प्रेरित.कामी 19
19
इफिसुस सहर रे पौलुस
1जे बेरा अपुल्लोस कुरिन्थी रे ताही नेनाय, दो पौलुस भीतरी तआ गोटा पहटा के दांड़ा चबा केते इफिसुस हीःग नेनाय, होनाःड़े हुनी के थोड़ेक चेला भेटाव नेनाकु। 2“बिसवासी बनाअः बेरा आपे के पबितर आतमा भेटाव ताही नेना एतान?” मेन केते हुनी हुंकू के कुली लिकुआय। “आले पबितर आतमा होः हुयाआ नोःआँ होः काले आयुम तदा” मेन केते कंहड़ी रूवाड़ोः लियाकु।
3दो खान आपे एतान बतिस्मा ईदी तदापे? मेन के पौलुस हुंकू के बेता लिकुआय, “हुंकू जोहन आला बतिस्मा” बेता लियाकु।
4 #
सं.मत्ती 3:11; सं.मर 1:4,7,8; सं.लुका 3:4,16; सं.जोह 1:26,27 पौलुस बेता लिकुआय, जोहन मन रूरुवाड़ कु के बतिस्मा एमा कु केनाय, हुनी होड़कु के बेता कु केनाय ची आपे के ईङ तरअः तयोम हिजोई रे चाहे ईसु रे बिसवासेपे।
5नोःआँ आयुम केते, हुंकू परभु ईसु आला नुमू रे बतिस्मा ईदी लअकु। 6जे बेरा पौलुस हुंकू तेङ रे तीः दोहो लःअय दो पबितर आतमा हुंकू रे अड़गु नेना आउर एटाअ-एटाअ भाखा कंहड़ीः दाकु तेकर आगमजानीः दाकु। 7हुंकू मिलाव केते बारह झन हेरेलकु ताही नेनाकु।
8पौलुस पे महिना जगुत बिनती ओड़ाअ सेन एकान केनाय। हुनी परमेसर रअः राईज रअः बारे बेगर-लाज-बोरते कंहड़ी केनाय तेकर जाहुदीकु के समझाव कु केनाय। 9बकिर थोड़ेक होड़ मुरुक कठोर नाकु, आउर काकु बिसवास लआ हुंकू जामा होड़कु मड़ांग रे नोःआँ होरा के बेस काकु मेन लआ दो पौलुस हुंकू के बाई केते चेलाकु के इदी केते सेनोः नाय, आउर तुरनुस नुमू रअः इसकुल ओड़ाअ रे चरचा एकाय केनाकु 10दु बरीस जगुत नेकान हुयाव नेना, नोःआँ लकान एसिया रे ताहिनोअकु चाहे जाहुदी ताहिन चाहे युनानी जामाकु परभु आला बचन आयुम लअकु।
11तेकर परमेसर पौलुस आला तीः तरअः अनहोनी रअः समरथ काम कामी केनाय। 12नोःआँ जगुत ची हुनी आला छुवाँव लआ झड़ान चाहे गमछा के बेमराहाकु दुबाःड़े ईदी केनाकु दो, हुंकू आला बेमार नीर जुनोः केना आउर मुवाँ आतमा उडुंग जुनोः केनाकु 13बकिर थोड़ेक जाहुदीकु ठाँव-ठाँव सेन केते, मुवाँ आतमा के उ-उडुंग रेनअः कुसिसे केनाकु आउर हुंकू गादुस आतमा ताहीनोः केनाकु हुंकू के परभु ईसु आला नुमू रे नोकान कंहड़ी केनाकु, “ईसु आला नुमू रे पौलुस परचारेआय ईङ आमके हुकूम एमाअ दिमीईंङ ची उडुंग जुनोः मे।” 14जाहुदी बड़े पुरोहित स्केवा आलकु सातो होपोन ताय होः हेकाने केनाकु।
15बकिर मुसिङ हिला मुवाँ आतमा कंहड़ी रूवाड़ओ लियाय, “ईङ ईसु केहोः पाड़ीईङ तेकर पौलुस के होः चिनहायीङ बकिर आम ओके हेके?”
16जे होड़ मुवाँ आतमा आला कबजा रे ताही नेनाय, हुनी झपटाव केते जामेके पछड़ाव केते हुंकू रे तेजाव नेनाय आउर हायल-कायल लिकुआय ची हुंकू लांगटा आउर घावाईल केते, होना ओड़ाअ तरअः उडुंग नीर नेनाकु। 17नोःआँ बात के इफिसुस रे ताहीनोः कु जब जामा जाहुदी आउर युनानी होः पाड़ी केदाकु, हुंकू जामा के बोर भिनाव ना आउर परभु ईसु आला नुमू रअः बड़ाई हुयाव नेना। 18बिसवासीकु रे होः ढेर होड़कु हीःग केते, जामाकु मड़ांग रे अपन-अपन कामी के उदूः केते मनाव नेनाकु। 19जादु टोनाय केनाकु हुंकू मेसे ढेर अपन-अपन पुथी के साउंठाव केते, जामाकु देखार रे नेल-नेलते तियांग केदाकु। जब होड़कु होना रेनअः दाम जोड़ाव लअकु दो पचास हजार ढिबुवा#19:19 पचास हजार ढिबुवा जे मि साव साठ झन होड़कु आला मि साल रआ कमाई ताहिना। बराबईर थिना। 20नोःआँ लकान परभु आला समरथ रे बचन फैलाव सेन नेना आउर मुरुक बड़हाव सेन नेना।
21नोःआँ बात बिताव चुकाव ना तयोम पौलुस मकिदुनिया आउर अखाया के दांड़ा यअते जिरोसलेम सेनोः लःअय मन रे ठनाव लःअय। तेकर होनाःड़े सेन केते ईङ के रोम के होः नेनेल दरकार एदनाअ मेन केते कंहड़ी लःअय। 22हुनी अपन से-सेवा कु मेसे बनहोंड़ माने कि तिमुथियुस तेकर इरास्तुस के मकिदुनिया कुलगोःड लिकिनाय, बकिर आएंग खुदे आउर थोड़ेक दिन जगुत एसिया रे ताही नेनाय।
इफिसुस रे दंगा
23हिमीन बेरा इफिसुस रे परभु आला होरा रअः बारे रे मुरुक झमेला हुयाव ना। 24एता लःअय ची देमेतोरियुस नुमू रिनी मियांड सोनेरा आरतेमिस देवता आला चाँदी रेनअः बड़े बिनती ओड़ाअ लकान बनाव ची केते, करीगारकु के ढेर काम एमाअ ची कुकेनाय। 25हुनी नुकू करीगारकु के तेकर नोःआँ धंधा रिनकु एटाअ कामी वाला केहोः जवार केते बेता लिकुआय, बोकोकु आपे पड़ीआपे ची नोःआँ धंधा रे उकिन बेस धन भेटाआ। 26बकिर आपे नेल दापे आउर आयुम दापे ची इफिसुस भाईर रे कोवान बकिर गोटा एसिया रे पौलुस ढेर होड़कु के समझाव-बुझाव केते बहकाव तदकुआय, हुनी आला कंहड़ी हेके, ची जे तीः रआ बनाव लिनकु देवता, देवता नलागे। 27नोःआँ चलते नहाअः निआँ बात भाईर रेनअः बोर कनोआँ, बकिर आबु आला नोःआँ धंधा रेनअः मतलब होः एरे ताहिनोआँ आउर ची महान देवी आरतेमिस आला मंदिर तुछ समझाव कोआ आउर जेके देवी रअः गोटा एसिया तेकर दुनिया पुजायाय होना रेनअः माने होः चबा कोआ।
28हुंकू नोःआँ आयुम केते खीस नाकु आउर “इफिसुस रे तहिन कु आली आरतेमिस आला जय” मेन केते, छेराव-छेराव कंहड़ीः दाकु। 29तेकर गोटा सहर रे मुरुक खबडबाव नाकु, तेकर होड़कु मकिदुनिया रिनी गायुस तेकर अरिस्तर्खुस के जे पौलुस लोः साँघे सेनोः केनाकिन सःब लिकिनाकु आउर सहर रअः बड़े अखड़ा#19:29 बड़े अखड़ा सहर रे लगभग पचाहतर हजार लकान होड़कु दु़ड़ूगोः लकान ठाँव ताहिना। पखी ओर इदी लिकिनाकु। 30पौलुस होना सभा रे सेनोः नाम केनाय, बकिर चेलाकु काकु सेन चिलिया। 31एसिया रिनकु थोड़ेक हाकिमकु, पौलुस आलकु गाती ताय ताहिनाकु, हुनी दुबाःड़े कंहड़ी कुलगोःड लअकु ची सहर रअः बड़े अखड़ा आलुम सेन कोअ मेन केते गोहराव नेनाकु। 32सहर रअः बड़े अखड़ा रेनअः सभा रे मुरुक खबडबाव ना ची ओके एतान कंहड़ी तानाकु, दो ओके एतान गुले केनाकु, ढेर होड़ दो आले एतान लःअय जवार तनाले सेके होः काकु पाड़ी केना। 33तुन्दरा रे थोड़ेक जाहुदीकु सिकेन्दर के समझाव-बुझाव केते, मड़ांग बड़हाव लियाकु, सिकेन्दर तीः रे अड़िःग केते, होड़कु मड़ांग रे ससमझाव नाम केनाय। 34बकिर जब हुंकू पाड़ी केदाकु ची हुनी जाहुदी हेके सेके दो जामा से जामाकु “इफिसुस रे तहिन कु आली आरतेमिस आला जय” मेन केते मिसातेरे दु घंटा जगुत गुल एकाय केनाकु।
35तब सहर रिनकु मुंध होड़, होड़कु के सान्तोक केते, ए इफिसुस सहर रिनकु होड़कु ओके काय पड़ीआ ची, इफिसिकु आला सहर महान देवी आरतेमिस आला मंदिर रअः आउर सिरमा तरअः नुर ओना हुनी आला मुरती रेनअः देखा-तखा वाला हेके सेके? मेन केते बेता लिकुआकु। 36नोःआँ बात के ओके होः टो-टोटअ इरकु दड़ीआ, हिना लःअय आपे के सान्तोक जुनोः चाही आउर बेगार सोंचाव-समझाव ते एतान होः आलपे ईया के। 37आपे जे होड़ के नोआँड़े आगु तदकिनापे, जे ना मंदिर के रे-रेःग वाला हेके, आउर ना आबु आली देवता के नि-निन्दा वाला हेके। 38जदि देमेतोरियुस आउर हुनी आलकु गतितय करीगारकु के, जाहें तरअः जहान सिकाईत एदनाअ दो, कछारी खुला एदनाअ आउर हाकिमकु होः एदान कुआ, हुंकू सेन केते बनार पखी तरअः अपन-अपन नालिसेकु। 39-40आउर जदि आपे जहान एटाअ बात रेनअः बारे, जहान कुकुली चहाआपे दो, बड़े सभा रे फैसला चिकेआय। एता लःअय ची तिसिंग हुयाव नेना होना घटना रअः चलते, आबु तेङ रे झमेला रअः दोस लगाअ रेनअः बोर एदनाअ, निआँ लःअय ची नोःआँ झमेला रअः एतान उतारा होः एमोअ इरबु दड़ीआ। 41नोःआँ कंहड़ी केते हुंकू होड़कु के सेनोः बेता लिकुआकु।
Đang chọn:
प्रेरित.कामी 19: ASR
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2023 NLCI CC BY-NC-ND 4.0
