LUK 13
13
Barungriir Huungnii Chongjeer
1Apha ichiinache Galili mee ae ing Thangnang ting ipeehfhuw chaatha chaap empeeh raenche, Pilaat ing atheh aechu Jesu ningna chong abajen mee topoh omsae. 2Amana Jesu ing eningna abasang, “Galili mee aechu changche ichii ing entheh khaenache, Galili mee ae kaartanii enuw inche isii icher sehpae ichii ing nemandenva? 3Ki ing neningna kariirnah, changchen mahva; nenuw ing nenbarungriir huungmah tanga tanuwka, nenuwkho enuw vaange maangchir vanenta. 4Changpang mahka Shilom na om yngkaangpak een inche atiihrae mee suum arii iriih derka ithii aenche Jerusalem sungna ong mee vakhae chungna isamah sehpae ichii ing nemandenva? 5Ki ing neningna kariirnah, Changchen mahva; nenuw ing nenbarungriir huungmah tanga tanuwka, nenuwkho enuw vaange nengkheng maangchir vanenta.”
Ynlamah Thachang bur taklina Ynghuwnii
6Jesu ing ynghuwnii thamin havi ariir: “Achuw yngkheh mee ing ingkhon sungna thachang bur yngkheh aphin; nikheh nache ama ing aanla ajongtah nache ynlamahsa. 7Chutah-nache ama ing ingkhon khaenache aapaanii ningnache ariir, ‘Enla, kumthum sungna ki ing thachang bur havi aanla kajong tuwhmahsing. Fuwrtahra; havi inge ruwruwchu ikaniimah ing amangom i ynchii ikanii omkhang?’ 8Ingkhon aapanii inche aningna abasang, ‘Aafhuw, atiikum pangve omtahrasii, ki ing akuur manriningka chuwkata vokhehkho ruwruw mansakpheh katae. 9Ama inuwnache basen naka hunganla nave saksa; changvakonchu ynlamah nave changlaenche fuwrtah vaanta.’ ”
Jesu ing Akuung Ipuum ing Ina Rupanuw Amandam
10Jesu ing meekongnii yngkhehna isa thamin Deennii inii nache atong. 11Amanache enruw, kumsuum arii iriih sungna akuung puumka ina ynjik achehmah rupanuw yngkheh om. 12Jesu ing amachu amutah nache eenka aningna ariir, “Rupanuw, ina chiikha damsachii.” 13Amana Jesu ing ataklina akik ing avepartah nache akuung ipuum ynjik achehmahchu damsa, vokhehkho ama ing Thangnang chu amanpahsah.
14Changvakonchu meekongnii aapanii inche Jesu ing Deennii iniina amandam tahnache abarung sikka ama ing mee ae ningnache ariir, “Mee ing inii niruk sungna nong tunii omna; chukhaenache inii niruk sungnache ina vakhaechu mandamnii khaenache thengruw, Deennii iniine thengmahruw.” 15Jesu ing abasang, isachaang itu ae! Nenuw nengkheng ing Deennii iniina nensiir nendaar nenphuwpchu bajoh chuwka taangting chii nenpeehmah vakhang? 16Abraham sanuw havi enruw, kumsuum arii iriih chakna umlae ing suwrka om havicha Deennii iniina ynjohpham suwhmah khang? 17Amana hava chong vakhae i riirka, Jesu atak ajeehnii vakhae mee aechu ningjak apeehpae; amanche Jesu ing hangjaehmeh isapak nong atu vakhae khaene mee changjaeh aenche enrotha irohsah.
Encham Muw re Chor taklina Ynghuwnii
(Met 13.31-32; Mk 4.30-32; Met 13.33)
18Chukhaenache Jesu ing ariir, “Thangnang iruwngpaamchu ynchiithoh aanghakne? Vokhehkho ynchii thohche mandeeng vaanchiiva? 19Havi chuve mee yngkheh ing encham muwchu chika aruwraena avorthoh aanghakna; amana aburchu hangmuwngka thingbur vaangche hungruungsa, vokhehkho abah taklinache vaati aeng enrabuw enghuwnah.” 20Athar vokheh Jesu ing ariir, “Thangnang iruwngpaamchu ynchiithoh mandeeng kate? 21Amachuve rupanuw yngkheh ing jaam chika amana chor thohche manvaeka ahangpuur mahri raen-taangche asiith thoh aanghakna.”
Eenkhaar Ymbik
(Met 7.13-14,21-23)
22Havi aanuwdehna Jerusalem yntongting vasivachii nache, Jesu ing khuwruung chaapna vokhehkho akhuw siirna isa thamin tongka ivasi. 23Changlaenche mee yngkheh ing Jesu ningna ariir, “Aafhuw, ikarpeeh phava enchii mee aechu topoh pangti vachiiva?” 24Jesu ing eningna abasang, “Eenkhaar ymbik nache ivaruwhchehnii khaena karkhiingruw; neningna kariirnah, mee inempak ing amanache ivaruwhnii tuvaatae changvakonchu chehmahnii ae. 25Eensung aafhuw inche hangiir naka eenkhaar akam-pang aanuwnache nenuw ing taangna ngiir tanuwka, vokhehkho eenkhaar-chu ichum tanuwka, Aafhuw, Aafhuw, ibarangpeehra tavanenta. Apha ichiinache ama ing nenuw utanii vachuw ki manghuwmah chuwng tanaka ibasang vaata. 26Chang-laenche nenuw ing ichong basenva nenta, ‘Kenuw ing nang thoh kensah kenginhak, vokhehkho keng khuwruung nache ymmanchuwchii.’ 27Changvakonchu ama ing tavaata, ‘Ki ing neningna kariirnah, nenuw utanii vachuw ki manghuwmah chuwng; kaningtanii ongmahruw, ichuwhmah nong itu vakhae ae!’ 28#Met 22.13; 25.30#Met 8.11,12Nenuw ing Abraham, Isak, Jakop, vokhehkho Thangnang jaephar vakhae aenche Thangnang iruwngpaamna ong aechu nemuraenche, nenuw chuve taangting iren naka ama mapham nache nengha iriir tanuwka ijachaam, ichap ichuw phava nenta. 29Amana mee aenche iniisuwh tanii, taetah tanii, ikang, irip tanii theng ae naka Thangnang iruwngpaam ongnii nache ongvaatae. 30#Met 19.30; 20.16; Mk 10.31Chukhaenache enruw, maensa inche ningkuur vaata amanche ningkuur inche maensa vaata.”
Jesu ing Jerusalem Aning Amansiih
(Met 23.37-39)
31Changlaen siimche achuw yngkheh Pharisi aenche vatheng aeka Jesu ningna enriir, “Hava mapham i bathen nana apham yngkheh ting sira; Herot ing nangchu thehningka ynchiinah.” 32Amana Jesu ing eningna abasang, “Nenuw ing vaknuwna imi ningnakhe riirruw, ‘Amachuve enruw, atanii re atuknuwkho umlae aechu thurva katae, amanche ina ae chukho mandamva katae, amanche inii animanthumnii nache kanongchu manchichir vakata.’ 33Changkhang nare ataniikho, atuknuwkho, amanche thiim nakho ki siva kachiiting bukna; akhaechuve Jerusalem taangna Thangnang jaephar ing ithiichu sakmahnii.”
34“O Jerusalem, Jerusalem, Thang-nang jaephar aechu thehchiika, vokhehkho rung ing nadeeng ae nang, aar afhuw ing atichu abatha ing aop vaangkhe vajaehmeh nasiti aechu opsa ae ningka kachii, changvakonchu nenuw ing irupeeh mahchuw! 35Chu-khaenache enruw, nenta rumniieen havi aruwh ing kamahpa. Ki ing neningna kajeernah, nenuw ing Aafhuw rumingna ijungtheng atak i aajaehmeh bor aphava tatanuwka nenriirmahri raentaang imumah tanuw!”
Currently Selected:
LUK 13: MOYO
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.