Yaya Kopoilaan
Kopoilaan
Ngaran nopo di tulun i minonulis diti buuk nga i Yaya tanak di Jobidi om i Solumi. Kampungjo nopo nga Boitsida siri Vonuvo Golilia. Tujuan nopo disido monulis nga siri bab 20 ayat 31 do ka, “Tinulisku iti buuk supaya aparsaya kou do i Yisus nopo nga i Koristus, i pinili di Kinoringan sumiliu do Raja, om Isidono i Tanak do Kinoringan. Om kaanu kou do kovijaan sabap do aparsaya kou Disido,” ka. Irad nopo diri, obuliko mambasa do oguu ayat siti pasal do KokinoringanoJo di Yisus do Isidono Tanak do Kinoringan, om pasal do potingkuro i kaparsayaan do tulun om pasal do kovijaan do auso koovion.
Saralom nopo diti buuk do Abar do Aandai di Tinulis di Yaya, om pinotuduk do i Yisus nopo nga Tinangaran do Kinoringan do auso koovion, om “I Sinumiliu do Tulun om minijon siti daton.”#1:0 daton: ditokou Om pinatangar nogi si saralom do buuk diti do kinoponulisan nopo do Abar do Aandai diti supaya do mangangat di tulun diri kabasa do buuk diti supaya aparsaya do i Yisusno i Momimijau di pinajanji laid, om Isidono Tanak do Kinoringan. Om aparsaya nopo iolo Disido om kaanui iolo do kovijaan (20:31).
Om iri nopo i pinonimpuunan diti buuk nga monorita do i Yisus nopo nga Tinangaran do Kinoringan di auso koovion. Om koguuo nopo do bab mantad bab 1 gosob bab 12 nga ponoritano do piipiro kosunduvan di vinaal di Yisus. Om iri nopo piipiro kosunduvan di vinaal Disido nga popointalang do Isidono i Momimijau i pinajanji laid, om Isidono Tanak do Kinoringan. Pointikid-tikid di kosunduvan do vinaal Disido om kopisuputi do tinangaran di Tuhan Yisus si di tongotulun do toguu do papatalang nong onu komoion di kosunduvanJo diri. Om minonorita nogi i boogian diti do kivaro i tongotulun do aparsaya di Yisus om osiliu dii di tulunJo, om kivaro nogi i lumavan om i au aparsaya Disido. Om bab 13 gosob bab 17 nopo nga alanggau iri sinorita pasal do pinisompuuvan di Yisus om i tongotulunJo di ogirot marong do ontok di ongoio dii Isido tangkapo di totuvong. Om sinorita nogi i tangarJo do pinoposodia om pinopogirot di ginavo diolo ontok do totuvong diri. Om irino piipiro bab di kolimumusonno om monorita nong potingkuro i Yisus tinangkap, om di bisarawon Isido, om pinasalib Isido gosob do napatai om minijau kavagu Isido. Om monorita nogi nong potingkuro Isido minintalang si di tongotulunJo di novijau Isido kavagu.
Iri nopo sorita pasal di tongondu do nokosupan do lumapau (7:53-8:1-11), om kivaro tanda kurung di agajo sabap oguu Kitab om solinan di moisosondiang tinangaran di pogulupo do au tinulisan do sorita diri. Om kivaropo Kitab vokon do pinotulisan do sorita diri siri boogian vokon.
Om iri nopo pinoinggajo marong di Yaya saralom do buuk diti nga pasal do nitaak toomod do Kinoringan i kovijaan do auso koovion mantad di Yisus Koristus. Insan do maino nga manaak i Yisus toomod diri kovijaan siri di pointikid-tikid di tongotulun diri aparsaya Disido do Isidono vajaan do mongoi si di Kinoringan, om popoilo Isido do toinomod, om manaak Isido do kovijaan di tongotulun.
Iri nopo iso gaagaya di Yaya monulis diti buuk nga irino do onuon disido iri piipiro poiradan mantad di koubasanan do tulun do monikid tadau, sabap popointalang isido do piipiro ponudukan mantad di Tatod do Kinoringan: irad do vaig, kuui, tanavau, i momimiara do kambing biri-biri om i kambing biri-biri di piarawon, puun do anggur om i tuva di anggur.
Saralom diti Buuk
1. Kotimpuunon 1:1-18
2. I Yaya Mamamatis om i piipiro tulun di pogulupo kosiliu do tulun di Yisus 1:19-51
3. Karaja di Yisus si di tongotulun toguu 2:1-12:50
4. I piipiro tadau di kolimumusonno do silo Bandar Yorusalim om silo somok do Yorusalim 13:1-19:42
5. Novijau kavagu i Yisus om minintalang kavagu Isido 20:1-31
6. Pongovian: minintalang kavagu i Yisus si Golilia 21:1-25
Nong kivaro tanda bintang (*) siri tinangaran, nga obuli iumon i komoion diri tinangaran si Kamus Kadajan.
موجودہ انتخاب:
Yaya Kopoilaan: LabukPKV
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1995, Wycliffe Bible Translators, Inc. All rights reserved.