Zaŋ 16
16
1Yesu ke gweɗec ndah masasəraka jene tata saya, gege: «Ya gwaɗakwar fakwanay ara nesey sə, afa akwar da gərda makəsparav bay. 2Ac ta mbasakwar avəda dapa Way hay ta macə mbahw te Zuwef hay. Pas masa nda ma ta kəɗakwar ka macəhwandaw ka ta husakata sə, a ta wulakiya, ka ŋgana kwakwas mambəla ana kad Zlavay. 3Ac te ŋgə jeŋ ana hay ara nesey sə, afa ac ka sən Papa aabay, ec ke səniyey aabay may. 4Amaa ya gwaɗakwar ara nesey sə, afa daha pas ana ka husakata, akwar da sənafa, jə masa ya ta gwaɗakwar.»
Mezlər te Mesfen Mavəna
«Ya ka gwaɗakwaɗ jeŋ ana hay dəga dapa mezlerey ana aabay sə, afa ya varakwar heley. 5Təlam nesey, ye te veh kad vara nda mezlərekiyey, amaa kwa nda amta deveŋ akwar masa e te nəkefiyey: “Ka də ma” sə, aabay. 6Amaa mawulak yaŋ ka fənakwar fa gədaŋ, afa ya ta gwaɗakwar ara nesey. 7Anjəkar, ya ka gwaɗakwar metehwe ana, daha ya ka ta data sə, mambəla ana kad akwar. Eve metehwe ana, daha ye ke də aabay sə, nda ma ta jənakwar sə, e te dek aabay. Sesəker daha ya ka ta data sə, ya ta zlərakwaɗay. 8Aŋga sə, daha ka ta dakata, e te ŋguzdecen mezlek ta ndah ta vavara da yaŋ ma te mebərey, da yaŋ meŋgə mezlər eve cəvey ana va da yaŋ matəɗ ma ta Zlavay. 9Ece zlek da yaŋ ma te mebərey sə, afa ac ka kəs ma taaɗaw pa rav aabay. 10Ece zlek da ya meŋgə mezlər eve cəvey ana sə, afa ye də kad vara Papa, akwar te weleyey ɓasabay. 11Ece zlek da ya matəɗ ma ta Zlavay sə, afa Zlav ka təɗana ma yaŋ Saadan, bay ta vavara na cay. 12Jene hay gaa masa ya wal magwaɗakwar, amaa akwa zlafa maɓəsiya təlam na bay. 13Daha Mesfen te metehwe ana ka ta husakata cay sə, a ta padakwaɗ ma kad pe metehwe ana fakwanay, afa e te gweɗek dapa gədaŋ ta bay tata bay, amaa a ta gwaɗakwaɗ sə, jene hay masa aŋga ta cəna va magwaɗakwaɗ jene hay fakwanay masa ec te ŋgə maayaŋ kad fəma. 14A ta ŋguzdakwaɗ mehehəm taaɗaw, afa a ta kəs jene deveŋ jene hay masa ec de vereyey, a ta gwaɗakwaɗay. 15Jene hay fakwan masa Papa aŋga ava aŋga sə, yey may, ya ava aŋga. Mafay ana, ya ka gwaɗakwar: “A ta ŋguzdakwaɗ jene deveŋ jene hay masa aŋga te kəsek de vereyey.”»
Marga sə, a ta tərata ke mewesley
16Yesu ke gweɗec ndah masasəraka jene tata saya, gege: «Asaya, manjah kusetke fana akwar te weleyey ɓasabay. Ava dəɓa ana manjah kusetke, akwar te weleyey saya [afa ye də kad vara Papa.»] 17Ara nesey, ndah masasəraka jene tata dərziya ec ke gweɗ dapa taɓa tec, gege: «A gwaɗandakwa: “Manjah kusetke fana akwar te weleyey ɓasabay”. Ava dəɓa ana manjah kusetke, akwar te weleyey saya. Ke gweɗ saya: “Ye də kad vara Papa”. Ma ana hay nesey sə, aca wal megweɗ gwagumaw?» 18Ece gweɗ saya, gege: «“Manjah kusetke” sə, a wal megweɗ gwagumaw? Ma ana na anda cənakwaɗ aabay.»
19Yesu ka səna mawulak yaŋ ta ndah masasəraka jene tata masa aca wal ma ta nəkafa sə, avəda. Ara nesey, gege: «Ma aɗaw masa e gweɗ, gege: “Manjah kusetke fana, akwar te weleyey ɓasabay. Ava dəɓa ana kusetke, akwar te weleyey saya”, akwa nək ma fa vaw takwar sə, da yaŋ ma ana na geyey? 20Ya gwaɗakwar, akwar ta kuɗa, akwar te hwehurey, ta ndah ta vavara sə, ec te wesley. Akwar ta njah dapa matakwa, amaa matakwa takwar ana, a ta tərata ke mewesley. 21Mawulakaw da yaŋ ŋgwaz ava hwaɗ, dapa masa e səfey sə, aŋga dapa matakwa. Amaa daha ka hayata cay sə, a sənafa matakwa tata hay sabay, e te wesl macəkuma bay mafay ta masa ka ŋgat wat waya kad pa vavara. 22Ara aŋga ana, akwar may, təlam nesey, akwar dapa matakwa, amaa maayaŋ kad fəma sə, ya ta walakwar saya. Pas ana ŋgesey, akwar te wesley, mewesley ana ŋgesey, kwa ndana ma ta zlafa makəsakwaɗ aabay. 23Daha pas ana ka husakata cay sə, akwar te nəkefiyey jene ɓasabay. Ya gwaɗakwar, daha akwa nək jene kwa wula wula vara Papa eve mezeley aɗaw sə, a ta vakwar jeŋ ana. 24Dəga dapa mezlerey ana kasl pəsna, akwar ka nək jene eve mezeley aɗaw aabay. Manəkaw, akwar ta ŋgatiya, ara nesey meweslə takwar da nəhata.»
Bigula te Yesu da yaŋ ndah ta vavara
25Yesu ke gweɗec ndah masasəraka jene tata, gege: «Ya gwaɗakwaɗ jeŋ ana hay fakwan ara nesey sə, ava ma maɗəva. Pas ana e te dekey masa ya ta gwaɗakwar ava ma maɗəva ɓasabay, amaa ya ta gwaɗakwar ava ma mapana da yaŋ Papa. 26Daha pas ana ka husakata cay sə, akwar ta nək jene da vara Papa eve mezeley aɗaw. Jene amta masa ya gwaɗakwar aabay sə, masa ya ta cana mbahw kad Papa mafay takwar. 27Aŋga, Papa ava yaŋ tata ana a walakwar, afa akwar ke weliyey. Asaya, akwar ka kəsaw, yey sə, ye dek dapa Zlavay. 28Ye dek dapa Papa kad pa vavara. Təlam nesey, ya ta gərda vavara ana, ye te veh kad vara Papa ana.» 29Ndah masasəraka jene tata ac ka gwaɗa, gege: «Wala təlam nesey, ka gwaɗandaw ava ma masa mapana ana, bəna ava ma maɗəva sə, ɓasabay. 30Təlam nesey, anda səniya kaa sə, ka sən jene hay fakwanay. Ka wal masa ndana da nəkafakaa ma sə, aabay. Mafay ana, andə ka kəsaw pa rav taciya, ke dek sə, dapa Zlavay.» 31Yesu ke vehecen, gege: «Təlam nesey sə, akwar ka kəs ma aɗaw pa rav takwar la geyey? 32Yaw, pas ana e dekey, kwa təlam nesey ka husakata cay, masa akwar fakwanay akwar ta vəna yaŋ amta amta, kwa waawa a ta vahaɓa kad a wunam tata, akwar te gərdeyey amta. Amaa ya amta bay, Papa aŋga ava yey. 33Ya gwaɗakwar fakwanay ara nesey sə, afa akwar da ŋgat metehey dapa manjah macama eve yey. Ac ta ŋgadakwar marga dapa vavara nesey, amaa matəhaza rav. Yey sə, ya ka ŋgə bigula da yaŋ ndah ta vavara na cay.»
موجودہ انتخاب:
Zaŋ 16: CUVnt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL