John 7
7
Aḵ Jesus Ya Da Sunudna
1Nagangput ḵad sadi, ummoy aḵ Jesus atta nampaliḵwose ili'tte probinsiya'd Galilee. Adinapun pione umoy atte probinsiya'd Judea te singsington da papangat da Judyu inondae angongat ḵan siya.
2Madam-an ḵad Gayagayan da Judyu we ngannonda Sigay,#7:2 Sa annae Gayagayae ngannonda Sigay, sindumingguwane gangganason da Judyu. Losan da Judyu umoy angwa'ḵ sigay aḵ umidunganda ta umoyda umiyan. Ḵad sana angiḵagasmoḵanda'tte nanadtaddaḻanan da danaḵḵoḻda si bumbummaaw atte naḻpuwanda'd Egypt. Leviticus 23:33-36, 39-43; Deuteronomy 16:13-16. 3ḵanan da sunud Jesus we laḻaḵi ḵan siya, “Tenam sina ya inḵa'tte probinsiya'd Judea ta ilan da disipulum da nakaskasdaawe ḵoom! 4Ḵad nu ḵoom da sana, ilan da losane tagu si lubung ta igammuwonda. Te naippun tagu'ḵ itataḻuna ḵoona nu pionae ipaigammu ḵinatataguna.” 5Imbagan da laḻaḵi ye sunud Jesus ḵaḵna te taḵon ay da sunudna, adidapun amati ḵan siya.
6Ḵanan Jesus ḵan dida, “Daampun dumatong timpuḵe angituttuwa si planun Apudyus. Yaḵon ḵan diḵayu, baḻangnae timpu we maḵwa ḵoonyu da pionyu. 7Te ippun lasun da tagu we adipun namati ye sumasanga ḵan diḵayu yaḵon sasangngaanda saḵon te panoḵnoḵaḵe lawweng da ḵoḵoḵḵonda. 8Inḵayu maḵagayagaya. Umadiḵ umoy te daampun dumatong ustu we timpuḵe angituttuwa si planun Apudyus.” 9Imbagana sana woḵ inninggaw atte probinsiya'd Galilee.
Sa Ummayan Jesus Atte Gayagaya
10Yaḵon ḵesan ḵad da sunud Jesus we ummoy naḵagayagaya'd Jerusalem atte Gayagayan da Judyu we ngannonda Sigay, ummoy os aḵ Jesus yaḵon adipun nampappaila. 11Nangwa ḵad da papangat da Judyu, singsingtonda'tte gayagayae ḵananda, “Dimman aḵ Jesus?” 12Da nandatdatonge tagu'tte gayagaya, siya uguugudonda mipanggob ḵan Jesus. Ḵanan da udum, “Ambaḻu ugalin Jesus.” Yaḵon ḵanan os da udum, “Lawwelawweng te uḻ-uḻnugana da tagu.” 13Yaḵon adidapun indangsoḻe angug-uggud si mipanggob ḵan siya te maḵimutda'tta papangat da Judyu.
14Batug ḵad di angginawa gayagaya, ummoy aḵ Jesus atte paway ni templo woḵ nantuttudu. 15Pun nataag da papangat da Judyu woḵ ḵananda, “Naippun nangatu'ḵ adaḻ ni annae tagu. Dinu nangaḻ-ana si laingna?”
16Sinongbatan Jesus dida woḵ ḵanana, “Daḵampun aḵ sa somsomoḵḵu maḻpuwan ni ituttuduḵ yaḵon maḻpu ḵan Apudyus we nangibuun ḵan saḵon. 17Ngaimane pionae angwa'tta pinion Apudyus, igammuwona nu maḻpu ḵan Apudyus da tuttuduḵ baḵon nu maḻpu si mismu we ḵaḻabbongaḵ. 18Sa tagu we antuttudu we maḻpu si somsomoḵna, siya singtona midayawana. Yaḵon sa tagu we siya singtona dayaw ni nangibuun ḵan siya, pasige ustu ya tuttuwa da ibagana. 19Daḵampun ḵamman ḵan Moses nangitod ḵan diḵayu si lintog? Yaḵon naippun ossaan ḵan diḵayu'ḵ nanuttuwa si sanate lintog te nu tinuttuwayu, adiyupun oḵyan singsington inonyu we angongat ḵan saḵon?”
20Ḵanan da tagu, “Naaḻananḵa! Ngai lawa maḻyad angongat ḵan siḵa?”
21Ḵanan Jesus, “Inninggaw ossaane ḵingwaḵe nakaskasdaaw si umillongan si ḵinaanḵu saḵit ni tagu woḵ nataag ḵayu. 22Innatod Moses lintoge inawatna'tta danaḵḵoḻnae ḵasapuḻane sogyatanyu abengyu we laḻaḵi si ḵumawaḻu we aḻgaw. Pun nu niyaspuḻ ḵumawaḻu we aḻgaw ni abeng atte umillongan, isunae sogyatanyu.#7:22 Sa sogyat siya sinyal ni tuḻage ḵingwan Apudyus ḵan Abraham ya da ganaḵna. Losane laḻaḵi ye abeng, masogyatan nu ḵumawaḻu we aḻgawna. Genesis 17:9-14, 21:4; Leviticus 12:3. 23Pun nu sogyatanyu'tte umillongan ta mituttuwa lintog Moses, ngaipa ḵayu sumanga si ḵinaanḵu saḵit ni tagu si umillongan? 24Adi ḵayu anḵuwise mibatay si ḵatollongan yaḵon anḵuwis ḵayu si ustu we anḵuḵuwis.”
Sa Maḻpuwan Ni Kristu
25Pun ḵanan da udume iJerusalem, “Daḵampun ḵamman atte annae tagu pion da papangat taḵu gongaton? 26Ilanyu ḵad, annate maḵaug-uggude maḻamaḻang atta tagu ḵad andi ye umman da papangat taḵu giginnoḵ. Inigammuda ḵammane tuttuwae siya Kristu? 27Yaḵon igammu taḵu naḻpuwan ni annae tagu. Te nu umali Kristu naippun angigammu si maḻpuwana.”
28Pun nantuttudu ḵad aḵ Jesus si paway ni templo, indangsoḻnae gumminga woḵ ḵanana, “Igammuyu pagay saḵon ya igammuyu naḻpuwaḵ? Daḵampun aḵ ummaliyaḵ gapu si ḵuwaḵe ḵasomsomḵan. Yaḵon sa tuttuwae nangibuun ḵan saḵon, adiyupun igammu. 29Saḵon ḵad, igammuḵ te siya naḻpuwaḵ ya siya nangibuun ḵan saḵon.”
30Imbagan ḵad Jesus sadi, pinadas da papangat doḵmaan yaḵon adimpun Apudyus iyunud te daampun yan dumatong mituttuwaan ni planuna ḵan siya. 31Yaḵon adu da namati ḵan siya woḵ ḵananda, “Sa annae tagu, tuttuwae adu da nakaskasdaawe sinyale ḵingwanae isun ni namnamaon taḵu we ḵoon Kristu nu umali sina.”
Sa Namadasanda Anoḵmaan Ḵan Jesus
32Dingngoḻ ḵad da Pharisee ye sin-aayumimit da amode tagu mipanggob ḵan Jesus, nangibuun da papangat da papadi ya da Pharisee atta guwaḻdan ni templo ta umoyda doḵmaan aḵ Jesus. 33Ḵanan Jesus ḵan dida, “Sin-aḵitan inggawaḵ ḵan diḵayu ya mipauliyaḵ atte nangibuun ḵan saḵon. 34Ḵad asiyu saḵon singsington yaḵon adiḵayupun maḵaodas ḵan saḵon. Adiḵayupun maḵaali'tte ayaḵ.”
35Ḵanan da Judyu we nan-asiimus, “Dinu ayanae aditaḵupun maḵaodas ḵan siya? Umoy ḵamman nin atta adayu we ilin da Gentil we igaw da naas-asipaḻaḵe Judyu ya antuttudu'tta Gentil? 36Ngai piona ḵanane, ‘Singsingtonyu saḵon yaḵon adiḵayupun maḵaodas ḵan saḵon ya adiḵayupun maḵaali'tte ayaḵ?’ ”
Sa Bubune Adipun Mattuḵ
37Sa anungus ḵan ḵapatogane aḻgaw ni Gayagayan da Judyu we ngannonda Sigay, summiḵad aḵ Jesus woḵ ḵananae nangiyipḵaw, “Ngaimane mauwaw, umali ḵan saḵon ta uminum. 38Ngaimane amati ḵan saḵon, maitttan si awade nibaga'tte nigili si Ugud Apudyus we ḵanana, ‘Sa danume angitod si biyage isun di bubune bumubuse maḻpu'tte pusuna ya adipun mattuḵan.’ ”#7:38 Isaiah 58:11. 39Siya inugud Jesus mipanggob si Ispiritu Santu we awaton da amati ḵan siya. Yaḵon daampun maatod ḵan dida te daampun mipauli'ḵ Jesus ta midayaw ad langit.
40Dingngoḻ ḵad da tagu inugudna, ḵanan da udum, “Siya tuttuwae inuuwway taḵu we profeta.”
41Ḵanan da udum, “Siya Kristu we imbuun Apudyus.” Yaḵon ḵanan os da udum, “Naid! Sa Kristu, tuttuwae daḵampun aḵ maḻpu'tte probinsiya'd Galilee. 42Te nigili si Ugud Apudyus we maḻpu Kristu atta ganaḵ Ari David. Ḵad miyanaḵ ad Bethlehem we ilin Ari David atte awe.”#7:42 2 Samuel 7:12-13; Micah 5:2. 43Pune sadi, nanggogwa da tagu mipanggob ḵan siya. 44Ḵad pion da udume doḵmaan yaḵon adimpun Apudyus iyunud.
Sa Adimpun Da Papangat Da Judyu Namatiyan
45Pun nipauli da guwaḻdan ni templo'tta papangat da papadi ya da Pharisee ye da nangibuun ḵan didae anoḵma ḵan Jesus. Ḵananda'tta guwaḻda, “Ngaipayu adi dinoḵmaan ya indatongyu sina?”
46Ḵanan da guwaḻda, “Adinipun te naippun paat miyisu'tte an-uugudnae ambaḻubaḻu!”
47Ḵanan da Pharisee ye summongbat, “Na! Naallelaw ḵayu bos atta imbagana? 48Awad ḵad ain osa'tta papangat baḵon nu ossaan ḵan diḵani ye Pharisee aḵ namati ḵan siya? 49Da tagu we namati ḵan siya, naippun igammuda si lintog Moses. Pun aaddi ye dusaon Apudyus dida.”
50Inninggaw sidi osa'tta Pharisee ye nangngadan aḵ Nicodemus. Ummoy si awe ḵan Jesus woḵ naḵaug-uggud ḵan siya.#7:50 Atte John 3:1-21 ummoy aḵ Nicodemus naḵaug-uggud ḵan Jesus atte labi. Ḵanana'tta buḻunna, 51“Sa lintog taḵu, adipun maḵwae madusa tagu nu adi taḵu dongngon ḵan igammuwon nu naḵabasuḻ baḵon nu adipun.”
52Ḵanandae summongbat ḵan siya, “Isum nin naḻpu'tte probinsiya'd Galilee. Singtom si Ugud Apudyus woḵ igammuwome naippun profeta'ḵ naḻpu'tte probinsiya'd Galilee.” 53Pun ummoyonda.
موجودہ انتخاب:
John 7: kml
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2019 Translators Association of the Philippines (TAP), All rights reserved.