Lukas 22
22
Miupakat Mamatai di Yisus
(Mat. 26:1-5, 14-16; Mar. 14:1-2, 10-11; Yaya 11:45-53)
1Om oruaino dii orikot i tadau tagajo do tulun Joudi do kapangakanan diolo di kuui do auso poudor i pangambang di tapung, irino Paska i tadau tagajo do pangandaman diolo di pinogiduan diodu-aki diolo mantad si Vonuvo Masir di pogulu. 2Moiupapakatno dii i tongokotua di imam om i tongotulun do monunuduk do Undang-undang Ugama do Joudi nong kukuroyon mamatai i Yisus ontok diri auso tulun koontong, do rumosi gia iolo do kivaro tulun koontong.
3Om asuno dii i Soitan, i kotua do rogon, si ginavo di Yudas, i roiton do Koriut, iso mantad di opulu om duvo tulun di Yisus. 4Om ongoino dii i Yudas kumiupakat di tongokotua di imam om iri tongokotua do pulis nong potingkuro isido pojual di Yisus si diolo. 5Nga aandaian dii marong iolo do irad diri, om poiupapakatno dii iolo do manaak do siin si di Yudas. 6Om nakaakunpo dii i Yudas diri, om pogiumno dii isido do akal nong potingkurono do itaak i Yisus si di tongokotua di imam om au oilaan do tulun tasapou.
Posodia do Taakanon ontok do Paska
(Mat. 26:17-25; Mar. 14:12-21; Yaya 13:21-30)
7Om norikot nopo dii i Tadau Tagajo di tulun Joudi do Kapangakanan diolo di Kuui do Auso Poudor, om ponogitno dii iolo do tanak do kambing biri-biri soi di Kinoringan. 8Om poguluvono dii di Yisus i Pitrus om i Yaya do mampanau, do kaDisido, “Pogulu kouno pogi om posodiawono i tongotaakanon do akanon tokou do Paska,” kadi Yisus.
9Nga kadiolo, “Inombo pantok kouvanganNu do ponodiaanja?” ka.
10Om jawap dii i Yisus diolo do, “Pampanau kouno mongoi si Bandar Yorusalim, om osomungan kou nopo diri iso kusai do minongoi managou#22:10 Managou: Koubasanan nopo do tulun Joudi managou nga tongondu noo, okonko kusai. do mimban-simban di suvangan, om vaja kouno disido masu siri valai. 11Om tangaron mujuno iri sanganu di valai irad diti, ‘ “Sinombo do bilik pangakananja di tongotulunKu ontok diti Paska?” kadi Guru,’ kanto nono disido. 12Om angatan kou disido siri iso bilik do abava si savat do natandaian laid, om siri kouno posodia,” kadi Yisus.
13Om pampanauno dii i Pitrus om i Yaya si bandar om kosomungai dii diolo iri komoion di Yisus, om kuriono dii diolo i tongotaakanon ontok di Paska.
Pangakanan do Pangandaman di Kinapatajo di Tuhan
(Mat. 26:26-30; Mar. 14:22-26; 1 Kor. 11:23-25)
14Om norikot nopo dii i maso kaakanan di Yisus om i tongosusuuonJo, om rikotno dii iolo siri om miniurukno dii iolo mangakan. 15Om pitangar nogi dii Isido diolo do, “Agajono ginavoKu do muruk dikovu do mangakan diti taakanon do Paska do aupo asansara Oku. 16Do mitangar Oku dikovu, do au Okuno dii kaakan kavagu diti gosob do korikot i komoion diti Paska, irino ontok do momorinta Oku siri Kopomorintaan do Kinoringan,” kadi Yisus.
17Om kuutaiJono dii iri sangkir do kivaig do anggur, om ponorimakasi nogi dii Isido di Kinoringan, om kaDisido, “Onuo mujuno iti, om tikid-tikidono mongiup siti sangkir, 18do mitangar Oku dikovu do mantad do maino au Okuno koiup kavagu diti vaig do anggur gosob do orikot i maso do porintawonKu i tongotulun do Kinoringan,” kadi Yisus.
19Om paganuno dii Isido di kuui, om ponorimakasino dii Isido di Kinoringan, om poikokib-kokibo nogi dii iri kuui, om taakai dii di tongosusuuonJo, om kaDisido, “Itino kojuvanKu do pataakonKu gumanti dikovu. Vojoo mujuno do irad diti do pangandaman muju Dogo,” kadi Yisus.
20Om kaakanpo dii iolo diri taakanon, om paganuno dii i Yisus di sangkir diri pongiupan irad nogi diri kuui, om ponorimakasino dii Isido di Kinoringan, om pataako nogi dii Disido di tongosusuuonJo, om kaDisido, “Iti nopo iupon muju siti sangkir nga i raaKu do tumuntug do apatai Oku sabap do pongolukatKu dikovu. Om i raaKu nopo nga pomogirot di pongojonjian di kavavagu mantad di Kinoringan.
21Nga antangai pogi nga muruk Dogo mangakan ilo tulun do pojual Dogo. 22Om Iokuno i Sinumiliu do Tulun om mimang apatai Oku irad di naatur laaid di Kinoringan. Nga songkuro araat nasip di tulun di pojual Dogo!” kadi Yisus. 23Om poiduduatno dii i tongotulun di Yisus nong isai diolo pojual di Yisus.
Moisisival nong Isai Agajo Pangkat
24Om timpuunno dii i tongotulun di Yisus moisisival nong isai agajo pangkat diolo kaantangan do koruang. 25Nga pitangarno i Yisus diolo, “Ii nopo raja do tulun do okonko bansa do Joudi nga irino kikuasa momorinta di tongotulunjo, om roitan nogi iri kikuasa do ‘ponulung di tongotulunjo’. 26Nga ikovu nopo om okonko irad diri, do isaai nopo iri mokipangkat misti minsuribak, om i kotua nga misti sumiliu irad do tulun do gumaji. 27Do isai batoi agajo kuasa nong i mokisurung do taakanon om i poposurung do taakanon? Tantuno i mokisurung. Nga insan irad diri, Ioku nopo om miiradi di poposurung siti dikovu.
28Nga ikovu nopo nga atatap do maja-vaja Dogo di maso do kasansaraanKu, 29om ontok Oku sumiliu do Raja do momorinta siti vonuvo om tontuonKu ikovu nogi do momorinta, do miirad Dogo do tinantu diAmo#22:29 diAmo: diApa laaid do momorinta. 30Om kopoiuruk tokovi mangakan om mongiup siri saralom do KopomorintaanKu, om koogom kou siri tongotoogomon do manalasai diri opulu om duvo sukusakat do Israil,” kadi Yisus.
Popoilo Laaid i Yisus do Mongolim i Pitrus
(Mat. 26:31-35; Mar. 14:27-31; Yaya 13:36-38)
31Om pitangar i Yisus di Pitrus do ka, “Simun! Antangai pogi nga pokionuon kou marong di Soitan, i kotua do rogon, do ponsubaan i ginavo muju nong atatap aparsaya ko au, irad do mangatap do parai. 32Nga nasambayanganKuno ika, Simun, supaya aui daa lumuoi i kaparsayaannu si Dogo. Om nong koguli nopo i ginavonu do aparsaya om pogirotono kasangkat i ginavo di tongosulodnu,” kadi Yisus.
33Om jawapno dii i Pitrus disido, “Tuhan, pojiilonKo ko patajonpo nga nokosodia okuno maja Dika,” kadi Pitrus.
34Nga pitangarno i Yisus do ka, “Pitrus, noilaanKuno ika do aupo kopongingkukuuk ilo tandaa sodop maino, om intolukono mitangar do, ‘Au oku kotutun di Yisus!’ kanu dino Pitrus,” kadi Yisus.
Poijanan do Siin, Biik om Gampa
35Om pitangar nogi dii kavagu i Yisus di tongotulunJo do ka, “Potingkurono kasaramanan muju? Di pogulupo sinuuKu ikovu mampanau, do kangKu, ‘Ada kou mongovit diri poijanan do siin, ko biik ko kasut sopiar,’ kangKu, koinam kou dii naku do osimpitan?” kadi Yisus.
“Aui,” kadiolo.
36Om pitangarno dii kavagu Isido diolo, “Nga maino nopo isai-isai nopo dikovu kivaro poijanan do siin ko biik om ovitono. Om isai-isai nopo iri auso gampa om pojualono iri sabungjo do ipalit do gampa irad di tulun do sumodia di korikatan di musujo. 37Do mitangar Oku dikovu do potingkuropo nga misti do orikot i tangar siri Kitab do Ioku komoion do ka, ‘Pinavaja Isido di tulun kiduso,’ ka. Om atantu do orikot i tangar diri pasal Dogo,” kadi Yisus.#Antangai Yasaya 53:12.
38Om jawapno dii iolo do ka, “Tuhan, antangai atino iti gampa, duvoi,” kadiolo.
Om “Sukupno ino! Adano kalava!” kadi Yisus.
Sinumambayang i Tuhan Yisus siri Kabun Gitsamani
(Mat. 26:36-46; Mar. 14:32-42)
39Om pampanauno dii i Yisus mantad si Bandar Yorusalim do mongoi siri Kulud#22:39 Kulud: Kotud do Jaitun do irad di koubasanJo. Om i tongotulunJo nga minaja Disido. 40Om korikot dii iolo siri, pitangar dii i Yisus diolo do ka, “Sambayang kouno supaya om aukoi osuat do ponsubaan do mundur mantad Dogo,” kadi Yisus. 41Om rijangno dii Isido diolo minongoi sumambayang do lobi sarantai kosodu mantad siri, om singkotudno dii do sumambayang do ka, 42“Ou Amo,#22:42 Amo: Apa nong kouvanganNu, om tulungo Okuno Dika daa do poinsoduo Dogo iti kasansaraanKu; nga insan do irad dino okoniko maja Oku do kouvanganKu kondiri, nga irino kouvanganNu,” kadi Yisus. 43Om kivaro dii iso moloikat do minintalang naantangan Disido do mantad soi suruga do minonulung do popogirot di kojuvanJo. 44Om sumurau marong Isido, nga makin nogi dii do monginontob Isido do sumambayang, sampai sontotobur i tumosJo gosob do tumuru irad do raa si tana.
45Om ingkakatno dii Isido do ginumuli siri kinoijono di tongotulunJo, nga nokosupan dii Disido iolo do nokoodop do oludus#22:45 oludus: olunggui ko osusa marong ginavo marong iolo. 46Om pitangarno i Yisus diolo, “Nokuro do modop kou? Tungag kouno do sumambayang supaya om au kovi osuat do ponsubaan do mundur mantad Dogo,” kadi Yisus.
Tinangkap i Yisus
(Mat. 26:47-56; Mar. 14:43-50; Yaya 18:3-11)
47Nga mangar-tangarpo dii i Yisus di tongotulunJo, om sinono dii i tongotulun do asapou do minaja di Yudas. I Yudas nopo nga i songkoruangan diri opulu om iso tulun di Yisus. Om insomokno dii i Yudas do monium di Yisus, do sumalam isido di Yisus. 48Nga kadii di Yisus disido, “Yudas, koponiumannu Dogo, i Sinumiliu do Tulun, do pojualko bala Dogo!” kadi Yisus.
49Nga kaantangai nopo dii di songkoruangan di Yisus do irad diri, pitangarno iolo do, “Tuhan, lilaan ikoji Dika nong ongoionja tibaso iolo?” kadiolo. 50Om pangakangno dii iri iso koruang diolo do monibas di turipon di Imam Tagajo gosob do napapas i tolingojo ponong vanan.
51Nga pitangarno i Yisus, “Adano ino, sukupno ino,” ka. Om onuoJono dii iri tolingo di tulun, om posokotono dii kavagu om lingasaino dii.
52Om pitangarno dii kavagu i Yisus di tongokotua do tulun Joudi, irino i tongokotua di imam om i tongokotua di pulis mangajaga di Valai Sasambayangan Tagajo om i tongomoloingon vokon i rinumikot siri manangkap Disido, do kadi Yisus, “Nokuro do kisinangkil kou do gampa om songkuut-kuut kou do lalapos mongoi siti? Panantaman mujupo bato om parampuk Oku? 53Ombo bala iti tikid tadau Oku maja-vaja dikovu sino natad do Valai Sasambayangan Tagajo, nga au Okui tangkapon dikovu. Nga itino maso muju tinantu laaid do Kinoringan do minaja kou do kuasaan do totuvong, irino i kotua do rogon,” kadi Yisus.
Minongolim i Pitrus do Kotutun di Yisus
(Mat. 26:57-58, 69-75; Mar. 14:53-54, 66-72; Yaya 18:12-18, 25-27)
54Om tangkapono dii diolo i Yisus om ovito mongoi siri valai diri Imam Tagajo. Nga suutno dii i Pitrus di Yisus siri sodu. 55Om siri nopo natad di valai diri nga kivaro pinurokitan diolo do padadangan do noliput do tulun om rinumunggum i Pitrus diolo mogom do dumadang diri tapui.
56Nga kivaro dii iso tongondu raraa ginojian di Imam Tagajo do nokoontong di Pitrus poingogom siri vaangan di tapui, om tantangaino dii disido i Pitrus om kadisido do, “Ati tulun diti nga songkoruangan i di Yisus!” ka.
57Nga timpuunno dii i Pitrus do mongolim om pitangarno do ka, “Tongondu, au okui kotutun Disido,” ka.
58Nga aupo alaid mantad diri, om kivarono iso tulun vokon nokoontong di Pitrus, om pitangarno do ka, “Ika nogi nga songkoruangan diolo, okon?” ka.
Nga jawap i Pitrus do, “Usai, okoni!” ka.
59Nga kivaro kama do sanjaam mantad diri, kivarono kavagu tulun vokon do inontobon minitangar do ka, “Oinomodno bo do tulun diti nga koruang nogi Disido, do isido nga tulun mantad soi Vonuvo Golilia!” ka.
60Nga jawapno i Pitrus, “Usai, au oku nokoilo nong onu ino komoionnu,” ka. Nga mangar-tangarpo isido, turus pongingkukuuk dii i tandaa. 61Om kovilijono dii di Tuhan mongontong di Pitrus. Om kaandamai nogi dii di Pitrus iri tinangar laaid di Tuhan disido do, “Aupo kopongingkukuuk ilo tandaa sodop maino om intolukono mitangar do, ‘Au oku kotutun di Yisus!’ kanu dino,” kadi Yisus. 62Nga labusno dii i Pitrus, om pogiad do opuod.
Insasanawon om Loposon i Yisus
(Mat. 26:67-68; Mar. 14:65)
63Om kinamaipo dii di tulun mangajaga di Yisus do monginsasana om lopo-loposon dii Isido. 64Om somponono dii diolo i mato di Yisus om duatono do, “Intutunai daa nong isai ino minanampak Dika?” ka. 65Om oguupo i tinangar diolo mangararaat di Yisus do sondiang mantad diri.
Pinogotuvang i Yisus di Pinonguntunan di Tongokotua
(Mat. 26:59-66; Mar. 14:55-64; Yaya 18:19-24)
66Nga kanavau nopo dii, om untunno dii iri tongomoloingon di tulun do Joudi, irino i tongokotua di imam om i tongotulun di monunuduk do Undang-undang Ugama do Joudi, om angatai nogi dii diolo i Yisus gumotuvang si Pinonguntunan di Tongokotua. 67Om nokorikotno siri om tangaraino dii diolo i Yisus do ka, “Poiloo ikoi nong oinomod do i KoristusKo,” ka.
Nga jawap nogi dii i Yisus do, “Insan tangaronKu ikovu au kovi aparsaya Dogo. 68Om kivaro iri iduatKu dikovu, nga au kovi jumawap. 69Nga Iokuno i Sinumiliu do Tulun, om mantadno maino do poogomon Oku siri ponong vanan do Kinoringan, irino i Agajo kuasa,” kadi Yisus.
70Om pitangarno kasaangkat iolo, “Irad nopo dino om TanakKo bala do Kinoringan, sooro,” kadiolo.
Om “Inono tinangar muju do Iokuno iri,” kadi Yisus.
71Om poitatangarno dii iolo, “Onupo kogunaan tokou mogium do saksi, do norongou tokouno i tangar Disido kondiri do mangaraat Isido do Kinoringan,” kadiolo.
موجودہ انتخاب:
Lukas 22: LabukPKV
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 1995, Wycliffe Bible Translators, Inc. All rights reserved.