Gɔwɔ tɔɔi 18
18
Yálá ə Isaakə hɔlɔɓo mɛ̨nį nwɛlɛɛɓo Sara ma
1Yai-Laa ə gbɔwɔ lɛ Abrahamə ɓa Mamre nwɛla kwɛlɛ. Nąąlɔwai, hvóló kulaa kpɔ kɛ, wəleen ɲɛ tɔɔ, Abrahamə heɛ ɲəi ɉəɠə pɛlɛ́ kwɛlɛ. 2Ə lɛɛ lɔ hee ni, ə hinąą haaɓa kaa, di mąą hvo kɛ kwɛa li mą, diɛ pa bɔ. Ə muhəɠə, yɛ li di laakwiɛn ɉii, ə mąą yɛɛ di kɔ́wɔ mu. 3Ə mo dɔ̨nɔ̨ ɓa yɛ mą: «Gɛ́ ə́ hvaa mą, ka hee woloɓo bɔ́ɔ́li ɓɛ. 4Di pa a yá, ka ka kɔ́wɔ mąąwaa ka hee nwulu nįnįn mu, ka ka hvii tɔɔ. 5Ŋą́ li ŋą́ kɔ̨nɔ̨n da pɛli ŋą́ paa la ka pɔ, ka mį́i, ka hu ə walawala, kaa li ka wɔ hiɛi ɓa, ə gɛ, ka hvə pa tɛɛ ɓɛ bɔ́ɔ́li kpɛli-kpɛli.»
Nwɛ̨ąąi tii di nwoo ɲąąpənə, diɛ mą: «Bələi tii ə mo la, gɛ tii, kwaa hvaa mą.»
6Nąąlɔwai, Abrahamə ə pənə kpɔ a mąą hulaa, ə lɔ nɛ̨ą Sara pɔ, ɉəɠə pɛlɛ́ mu, yɛ mą: «Ə́ mąą hulɔ, lɛɠɛ hunwɔ gəgən ɉu haaɓa həɠə, ɲɔwɔ, ə́ gɛ a nwɔ̨mį.»
7Yili pulu, Abrahamə ə gilɛ həɠə, ə li, nwɔ taatɛlɛɛɠaai kpulu hu, ə nįŋɛ̨ gbɔn dɔ̨nɔ̨ hon, ə dɛɛ nwɔ luwɔ tɔ̨nɔ̨ pɔ, yili ə nɛɛmą, ə niŋɛ̨i tii paa, ə bɛli. 8Ɓɛlɔwai kɛa ɉuwɔ ə mɔn na, Abrahamə ə ɉuwɔi tii həɠə ə bɛlɛ nįŋɛ̨ ɲįnįya kpona ɓa da nįŋɛ̨ ɲįnįya kulaa nįnɛ̨, ə paa la nwɛ̨ąi tii pɔ. Abrahamə ə lɛɛ tɔɔ ni di kwɛlɛ nwulu mu, nwɛ̨ą diɛ di laa mį́i. 9Nwɛ̨ąąi tii di Abrahamə mąąnikɛ, diɛ mą: «Ə́ nɛ̨ą Sara kaa mį?»
Abrahamə yɛ mą: «Gaa bɛlɛ́n.»
10Nwɛ̨ąąi tii tɔ̨nɔ̨ ə mo Abrahamə ɓa yɛ mą: «Gwɛlan tii pai, ɓɛlɔwai nwɔ̨nɔ̨, gáá pənəi ŋą́ pa ɓɛ, ə́ nɛ̨ą Sara gaa pai lon ɉulɔnu hɔlɔɓoi.»
Sara ə kɛ tɔɔ ni bɛlɛ́ laaləi Abrahamə pulu, ə nwooɠaai tii mɛ̨n. 11Nąąlɔwai, Abrahamə da Sara di pɔlɔɔi kɛa kɛ, lon ɉɔlɔɓoi hvo kɛ kɛa Sara ma. 12Sara ə yɛlɛ gwəi pələ, yɛ kɛ mą: «Mą́ą́ nɛ̨ɛ̨golo, ŋą́ pɛli kɛa lon ɉɔlɔɓoi kwa nwɔ́ mɛ̨nį nąmu Abrahamə yaa kpɛli, bɔlɔɔ?» 13Yai-Laa ə mo Abrahamə ɓa, yɛ mą: «Lɛ mɛ̨nį ɓa Sara kaa yɛ́lɛ́i, yɛ kɛ diɛ: ‹Mą́ą́ nɛ̨ɛ̨golo, vá pɛli kɛa lon ɉɔlɔɓoi?› 14Akɛtii, mɛ̨nį ta a pɛli kɛi a nwalawalaa Yálá yəi? Gwɛlan tii pai, ŋą́ pənə ŋą́ pa ɓɛ ə́ pɔ a ɓɛlɔwai, Sara a lon ɉulɔnu hɔlɔɓo.»
15Sara ə ɲɔw, kɛi tii di mo mą: «Yáá yɛlɛ», ə lənə mą; yɛ mą: «Və́ kɛ yɛlɛ li.»
Yai-Laa yɛ mą: «Ə́ yɛlɛ.»
16Nwɛ̨ąąi tii, di di muhəɠə kɛa diɛ li, di di ɲɛ̨i haŋą Sodomə daai pələ, Abrahamə yɛ li di tɔɔi pələi.
Abrahamə ə Sodomə taa mąą nɛ̨ɛ̨mąą hvə Yálá ɓa
17Yai-Laa ə mo gbɔwɔ ɓa yɛ mą: «Mɛ̨ni gáá lii gɛi vá pɛli nooi Abrahamə ɓa. 18Abrahamə kaa pai kɛi a nu kpulu huwalawalaa tamąą di nąn, Abrahamə pɔ pələ ɓə gáá pai lúwɔ́ tooi la lɔi mɛ̨i hį́iɠaa kəlee diɛ. 19Abrahamə ŋɛ̨i ɓə ŋą́ ɉəɠə ɉu, da non, ə mą kɛ non ɉuwuhu nuą, əgɛ, di nwɔ́ tɔ́nŋąąi hon, ya ɓə a gɛ, diɛi tii di wɔ tələnmolaa da di wɔ mɛ̨nį haŋąą pɔ, ŋą́ mįnɛ̨ pɔ mɛ̨nį kɛ diɛ.»
20Yai-Laa ə mo Abrahamə ɓa, yɛ mą: «Sodomə taa da Gomorə taa hu nuą kɛ nɛ̨ŋɛ̨n gun aa tɛ aa həli mą́ą́, di wɔ túwɔ́ pələ ɲɔ̨n ɉu a wiɛ. 21Ŋą́ yɛɛ, ə gɛ, ŋį́ li ŋį́ nąą kaa, a kɛ pələi gáá gun mɛ̨n ɉii la, gaa tii.»
22Nwɛ̨ąąi tii veelɛ di tɛɛ diɛ li Sodomə daai pələ, di Yai-Laa da Abrahamə di lɛɛ laa tɔɔni. 23Abrahamə ə mąąlɛɠɛ mą, yɛ mą: «Yai-Laa! Akɛtii ə́ kaa lii tələnmo nuą da nwąnąlɔ nuą kəlee nwun na pilii a gee? 24Akɛ gbəli hu, tələnmo nuą da kɛ Sodomə daai a nu pow lɔɔli, hvá mɔɔ pɛli daai tii mąąhvaalɛɛi nu pow lɔɔli tii mąą mɛ̨nį ɓa? 25Gílí kaa ɉu gɛ́ diɛ́, hvá pɛli mą. Hvá hvaa mą, nuąi hɔn və diɛ, da hɔn mąą nuą, hvə́ di nwun na pili a gee. Nui ŋɛ̨i a yɛnɛ̨ɛ̨ mɛ̨nįɠaa kəlee kitii tee, hva hvaa mą, hvo tələnmomun nwun na pili.»
26Yai-Laa ə Abrahamə woo ŋąąpənə, yɛ mą: «Ŋą́ nu haŋąą pow lɔɔli kaa Sodomə daai, ŋą́ daai tii mąąhvaalɛɛ nu pow lɔɔli tii mąą mɛ̨nį ɓa.»
27Abrahamə yɛ nwɔ̨nɔ̨ mą: «Ną́mu, ə́ lii laa bɔ́, gáá nwɔ̨nɔ̨ bɔ ŋą́ mɛ̨nį ta ɓo yɛ́, ɲą́ą́ ŋɛ̨i və́ ɓaa hɛn da, gáá lɔ a muluun gbala a wala kɛtii luwu. 28Akɛ yá li, nu pow lɔɔli tii a wala hɔlɔɓo, nu pow nąąn kɔ́w lɔɔli a hɔlɔɓo diɛ ɓo a nu haŋąą, akɛtii, yá mɔɔ pɛli daai tii nwun na pilii, mąąhɔlɔɓo, nu lɔɔli aa kulɔ nu pow lɔɔli tii la?»
Yálá yɛ Abrahamə ɓa: «Ŋą́ li, ŋą́ nu haŋąą pow nąąn kɔ́w lɔɔli kaa, vá daai tii nwun na pili.»
29Abrahamə ə pənə nwɔ̨nɔ̨, yɛ mą: «Gbəli hu, ə́ kaa lɔ lii nu pow nąąn gaai laa.»
Yálá yɛ mą: «Nu pow nąąn tii mąą mɛ̨nį ɓa, vá daai tii nwun na pili.»
30Nąąlɔwai, Abrahamə ə pənə nwɔ̨nɔ̨; yɛ mą: «Ną́mu, gáá nɛ̨ɛ̨mąą hvəi yɛ́, hvo ə́ liiɲąnwana mą́ą́, akɛ ŋą́ kɛi pənə gɛ́ hvaa ə́ pɔ. Gbəli hu, yá li yá nu pow haaɓa kaai, yá gɛ ləi?»
Yálá ə nwoo ŋąąpənə, yɛ mą: «Ŋą́ nu pow haaɓa kaa laa, ŋą́ daai tii mąąhvaalɛɛ.»
31Abrahamə yɛ mą: «Ee Ną́mu, mą́ą́hvaalɛɛ, gɛ mɛ̨nį gáá pənəi nwɔ̨nɔ̨ gɛ́ hvaa ə́ pɔ. Yá li, yá nu haŋąą pow hveelɛ kaa laa, yá gɛ ləi?»
Yálá yɛ mą: «Ŋą́ nu pow hveelɛ kaa laa, ŋą́ daai tii mąąhvaalɛɛ.»
32Nąąlɔwai, Abrahamə yɛ mą: «Ną́mu, nɛ̨ɛ̨mąą ɓə gáá vəi yɛ́, hvó ə́ liiŋąnwąną mą́ą́, yii gɛ́ ŋį́ mo, gbəli ɓaa yii. Akɛ yá nu haŋąą pow kaa daai tii hu, yá gɛ ləi?»
Yálá yɛ mą: «Ŋą́ nu haŋąą pow kaa daai tii hu, ŋą́ daai mąąhvaalɛɛ.»
33Ɓɛlɔwai Yai-Laa ə kpɛɛ la a nwooɠaai tii ɓoɔ Abrahamə ɓa, di di ɓɛlaɓo, Abrahamə yɛ pa ɲəi bɛlɛ́ laaləi.
Đang chọn:
Gɔwɔ tɔɔi 18: BKPDCG
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập