Iivesi zeBhayibhile ezithandwayo ezisuka Matiw 6

Yabelana

Kop kihhsheh bhi wu kihh lyap a dhenglong khinyi, kihh shigrett khinyi mett kakharr bii mwopp weett, bhi nyi p'ee pihh bii mihhseh ni mwopp weett wunn zag.

Pee'mhinyi bhi tapp shep wu kihh ann shuk p'ee puus w'u dhaarr mou, p'ee puus w'u dhaarr kihh ji kihh annshik maad-rah a dyikk. Kooh puus wu'rangg a kihh zheell w'u mak witt maad-rah.

“Pee'mhinyi bhi ih kihh satt wunn ih le, tapp wu kihh ann shuk p'ee seen wu p'ee bii w'u wunn p'ee so nyi kooh wu shwaa wu tong diy mou, h'aa kooh p'ee dihng shoopshuk, p'ee looh w'u wunn p'ee rwan nyi mou. Seen mett biisoh, yakhal shoopshik mett looh'lop mou aa'?

Pee'mhinyi mihh ghi dhekhem dhangNaan, bhi ghi dhel dhighin luh, ghi paah pwooluh bhi ghi sh'in dhangg keegha a Pag Naan, Naan w'u baah mwopp kihh mak naah nyi mou. A kihhsheh bhi Pag Naan ni w'u kih naah bii w'u mwopp kihh sh'in a w'u bhi-byaah p'ee kwatlebhed gha.

“Pee'mhinyi, bhi wu kihh dhangNaan a kihhshe se: “‘Puup mu tihngg kih dhengNaan, Ghi l'e tihh mu kyeer shumm gha dhen a wu'bhangg. Dyinn dhenglong keegha ji o'h. Bii w'u ghi kihh dh'om weett, bhi kwed a kihhsheh dhighin yill ni, kaa nyi tihngg kih dhengNaan seh.

Ghi pihh biisoh w'u shinn munn; biisoh keemu w'u shi'puus-shi'puus.

Ghi fwa shigbis keemu mwopp munn, kaa wu'munn mu kihh fwa mwooh kihh dheldyikihh munn se.

Tapp ghi looh munn dhighin kammpee w'u shwal-shwal mou; ghi y'aa munn lhi'baa pwoo Gwoohbis.’

“P'ee mihh wu kihh fwa dheldyikihh w'u gurum mwopp kihh sh'in wunn, bhi Puup wu Naan w'u tihngg kih dhengg p'ee fwa shigbis mug'wuh wunn zag.

Wu naah bul-shaapp mwopp sihng; baah mwopp kihh kopp dhebhenn kooh mwopp dyiip mou, yakhal baah mwopp kihh chakk soh l'e dyaarr mou, weett kihhsheh bhi Puup wu Naan w'u tihngg kih dhengg kihh so-shwaa kihh mwopp. Hah, dheeh wunn kihh kyeenn mett bul mwopp s'ang?

“Tapp wu kihh akk long lhidyarrang shuk a dhighin yill mhize mou, pee w'u dih'gub kooh zhi'leng mwopp kihh mak tu'koog bii diy, kooh watt mwopp kihh mak teepee dhel w'att diy mou. Kop kihhsheh bhi wu akk long lhidyarrang shuk a kih dhengNaan, pee w'u dih'gub kooh zhi'leng mwopp kihh mak tu'koog bii diy mou, kooh watt mwopp kihh mak teepee dhel w'att diy mou. P'ee pee w'u long keegha diy, bhi p'an keegha p'ee kwed a nhighin zag.

“Baah kromm kihh mak pihh kaah niy p'ee sh'in dhakk mhiluh vel mou. P'ee kihh mak dhen a rooh nyi p'ee wall wu'zeh, dheeh shiih kihh wu'zeh; h'aa kooh pihh kaah niy wu'zeh dheeh toglong wu'zeh. Pee'mhinyi, bhi baah wunn p'ee mak pihh kaah wuh Naan yakhal wu pihh kaah wuh shaghal zag mou.

Dheeh kad kan mihh Naan kihh sh'in zhwatt v'ur shit w'u dh'em a kihhsheh; shit w'u mihh nyi se shinn, bhi dhaarr mwopp kihh meng a tihghirhing, bhi diy sh'in zhwatt wu'wunn mett s'ang, Ooh wunn mhishiin-pihhzeenn mwopp?

Pee'mhinyi mihh ghi r'u pihh zhukhum mhipyaah mwopp, bhi ghi pihh shekhett dh'ok, harr dhen a kaarooh sarr gha w'u dih'kul man bii w'u sarr gha w'u dihsoh phi sh'in nyi se mou. Ghi sh'in kihhsheh tihh zhukhum keegha dhen diy a w'u bhi-byaah. A kihhsheh bhi Pag w'u kih naah bii w'u mwopp kihh sh'in a w'u bhi-byaah p'ee kwatlebhed zhukhum ni gha.

“Wu kihh kangg tappseh wu kihh sh'in dhakk'shin wu'rett keewu a phishumm tihh gurum mwopp naah diy mou. Mihh wu sh'in kihhsheh bhi baah wunn p'ee kad m'ee lebhed kihpee Puup wu Naan w'u tihngg kih dhengg dyi mou.

“Mihh wunn kaah yaa'pwoo, bhi tapp wu kihh gooll kih shuk kaa mhi-raanaan mwopp kihh sh'in se mou. P'ee mihh r'u bhi mwopp kihh dwangg yit ru tihh koohweeh man rooh mwopp kaah yaa'pwoo diy. Ih kihh satt a zeenn wunn, baa mwopp lapp lebhed khi bii ru a pwetd seh. Kop kihhsheh bhi mihh wunn yaa'pwoo, bhi wu vwang yit wu, wu m'um mw'oor kaah wuh, tapp gurum mwopp kihh naah man le wunn kaah yaa'pwoo mou; a Puup wu, w'u baah gurum kihh naah mou, a nyi kyekk p'ee naah nyi man. A kihhsheh bhi Puup wu ni, w'u kihh naah bii w'u gurum kihh sh'in a w'u bhi-byaah, p'ee kwatlebhed wunn.