Matyò 6
6
Ezaʼlê kûmə̀ ètsâmtè əghɨ̀zè
1Ghàyn e tɔ̂ʼnə̀! Sə̂ nə̂ va ghɛ Fezhə̀ ghaynghe chûŋə̀ kè nə ghɨ fe. Ə ghàyn nə̀ ghɛ nə ghɨ ghə fe, ə ghàyn tə tàʼa kyiə emâʼte sê Pɨ̀a vâynvè ekwùtwəyn.
2“E za nyi nə ə ò fo fɨake sê wùə vɛ ə è kyiŋə, kə ò ghaŋsə̂ èwiyn, kèpî kə ghɨ e kaŋkaŋə nəghe ə sendɛ sə Fezhə̀sè è cho tefàfghè nə̀ nə ghɨ ghə fe ghənə. M tsâ sê ghàyn səmɔʼ nə ghɨ nə ghɨ̂yn ə kyi mɨ̂sè mâʼte ə ghənəè. 3Ə ò fo fɨake sê wùə vɛ è kyiŋə, kə ò nəyn nə wùə vɛ ə è nyì paʼsê pî əghò etipì fe. 4Zɨnə mə nə̀ nə̂ ə wùə vîvè tàʼa ke afɨa kɛ ò fo sê veyn. Zhə̀fè pɨ̀a vâyn vɛ ə è fe nâʼà pî ghè andə̀te nə̂ maʼte ghô.”
Ezaʼlê kûmə̀ ètsə̂m
(Lûk 11.2-4)
5Ə ghàyn piə tsə̂mə̀, kə ghàyn ə tsə̂mə̀ kə ghɨ ghɛ ə kaŋkaŋə nə̂. Ghənə kɔ̂ŋə̀ sə̂ ndwìə tsə̀mə̀ ə sendɛ sə atsɨ̀yntese tsəməse è kɨsè echo fàfə̀, kə nâʼà pîndè fe ghənə. M tsâ sê ghàyn səmɔʼ nə kyì əghɨ̀ ghɨ̂yn ə kàynè kyî maʼte ə ghənə̂zè ekɨ̂m. 6Ə ò nyì se tsə̀m, ndù ə ndɛ fètəyn, kyɨ̀ŋ pâʼà ndɛke, ə tsə̂mə̀ sê pɨ̀a ve vɛ ə fe va vəyn. Ə pɨ̀a ve vɛ È zɨə ghɛ ghɛ ò tsə̀mə̀ andə̀te, tə mâʼtè gho.
7Ə ghàyn tsə̂mə̀, kə ghàyn ə piə tsɛsə ghɛghe se tsɨ̀ mə ghe kiva tɔfe, kə ghɨ ghɛ ə keva Zhə̀fè tsə̀mə̀. Ghənə zàŋsə̀ kwâʼtə̀ nə Zhə̀fè nə̀ zɨə ghənə kûmə̀ kə ghənə tsə̂mə̀ tyafsə̀. 8Kə ghàyn ə nyi kə ghənə kûmə̀ nə Zhə̀fè Pɨ̀a vâyn nyîə kâynè ke àfɨa kɛ ə ghàyn kyiŋə tsɔ̀fə ə ghàyn pfɨf. 9Ə̀ vɨnə nyi endom vɛ kə ghàyn ə tsə̂mə̀ ətəyn:
Zhə̀fè, Pɨ̀a vâs vɛ ə è nyi ekwùtwəyn:
Ə kɔʼsêzè ə nyi èzə zɛze,
10ə tyaʼ kɛke fɔ̀ynkè pəyn nji eluʼ,
ə ghɨ ghɛ ə ghe nyi ə chi ə nə̂ ə̀ghɛ ghɛ ə Ò kɔ̀ŋə̀ kè eghɨ kə nə̂ ekwùtwəyn.
11Fo sê ghàs ndâyn fɨazhiə vɛ ghàs kyiŋə.
12Lɛ̀se fo pi sɛ ghàs nyi mə nə̀yn,
kèpi eghɨ kə ghàs lɛ̂sə̀ fo ghɨ ghɛ nə̂yn pi sê ghàs.
13Kə ò zâ nə ghàs pfɨə nji emɔ̀m
pîza kɨ̀ŋte ghàs sê satàyn. #6.13 Ŋwàʼlè sə shi shîse ə paʼsê nə Ò kyi efɔ̂yn è tyaʼke è pɔmsêzè sə te shîŋə̀ tèkɨ̂m. Ə zə nyi ke zamə.
14Ə ghàyn lɛ̂sə̀ fo ghɛ ə pi ghɛ ə ghɨ nə̂yn sê ghàyn, Zhə̀fè, ə Pɨ̀a vâyn vɛ è nyi ekwùtwəyn pɔŋ lɛ̂sè fo sèpi saynse. 15Pîza ə ghàyn tàʼa lɛ̀sə fo əghɨ mɔ̀ʼɔ, Zhə̀fè, ə Pɨ̀a vâyn tə tàʼa pɔŋɔ lɛ̂sə fo saynse.
Ezaʼlê kûmə̀ èpam echoze
16“Ə̂ ghàyn pamə choze, kə ghàyn ə kosə̂ kyâʼà kə ghɨə kaŋkaŋə nə̂. Ghənə piə pamə ècho, e kosə̂ kyâʼà kə ghɨ fe nə ghənə pamə ècho. M pîə se ghàyn səmɔʼ nə ghənə kàynè kyî mâʼtè ə ghənə̂zè. 17Ə̂ ghàyn pamə choze, ghâ shûə tèkyâʼ taynte, ə shɔ̀ʼè ètu vâynvè. 18Ghàyn nəyn zɨnə mə kə ghɨghe ə keva nə ghàyn pamə ècho, ə̀ tsɛ̂ kə va Zhə̀fè pɨ̀a vâyn vɛ ə fe va vəyn ke nə ghàyn pamə ècho. È fe ə̀ghɛ ghɛ ə ghe nyi andə̀te, mə nyi Vəyn vɛ ə È tə mâʼtə̀ ghàyn.”
Ezaʼlê eghaʼ zɛ e nyi ekwùtwəyn
(Lûk 12.33-34)
19“Kə ghàyn ə ndə̂mə̀ èghaʼ zayn ze fa chi, elùʼ vɛ ə shɔʼshɔʼe, è chaʼè kaʼa ve pofse, mə ghɨ echɔŋə kaʼa kəm nji kepî ə ndɛ ə chɔŋ vəynve. 20Ghàyn pɨl pɨaʼtê ndəm èghaʼ zayn ze ekwùtwəyn, eluʼ mə shɔʼshɔʼe, è chaʼè vâyn kàʼa ve pofse, ghɨ echɔŋəghe e vayn kàʼa kəm nji ə ndɛ se chɔŋ ə vəynve. 21Kûmə̀ nə luʼ vɛ ghaʼ zɛze nyi ətəyn, ə̀ nyì kepî fu kə təm ghɛghe nyi.”
Epayn e wìynze
(Lûk 11.34-36)
22“Shiə wûə nyi lâm sè wiynə vəynve. Ə shi ghɛ nyi achûŋ, ə wiyn vɛve ekɨ̂m ə nyi mə ə̀ lwiyn kê èpayn; 23Pîza, mə shi ghɛghe va achûŋ, ə wiyn ve və nyi əfètə̂ àlɨm. Ə fɨa kɛ ə ke nyi se chwìtè epayn se ghò pɨl nyi àfɨa kɛ ə ke ndə̂mə̀ ghò alɨm, ə nyi nə lɨm kɛ ə ò nə̀ nə̂ ə ò nyi əfètə̂ ətəyn nə̀ nə kə fɨ̂mə̀ àfɨa!”
Ezaʼlê nə wùə vayn kàʼa è kɔʼse Zhə̀fè è kɨsè fɨave
(Lûk 16.13; 12.22-31)
24“Ò vayn kaʼa ô nyi àkɔ̂s sê ghɨghə pɛ̀; ò nə̀ kɔ̂ŋə̀ èmɔ̀ʼ ə ò payn və mɔʼɔ. Ò nə̀ nə̂ ə o nyi ghâyn wùə èmɔ̀ʼ ə ò tə vɛ mɔ̀ʼɔ. Ò vayn kàʼa ò nyi wùə efɨ̀aʼa sê Zhə̀fè, kɛsè nyi wùə èfɨaʼa sê kɛve.”
25“Ə̀ za nyi eghɛ zɛ m tsâyn sê ghàyn nə: kə ghàyn ə kyi èfɨmsê nə ghàyn nə̀ zhiə ghɛ̀ ə mɨ ghɛ endom sə̂ ndamə, pî kə se ndzɨs sê wiyn vɛve. Nâʼà sə kàyn, ndam zayn tsɨ̂ə tsɛ va fɨazhiə və? Wiyn vaynve kɔʼnə̂ tsɛ̂ va ndzɨse ə? 26Ghàyn naynə̂ kə nɨ̂ŋ mə: ghənə zho va fɨave, ghənə kwîə va fɨave, zûŋtə̀ va fɨazhiəve se ndə̀m etwəyn. Pîza Zhə̀fè pɨ̀a vâyn vè ekwùtwəyn e tɔ̂ʼnə̀ è ghənə! Ghàyn kɔʼnə̂ tsɛ va nɨ̂ŋmè ə̀? 27Ə̀ nyi nde ə ghàyn ə fètəyn ə è kàʼa è kwəynse tuʼm̀ ə vəyn ndam kûmə̀ nə è kyi efɨmsê ə?”
28“Kûmə̀ ghè ə ghàyn kyi fɨmsêzè kûmə̀ sèndzɨs sɛ ə ghàyn nə̀ maʼa? Ghàyn naynə̂ ke kə̂ ndwɔ̂ŋ azhìvè ndəmə: ve fɨ̂aʼà va fɛtə̂ va ndzɨse sè ngɨŋsə ghənə̂sè. 29M tsâ sê ghàyn nə, naʼapî fɔ̀yn Sòlomùyn è ghaʼa vəyn ze kɨ̂m tè màʼa va ndzɨse se tsɔ̂fə̀ zaʼâ kə sə endwɔ̀ŋ sɨ̂yn. 30Ə̂ Zhə̀fè nyi kàʼa Fe lafse tayn èwə̂yn nyî mə ve nyi ndâyn mə ezhwisəʼə ə və nyi mə nyɔ̀ʼ ewùs, ə È tə tàʼa lafsə̂ tsɛ ghàyn nyiə mə mə? Ghàyn kyi epomə̂ e tətə̂ zè.”
31“E za nyi nə kə ghàyn ə kyi èfɨmsê pîə nə, ‘Ghàs nə̀ zhiə ghɛ̀ ə? Ghàs nə̀ mɨə ghɛ ə?’ Pî nə, ‘Ghàs nə̀ maʼà ghɛ̀ ə?’ 32Ghɨ ghɛ ə ke va Zhə̀fè nyi ghɛ ə nyɨŋə epàmə̂ ə̀ghɛ nə ghɨ̂nə̀. Pîza Pɨ̀a vâyn ekwùtwəyn ke ndô nə ghàyn kyiŋə ndò fɨa nə vɨ̂yn èkɨ̂m. 33Pîza, ghàyn nayne chi ə̀ghɛ efɔ̂yn ə Fezhə̀e sə shi ə ghàyn nəyn ghɛ ghɛ ə Zhə̀fè kyiŋə nə ghàyn nəyn. Ə ghàyn nə̀yn nyiə mə, ə Zhə̀fè nə fo fɨa mɔ̀ʼɔve nâʼà ekɨ̂m se ghàyn. 34È za nyi nə kə ghàyn ə kyi è fɨmsə̂ kûmə̀ ezhwisəʼəve. Kûmə̀ nə zhwisəʼəve tə nə̂ ə və kyi zə vəyn nə tefɨmsê. Naʼapî ètuʼ èkwə̀ kyi tètsôs te tsɨəte te kwəynə kə sê tuʼ nə fɛ.”
موجودہ انتخاب:
Matyò 6: bfm
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in