Luk 5
5
1Gw’avegagi Yesu kum̃aṉa pa g’ôsaṽa w’eliṽa zi Genezarèt, aṉag’awenge w’aṽyeṉi gôre yè gô jogw’igamba ny’Anyambyè; 2n’ayeṉi yè lende ṽaṉi g’ôsaṽa w’eliṽa; ndô iyôṉisi y’intyuè y’aliwô y’atalwi avila gô yô gô jôvuṉe lôṽi yaô. 3N’agweṉi yè gw’elende z’aṉivyô ne Simôn, n’awulinyè yè inè, e ga zanjiṉe zô kwè avila gô ntye. N’alwaṉi yè baru, aṉènj’aṉaga avila gw’elende.
4Gw’azukizi yè gô kamba, awulinyi Simôn inè: Gogwaṉi g’ôronga, ko pungaṉi lôṽi yaṉi gô dura. 5Awiṉizô yè ne Simôn inè: Rera, azw’ajanj’ôgwèra wiṉo wôdu, ko zwè alèng’ezom̃a; ndô gw’igambi nyo, mi be pung’elôṽa. 6Gw’avungi waô zô, w’agôt’intyuè sinyengemè, n’avakilyi lôvi yaô gô juwa. 7N’avèpi waô indegô saô s’avegagi gw’elend’em̃ori gô bya gô nunguṉa waô. Aṽyeṉi waô, ayônye lende yôdu ṽaṉi ralye, ko yô pakilya gô dom̃iṉa. 8Ndô Simôn Pyère, gw’ayeṉi yè yeṉo, avôswi gw’agôlô mi Yesu, awulya inè: Rera, lubwa avila gôre myè, konde my’ ôm’ombe. 9Konde am̃ami pôlô, ayè na waôdu w’avegagi na yè, g’ômwanja w’idura s’intyuè s’aluryô waô. 10Na yeṉo kè Yakobu, ni Yôan, awaṉa wi Zebeday, w’ayanjagi ta ni Simôn. N’awulinyi Yesu Simôn inè: Arya, avila vèṉo ô be kôtag’aṉaga. 11Na gw’ayèzi waô lende yaô gô ntye, w’arigi yom̃a yôdu, azôngè.
12Arweṉi gw’avegagi Yesu gô nkala mori, vôna, avegag’ôma ralye ni nkaṉi ya gelô, gw’ayeṉi yè Yesu, avôswi g’ôzô wè gô ntye, agwenè inkolo inè: Rera, j’aw’ajivira, awè ko panga myè pupu. 13N’anyonyuṉi Yesu ôgo wè, awatè, awulya inè: Mi jivira, lwaṉa pupu. N’alubwi nkaṉi ya gelô pelè avila gôre yè. 14N’azômbyè yè inè, awuliny’ôma. Ndô gèndaga, ko tum̃iny’ôkuṽi wo gôre miṉisè, ayira gw’ijombunyô so nt’azômbyi Môsès, ko yô dwaṉ’ôyeṉi gôre waô.
15Ndô elum̃i zè z’ayagayagi pôlô vyagaṉô, n’aṽyeṉi aṉag’awenge gô jogo na gô jingô inkaṉi saô. 16Ndô ayè arômb’ôkuṽi wè, agènda gw’imbôra si re si ze n’aṉaga, agambiṉa.
17Arweṉi ntyugu mori inè: Yesu aṉènjagi. N’avegagi vovo ifarisi n’iṉènji y’ivanga y’aliwô y’abyeṉi avila gô nkaly’edu yi Galile, n’avila gô Yuda, n’avila gô Yerusalèm; ni ngulu ya Rerè y’avegagi na yè gô jinga. 18Na vôna, aṉaga w’aṽagi g’ôdô ôma w’avegagi juwa p’awogo, n’awutagi waô nt’are waô ko jinginyè alimbiṉè g’ôzô wè. 19Ndô gw’arweṉi nè wi pa dènge mpoṉo yi re waô ko jinginyè g’ômwanja w’ibuṉa s’aṉaga, w’avandi g’ômwanjamwanja wi nagô, arôla wô, azônyè n’ôdô wè gô garegare y’aṉaga, g’ôzô wi Yesu. 20Gw’ayeṉi Yesu ibekelyi saô awulyi nè: Ôṉôm̃e, ibe so si re wè nyezô pa. 21Avakily irèndisi n’ifarisi gô pikilya, awulya inè: Mande wiṉo e pèdy’Anyambyè? Mande re ko jolye nyez’ibe, kaô Anyambyè dadyè? 22Ndô Yesu amyeṉ’ipikilyi saô awiṉizi yè, awulinya waô inè: Aṉwè pikily’ande gw’irèm̃i yaṉi? 23Ezom̃a nde zi re dèla vyagaṉô gô bulya inè: Ibe so si re wè nyezô pa, mbè gô bulya inè: Ṉongwa, ko kènda? 24Ndô gôre ṉwè gô mya inè, Ômwaṉa w’ôma are ni ngulu gô ntye gô nyez’ibe, abulinyè ôma w’apegaga juwa p’awogo inè: Mi bulinyo inè, ṉongwa, ko tômbiṉ’ôdô wo, agèndaga gô nagô yo. 25N’aṉongwi yè pelè gw’azô maô, arômbiṉ’ôdô w’alèwôgô yè, agèndaga gô nagô yè, nsum̃inyag’Anyambyè. 26Am̃ami waôdu pôlo, azum̃iny’Anyambyè; n’agôtyô waô n’itya, awulya inè: Azw’are jeṉa p’isam̃u yi mamô ṉèṉo wiṉo.
27Isam̃u yiṉo vya, agogwi Yesu, n’ayeṉi yè publikan, ini nyè ne Levi, dwaṉa pa baru gô mbôra yi bongô mpagô. N’awulinyè yè inè: Zônga myè. 28N’arigi yè yom̃a yôdu, agum̃aṉa, azôngè.
29Aṉambiṉô yè ne Levi ôgeṽe ômpôlô gô nagô yè, n’ipublikan sinyenge n’aṉag’am̃ori w’avegagi baru na waô gô tavulu. 30N’avum̃avum̃’ifarisi n’irèndisi yaô, n’awulinyi waô iṉèngi yè inè: Ntiṉa nde yi nya ṉwè ayonga n’ipublikan n’aṉag’aṽe? 31Awiṉizi Yesu awulinya waô inè: Waô wi re mbyambye wi zele n’isolo ny’ôganga, ndô waô wi re n’inkaṉi. 32Mi pa bya gô fwey’aṉag’aṽya, ndô aṉag’aṽe gw’iniga si nkôndi.
33N’awulinyi waô yè inè: Iṉèngi yi Yôan, na y’ifarisi yi peng’esônge inyongo sinyenge agambiṉa, ndô iyo yi nya ni jonga. 34Awulinyô waô ne Yesu inè: Aṉwè ko pang’indegô s’ôṉôm̃e wi jômba gô peng’esônge, gô p’ar’ôṉôm̃e wi jômba na waô? 35Ndô intyugu si be bya, si be bongiṉô waô ôṉôm̃e wi jômba, gambèṉè wi be peng’esônge gw’intyugu mèsoṉo. 36Agôviṉi waô kè nkôgô inè: E zel’ôma wi jôkuṉ’erèndè zi ngoy nyoṉa gô fwela zô gô ngoy nungu, g’egômbe e be jôkuṉe ngoy nyoṉa, n’erèndè zi ngoy nyoṉa zi ze kwezangaṉe ni ngoy nungu. 37E zel’ôma wi jir’iv’inyoṉa gw’imbute inungu si banda, g’egômbe iv’inyoṉa nyi jôṉ’imbute ko nyô jiraṉa, ko imbute bundakaṉa. 38Ndô iv’inyoṉa nyi ga yirô gw’imbute inyoṉa. 39E zel’ôma re jonga p’iv’ilungu, ko bel’inyoṉa, konde e bulya inè: Ilungu nyi r’iṽya.
Đang chọn:
Luk 5: MYE
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1927.