Iivesi zeBhayibhile ezithandwayo ezisuka Mahte 5

Yabelana

Myibung lé tap mù, mûng èq nghop tô é ó a kut wú kó; haû su kut râ malaî, yhúmhkaû má lúng tô é bang yùq hkangmó myòq wó myâng râ matú, tsûngjang má kúm tsung to râ nghut lhê. Haû eq rajung za, byu pé gi, núngmòq é ge é múzó pé lé byu-myàng luî, mauhkûng htoq mâ é núngmòq é Îwa lé hkya-on kó sháng gàq, núngmòq é maubó lé yhángmòq é hí má dùq nhang to keq.

Núngmòq gi, mingkân é maubó nghut akô; bùm htoq mâ é wà mó lé gi, wó nghop to râ a nghut.

Myìt sansêng é bang gi, hkungsô wó nyi ri; hkâsu mù gâ le, yhángmòq gi, Garai Gasang lé myàng kôrâ nghut lhê.

Díngmán hkyô lé mùt shit nyi é bang gi, hkungsô wó nyi ri; hkâsu mù gâ le, yhángmòq gi, nhik dìk shoq myàng zo kôrâ nghut lhê.

Nghut kôlhang, Ngò, núngmòq lé taí kôlé, núngmòq gi, mauhkûng htoq mâ é núngmòq é Îwâ é yhang zô pé wó dùt kó sháng gàq, núngmòq é gye pé lé chyitdàp mù, núngmòq lé zing-ri bâng é matú kyûdung byi keq

“Sô má, asho awui dùt é bang gi, hkungsô wó nyi ri; hkâsu mù gâ le, mauhkûng mîngdán gi, yhángmòq é mîngdán nghut nyi ri.

Nguì ngón hkyô sô xoq byî é bang gi, hkungsô wó nyi ri; hkâsu mù gâ le, yhángmòq gi, Garai Gasâng é yhang zô pé gâ é hui kôrâ nghut lhê.

Myìt iyon huî é bang gi, hkungsô wó nyi ri; hkâsu mù gâ le, yhángmòq gi, nhik lhoqtîng é hui kôrâ nghut lhê.

Díngmán hkyo é yánmai zing-ri huî é bang gi, hkungsô wó nyi ri; hkâsu mù gâ le, mauhkûng mîngdán gi, yhángmòq é nghut nyi ri.

Shogyo nhikmyin myìt bo é bang gi, hkungsô wó nyi ri; hkâsu mù gâ le, yhángmòq gi, shogyo nhikmyîn yu é hui kôrâ nghut lhê.

Ngá é yánmai, byu pê èq, núngmòq lé rhoi é, zing-rî é, a teng a mán é dông agè ashop é dang a-myû myû taí tso kô é hkûn, núngmòq hkungsô wó nyi ri. Nguì ngón gabú nyî keq, hkâsu mù gâ le, núngmòq é matú kô é chyûnghuq gi, mauhkûng mîngdán má jòq tô ri. Núngmòq é hí lhê é myìqhtoî pé lé le, yhángmòq gi, haú dông zing-rî laî lo wú bekô nghut ri.

I‑myìt nú nhâm é bang gi, hkungsô wó nyi ri; hkâsu mù gâ le, yhángmòq gi, mingkan lé wó sîng kôrâ nghut lhê.

Núngmòq gi, myìdàm htoq mâ é xo nghut nyi lhê. Nghut kôlhang, xo gi, màn kân byùq jáng, haú lé hai èq dum wó lhoqngam yù râ lhú? Shinggan shut dú pyám mù, byu pê èq nâng pyeq pyâm é mai lai luî, hai a-kyû le bò râ a nghut lo.

Haû mù, mauhkûng htoq mâ é núngmòq é Îwa gúmjùp é su, núngmòq le gúmjùp nyì keq.

Náng é dang lé, ‘nghut lhê’ lé gi, ‘nghut lhê’ nghû, ‘a nghut é’ lé gi, ‘a nghut’ nghû, taí aq; haû mai laî é gi, haû agè ashop su chyáng mâ é nghut ri.

‘Myòqjí matú myòqjí xap, zui matú zuì xap’ gâ é dang lé, núngmòq wó gyô wú bê nghut lhê. Nghut kôlhang, Ngò, núngmòq lé taí kôlé, agè ashop kut é sû lé lató hkâhpuq. Náng é lòqyo bowâm má pyuq byi sû lé, lòqpaî hkyam le hkâm byi shi aq.

Haû mù, náng é lòqyo myòq èq, nang lé mara kut shut nhang é nghut le gi, haú lé làp choq yû mù, dú pyám aq. Hkâsu mù gâ le, náng é ragùngdu gón ngaraî ming gyó râ htoq má, náng é gùngsho rajung jung za htên byùq é nghut le gi, náng é matú je ge ri. Haû eq rajung za, náng é lòqyo lòq èq, nang lé mara kut shut nhang é nghut le gi, haú lé hpyit yû mù, dú pyám aq. Hkâsu mù gâ le, náng é ragùngdu gón ngaraî ming gyó râ htoq má, náng é gùngsho rajung jung za htên byùq é nghut le gi, náng é matú je ge ri.