ဒေါ ဂုဝ် 6

လွင် ဂွန် ဇဝ်ဖြာ ဂါယ် ဂွန် ဒူအီ

1န့ ယီ မိုဝ်း ဒူအီ ကိူန် ဒဲင် ကာဒါယ်။ ဂေ ဘော ဝီ မိုဝ်း ဂွန် အီဘိုန့် ကိူန်။ 2ဒေါ အန် တီ န့ ယီ မိုဝ်း ဂေ အီ စိူဝ် ဂွန် အီမာယ် ဇဝ်ဖြာ၊ ဂေ ဝီ ယိုဝ်၊ ဂွန် အီဘိုန့် ဒူအီ ဟဲ့ စှိတ် ကာဆဝ်။ ဟဲ့ ဟွတ့်၊ ဂေ ဝီ လာယ် လာယ်၊ တဲး ဂေ ဘဲန် အီဘိုန့် ဂေ၊ တဲး ဂေ ပွိုန် ဒီ ဘူင် ခဲ့ ပီ အိုင် ဂေ။ 3ဒေါ ယွတ် ဇဝ်ဖြာ လွင် အန် တီ အန် ဝီ တဝ်း၊ “ဖွိုမ် အုဝ် အီ ဒွါ အာဆာက် ဒီ အီ၊ အုဝ် ဟူ တဲး န့ ကွယ် ဒီ ဂေ ဆေဆေ။ အုဝ် ဒီ တဲး အာဆာက် ဒူအီ ကွယ် အာဒါ အူ မာယဝ်း ဒီ အာ ဂိုဝ် ဆီနမ်။”

4အာခြာဝ် ဘာန် ဒေါ အန် တီ န့ မိုဝ်း ဒူအီ ဒုဝ် ဒီတူင့် ဒီတာင် အီ ကွယ် ဒဲင် ကာဒါယ်။ ဒေါ လာယ် ဂေ ဂွန် ဇဝ်ဖြာ ဒီ ဂွန် အီဘိုန့် ဒူအီ၊ ဂေ ဟဲ့ မိုဝ်း ဂွန် ဒီတူင့် ဒီတာင် ဇိုဝ် တီ။ ဂွန် ဂေ တီ၊ ဂေ ဟဲ့ ဘဲန် ဒါ ဘုဝ် တာင် ဘော မိုဝ်း ပ့လူမ် ကိူန်။ ဂေ မိူဝ် မုး ဒါ တာင် အီ မိုဝ်း ဆာရေ အာခြာဝ် ဒေါ မွိုန်။

5ဇဝ်ဖြာ ယီ ယွတ်၊ ဒူအီ အီ ကွယ် ဒဲင် ကာဒါယ် ဘောကာဂ့လျီတ်၊ ဂေ ဟဲ့ ဟာယ် ဟဲ့ မိူက်။ ပီ ဇေန့်ဇာ ဂေ အီ လေး ခဲင် နဝ်း ဂေ ဘော ပီ ဘူင် ဂေ ဒွန် မျုဝ်၊ န့ တူ မွှိုမ် တူတ့် ဒွန် မျုဝ်။ အာဝ် မိုဝ်း အီ မွှိုမ် မာဆေ။ 6ကူပ် ယိုဝ် ဇဝ်ဖြာ လွင် အန် တီ၊ အန် မိူဝ် မိုဝ်း နဝ်း က့လိုဝ်။ အန် ကာဖာ၊ အန် ဟဲ့ ကာလိုပ် ဒီ ဘူင် ဒူအီ။ 7အန် ဇဝ် ဝီ တဝ်း၊ “အုဝ် ဒီ ပျာတ့် ဝဲန် ဒူအီ ပဲ့ ဟဲ့ ဘူင် အုဝ်။ အုဝ် အာဝ် ဟူ တဲး ဂေ ကွယ် ဒဲင် ကာဒါယ် နီ။ ဘော ဂေ ဒူအီ၊ ဘော ဂေ ဒုဝ် ဆတ်ဒါဝါ အီ ကွယ် ဒဲင် ကာဒါယ်၊ ဘော မာဆိမ် အီ ကွယ် ခဲင် ဂါင်ဟြာဝ်၊ အုဝ် ဒီ ဝဲန် တူတ့် ဂေ ဒွန် မျုဝ်။ နဝ်း အုဝ် ဟဲ့ ကာဖာ၊ အုဝ် ဟဲ့ ကာလိုပ် ဒီ ဘူင် တဲး ဂေ မိုဝ်း။” 8န့ ယီ မိုဝ်း ဒါ အူ ဝီ၊ အန် စိူဝ် အာနုဝ်။ ဇဝ်ဖြာ ဟဲ့ တဝ်း၊ အန် မိုဝ်း နဝ်း ဆိူဝ် နဝ်း မှာန်။

9ခါ နီ ဟာဝ်၊ ဒီ ဝီ ကာလာင် လွင် အာဆာက် အာနုဝ်။

ဒေါ ကွယ် အာနုဝ် ဒဲင် ကာဒါယ် နီ၊ အန် မိုဝ်း နဝ်း လုယ်။ အာဝ် ပွိုန် ကာလာင် အီ တူ မွှိုမ် လွင် အန်။ အာနုဝ် ဒူပ် ဆီချာ ဇဝ်ဖြာ။ 10အန် မိုဝ်း ဂွန် အီမာယ် အူယ် ဝီ။ ဂေ စိူဝ် အာဆေမ်၊ အာဟာမ် ဘော အာယာဖေတ်။

11ဒေါ အန် တီ ကာဒါယ် အာဝ် အး။ ဂေ ဒူအီ အီ ကွယ် ဒဲင် ကာဒါယ်၊ ဂေ အာဝ် မွှိုမ်။ ဂေ ဘူင် အီ စီစိဝ် ဆေဆေ။ 12ဇဝ်ဖြာ ယီ ယွတ် ကာဒါယ် ဘော ယိုဝ် ဂေ ဒူအီ ဒဲင် ကာဒါယ်။ ဂေ ဘောကာဂ့လျီတ် တူ မွှိုမ်။ ဂေ အီ ကွယ် ဒဲင် ကာဒါယ်၊ ဂေ ဘောကာဂ့လျီတ် တူ ဘူင် နာ ဘွတ် နာ မွှိုမ်။ 13ခုဝ်၊ ဇဝ်ဖြာ ဝီ ကာလာင် ဂြုဝ်း ဒီ အာနုဝ် တွိုန်။ အန် တဝ်း၊ “အုဝ် ဟဲ့ ဟွတ့် ဆုင်ဖျာတ် ဒီ ဘူင်၊ တဲး အီ ကွယ် ဒဲင် ကာဒါယ် နီ၊ လိုဝ် စှိုမ် တူတ့် ဒွန် မျုဝ်။ ကူပ် န့ မိုဝ်း မီ နာ တူ မွှိုမ် ဒဲင် ကာဒါယ် နီ၊ အုဝ် ဒီ ပျာတ့် ဝဲန် ဘော ဂေ ဒူအီ ဘော ကာဒါယ်။ အုဝ် ဒီ ဘူင်၊ တဲး န့ လိုဝ် တူတ့်။ 14မဲ ယီ လုဝ် ဘူင် ရိုဝ် ဆင်ဖုဝ်၊ တဲး မဲ တာ ဟေ ဂုဝ်ဖာ။ နာ ခဲင်၊ မဲ လုဝ် ဘူင် ဘဲန် ဟူင် ဘဲန် ဟူင်။ ဘော နာ ခဲင် ဘော နာ ရေတ့်၊ မဲ လုဝ် ဖဝ်း ဂြဲ။ 15မဲ ယီ လုဝ် ဘူင် ရိုဝ် ဆင်ဖုဝ် တီ၊ တဲး တူင့် အန် အူယ် မာယဝ်း ကာနိး။ တဲး နာ တျီမ် အန် ဖန် ဂိုဝ် ကာနိး၊ နာ စာ အန် အူယ် ဂိုဝ် ကာနိး။ 16မဲ ဘော လုဝ် တပ် ရိုဝ် တီ၊ တဲး န့ လူင် လွှိုမ် အူ ဘ့လာက် အူ ကာနိး။ အူ ဘ့လာက် မဲ လုဝ် ဘူင် မာလုဝ်း။ နာ ခဲင်၊ တဲး န့ မိုဝ်း အူယ် ခြွင့်။ န့ လုဝ် မိုဝ်း အူ ခြွင့် နာ ခြိုမ်၊ အူ ခြွင့် နာ ကာတဲ၊ ပေါ အူ ခြွင့် နာ ဒဲင်။ မဲ လုဝ် ဘူင် ရိုဝ် ဆင်ဖုဝ် တာင် တီ ပါယ် တီ။ 17အုဝ် ဒီ တဲး န့ ဂ့လာယ် ကိူန် ဒဲင် ကာဒါယ်၊ တဲး အိုမ် ပုန် တူတ့် ကာဒါယ်။ ပါယ် တီ အုဝ် ဒီ ပျာတ့် ဝဲန် တူတ့် ဒွန် မျုဝ် အီ မိုဝ်း ဖွိုမ်၊ အီ မိုဝ်း အာဆာက်။ အာဆေ အီ ကွယ် ဒဲင် ကာဒါယ်၊ အန် ဒီ ယမ် တူတ့်။ 18အုဝ် ယီ ဒီ ဒွါ ကာဒိက် ဆတ်ဇာ ဒီ မဲ။ မဲ အာနုဝ်၊ မဲ လုဝ် လိုပ် ခဲင် ရိုဝ် ဆင်ဖုဝ် တာင် တီ။ ဘော မဲ ဘော ဂွန် မဲ ဘော အီဘိုန့် မဲ ဂေ အဝ် မဲ၊ ဘေ ဒွန် အီ လုဝ် လိုပ်။ 19န့ မိုဝ်း ဘော ဒုဝ် ဆတ်ဒါဝါ ဒွန် မျုဝ် အီ မိုဝ်း အာဆာက်၊ မဲ လုဝ် ဒိုဝ်း ဘ့လေး ဂေ ခဲင် ရိုဝ် ဆင်ဖုဝ် တီ၊ အူ မျုဝ် အူ ဂူ၊ တဲး ဂေ ကွယ် ရိုမ် ဒူပ် မဲ၊ ကွဲ့ တဲး ဂေ စှိုမ်။ 20န့ ဘော မိုဝ်း အာမျုဝ် မာဆိမ် ဒွန် မျုဝ် ဘော မိုဝ်း အာမျုဝ် ဒုဝ် ဆတ်ဒါဝါ ဘဲန် မျုဝ် ဘဲန် မျုဝ်၊ ဘော အာမျုဝ် ဒုဝ် ဆတ် အီ မွိုန် ဟာဝ် ဒဲင် ကာဒါယ်၊ ဂေ ဒွန် မျုဝ် လုဝ် လိုပ် ခဲင် ရိုဝ်၊ အူ မျုဝ် အူ ဂူ၊ တဲး အာမျုဝ် ဂေ လွတ်၊ ကွဲ့ တဲး ဂေ ယမ်။ 21မဲ ယီ လုဝ် ဒိုဝ်း တး ပီ ဒီ ဟူမ် ဒွန် မျုဝ်၊ တဲး မဲ ကာဇု အုန် ခဲင် ရိုဝ်၊ တဲး မဲ မိုဝ်း ပီ ဒီ ဟူမ်။ ဘော မဲ၊ ဘော ဂေ ဒုဝ် ဆတ်ဒါဝါ ဒွန် မျုဝ်၊ တဲး ဘေ မိုဝ်း ပီ ဒီ ဟူမ်။”

22ဝါယ် အန် တီ အာနုဝ် တွိုန် ဝီ ဘူင် တူတ့် ပဲ့ ဟဲ့ ဒမ် အုန် ဇဝ်ဖြာ ဒီ အန်။

موجودہ انتخاب:

ဒေါ ဂုဝ် 6: pce

سرخی

شئیر

کاپی