Luk 3
3
1G’ômpum̃a w’igôm̃i n’ôtaṉè w’ipangiṉa si Tibère Sezar, — gw’avegagi Pontu Pilatu ôvangiṉi wi Yuda, n’Erod kè, ôvangiṉi wi Galile, na mwô’ngi yè Filipi, ôvangiṉi w’Iturya ni ntye yi Trakônite, ni Lizanyas, ôvangiṉi w’Abilène, 2na gw’egômbe z’avegagi Ana ni Kayifa imiṉisè impôlô, — aṽyeṉ’igamba ny’Anyambyè gôre Yôan, y’ômwaṉa wi Zakarya, gw’itôve.
3N’agèndi yè gô ntye yôdu vingôvingô Yoridan nkambiṉaga ibatiza s’iniga si nkôndi gw’inyeza s’ibe, 4ga nt’are tèndô pa gw’ezangô z’agamba mi Yezaya y’ôvogisi inè: Inyôy ny’ôma ntôngaga gw’itôve inè: Gekizaṉi mpoṉo ya Rerè, vangaṉi mpoṉo yè gôre. 5Ôdèdy’edu wi be jônyô, ni nômby’edu n’esanômby’edu yi be sônyô; n’imbôra s’arègo si be nyonyuṉô, n’impoṉo sa patagapataga si be pangô vèvèlè. 6N’izôṉe yôdu yi be jeṉ’isungiṉa s’Anyambyè.
7Yeṉo awulinyi yè inkondo s’aṉaga w’aṽyeṉigi gô batizô ne yè inè: Aṉwè, awaṉa w’impeṉe, mande amyeza ṉwè gô fang’eguṉu zi bya? 8Sambô yaṉaṉ’ilônda yi keka n’iniga si nkôndi, ko awulyaṉi gw’irèm̃i yaṉi inè: Azw’are n’Abraam, ayè reri yazô, konde mi bulinya ṉwè inè, Anyambyè are ni ngulu yi nonguny’awaṉa avila gw’adô miṉo gôr’Abraam. 9Ndô venge vèṉo erèm̃i zi re dimbiṉô pa gô ntiṉa yi rere: sambô erery’edu zi re zi pa jaṉ’ilônd’imbya zi be begô awalô g’ôgôṉi.
10N’aṽambyô yè n’aṉaga, awulya inè: Sambô, azwè ga lend’ande? 11Awiṉizi yè waô inè: Ayè yi re ni ngoy mbaṉi, e ga ve yè yi re e zele, n’ayè yi re n’inya, e ga lende kè egolaṉi mèmô.
12Aṽyeṉi kè ipublikan gô batizô, n’awulinyi waô yè inè: Ôṉènji, azwè ga lend’ande? 13Awiṉizi yè waô inè: Awongaṉi vyagaṉô ni nt’are ṉwè sômbyô pa.
14Isozè kè s’aṽambyi yè inè: Azwè ga lend’ande? Awiṉizi yè waô inè: Awongiṉaṉi ôm’edu ezom̃a ni ngulu, ge n’itemiza, ko dwaṉaṉi dwèrè n’ipi saṉi.
15Gw’avegagi iṉongo nyôdu mpengiṉaga, ni njèkèlyaga gw’irèm̃i yaô g’ômwanja wi Yôan, twa pa ayè ne Krist, 16awiṉizi Yôan, awulinya waôdu inè: Mi batiza ṉwè rèti n’aṉingô; ndô ayè yi bya gô nyum̃i yam̃ are ni ngulu vyagaṉô na myè, are myè e zele n’inyanga nyi puruṉ’igoli y’intyôzô sè s’atanga. Ayè be batiza ṉwè n’Iṉiṉ’Iṽya n’ôgôṉi. 17Are n’evèpi zè g’ôgo wè; e be jombuny’irèviṉô nyè ny’ilônda pupu, ko yè kum̃inya bile awela sô gw’egari zè, ndô wulu e be peza yô g’ôgôṉi wi re w’aṉim̃e.
18Yeṉo Yôan agambiṉ’iṉongo ntyangô mbya, n’arô bulinyi yè waô agamb’am̃èṉè am̃enge m’ôrevuṉô. 19Ndô gw’arevunyô Erod, y’ôvangiṉi, ne Yôan g’ômwanja w’Erôdyas, y’ômwantô wa mwô’ngi yè, na g’ômwanja w’isam̃u imbe yôdu y’aliwô y’adendyô yè, 20Erod arô kundi gw’ibe sè sôdu igamba nyiṉo, inè, aweli Yôan gô ntyôgô.
21N’arweṉi nè, gw’aṽatizô iṉongo nyôdu, Yesu aṽatizô kè; na gw’agambiṉagi yè, ôrôṽa w’aṉungwi, 22n’azum̃iṉ’Iṉiṉ’Iṽya gôre yè egolaṉi z’ôkuṽa, ga ibembe. N’ayogaṉô inyôy avila g’ôrôṽa inè: Awè n’ômwaṉi wam̃ wi tondô myè; mi jeṉe mbya gôre wè.
23Yesu avegagi pyèrè n’agôm̃i m’impum̃’ararô g’ôṉèro wè gw’avakilyi yè gô nènja; avegagi kè nt’avikilyi aṉaga, ômwaṉa wi Yôsèf, y’ômwaṉa w’Eli, 24y’ômwaṉa wi Matati, y’ômwaṉa wi Levi, y’ômwaṉa wi Mèlki, y’ômwaṉa wi Yanay, y’ômwaṉa wi Yôsèf, 25y’ômwaṉa wi Matatyas, y’ômwaṉa w’Amosi, y’ômwaṉa wi Naum̃u, y’ômwaṉa w’Esli, y’ômwaṉa wi Nagay, 26y’ômwaṉa wi Maat, y’ômwaṉa wi Matatyas, y’ômwaṉa wi Semèy, y’ômwaṉa wi Yôsèk, y’ômwaṉa wi Yoda, y’ômwaṉa wi Yôanan, 27y’ômwaṉa wi Resa, y’ômwaṉa wi Zôrôbabèl, y’ômwaṉa wi Salatyèl, y’ômwaṉa wi Neri, y’ômwaṉa wi Melki, 28y’ômwaṉa w’Adi, y’ômwaṉa wi Kôsam, 29y’ômwaṉa w’Elmadam, y’ômwaṉa w’Er, y’ômwaṉa wi Yesu, y’ômwaṉa w’Elyezèr, y’ômwaṉa wi Yôrim, y’ômwaṉa wi Matat, y’ômwaṉa wi Levi, 30y’ômwaṉa wi Simeôn, y’ômwaṉa wi Yuda, y’ômwaṉa wi Yôsèf, 31y’ômwaṉa wi Yônam, y’ômwaṉa w’Elyakim, y’ômwaṉa wi Melea, y’ômwaṉa wi Mena, y’ômwaṉa wi Matata, y’ômwaṉa wi Natam, 32y’ômwaṉa wi David, y’ômwaṉa wi Yisa, y’ômwaṉa wi Yôbèd, y’ômwaṉa wi Booz, y’ômwaṉa wi Salmôn, y’ômwaṉa wi Naason, 33y’ômwaṉa w’Aminadab, y’ômwaṉa w’Admin, y’ômwaṉa w’Arni, y’ômwaṉa w’Esrom, 34y’ômwaṉa wi Farès, y’ômwaṉa wi Yuda, y’ômwaṉa wi Yakob, y’ômwaṉa w’Izaak, y’ômwaṉa w’Abraam, y’ômwaṉa wi Tara, 35y’ômwaṉa wi Nakor, y’ômwaṉa wi Seruk, y’ômwaṉa wi Ragau, y’ômwaṉa wi Falèk, y’ômwaṉa w’Ebèr, y’ômwaṉa wi Sala, 36y’ômwaṉa wi Kaynam, y’ômwaṉa w’Arfakisad, y’ômwaṉa wi Sèm, 37y’ômwaṉa wi Nôa, y’ômwaṉa wi Lamèk, y’ômwaṉa wi Matusala, y’ômwaṉa w’Enoki, y’ômwaṉa wi Yarèd, y’ômwaṉa wi Maleleèl, 38y’ômwaṉa wi Kaynan, y’ômwaṉa w’Enos, y’ômwaṉa wi Sèt, y’ômwaṉa w’Adam, y’ômwaṉa w’Anyambyè.
Đang chọn:
Luk 3: MYE
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1927.