प्रेरित.कामी 18
18
कुरिन्थी सहर रे पौलुस
1नोःआँ बात तयोम पौलुस एथेंस बाई केते, कुरिन्थी सहर सेअ नाय। 2होनाःड़े हुनी के अक्विला नुमू रिनी मियांड जाहुदी भेटाव नेनाय, हुनी पोनतुस राईज रे ताहीनोः वाला ताही नेनाय। हुनी अपन आउराईत प्रिसकिल्ला ते लोः हाले रे रेगी इटली तरअः हीःग ताही नेनाय, एता लःअय ची कलौदियुस जामा जाहुदीकु के रोम तरअः उडुंग जुनोः रअः हुकूम एमा थिलकुआय, पौलुस हुनी लोः भेंटोः सेन नेनाय। 3पौलुस हुंकिन लोः ताही केते कामी एहेःब लःअय एता लःअय ची हुंकिन आला ताम्बु बनाव रेनअः काम धंधा ताही नेना। नुई तेकर हुनी आला मियांड धंधा ताही नेना, 4पौलुस जामा सथाअ हिला बिनती ओड़ाअ रे कंहड़ी गथाय केनाय, जाहुदी तेकर युनानीकु के ससमझाव रेनअः कुरनीसे केनाय।
5जब सिलास तेकर तिमुथियुस मकिदुनिया राईज तरअः हीःग नेनाकिन, दो पौलुस अपन पुरा समय बचन रअः परचारे केनाय, तेकर जाहुदीकु के ईसु गी ख्रीस्त हेके मेन केते गोवाही एमा कु केनाय। 6बकिर हुंकू बिरोध तेकर निन्दाअ दाकु दो, हुनी अपन गेन्दरअ कुटा केते, “आपे आला मयोम आपे आला बोहोअ रिगी ताहीनोः, ईङ दो बेकासुर एदानिया। नहाअः तरअः ईङ एटाअ जाईतकु दुबाःड़े सेनिङ” मेन केते हुंकू के बेता लिकुआय। 7हुनी हुंकू के बाईःग तु केते, तीतुस युसतुस नुमू रिनी परमेसर आली भक्त एटाअ जाईत आला ओड़ाअ रे हीःग नेनाय, हुनी आला ओड़ाअ ताय बिनती ओड़ाअ तरअः सटले ताही नेना। 8बिनती ओड़ाअ रिनी अगुवा किरीसपुस आलकु गोटे ओड़ाअ रिनकु समेत, परभु रे बिसवास लअकु तेकर ढेर कुरिन्थी रे ताहीनोः कु होः पौलुस आला बात के आयुम केते बिसवास लअकु, तेकर बतिस्मा ईदी लअकु।
9परभु मि-निदा पौलुस के दर्सन एम केते बेता लियाय, “आलुम बोर बकिर कंहड़ी इदीमे, चुपचाप आलुम ताही कोअ। 10एता लःअय ची ईङ आम लोः एदानिङा, ओके होः आम के तीः बिरिःड केते हानाव एरकु दाड़ी मेआ, एता लःअय ची नोःआँ सहर रे ईङ आलकु ढेर होड़ एदान कुआ।” 11हिना लःअय पौलुस होनाःड़े परमेसर आला बचन सिखाव-यआते, डेढ़ बरीस जगुत ताही नेनाय।
12जे बेरा गल्लियो अखाया, राईज रिनी राजपाल ताही नेनाय, दो जामा जाहुदीकु मिलाव केते पौलुस के ससःब हीःग नेनाकु, तेकर हुनी के नेयाय रअः गद्दी ईदी केते, 13नुई होड़ परमेसर आला आराधना नोकान सिखाव कुआय, ची जे धरम पुथी रआ कनहुन तरअः एटाअ लकान एदनाअ मेन केते कंहड़ी लअकु।
14जे बेरा पौलुस क-कंहड़ी वाला गी ताही नेनाय, ची गल्लियो जाहुदीकु के बेता लिकुआय, “ए जाहुदीकु जदि नोःआँ खपतान चाहे गुनाह रेनअः बात ताही कोआ होले ईङ जरूर साहस से आपे आला बात के आयुम किईङ। 15बकिर नोःआँ झगड़ा थोड़ेक सबद चाहे नुमू, तेकर आपे आला धरम पुथी रेनअः कनहुन रअः बारे एदनाअ, दो आपे गी पाड़ी जुनोःपे, एता लःअय ची नोकान बात रअः ने-नेयाय ईङ काईंग चहाआ।” 16तेकर हुनी हुंकू के नेयाय रअः गद्दी तरअः उडुंग ची किदकुआय। 17तब जामा जाहुदीकु बिनती ओड़ाअ रिनी अगुवा सोस्थेनेस के सःब केते, नेयाय रअः गद्दी मड़ांग रे हुमाअ लियाकु, बकिर गल्लियो नोःआँ रेनअः एतान होः काय फिकिर लआ।
अन्ताकिया रे पौलुस आला रूवाड़ोः
18 #
गन 6:18
पौलुस ढेर दिन जगुत कुरिन्थी रे ताही नेनाय, फिन बोकोकु तरअः बिदा केते, प्रिसकिल्ला तेकर अक्विला लोः जहाज रे सिरिया सेनोः लःअय तेयार तहिनाय हिमीन रे, हुनी करार थिलाआय लःअय किंख्रिया रे बोहोअ ताय के खुराव थिलाआय। 19हुंकू इफिसुस सोदोर केते हुंकिन के होनाःड़े बाईःग तु लिकिनाय, तेकर आएंग बिनती ओड़ाअ सेन केते जाहुदीकु लोः कंहड़ी-गथा लःअय। 20जब हुंकू आले लोः आउर काइटको दिन ताहिन मे मेन केते, पौलुस लोः गोहराव नेनाकु बकिर हुनी काय मनाव नेना। 21बकिर बिदायोः बेरा “जदि परमेसर चहाआय होले आपे दुबाःड़े फिन हिजोईंग” मेन केते बेता लिकुआय। तब हुनी इफिसुस तरअः जहाज रे रकाःब केते सेनोः नाय।
22तेकर कैसरिया रे सोदोर केते जिरोसालेम सेन नेनाय, तेकर कलीसिया रिनकु होड़ के जोहार केते अन्ताकिया रे सेनोः नाय। 23पौलुस थोड़ेक दिन होनाःड़े ताही नेनाय, आउर फिन उडुंग केते हुनी पखी तरअः गलातिया तेकर फ्रुगिया रअः पहटा के दांड़ा-यआते जामा चेलाकु के ढाढ़स एमा लिकुआय।
इफिसुस सहर रे अपुल्लोस
24हिमीन रे अपुल्लोस नुमू रिनी मियांड जाहुदी इफिसुस रे हीःग नेनाय, जेकर जनम सिकन्दरिया रे हुयाव ताही नेना। हुनी सवांगिया वकता ताही नेनाय, तेकर धरम पुथी के बढ़ियाँ से पाड़ी केनाय। 25हुनी के परभु आला होरा रेनअः गुन भेटाव थिना, हुनी मन लगाव केते ईसु रआ बारे सही बात के परचारे केनाय आउर सिखाव कु केनाय, बकिर हुनी जोहन भाईर आला बतिस्मा के पाड़ी केनाय। 26हुनी बिनती ओड़ाअ रे बेगार बोर भयते कंहड़ीः दाय। तब प्रिसकिल्ला तेकर अक्विला हुनी आला बात के आयुम केते, हुनी के अकिन ओड़ाअ ईदी केते परमेसर आला होरा रआ बारे हुनी के आउर बढ़ियाँ से समझाव लियाकिन। 27जे बेरा अपुल्लोस अखाया सेनोः नाम नेनाय, दो बोकोकु हुनी के मदाईत लियाकु। तेकर अखाया रिनकु चेलाकु आला नुमू रे चिठी एम केते, ची हुंकू हुनी आला सोवागतीकु मेन केते चिठी लिखा कुलगोःड लअकु। अपुल्लोस होनाःड़े सोदोर नेनाय दो, हुनी पखा तरअः बिसवासीकु के परमेसर आला दया तरअः ढेर मदाईत भेटाव नेना। 28एता लःअय ची हुनी धरम पुथी तरअः साबुत एम-एम ची, ईसु गी ख्रीस्त हेके मेन केते बड़ा जोर ते, जाहुदीकु के जामेकु मड़ांग रे चुपचाप ची किदकुआय।
Đang chọn:
प्रेरित.कामी 18: ASR
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 NLCI CC BY-NC-ND 4.0
