Luk 6
6
1Arweṉi gô ntyugu yi soṉo, fweyô pa inè, yi mbaṉi‐nônga, inè, Yesu avyagaṉi gw’intyaga s’ibile. N’alul’iṉèngi yè ibile anya sô, nkilaga sô gw’intyom̃è saô. 2Ndô awèwo w’ifarisi w’awulinyi waô inè: Ntiṉa nde yi denda ṉwè ndaga yi re yi ze kwèkwè gô dendô gô ntyugu yi soṉo? 3Awiṉizyô waô ne Yesu inè: Aṉwè pa tanguṉa ga nt’alendi David, gw’ayogyô yè njaṉa, ayè na waô w’avegagi na yè; 4ga nt’ayingiṉi yè gô nagô y’Anyambyè, awonge mpèmba yi dôṽyô g’ôzô wi Yeôva, anya yô, ava kè waô w’avegagi na yè, yi re yi zele kwèkwè gô nyô, kaô imiṉisè dadyè? 5N’awulinyè waô inè: Ômwaṉa w’ôma ayè n’ôvangiṉi wi ntyugu yi soṉo.
6Arweṉi g’ôwenja wi soṉo mori inè, Yesu ayingiṉi gô nagô yi soṉo aṉènja. N’avegagi vovo ôṉôm̃e w’avegagi n’ôgo wè ôṉôm̃yè juwa pa. 7Irèndisi n’ifarisi w’aṽèmbagi Yesu inè, vende twa e be jinga gô ntyugu yi soṉo, ko waô dènge ntiṉa yi sozizè. 8Ndô amyeṉ’ipikilyi saô, n’awulinyi yè ôma w’avegagi ôgo juwa pa inè: Gum̃aṉa gôre gô garegare. N’agum̃aṉi yè gôre. 9N’awulinyô waô ne Yesu inè: Mi bambya ṉwè inè, are kwèkwè gô dende mbya gô ntyugu yi soṉo, mbè gô dende mbe, gô sungiṉ’em̃èṉo mbè gô jôṉa? 10Vovo avôni yè, waôdu vingôvingô, n’awulinyi yè ôṉôm̃e inè: Nyonyuṉ’ôgo wo. N’alendi yè yeṉo, n’awinyi ôgo wè mbyambye.
11Ayônyi waô n’eguṉu, awônde môndo nt’are waô ko dendiṉe Yesu.
12Gw’egômbe mèzoṉo, agèndi Yesu gô nômba gô kambiṉa, n’alwaṉi yè ôgwèra wôdu nkambiṉag’ Anyambyè. 13Gw’ayenj’ôwenja, aweyi yè iṉèngi yè, n’avinji yè avila gôre waô igôm̃i n’aṽaṉi n’aṽèti yè waô inè, rôm̃i:
14Aṽèti Simôn inè, Pyère; Andru, ya mwô’ngi yè; 15Yakobu; Yôan; Filipi; Bartelemi; Matay; 16Tôma; Yakobu, y’ômwaṉa w’Alifas; Simôn, y’aweyôgô inè, Zelôte; Yudi, y’ômwaṉa wi Yakobu; ni Yudas Iskaryot, y’alwaṉ ’ôgondisi.
17N’azum̃iṉi yè na waô, agum̃aṉa gô mbôra ya vèvèlè, n’aliṽinyi yè vovo iṉèngi yè imyenge, n’aṉag’awèṉè awenge avila gô Yuda yôdu, n’avila gô Yerusalèm, n’avila gô ntye yi Tir na yi Sidôn, g’ôzamba wi ntyuṽa. W’aṽyeṉi gô jogw’agambi mè, na gô jingô inkaṉi saô. 18Waô w’azokolyô n’aṉiṉ’ambe w’ayingyô. 19N’aṉaga waôdu w’aṽeli gô bwatè, konde ngulu y’agogwi avila gôre yè ayinga waôdu.
20Arômbiṉi Yesu antyo mè gôr’iṉèngi yè, awulya inè:
Ôzaviṉô gôre ṉwè ikuge, konde iṉongo ny’Anyambyè inyaṉi!
21Ôzaviṉô gôre ṉwè yi jogo njaṉa vèṉo, konde aṉwè be jôrizô!
Ôzaviṉô gôre ṉwè yi deṉa vèṉo, konde aṉwè be jeṉ’igeṽa!
22Ôzaviṉô gôre ṉwè, gô be bikô ṉwè n’aṉaga, na gô be tômba waô ṉwè avila gô nkumbi yaô, aroṽa ṉwè, awal’ani maṉi gw’ezom̃’eṽe, g’ômwanja w’Ômwaṉa w’ôma! 23Yeṉaṉi mbya gô ntyugu mèyoṉo, ko dôgwaṉi n’igeṽa, konde ipi saṉi si be dwaṉ’ipôlô g’ôrôṽa; konde yeṉo alendiṉ’ireri saô ivogisi.
24Ndô azile gôre ṉwè kiti, konde aṉw’are dènga p’ôzindyô waṉi!
25Azile gôre ṉwè yi re jôra pa vèṉo, konde aṉwè be jogo njaṉa!
Azile gôre ṉwè yi joṉa vèṉo, konde aṉwè be dwaṉa n’iwoga avôviz’antyoṉi!
26Azile gôre ṉwè gô be sum̃inyô ṉwè n’aṉaga waôdu, konde ireri saô s’alendiṉ’ivogisi y’inôka yeṉo.
27Ndô mi bulinya ṉwè yi pôganyô myè inè: Rôndaṉ’ilôvalôvi yaṉi, ko dendaṉi mbya gôre mongi wi bika ṉwè! 28Zaviṉaṉi waô wi doga ṉwè, ko kambiṉaṉi Anyambyè g’ômwanja wa mongi wi dendiṉa ṉwè mbe. 29Jog’ôma abôlo gw’iwugu, gegunyè im̃ori kè. Jog’ôma abongiṉo ôrôgômbi wo, alegè kè gô tô bonge ngoy yo. 30Va gôr’ôm’edu wi bambyo, n’ayè yi bongiṉo yom̃i yo arô bambyè yô. 31Nte bela ṉwè inè, aṉaga wi ga lendiṉe ṉwè, lendiṉaṉi waô kè mbela mèmô. 32J’aṉw’atonda waô wi tonda ṉwè, akeṽa nde mi re gôre ṉwè? Konde vangaṉ’aṉag’aṽe kè wi tonda mongi wi tonda waô. 33J’aṉw’adende mbya gôre waô wi dendiṉa ṉwè mbya, akeṽa nde mi re gôre ṉwè? Konde vangaṉ’aṉag’aṽe kè wi dende mbela mèmô. 34Na j’aṉw’asunga waô wi re ṉwè ko deṽiṉa gô tô dènga, akeṽa nde mi re gôre ṉwè? Vangaṉ’aṉag’aṽe kè wi sung’aṉag’aṽe, gô tô dènge mbela mèmô. 35Ndô rondaṉ’ilôvalôvi yaṉi, ko dendaṉi waô mbya, azunga igum̃u fo nyi tô dèng’ezom̃a. Gambèṉè ipi saṉi si be dwaṉ’ipôlô, ko ṉwè dwaṉ’awaṉa w’Ôma w’igôṉômè, konde are ni nkèngo gôr’abodyè n’aṽe. 36Sambô lwaṉaṉi ni nkèngo ga nt’are Reri yaṉi ni nkèngo.
37Ayèkèlyaṉi, gambèṉè aṉw’ayèkèlyô; avaṉi aṉaga ôgara, gambèṉè aṉwè av’ôgara; nyezaṉi, gambèṉè aṉwè be nyezô kè. 38Vaṉi, gambèṉè aṉwè be pô: aṉaga wi be jônya gôre ṉwè egèṉizô eṽya ralye, avitakaṉa zô, azugyazugya zô, ko zô dwaṉa kaô mpônswavônswaga; konde egèṉizô zi kèṉizô ṉwè, zô be tô kèṉizô gôre ṉwè.
39Agôviṉi yè waô nkôgô yiṉo kè inè: Ipoku nyô ko jolye kèndy’ipoku? Aranga inè, waô aṽaṉi wi be pôswa gw’iṽemba?
40Ôṉèngi e zele vyagaṉô n’ôṉènji wè; ndô ôṉèngy’edu wi re kekizô pa wi be dwaṉa g’ôṉènji wè.
41Ntiṉa nde yi pôno nkizi yi re gw’intyo nya mwô’ngi yo, ndô ô pa pikily’ôkoga wi re gw’intyo nyomè? 42Ge awè ko bulinya mwô’ngi yo sèṉi, inè: Mwô’ngi yam̃, yivira myè tômbe nkizi yi re gw’intyo nyo, awèmè w’avôn’ôkoga wi re gw’intyo nyomè? Awè, ômbyagwaṉa, lônge tômb’ôkoga wi re gw’intyo nyomè, gambèṉè ô be jeṉa bômbe gô tômbe nkizi yi re gw’intyo nya mwô’ngi yo.
43E zel’erer’eṽya zi jaṉ’ilônd’imbe, ge erer’eṽe jaṉ’ilônd’imbya. 44Konde erery’edu zi myô n’ilôndi yè. Aṉaga wi pa dul’ifigi avila gw’arèndè, ge ôlônda wi pang’ivè avila gw’imbara. 45Ôm’ombya e koguny’agamb’ambya avila gw’ibuṉa s’ômbya w’ôrèm̃i wè, n’ôm’ombe avila gw’ibuṉa s’ibe s’ôrèm̃i wè, e koguny’agamb’ambe; konde ôgwaṉi wè wi kamb’isam̃u yi re buṉa pa g’ôrèm̃a.
46Ntiṉa nde yi fweya ṉwè myè inè, Rera, Rera! ko ṉw’alenda nte bulya myè? 47Ôm’edu e bya gôre myè, ayogw’agambi mam̃, alenda mô, mi be teva ṉwè ôma re ko kolaṉô na yè. 48Ar’egolaṉi g’ôm’aṉôgi nagô, arumba polô gô ntye, alôṽye ntiṉa yi nagô gw’idô. Gw’avandi eṉingô evôlô, ntônda y’awôlagi nagô mèyoṉo, ndô yi pa dènge ngulu yi sugyazugya yô, konde y’aliwô y’aṉôgyô mbyambye. 49Ndô ayè yi jogo, ko alenda mô, ar’egolaṉi g’ôm’aṉôgi nagô gô ntye ôseṉa fo; awôlyô yô n’intônda, arugwi yô pelè, n’itugwa si nagô mèyoṉo s’avegagi sipôlô.
Đang chọn:
Luk 6: MYE
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Published by the British and Foreign Bible Society in 1927.