Zaŋ 13
13
Ɗaf metekweɗ ana va mepen sek
1Magəra manah amta wagaa macunam ta Pak te Zuwef hay sə, Yesu a səniya pas tata ta magərda vavara nesey, a da vahaɓa a cak ta Papaŋ sə, aŋga hukw cay. Aŋga masa a wal ndah tata dapa vavara mabay, e te weleceŋ kwa kwakumakw ana aabay. 2Da yaŋ ɗaf, anjəkar bay ta haalay ka paɗ mawulak yaŋ pa rav ta Zudas Iskariyawt wut ta Simaŋw, afa a da vaɗ Yesu pa ha ta maslagəra tata hay, 3Yesu sə, a səniya, Zlav Papaŋ ka van jene hay fakwanay pa ha tata, a səniya, aŋga sə, e dek da vara Zlavay, e te veh kad vara Zlavay ana. 4Da yaŋ ɗaf ana ŋgesey, ke zleftek, ka cəkwa rəkwat mazambəla ana fa vaw tata sə, avəda, ka jawaɗ rəkwat mekele a ŋgwah. 5Ava dəɓa ana, ka gajə yam pa daaraw, ke penecen sek ta ndah masasəraka jene tata. Ke təkweɗecen sek ana, ava rəkwat masa aŋga ta jaw ŋgwah tata ava aŋga.
6A husa vara Simaŋw Piyer, Piyer ana ka gwaɗa, gege: «Bay Mazlakava, kaa ava yaŋ takaa ana, ka panawa sek aɗaw geyey?» 7Yesu ka vahan, gege: «Jə masa ya ŋgiya təlam nesey sə, ka sən ma da yaŋ ana bay heley, amaa kad fəma kusetke sə, ka ta səna ma da yaŋ ana avəda.» 8Piyer ka gwaɗa saya, gege: «Away, e ŋgə aabay! Kaa, ava yaŋ takaa, ka panawa sek aɗaw aabay!» Yesu ka gwaɗa, gege: «Daha ya ka panakaɗ aabay sə, kwa ka ta ŋgat meven ta ma takaa vereyey aabay.» 9Simaŋw Piyer ka gwaɗa, gege: «Bay Mazlakava, daha ara nesey sə, ka ta panawa sek hay babəla bay, amaa panawa ha hay va yaŋ ana fakwan may.» 10Yesu ka gwaɗa saya, gege: «Daha ndana ke pen cay sə, a wal mepen vaw tata fakwan ɓasabay say sek hay, afa akwar mapana ciyekw ciyekw cay. Akwar sə, akwar mapana, amaa akwar fakwan bay.» 11Yesu e gweɗ, akwar mapana fakwan bay sə, afa a sən nda ma ta viya pa ha ta maslagəra tata hay.
12Ava dəɓa ta masa Yesu ka ndəvda mepenecen sek cay sə, ka paɗ rəkwat tata mazambəla sə, fa vaw saya, ke veh kad pa slam tata, ka ta ndə ɗaf, gege: «Akwar ka cəna ma da yaŋ mezlər masa ya ta ŋgakwar na geyey? 13Akwa zeliyey, “Nda masasəraka nda” va “Bay Mazlakava”, akwa gweɗek ara nesey sə, mambəla ana, afa yey sə, ya ara aŋga ana. 14Yaw, daha yey sə, ya nda masasəraka nda, ya Bay Mazlakava, ya panakwaɗ sek sə, akwar may, a lada akwa pan sek fa vaw takwar. 15Ya ŋgiya ara nesey, ya ŋgə sə, ya vakwar mececeley, jə masa ya ta ŋgiya kad akwar sə, maŋgaw dapa taɓa takwar ara aŋga ana may. 16Ya gwaɗakwar, nda maŋga mezlər sə, a fəna bay ta way tata aabay. Asaya, kwa maslaŋ, a fəna nda mazlarda aabay. 17Daha akwa səniya, akwar te wesley, daha akwar ke ŋgə mezlər ava aŋga. 18Ye gweɗ ara nesey sə, kad akwar fakwan bay, ya sən ndah masa ye te peleceŋ. Amaa a lada ma masa mavinda da yaŋ yey sə, da ŋgata. Ma ana, ke gweɗ, gege: “Nda masa anda ndə ɗaf ava aŋga fa slam ana sə, ka tərata maslagəra aɗaw”. 19Ya gwaɗakwaɗ ma ana dəga təlam nesey, wagaa jeŋ ana e te ŋgey. Daha ka ŋgata cay sə, akwar ta kəsa avəda, “Yey sə, yey.” 20Ya gwaɗakwar, nda masa a kəs maslaŋ aɗaw sə, a kəs ŋgesey, yey ana. Asaya, nda masa e kəsiyey, a kəs ŋgesey, nda mezlərekiyey may.»
Zudas a və Yesu pa ha ta maslagəra tata hay
(Mat 26.20-25; Mar 14.17-21; Luk 22.21-23)
21Ava dəɓa ta masa Yesu e gweɗ ara nesey sə, yaŋ tata ka dəŋgazlata, ke gweɗ, gege: «Eve metehwe ana ya gwaɗakwar nda amta deveŋ akwar e te peɗiyey pa ha ta maslagəra aɗaw hay.» 22Ndah masasəraka jene ece njer pe ndey pe ndey dapa taɓa teceŋ, e gweɗ ara nesey sə, da yaŋ wa. 23Nda amta deveŋ ndah masasəraka jene, masa Yesu ana a waya elehey sə, aŋga zef da cak tata. 24Simaŋw Piyer ke becem ana ndey, a da nəkafa Yesu ana, «E gweɗ ara nesey sə, da yaŋ wa.» 25Nda masasəraka jene masa Yesu a waya elehey sə, ka zaŋgafa yaŋ Yesu, ka nəkafa, gege: «Bay Mazlakava, ma ta mbaha jeŋ ana ara na wa?» 26Yesu ka vahan, gege: «Ya ta tal peŋ pa lak, ya ta van kad nda ana.» Ava dəɓa ana, Yesu ka kəs peŋ, ka talaw pa lak, ka van kad Zudas Iskariyawt, wut ta Simaŋw. 27Dəga dapa masa Zudas ana, a kəs peŋ dapa ha te Yesu ana ŋgesey sə, faŋga faŋga ana, Saadan, ke sehw pa rav tata. Yesu ka gwaɗa, gege: «Jə masa ka wal maŋgiya sə, ŋgana avəda zef!» 28Kwa nda amta deveŋ ndah faŋga sə, ka sən masa Yesu e gweɗ ara nesey, mafay te mey sə, aabay. 29Ndah masasəraka jene dərziya, aca wulakiya sə, Yesu a wal mazlarda Zudas ana ke te husemek jene hay ta macunam, daha aabay, a wal e de vec jene kad maslamarga hay, afa aŋga nda matəhaza səlay teceŋ. 30Ava dəɓa ta masa Zudas ka kəsa peŋ dapa ha te Yesu ana avəda sə, ka data zef kad a vəda. Dapa ŋgesey ana, vaɗ cay.
Ma majawa waya
31Ava dəɓa ta masa Zudas ka data kad a vəda cay sə, Yesu ke gweɗ, gege: «Təlam nesey, Wut ta Nda mahahəma cay, Zlav aŋga mahahəma jaka vara vaw.» 32Zlav e te ŋguzdek mehehəm ta Wudiya jaka vara vaw, mbala e te ŋguzdek cay. 33Wude hey aɗaw, ya ta njah ava akwar gaa ɓasabay. Akwar te yehiyey, ara ye te gweɗec kad mazlakava hay te Zuwef hay: Slam masa yey te də kad pa sə, akwar ta zlafa medə pa aabay. Təlam nesey ya gwaɗakwar ara aŋga ana may.
34«Ya vakwar ma majawa waya: Mawal vaw dapa taɓa ta akwar! Ara masa ya ta walakwar, akwar may, mawal vaw dapa taɓa takwar. 35Daha akwa wal vaw dapa taɓa takwar ara nesey sə, ndana hay fakwanay ac ta səniya, akwar sə, akwar ndah masasəraka jene taaɗaw hay.»
(Mat 26.31-35; Mar 14.27-31; Luk 22.31-34)
36Simaŋw Piyer ka nəkafa Yesu, gege: «Bay Mazlakava, ke te dey ana sə, kad ma?» Yesu ka vahan, gege: «Slam masa yey te də kad pa nesey sə, ka zlafa mecəpiyey təlam na bay heley, amaa ke te cəpiyey sə, ava dəɓa ana.» 37Piyer ka gwaɗa, gege: «Bay Mazlakava, ya zlafa macəpakaa təlam na bay sə, mafay te mey? Ya maləmada ta mavə mesfeney aɗaw mafay takaa.» 38Yesu ka vahan, gege: «Ka maləmada ta mavə mesfen takaa mafay taaɗaw geyey? Ya gwaɗakaa ava metehw tehwe ana, wagaa balaŋgwaz a ta ŋgal uway sə, ke ke gweɗ ka mahkar, ke səniyey bay, ke səniyey bay.»
موجودہ انتخاب:
Zaŋ 13: CUVnt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL