Génesis 8
8
Pacon huinquintomarinsoꞌ
1Naporoꞌ Yosëri Noi, yaꞌipi maꞌsharoꞌsa nanchaquë yaꞌhuëapisopita, inapita yacatahuarin. Ina nohuanton pacon huinquintacaso marëꞌ ihuan paꞌnin. 2Coꞌhuara huinquinchátërasohuëꞌ, oꞌnanꞌton mëꞌtarin. Naporoꞌ marë acoporo quëran pipirinsoꞌ, nioncotërin. Inápaquë iꞌ yaꞌcopinamën niiꞌsoatërinsonta inaporin. 3Pasa aꞌnatërápo shonca tahuëri quëran, iꞌ piꞌpiyan piꞌpiyan huinquintomarin. 4Canchisë yoqui, shonca canchisë tahuëri quëran, Ararato motopiroꞌsa huiꞌnimotënquë nanchasoꞌ, yaꞌmitërin. 5Iscon yoqui nanirahuaton tahuëririnquë, motopiroꞌsa huiꞌnimotëna yaꞌnopi huachi.
6Inapita yaꞌnohuachinara, catapini shonca tahuëri quëran, Noiso nancha huintananën iꞌsoatërin. 7Naporoꞌ aꞌnara itatan aꞌparin. Inasoꞌ, itohua itohua yanpo yanpónantarin. Iꞌ huinquintacaso ninaton, naporin. 8Ina piquëran, Noisoꞌ iꞌ huinquintërinso nitotacaso marëꞌ, nëpë yaꞌhuërëꞌ aꞌpaantarin. 9Aꞌpapirinhuëꞌ, co intopa huënsëcasohuë niꞌton, yanpo yanpónantarin. Naporarin quëran, nanchaquë chachin huënantarin. Huëntahuachina, Noiri masahuaton poꞌmoantarin.
10Canchisë tahuëri quëran, naquëranchin aꞌpaantarin. 11Nëpëso paꞌsahuaton, iꞌhuarayasha huarëꞌ huënantarin. Oripo nara sëꞌparaꞌhuaya monoquënë chachin naquërahuaton quëntarin. Naporoꞌ Noi, yaniromarinso nitotërin huachi. 12Canchisë tahuëri quëran naquëranchin nëpë aꞌpaantapirinhuëꞌ, co huachi huëntarinhuëꞌ.
13Noi saota pasa aꞌna piꞌitapasoꞌ, yaꞌipiroꞌpaꞌ yaniromarin huachi. Caniaritërinso yoquiquë, yaꞌnatiirinso tahuëri chachin, napopinchin nancha pëirapirinso oquirin. Naporo yaꞌipiroꞌpaꞌ yaniromarinso nocorin. 14Aꞌna yoqui, cato shonca canchisë tahuëri nanihuachina, yaꞌipiroꞌpaꞌ noyá yaniromarin huachi.
15Naporo chachin Yosëri Noi itapon: 16“Iporaso huachi saꞌanëꞌquën chachin nancha quëran pipiquëꞌ. Huiꞌnanpitantaꞌ, saꞌinarë chachin pipiinaꞌ. 17Yaꞌipi maꞌsharoꞌsanta ocoiquë paꞌinaꞌ. Anpiantëhuanoꞌsaꞌ, pëꞌtahuaroꞌsaꞌ, noꞌpaquë niohuaratërinsopita, yaꞌipi inapitanta pipiinaꞌ. Notohuaroꞌ huaꞌhuatatonaꞌ, yaꞌipiroꞌpaquë yanquëꞌinaꞌ,” itërin.
18Napotohuachina, yaꞌipi piyapiꞌsa chaꞌëpiso pipipi. 19Maꞌsharoꞌsanta pipipi: Pëꞌtahuaroꞌsaꞌ, niohuaratërinsopita, anpiantëhuanoꞌsaꞌ, inapitanta pipipi huachi. 20Nani pipihuachinara, Noiso aꞌnara artaro ninin. Yosë chinotacaso marëꞌ maꞌsharoꞌsa tëpacaiso nipisopita masahuaton, tëparin. Anpiantëhuanoꞌsantaꞌ, manin. Aꞌnaya aꞌnaya nisha nisha nipisopita quëran tëparin. Tëparahuaton, Sinioro chinotacaso marëꞌ artaro aipi yaꞌipi ahuiquitërin. 21Maꞌsharoꞌsa ahuiquitërinso pimóchin imërahuaton, Yosëri nóya niꞌnin. Naporoꞌ inaso tapon: “Huaꞌhuatapona quëran huarëꞌ piyapiꞌsaꞌ, co noyahuëꞌ nicacaisoráchin cancantopi. Inaso niponahuëꞌ, co huachi ipora anaꞌintërahuëso pochin, isoroꞌpaꞌ anaꞌintaantapohuëꞌ. Co huachi maꞌsharoꞌsanta inapotapohuëꞌ.
22Isoroꞌpaquë yaꞌhuapona pochin, piyapiꞌsa noya shaꞌtaponaꞌ.
Nitërinsonta macaponaꞌ.
Huënocanta yaꞌhuërahuaton, sëhuëonta yaꞌhuapon.
Piꞌipi tahuëriꞌsanta nanirahuaton, oꞌnapinta nanipon.
Tahuëri, tashiꞌ, inapitanta yaꞌhuapon,” tënin.
موجودہ انتخاب:
Génesis 8: cbt
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2011, Wycliffe Bible Translators, Inc. All rights reserved.