Luk 4
4
1Awinyi Yesu avila gô Yoridan, jônya pa ralye n’Iṉiṉ’Iṽya, n’agèndizô n’Iṉiṉa gw’itôve; 2alwaṉi vovo agôm̃i m’intyugu anay nsoryôgô ne Satan. Gw’intyugu mèsoṉo e pa ny’ezom̃a, na gw’amaṉi sô, ayogyô yè njaṉa. 3N’awulinyô yè ne Satan inè: J’awè ômwaṉa w’Anyambyè, zômby’idô nyiṉo inè, nyi ga galwe mpèmba. 4N’awiṉizô yè ne Yesu inè: Are tèndô pa inè: ’Môṉaga alwaṉa bo kaô ni mpèmba dadyè.
5Agèndyô yè ne Satan, arum̃inyè aṉongo mi ntye môdu v’igamba ny’agwaṉa. 6N’awulinyô yè ne Satan inè: Mi be po inyanga nyiṉo nyôdu, n’ivenda ny’aṉongo miṉo; konde nyi re pô pa myè, na mi be pa nyô gôr’ôma wi tondô myè. 7Sambô j’aw’asaviṉa myè, nyi be dwaṉ’inyo. 8N’awiṉizô yè ne Yesu inè: Are tèndô pa inè: Zaviṉe Rerè, Anyambyè yo, ko janjiṉè dadyè.
9Arô kèndyô yè ne Satan gô Yerusalèm, alôṽyè g’ômwanja wi nagô y’Anyambyè, awulinyè inè: j’awè ômwaṉa w’Anyambyè, vôsuny’ôkuṽi wo gô ntye; 10konde re tèndô pa inè: E be sômbya iyenjèl sè g’ômwanji wo, ko sô bandam̃iṉo; 11na inè, si be twaṉo gw’ago maô, awè vende duke ntyôzô yo gw’idô. 12N’awiṉizô yè ne Yesu inè: Are bulyô pa inè: Alembe Rerè, Anyambyè yo.
13Gw’aliwô Satan amaz’isorya sôdu, alubwi avila gôre yè v’egômbe.
14Awinyi Yesu ni ngulu y’Iṉiṉa gô Galile; n’ayagayag’elum̃i zè gô ntye yôdu vingôvingô. 15N’aṉènji yè gw’inagô saô s’isoṉo, n’azum̃inyô yè n’aṉaga waôdu.
16Aṽyeṉi yè gô Nazarèt, nkala y’avôm̃izô yè, n’ayingiṉi yè gô nagô y’Anyambyè gô ntyugu yi soṉo, ga nt’avegagi ntyale yè. N’agum̃aṉi yè aranguṉa. 17N’avenyô yè ezangô z’ôvogisi Yezaya. N’aṉunguṉi yè ezangô, alènge mbôra yi re tèndô pa inè: 18Iṉiṉa nya Rerè nyi re gôre myè, konde are sagya pa myè gô bunguṉe ntyangô mbya gôr’ikuge; are tôm̃a pa myè [gô jinga waô wi re n’irèm̃a tukyô pa,] 19gô myez’ikôte inè, yi be tigô yangayanga, n’apoku inè, mi be tô jeṉa, na gô tiga yanga waô wi re bangatyô pa, gô kambiṉ’ômpum̃’ômbya wa Rerè.
20N’aṉunji yè ezangô, ava zô gôr’ôma wi pengiṉa, n’alwaṉi yè baru. Na waôdu w’avegagi gô nagô yi soṉo w’azindiṉi yè ngolongolo.
21N’avakilyi yè gô bulinya waô inè: Ṉèṉo wiṉo agamba miṉo m’irèndo mi re ṉwè jogo pa m’atweṉi rèti. 22Na waôdu w’arakilyi g’ômwanji wè, am̃ama g’ômwanja w’agamba m’ikèsi m’agogwi avila g’ôgwaṉi wè, n’awulyi waô inè: Wiṉo arang’ômwaṉa wi Yôsèf? 23N’awulinyô waô ne Yesu inè: E zele mpaga, aṉwè be kôviṉa myè nkôgô yiṉo inè: Ôganga, ying’ôkuṽi womè; n’aṉwè be bulinya myè inè: Ôsam̃u edu wi re zwè jogo pa inè, w’alendi wô gô Kapernaum, lenda wô kè vèṉo gô ntye yomè. 24Ndô arô bulyi nè: Rèti, mi bulinya ṉwè inè, e zel’ôvogisi wi bongô gô ntye yèmè. 25Giligili mi bulinya ṉwè inè: Gw’intyugu s’Eliya avegag’itika gw’Israèl, gw’aṉunjyô ôrôṽa impum̃’irarô n’agwèli ôrôṽa, ko njaṉa mpôlô dwaṉa gô ntye yôdu; 26ndô Eliya e pa tôm̃ô du gôre waô, ndô arôm̃yô gô Sarepta, gô ntye yi Sidôn, gôr’ôtika. 27Avegagi kè aṉag’awenge w’avegagi n’inkaṉi sa gelô gw’Israèl, gw’intyugu s’Elisa y’ôvogisi; ndô gôre waô e pa jing’ôma, ayingyô kaô Naaman ya mwô’Sirya.
28Gw’ayogyô waô isam̃u yiṉo, waôdu w’avegagi gô nagô yi soṉo w’ayônyi n’eguṉu. 29N’agum̃aṉi waô, azugè avila gô nkala, agèndyè kwanga gw’esôsôlô zi nômba, y’avegagi nôgô pe nkali yaô, gô bele pungè ôlôlôṽa g’ôlonga. 30Ndô Yesu avyagaṉi gô garegare yaô, nkombizag’ ôgèndo wè.
31N’azum̃iṉi yè gô Kapèrnaum, nkala yi Galile, n’aṉènjagi yè waô gô ntyugu yi soṉo. 32Am̃ami waô inènji sè, konde agambagi n’inyanga.
33Gô nagô yi soṉo avegag’ôma w’avegagi n’iṉiṉ’iṽe ny’isèkè, n’arôngi yè n’inyôy ivôlô inè: 34Ezom̃a nde zi re zwè na wè, awè Yesu yi Nazarèt? Ô re bya pa gô jiliza zwè. My’avôrô wè, awè Ôma wi nkèrè w’Anyambyè. 35N’azèmbyô nyô ne Yesu, awulya inè: Lwaṉa dodo, ko kogwa avila gôr’ôma mèwoṉo. N’iṉiṉ’iṽe ny’avôsunyi ôma mè gô garegare y’aṉaga, agogwa avila gôre yè, ndô nyi pa jeṉize yè nkaza. 36N’am̃ami waôdu pôlômè, awulyaṉa inè: Igamba nde nyiṉo? Konde e sômbya n’inyanga ni ngulu aṉiṉa m’isèkè, ko mô kogwa! 37N’ayagayagi elum̃i zè gô mbôry’edu gô ntye mèyoṉo vingôvingô.
38Agogwi yè avila gô nagô yi soṉo, ayingiṉa gô nagô yi Simôn. Ôgoy ômwantô wi Simôn ayogogô ijôrô sipôlô, n’agweni waô yè inkolo g’ômwanji wè. 39Agum̃aṉi yè gôre yè, azèmb’ijôrô, n’alubw’ijôrô avila gôre yè. N’agum̃aṉi ômwantô pelè ayanjiṉa waô.
40Gw’agèndi nkômbe, waôdu w’ayogiṉôgô ne mongi yaô nkany’edu, w’aṽagi waô gôre yè. N’aralyi yè ago mè gôr’ôm’edu gôre waô, ayinga waô. 41Aṉiṉ’ambe kè m’agogwi avila gôr’awenge ntôngaga inè: Awèn’Ômwaṉa w’Anyambyè. Ndô azèmbi mô ko ayivira mô kamba, konde m’amyeṉi nè, ayè ne Krist.
42Gw’ayenj’ôwenja, agogwi yè agènda gô mbôra ya kendekende. N’awutyô yè n’aṉaga, aṽyeṉi waô gôre yè; w’aṽeli gô simbyè inè, alubwa avila gôre waô. 43Ndô awulinyi yè waô inè: Mi ga gambiṉe ntyangô mbya y’iṉongo ny’Anyambyè gw’inkal’im̃ori kè; konde my’arôm̃yô gô ntiṉa yiṉo. 44N’agambiṉi yè gw’inagô si soṉo si Galile.
Đang chọn:
Luk 4: MYE
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1927.