwawu ali namafiyiheda.> >> 7Na mwasa wenne, kohowakula keraga: <<Hiyo kanimuiziwile mutu anvahile Juwawu utongi.>> 8Evale Yesu ohowonga, liye ira: <<Bahi eto, na miyene kannamuwonga mutu udivahile utongi zela jinairana miyo ji!>>
Yofwalrafwaniha ya anamalima a munda wa uva
Matewuji 21:33-46; Markuji 12:1-12
9Yesu ohoroma awandela atu yofwalrafwaniha ila eraga: <<Ohokalawo mulombwana alimile munda wa uva. Agazanle, munda watene ohoalugariha na atu amohi. Evale liye ohovenyaga, liye dowa ilambo imohiwa olapela, liye malawo tempu ilukulu. 10Yagafiyile tempu yohatcha, ohomuruma namalaba mmohi ira adowe wa anamalima ale ira kanvahe jejo jafuna kala jaye muwari mwa jovaha jatene ja mmundani mule.#20:10 jejo jafuna kala jaye muwari mwa jovaha jatene ja mmundani mule: Nione rodape unafwanyeya Matewuji 21:34 ira niiziwe zela makalelo kairetcha atu wanle zela joalugariha munda vamohi na makalelo ogana johanda jiwa. Mbwenye liye agafiyile wewule, anamalimale kohomuhinda aliwa mbubuda, nomala aliwa muruma ira adowege kahanvahile yengo. 11Evale maliba mundole ohomuruma namalaba mmohiwa. Na wenne agafiyile wa anamalima ale, aliwa kohomuhinda, aliwa mbubuda eto kohomuirela jengo ja manyazo, aliwa muruma ira adowe ahatukunle yengo. 12Nomala eno, maliba munda ule ohomuruma namalaba waneraru. Mbwenye anamalimale kohomuhinda, aliwa mbubudaga ante liye fiyeda poreya. Nomala aliwa mutamangiha. 13Evale maliba munda ule ohoumbuwelaga eraga: <Kodi nnafuna dire avi?> Noira eno, ohowongaga ekave, liye ira: <Dihiiziwa inafuna miyo ira! Nnafuna dimurume mwanaga wenne odizivela. Afwase liye adowa, anomuriheda.> Noira eno, ohomuruma. 14Mbwenye anamalimale kagamuonne liye azaga, kohowongaga mmohi na nfwaye keraga: <Ula gu mwana unafuna halana jengo jatene jeji babaye agakwile. Ndoweni nimpeni ira jatene jafuna liye halana babaye agakwile, jikale jehu.> 15Evale aliwa kohomutukulaga, aliwa mburulela unde wa munda, aliwa mpa.>>
Yesu agamanle wonga yofwalrafwaniha ile, ohofukaga, liye ira: <<Nnga anamalabale kere atu kampa mwanole, mwinnya wa mundole unafuna aairena avi? 16Jagaireyile eno liye unoza aape alombwanale, amala eno atukule mundole, aalugarihede anamalima amohiwa.>> Evale atu kavuruwanagale kohoiraga: <<Yeniyo mbwenye kiireye!>> 17Yesu mbwenye ohaing'anaga atwale, liye kwi: <<Miyo nnafuna dufukeni tapulela wa yolremba inafwanyeya mMazuni yoira:
<Nibwe neno nalramwisile aliba manga nyumba, peno ti nibwe na vamwendoni.> #
Salmu 118:22
18Mutu uli watene unagwele vazulu va nibwe ni, unomala gwadanyeya. Eto nibwe ni namugwela mutu, mutuyo unomala tchileya nnga utu.>>
19Yesu agamanle wonga, ora imohive yenne anamafundjiha malamulo na andimuwa a anamakuta kohofuna jomuhinda Yesu mwasiwa aliwa kohoiziwa ira yofwalrafwaniha ile aawongela aliwene. Mbwenye aliwa kaaova atu anno kafwanyeya evale.
Ja Sezare jikale ja Sezare eto ja Mulugu jikale ja Mulugu
Matewuji 22:15-22; Markuji 12:13-17
20Evale aliwa kohoroma muwendawendiheda mwatene mwavira liye. Noira enne koharuma atu ira kadowe kakale nnga atu apama, kamuxixe ira awakula mazu abure, kamuhinde kadowe kanvelele ira atongiwe mmandani mwa governadore. 21Evale atwale kohodowaga, aliwa nfuka ira: <<Namafundjiha, hiyo nihiiziwa ira jowonga jenyu na jofundjiha jenyu jinafwanyeya jagali jokwakwanela. Eto nihiiziwa ira nyo kamunatonga ira atu kaziveliwege. Mbwenye munafundjiha ndila ya Mulugu mwa ibaribari. 22Hiyo nnafuna nufukeni ira muniwandele. Kodi mwa malamulo ehu inorumelihiwa nimpagalrigi misoko Sezare? Owu hehi kanimpagalrigi?>> 23Yesu mbwenye ohoiziwa ungongomwa wewa, evale ohawakulaga eraga: 24<<Kazanani uno kobiri imohi ya parata ira miyo dione.>> Evale aliwa kagazilena, Yesu ohafukaga, liye ira: <<Kodi nzina na kove inafwanyeya vakobirini va jeji jaani?>> Evale aliwa kohorumelaga ira: <<Ja Sezare.>> 25Evale Yesu ohawandela eraga: <<Bahi, ja Sezare, munvahege Sezare. Ja Mulugu, munvahege Mulugu.>> 26Evale aliwa tchawandile onavo mwasa ofuna muhindana Yesu vamentoni va atu. Na mwasa wenne, kohomiyalaga, aliwa roma tikinaga zela makalelo Yesu awakunle liye.
ASadusewu kohonfuka Yesu zela venya mokwani
Matewuji 22:23-33; Markuji 12:18-27
27Muwari mwa aSadusewu#20:27 ASadusewu: Muwari mwa aJudewu, kohokalawo atu kafwanyeya kagali aSadusewu. ASadusewu vamohi na aFarizewu kafwanyeya kagali andimuwa oasogolrelra aJudewu zela ja Mulugu. ASadusewu eto tcharumela ira mutu akwa, unovenya mokwani. Eto tcharumela ira angelro kohokalawo. (Joira ja Anamarumiwa 23:8) anno anawonga ira: <<Mutu kanavenya mokwani>>, kohokalamo amohiwa kadowile wa Yesu, 28aliwa nfuka keraga: <<Namafundjiha, Mozeji ohonilrembela nlamulo noira: <Akala mulombwana mmohi akwa, amuhiya muhiyana ahanambalena ahima, mbalaye adowe amutele muhiyanole ira kambale mwana akale mwana wa mbalaye ukwile ule.>#20:28 mbalaye adowe amutele muhiyanole ira kambale mwana: Zela nlamulo ira mulombwana akwa ahanambale mwana na muhiyanaye, mbalaye ahambe nyumba, mazwala anafwanyeya Detoronomiyo 25:5-10. 29So mbwenye iireyile tchoira kohokalawo alombwana atanu na ambinli kabaliwe ingulu imohive. Mulukuluwa ohomutela muhiyana eto liye kwa ahambanlena mwana. 30Mbalaye wanembinli ohomutela makwele ule, liye kwa ahambanlena mwana. 31Eto waneraru ohomutela, na liyene liye kwa ahambanlena mwana. Mwa enne yohoireya yengo imohive na atene anne atanu na ambinli, atene aliwa kwaga kahambanlena mwana. 32Noira enne, eto muhiyanole vahanle liye, ohokwa. 33Nnga iireyile atu eno, atu atene kakwile kaza kavenyaga, mwa alombwana atene anne kamutenle, muhiyanole mamunaye unafuna akale ani, agali atenene kohomutela?!>>
34Evale Yesu ohawakula eraga: <<Atu a tempu ili hiyo ila, ahiyana na alombwana anotelana. 35Mbwenye atu anno anafuna za kala ofwanela venya ira kakalewo ilambo ya sogolro, aliwa kiza katelana. 36Mwasiwa kiza kakwa akoka, tchoira anaza kalinganege na angelro. Eto aliwa anaza kakale ana Mulugu mwasiwa tempu yenno inakala aliwa kagavenyile mokwani. 37Zela muselu oira atu okwa anoza kavenye mokwani, Mozeji na liyene ohooniheda ibaribari yenno muwari mwa mazu alrembile liye zela tempu yazile Mulugu muwari mwa nikupu nohinda. [Abarahamu na Izaki na Jako kagakwile wanle], Mozeji oholremba mazu omuitana Nabwiya na nzina na Mulugu wa Abarahamu, Mulugu wa Izaki, na Mulugu wa Jako.#20:37 Mozeji oholremba mazu omuitana Nabwiya na nzina na Mulugu wa Abarahamu: Mozeji kalrembile ira: <<Mulugu ali Mulugu wa Abarahamu.>> Mbwenye Mozeji alrembile ira: <<Mulugu gu Mulugu wa Abarahamu.>> Ku wonga Abarahamu ukalawove. 38Ku wonga Mulugu kahi Mulugu wa aliba kwa, mbwenye gu Mulugu wa aliba kalawo. Tchoira masiki atu kakwe, zela vamentoni va Mulugu, atene kohokalawove.>> 39Evale anamafundjiha malamulo amohiwa kohowongaga, aliwa ira: <<Namafundjiha, muhuwakula pama.>> 40Mwa enne kalivo awandile nfuka Yesu yengo imohiwa.
Yesu ohafuka andimuwa zela Namatikeliwa
Matewuji 22:41-46; Markuji 12:35-37
41Noira eno, Yesu ohafukaga, liye ira: <<Kodi anawongela nni ira Namatikeliwa gu mwana Davi? 42Tchoira mwinnyiwene Davi ohowonga muwari mwa Salmu, liye ira:
<Nabwiya ohowonga na Nabwiya waga, liye ira: <<Ugarati muwononi waga odjana 43ante difiyede agondjiha amwidanawo ira kakale nnga yengo yonyingalihavo manyalo awo.>>>#Salmu 110:1
44Akala Davi amuira Namatikeliwa: <Nabwiya waga>, nnga unawande avi tempu imohive kala mwanaye?>>
Yesu ohagwinaha mulandu anamafundjiha malamulo
45Evale atu atene kavuruwanaga, Yesu ohawandelaga anamamuharaye, liye ira: 46<<Polre polre na anamafundjiha malamulo! Tchoira aliwa anoziveliwetcha wara bata dolapa. Anoziveliwetcha londjeliwa kawendaga murampani. Eto kafiya nyumba dofundjamo Mazu, anaziveliwetcha garati mipando da sogolro. Eto kadowa vapwandoni anaziveliwetcha garati sogolro wewo uli mipando da undimuwa. 47Aliwa anaawaka amakwele a ahiyana nyumba diwa eto aliwa anolapiha malobelo ewa ira kaoniwege na atu. Na mwasa wa ejo anoza katongiwe na makalelo abure ohokala a masika.>>
موجودہ انتخاب:
Lukaji 20: iLolo
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2018 Visão Integral