Gɔwɔ tɔɔi 19
19
Sodomə taa kələn mɛ̨nį da Lɔtə nwun mąąɓo mɛ̨nį
1Yələwulii pɔ lɔwai, Lɔtə ə kɛ heeni Sodomə taa ɉįi la, malaka hveelɛi tii diɛ pa. 2Yɛ diɛ: «Nwɔ́ mɛ̨nį nąmįną, gáá nɛ̨ɛ̨mąą hvəi kaa, gɛ́ ka hvaa mą, ka gwə li ɲə́i bɛlɛ́ laaləi, ka ka kɔ́wɔ mąą waa, ka yii laa. Tínąą yələ wala, kaa kɛa li ɓɛi ka káá lii laa.»
Nuąi tii diɛ mą: «Kpaa! Ku kaa lii yii gwəli hąąi kɛnɛ̨ ɓa.»
3Kɛlaa, Lɔtə ə kanąn diɛ, ŋąąkpɛɛi, di hvaa mą, da diɛni di li ɲəi bɛlɛ́ laaləi. Lɔtə ə nɛɛ mą ə di nwɛ̨ą kɔ̨nɔ̨n gɛ, ə nwɔmi kɛ yii ləvɛin hvo kɛ ɉu, di mį́i.
4Nuą laa lɔwai hvo kpɛli ni kɛ ɉəli li, Sodomə daa hinąą di bɛlɛ́ mąątínɛ̨n, ə gɔwɔ tɔɔ hilɛlɛa diɛ ə həli la ɉulɔgoloɠaa diɛ, dɔ̨nɔ̨ kpɛli hvo lɛɛ pulu. 5Diɛ Lɔtə təli, diɛ kɛ mą: «Lɔtə, nwɛ̨ąąi ŋɛ̨i pa ɓɛ ə́ pɔ ɲələwulii hu, di kaa mį? Di kulɔ ɓɛ pələ ɲɛnɛ̨ɛ̨, ku kaa bɔ ku ku liiɓa mɛ̨nį kɛ a diɛ.»
6Lɔtə ə kulɔ ə tɔɔ bɛlɛ́ laaləi, ə bɛlɛ́ laa kpulu bulu pələ, 7yɛ diɛ: «Náwəini, kpaa! Ka hvə nwąnąlɔ túwɔ́ yili ɓo a diɛ. 8Nónnii nɛ̨ɛ̨gbɛla hveelɛ kaa ɓɛ, di hvo hulɔnu mɛ̨nį hu kɔ́lɔn, gáá di tɛɛi ka pɔ, ka ka liiɓa mɛ̨nį kpɔ kɛ a diɛ. Kɛlaa, ka hvə hulɔnu mɛ̨nį ta kɛ a nuąi ŋɛ̨i, nwɔ́ nwɛ̨ą ka tii. Mąąhɔlɔɓo, di kaa ɲə́i bɛlɛ́n.»
9Nuąi tii diɛ Lɔtə ɓa: «Həɠə tai laa tɔɔni! Nwɛ̨ą ə həɠə ləi, yɛ kɛ ə tɔ́n ɉee ku mɛ̨i ku pɔ lɔi ɓɛ, yili hva pɛli tii. Mɛ̨nį ku kɛi pa gɛi a nuąi ŋɛ̨i, ku kaa gee mɛ̨i hveelɛ kɛi a yɛ́.» Sodomə nuą di Lɔtə pili a huwalawala, di yili kɛa gbon mą, diɛ kɛ di naa yali. 10Malaka hveelɛi tii di Lɔtə hon, di nɔ di pɔ bɛlɛ́n, di bɛlɛ́ laa kpulu. 11Sodomə nuąi ŋɛ̨i kɛ kɛa tɔɔni gbon ma, malakaɠaa di nuąi tii kəlee ɲɛ́i kpinį diɛ, ə gɔwɔ tɔɔ ɉilɛlɛa diɛ, ə həli la ɉulɔgoloɠaa diɛ, nu tɔ̨nɔ̨ kpɛli hvo pɛli bɛlɛ́ laaləi kaai.
12Malaka hveelɛ tii di mo Lɔtə ɓa, diɛ mą: «Ə́ wɔ nuą taɠaa kaa ɓɛ daai, yɛ ə́ ɓɔlɔni, ə́ lon ɉinąą, ə́ lon nɛ̨ąą da ə́ nɛ̨́ɛ̨́yɔwɔ takpɛliɠaa? Mo diɛ, ka diɛni ka kulɔ ɓɛ daai. 13Ku kaa pai ɓɛ nɔi kələn ɉi, mąąhɔlɔɓo, nɔi ŋɛ̨i hu nuą kɛ nɛ̨ŋɛ̨n gun aa həli Yai-Laa ɓa, ə ku tɔɔ, ə gɛ, ku ɓɛ kələn.»
14Lɔtə ə li, nuąi ŋɛ̨i kɛi pa nonnii nɛ̨ąą həɠəi a di nɛ̨ą, yɛ diɛ: «Ka kulɔ ɓɛ daai ɉa, mąąhɔlɔɓo, Yai-Laa kaa pai daai ŋɛ̨i kələn ɉii.» Kɛlaa, di kɛi Lɔtə wooi tii kaa yɛ yola woo.
15Yələɓɔi kpinį mu, malakaɠaa di Lɔtə mąą wəleen, ə gɛ, ə kulɔ nąą daai, di kɛi kɛ mą: «Ə́ muhəɠə ɉa, ə́ nɛ̨ą da ə́ lonnii nɛ̨ąą hveelɛi ŋɛ̨i həɠə ka kulɔ ɓɛ daai, ə gɛ, ə́ nwun na hvo pa pili daa ŋɛ̨i nwɔ mɛ̨nį ɲɔ̨n ɉu.» 16Yii kɛa Lɔtə ə kɛi mąątínɛ̨n, malakaɠaa di ɉon a ɲee, di nɛ̨ą hon da nonnii nɛ̨ąą hveelɛi, di di kulɔ Sodomə daai, mąąhɔlɔɓo, Yai-Laa ə kɛ ɓɔ di nwun mąą ə ɓo.
17Yii kɛa di kulɔ daai, malaka hveelɛ tii dɔ̨nɔ̨ yɛ Lɔtə ɓa: «Pu ə́ li, ə gɛ, ə́ ə́ nwun mąąɓo, yá kɛi li, hvə ə́ pulu kaa hvo nwɔ̨nɔ̨ tɔɔ bələi, li ɲee tii ɓa, ə́ ə́ nwun mąą kilɛ laa, hvo pa lɛɛ ɉu.»
18Lɔtə ə nwoo ŋąąpənə, yɛ mą: «Ną́mu, nąą kwɛai, vá pɛli mą. 19Gili kaa kpɔ ɉu gɛ́ diɛ, yaa mɛ̨inɛ̨ɛ̨ kɛ mą́ą́, yaa nwún mąąɓo. Kɛlaa, va pɛli həlii ɲee tii ɓa, gɛɛ gbaloi tii hvo kɛ ɓɛlai daa ŋɛ̨i ɓa, gáá pai kiɛ lɛɛi bələi, nwún na ə pili. 20Yáá daa lon tii kaa, mąą hvo kwɛa li mą́ą́, ŋą́ pɛli ŋį́ hiɛ ɉa-ɉa, ŋą́ li nąą. Lɔwai lɛɛ ɲə́i, ə gɛ, ŋą́ li ŋį́ mą́ą́ kilɛ laa, a kɛ tii nwún mąą a ɓo.»
21Malaka tii yɛ Lɔtə ɓa: «Ŋą́ą́ hvaa mą, li laa, və́ pai daa lon tii kələn ɉii ə́ mąą mɛ̨nį ɓa. 22Li a gilɛ ɉa-ɉa, ə́ ə́ mąą kilɛ laa, mąąhɔlɔɓo, ya wala ni həli daai tii hu, və́ pai pɛlii mɛ̨nį ta kɛi.» Mɛ̨nįi gɛ diɛ kɛ daa lon tii laa ɓaa Soarə yaa li.
23Hvoló tɛɛ nwun ma ɓə Lɔtə ə həli la Soarə daai. 24Nąąlɔwai ɓə Yai-Laa ə nwɔ̨n dulɔ pu la Sodomə taa da Gomorə taa di mɛ̨i. 25Pələ ɓə Yai-Laa ə daa hveelɛi tii da gwɛlɛ lɔi kəlee kələn na, ɉu nuą ə mą kɛ ɉu wuluɠaa mąn. 26Lɔtə nɛ̨ą ə tinɛ̨n, ə ɲɛ̨i hee bulu pələ, ə mąą pənə a kpolo-kwɛni. 27Mąą yələ laa ɓoɔ, yələwala pɔ, ɓɛi ŋɛ̨i Abrahamə da Yai-Laa di kɛ la tɔɔni diɛ dɔɔ bələi woo ɓo, Abrahamə ə li ə tɔɔ laa. 28Ɓɛlɔwai ə ɲɛ̨i hee la Sodomə taa da Gomorə taa di mɛ̨i pələ, da di kwɛlɛ lɔiɠaa kəlee, ə lulu kɛnɛ̨ ta kaa yɛ tɛ kpɔ yɛ tíi kɛnɛ̨ kələn nulu.
29Ɓɛi ŋɛ̨i Lɔtə ə kɛ laa kɛ nɔi, ɓɛlɔwai Yálá ə kɛi nɔi tii da ɉu taɠaa kəlee kala la, ə giliŋąhiɛ Abrahamə ɓa, ə Lɔtə kulɔ nwun na pili tii hu.
Lɔtə da nonnii nɛ̨ąą di mąą mɛ̨nį
30Lɔtə ə kɛi ɲɔw heei Soarə daai, yili ɓə gɛ, ə li, ə hee, yee ta ɓa da nonnii nɛ̨ąą hveelɛi, di kɛ laa kwɛni wolo ta hu. 31Hvóló ta, Lɔtə lon nɛ̨ɛ̨nu nu pɔlɔ laamun, ə mo nəɠə ɓa, yɛ mą: «Gu ną́n pɔlɔi, ɓɛi ŋɛ̨i gu kaa laa, hulɔnu ta hvo ɓɛ gu pɔ yii a gu həɠə a nɛ̨ą, yɛ pələi mąąnɛɛ la. 32Yili ɓa, gu lɔɔ tɔɔ gu ną́n na, nɔɔ a ɉon, gwa diɛni gu laa, ə gɛ, yaai tii ɉuwu ə pa lɛɛ yɛnɛ̨ɛ̨.» 33Di nɛɛ mą di lɔɔ tɔɔ di nąn na, mąą yələwulii, nu pɔlɔ laamun ɓə da nąn di laa tɔwɔ, kɛlaa, di nąn və gili kɔ́lɔn.
34Mąą yələ laa ɓoɔ, nu pɔlɔ laamun yɛ nəɠə ɓa: «ŋą́ą́ nwɛ́i kɛ, kwa gu ną́n kwaa laa. Gu pənə nwɔ̨nɔ̨ gu lɔɔ tɔɔ na, ə gɛ, yələwulii pɔ, yɛ́ kpɛli ə́ li, ya ɓə a gɛ, gu gu ną́n ɉuwu kulɔ.» 35Di lɔɔ tɔɔ di nąn na, nɔɔ ə ɉon, mąą yələwulii, da nokolo laamun di laa. Di nąn və gili kɔ́lɔn.
36Lɔtə lonnii nɛ̨ą hveelɛi tii kəlee di koo həɠə. 37Nu pɔlɔ laamun ə naayɛɛ a julɔnu, ə naa hee a Moabə. Moabə tii ɓə kɛ a Moabə lɔi hu nuą di kalaɓɔlɔ. 38Nokolo laamun yaa kpɛli ə naayɛɛ a hulɔnu, ə naa hee a Bɛn-Ami. Bɛn-Ami ɓə kɛ a Amɔn lɔi hu nuą di kalaɓɔlɔ.
Đang chọn:
Gɔwɔ tɔɔi 19: BKPDCG
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập