Lukas 16
16
Nda maŋga mezlər eve wewer
1Yesu ke gweɗec ndah masasəraka jene tata, gege: «Nda eve zleley ɓa aŋga ava nda maŋga mezlər eve zleley tata ana ɓa. Ndana mekele ke dekey, ka gwaɗa, gege: “Nda maŋga mezlər eve zleley takaa sə, aŋga dapa makwakwacakaɗ zleley takaa hay”. 2Bay ta way tata sə, ka zala nda maŋga mezlər eve zleley tata sə, ka gwaɗa, gege: “Ya cəna ece gweɗ da yaŋ kaa sə, gwagumaw? Ŋguzdawa mezlər takaa hay masa ka ta ŋgiya eve zleley aɗaw, afa təlam nesey sə, ka ta njah ka nda maŋga mezlər eve zleley aɗaw ɓasabay”. 3Nda maŋga mezlər eve zleley sə, ka wulakaw dapa yaŋ tata, gege: “Ya da ŋgana gwagumaw? Bay ta way aɗaw e te mbesiyey avəda dapa mezlər tata. Ke həvey gədaŋ aɗaw aabay. Ke rəkey, hwar e kəɗiyey. 4Yaw! Təlam nesey, ya ka səna jə masa ya ta ŋgiya cay. Zuwan ya təhazaɓa guula ava ndana hay. Ara nesey, pas masa aŋga te mbesiyey dapa mezlər tata sə, guula aɗaw ana hay, ec te kəsiyey kad hwaɗ ta way tec hay”. 5Ava dəɓa ta mawulak yaŋ tata ana ara nesey sə, ke zelekec ndah makəsa duwa ta bay ta way tata amta amta fakwanay. Ka gwaɗa nda macaaca ana, gege: “Duwa ta bay ta way aɗaw da varakaa sə, ecuwey?” 6Nda ana ka vahan, gege: “Gula ta mal temere”. Ka gwaɗa, gege: “Aha, ɗelewer ta duwa takaa, njah manjah ke zef, vindaɗ gula kwakwar zlam”. 7Ka nəkafa nda leŋgeɗ saya, gege: “Duwa ta bay ta way aɗaw da varakaa sə, ecuwey?” Nda ana ka vahan, gege: “Bəley manəha dapa bakatar temere”. Nda maŋga mezlər eve zleley ta ndana sə, ka gwaɗa, gege: “Kəs ɗelewer ta duwa takaa ke zef, vindaɗ kwakwar cahkar”. 8Kwa nda maŋga mezlər eve zleley ana ka ŋgə mezlər eve cəvey ana aabay sə, nda eve zleley sə, a hahəmiya, afa ke ŋgə mezlər eve wewer. Eve metehwe ana, ndah ta vavara nesey aca ŋgə mezlər eve wewer dapa taɓa teceŋ ka fəna ndah ta Zlavay.»
Səlay mafəca nda va zleley metehwe ana
9Yesu ke gweɗ saya, gege: «Ya gwaɗakwar, matəhazaɓa guula eve zleley ta vavara nesey. Ara nesey, pas masa zleley takwar ana ka ndəvata sə, guulah takwar ana, ac ta kəsakwar kad pa slam ta manjah katar. 10Nda maŋga mezlər ava jə mekusetke ana masa ac ta vana eve cəvey ana sə, e te ŋgə mezlər ava jə mazlakava masa ac ta vana sə, eve cəvey ana may. Nda maŋga mezlər ava balhwaɗay ava jə mekusetke ana sə, e te ŋgə mezlər ava balhwaɗay ava jə mazlakava ana may. 11Yaw, daha akwa zlafa meŋgə mezlər eve zleley masa ac ta vakwaɗ fana dapa vavara na eve cəvey ana bay sə, naa ma ta vakwaɗ zleley metehwe ana masa akwar te ŋgə mezlər ava aŋga da baymaləvaŋ sə, wa? 12Daha akwa zlafa meŋgə mezlər eve cəvey ana eve zleley ta ndana bay sə, naa ma ta vakwaɗ zleley takwar masa akwar te ŋgə bay da yaŋ ana da baymaləvaŋ sə, wa?»
(Mat 6.24)
13«Ndana mazlafa maŋgana mezlər kad bay hay ecew fa slam ana aabay, afa a ta wal bay ŋgeɗey, a ta kazlda bay leŋgeɗey. Daha aabay, a nahan yaŋ kad bay leŋgeɗey, amaa kad bay leŋgeɗ sə, a piya ara jene taambəla. Akwa zlafa maŋgana mezlər kad Zlavay va səlay fa slam ana bay.»
Ma majawa va Wunam ta bay
14Masa Farisa hay ac ta cəna ma ana hay nesey, ac ka sasarafa Yesu, afa aca wal səlay elehey. 15Yesu gege: «Akwa ŋgə jene hay mambəla ana fa yam te ndey ta ndana hay, afa ece re gweɗ, akwar sə, ndah mambəla ana hay. Amaa Zlavay sə, a sən mawulak yaŋ takwar. Jene masa ndana hay aca wala mazlakava ana fa yam te ndey teceŋ sə, ŋgesey, jene taambəla fa yam te ndey ta Zlavay.»
(Mat 11.12-13)
16«Ma Majawa va ndah mehwedek ma, ece dey kasl fa Zaŋ te dekey. E zler dapa ŋgesey ana, Labara mambəla ana ta Wunam ta bay ta Zlavay aŋga mabəzada. Ara nesey, kwa waawa a ŋgə gədaŋ te mesehwey kad pa.
(Mat 5.18)
17Yaw, baymaləvaŋ va vavara aca ra ndəvey sə, gədaŋ dapa, amaa gədaŋ dapa mafəna ana saya kad jə mekusetke ana mavinda dapa ma majawa ta Muyiz nesey ke te vevəsey.»
(Mat 5.32; 19.9; Mar 10.11-12)
18«Yaw, kwa waawa mambasa ŋgwaza da way, ke kəsek ŋgwaz mekele, ŋgesey, ka kəs vaw fa zaŋ ana. Nda makəsa barvəla sə, ŋgesey, ka ŋgə madama.»
Nda eve zleley va Lazaraws
19Ava dəɓa ana, Yesu ke kərec maɗay ɓa, gege: «Ndana ɓa, aŋga eve zleley mabay, a pə fa vaw tata sə, rəkwat hay ta səlay mambəla ana. Aŋga dapa mambivaw cəɗem cəɗem, a ndə sə, jene hay mambəla ana. 20Nda mekele ɓa saya may, aŋga maslamarga ana, mezel Lazaraws, mbəlek fa vaw njaɓa njaɓa. Aŋga manaha fəma ta way ta nda eve zleley ana. 21A wal mandə mepepəs ta ɗaf fa vara dapa slam ta mandə ɗaf ta nda ana, amaa ndana mavana cəv aabay, sesəker gəda hay ece dekey, aca njəkaɗ mbəlek fa vaw tata.»
22«Ava dəɓa ana kusetke, nda maslamarga sə, tep a məcata. Maskəla hay ec ke dekey, ac ka kəsaɗ kad a wudam a cak ta Abəraham. Nda eve zleley sə, tep a məcata may. Ndana hay ac ka pəsaha vəda. 23Nda eve zleley sə, ka cəna marga mabay dapa vavara ta ndah maməca. Ka pə ndey kad a wudam sə, a wala Abəraham manjaha dəreŋ, Lazaraws manjaha da cak tata. 24Ara nesey, ka cə lalaw, ka talana ma Abəraham, gege: “Papa Abəraham, ŋgefiyey metekweney, zlərek Lazaraws a ra talaɗ ma ta wut ta ha tata pa yam, e de dek taslawa neneŋ aɗaw, afa ya cəna marga mabay dapa kwakwaw nesey.”»
25«Amaa Abəraham ka vahan, gege: “Wat aɗaw, sənafa mambivaw takaa masa ka dapa vavara heley, ka ka ŋgat zleley mabay. Dapa ŋgesey ana, Lazaraws aŋga dapa masə marga mabay. Təlam nesey, anda təkan rav fana varandaw, amaa kaa sə, ɓas marga ana hay may. 26Asaya, dapa taɓa taciya ava akwar sə, veɗ mekweleeleŋ ana ɓa, cəv te mezleŋ aabay. Mafay ana, daha ndana hay aca wal medə fana kad varakwar sə, aca zlafa madaɗ bay. Asaya, daha ndah dərŋga aca wal medek kad varandaw fana, aca zlafa medek bay may.”»
27«Nda eve zleley sə, ka gwaɗa Abəraham saya, gege: “Saŋga ya ŋgakaa mbahw papa, zlarda Lazaraws a way ta papa. 28Malama hay zlam ɓa, zlarda kad vereceŋ e de kəteceŋ, afa ece re dek pa slam ta marga na bay”. 29Abəraham ka vahan, gege: “Malamakw ana hay sə, ɗelewer ta ma majawa ta Muyiz va ta ndah mehwedek ma hay sə, mak mekəteceŋ, aca ra cak zləmay fa ma teceŋ!”»
30«Nda ana ka gwaɗa, gege: “Away, ara na bay, Papa Abəraham. Mambəla sə, ndana te pərekek dapa maməcay, e də vereceŋ sə, ŋgesey aca ŋgwada rav teceŋ.”»
31«Amaa Abəraham ka gwaɗa, gege: “Daha ac ka cak zləmay fa ma ta Muyiz va fa ma ta ndah mehwedek ma hay aabay sə, ŋgesey, kwa ma ta nda masa e pərekek dapa maməcay sə, ac ta kəsiya aabay.”»
موجودہ انتخاب:
Lukas 16: CUVnt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL