Matius 8
8
Yesu mampapàda: besa tau ung balala
(Mrk. 1:40-45, Luk. 5:12-16)
1Tòna minguluꞌ‑mo nai mungku ti Yesu, tau boso: mangulaꞌ‑I. 2Bùruꞌna‑mi ti besa tau ung balala, màli: na mukalimuntuꞌ tumunnuku i heleꞌNa pang musua: teꞌ, “O Tuang, i mading‑i, papàda:‑kaꞌko, sàbaꞌ U makuasa‑do.”*#8:2 papàda:. Sua: Yunani lìsòngi. I aluku tu Yahudi, tau ung balala niàna: ung burere. Ha mading‑i mintama i kaoneangna tau boso: minomba, ha mading‑i leta: i laling lipu:, pang ha mading‑i nierong. 3Na ànaꞌna‑mi Yesu ti kangkangNa mantokaꞌ tau to pang musua: teꞌ, “Mading. Pàda:‑mo:!” Pàdana teng‑mo ti sainna tau to. 4Na apuꞌna‑mi Yesu teꞌ, “Kalehai na? Hau pusua:-sua: mao i isai-sai teng te aka te, sangadinna nàmo: i imang mampupiita kalaemu, pang pinomba‑ing ti pinomba ung nipiparenta‑ing i atorang-atorang Musa,*#8:4 Hele i Im. 14:2-31. miluhali butti mao i dei: se.”
Yesu mampumatalete: pangkoringna besa komandang tantara Roma
(Luk. 7:1-10, Yoh. 4:46-53)
5Tòna mintama‑mo i lipu: Kapernaung ti Yesu, komandang kompi tantara Roma bùruꞌ mampampasikorai:‑ing pang mingkalemu 6teꞌ, “O Tuang, pangkoringku sintaleꞌ i tamming. Na kosu pang na sàrong‑ing tungka.”
7Musuana‑mi ti Yesu teꞌ, “Ayyo, Ku lumaa mampubelai‑i.”
8Hampoꞌ na sùmui komandang to teꞌ, “Tuang, ha sipatu:‑kaꞌko mantarima‑Ke i tammingku. Musua:‑Me: teng pang pangkoringku to matalete:. 9Sàbaꞌ koi:, parallu lumuku: mao i ung iaho kang nai koi:. Pang surudadu ung i hoiꞌ nai koi: parallu lumuku: mao i piparentangku. Ìna ku mampantuyu besanna surudadu lumao, lumaa‑da. Pang ìna ku manghàngo sintàna: teꞌ, ‘Hàmo:,’ baꞌ mai‑da. Pang ìna ku mampantuyu pangkoringku teꞌ, ‘Kamaꞌ ti tee,’ na kamaꞌ‑da.”
10Mimàha ti Yesu massàding aka to. MusuaNa‑mi mao i tau ung mangulaꞌ‑I teꞌ, “Matantu te ung Ku pusua: matung e teꞌ Moi i àlaꞌ-àlaꞌna tu Israel, hara‑Maꞌko mangkorai: tau ung mangampu kapatongangang ung lammuꞌ mène: tee! 11Pang Ku pusua: matung teꞌ, Boso: tau ung dang dea tu Yahudi bùruꞌa nai mata kùlaꞌ pang nai kalìliang kùlaꞌ pang sikahaka:-hakai: manne: sola: Abraham, Isak pang Yakub i kadatuang suruga, 12pambàtiꞌ dei: se ung nikonai: taunna Puang nitibea mao i sòhongna, i kamakarinnìngang. I anto mantalihuhui: se kumàraka pang sikùriki ti sisena.”
13Musuana‑mi ti Yesu mao i komandang to teꞌ, “Sumule:‑mo:. Nipaara‑rangmi mène: ti ung nu patongang to.” Pang tempo dea ho teng to, pangkoringna to matalete:.
Yesu mampumatalete: siranna Petrus bahine, pang tau sintàna:
(Mrk. 1:29-34, Luk. 4:38-41)
14Nai anto, Yesu lumao i rasangna Petrus. I anto Na ita ti siranna Petrus tarrang i ale: na pupirarung. 15Na tokaꞌna‑i ti kangkangna bahine to, hùling ti pirarungna. Tèdeꞌna‑mi pang mallayani‑i se.
16Mangkonai:‑mo àla: makarinning, boso: tau ung na katama dihata bulituku nibaha mao i Yesu. Pang nai kuasa suaNa teng, Yesu mampasahu dihata bulituku to, pang mampumatalete: ho nasang tau ung mipanaꞌ. 17Mangola: nasang to, nikannaꞌi ti suana Puang ung na padeaꞌ nabi Yesaya teꞌ, “Dea ti ung mangkoha: kapipanaꞌangta pang sainta.”*#8:17 Yes. 53:4.
Tau ung si mangkapelai: mangulaꞌ Yesu
(Luk. 9:57-62)
18Ara sangàlo Yesu manghele tau boso: ung mampimpalìngi‑I. Na onginna‑ming ti pasikolaNa teꞌ, “Ingke se i heteꞌna.”
19Hampoꞌ besa nai ung si manarangna i aluku tu Yahudi mandùkuꞌi Yesu pang musua: teꞌ, “Tungguru, ku mingulaꞌa‑ko iaka pòteng Ta lumaꞌi.”
20Hampoꞌ na sùmui Yesu teꞌ, “Serigala mangampu hàlo:, pang kudaꞌ mangampu sàrang, hampoꞌ Anaka Tulino*#8:20 Anaka Tulino. Sua: to, na pake leleng Yesu manturo: kalaeNa. hari: kaoneangNa maturu.”
21Musuana‑mi ti besanna nai ung mangulaꞌ Yesu teꞌ, “Tuang, patinai‑kangkaꞌko sumule: dolung mamparakai amangku.”
22Hampoꞌ na sùmui Yesu teꞌ, “Ulaꞌ‑Kaꞌ, pang eloꞌna‑da tau ung mate*#8:22 mate palleona, mate kapatongangang. mamparakai tau ung mate.”
Yesu mampamànaꞌ tanimporaꞌ mahara
(Mrk. 4:35-41, Luk. 8:22-25)
23Millantona‑mi i lemmang ti Yesu pang pola: ho ti pasikolaNa. 24Ha nisàdaꞌ-sàdaꞌ‑i bùruꞌ sangka: ti tanimporaꞌ mahara i tasiki to, dea pu na sampoi‑i balumba ti lemmang to. Tempo to, sileo: Yesu tarrang leto. 25Na enangNa‑mi pasikolaNa teꞌ, “Tuang, pulemu‑kangka! Pasalamaꞌ‑kang! Ta masolang dasse: e.”
26Musuana‑mi ti Yesu teꞌ, “Aka pu u mariaꞌ se tungka? Aka dang nu Mi patongang se?” TèdeꞌNa‑mi pang marràho pasaui pang tasiki to, màli: na mànaꞌ tungka.
27Mimàhanna‑mi se tungka pang silàha:-làha: moa teꞌ, “Isainna‑da ti Tau te? pùna hela‑da ti pasaui sola: tasiki manuruꞌ Na parenta?”
Yesu mampumatalete: idua tau ung na sosoko dihata bulituku
(Mrk. 5:1-20, Luk. 8:26-39)
28Deaꞌ‑mi se i heteꞌna, i pangalanna tu Gadara. I anto ara idua tau ung na sosoko dihata bulituku bùruꞌ mao i Yesu. Tau to‑i se harani tungka, dea pùna hari:‑da tau ung massarai liung i anto. Missòhong‑i se nai liokoꞌ pukaburuꞌang ung miluhali pangkaoneina‑i se 29pang mikei: teꞌ, “E Anakàna Puang, aka ti ung Nu pukauꞌa mao i kami? U mai‑mo naꞌ manghukung‑kang moi ha tempona‑mi?”
30Ha karao:‑i nai anto, ara sampolaiang bahi ung boso: tarrang muokaꞌ manne:. 31Na palaunna‑mi dihata bulituku to‑i se mao i Yesu teꞌ, “Ìna ki U pasahu, suo:‑kang mingeliꞌ mao i bahi to‑i se o.”
32Musuana‑mi ti Yesu mao i dei: se teꞌ, “Nàmo: se!” Sòhongna‑mi se pang mampintamai bahi to‑i se. Nasang bahi to, ràha miruru: pang tùrung sumampo mao i tasiki, deaꞌ mate i laling uhai.
33Miruruna‑mi se ti pikuyaꞌna bahi to mao i lipu: pang mampinghare:‑ing mao i ampunna ti nasang ung jadi mao i bahi pang mao i idua tau ung na sosoko dihata bulituku to. 34Lumanna‑mi nasang ti tau i lipu: to, mampampasikorai:‑ing Yesu. Tòna sikorai:‑mi se, na palau‑i se tungka mao i Yesu mangking malai, mampalii: lipuna‑i se.
موجودہ انتخاب:
Matius 8: skx
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in