LUK 17
17
Isiicher khaena Jesu Chongjeer
(Met 18.6-7,21-22; Mk 9.42)
1Jesu ing asebok ae ningna ajeer, “Isii ting bukniichu suwhrem vaata; changvakonchu isii tingche buknii abasuw aningnache ijaniisapa! 2Ama ing hava naepang ae ningne yngkhehchu isii ting babuwnii vachii changve, ariingna rungsum ynthinaka chifhuw ting iren inche akhaena saksehna. 3#Met 18.15Chukhaenache nenuw nentaksah ynriimruw; nenguw nenae mee yngkheh ing isii tunave ichahruw, amana abarungriirchu huungnave kuhpeehruw; 4amanche nikhehna ama ing vasarii chak neningna isii tunaka, neningna vasariimeh vaanrinaka kabarungriir kahuungpa tanaka riirnave, kuhpeehva nenchiiva.”
Thacha
5Sebok aenche Jesu ningna enriir, “Kenuw kenthacha i imanpir peehsara!” 6Jesu ing eningna ariir, “Nenuw ing enchaam muw thoh ynchim ing nenthacha omnave, nenuw ing leimachaak bur tinge, ‘Nataksah ing narajung ymphinana chifhuw tingse ymphinsara nenchiitahna nenriirchu manjiivaata.’
Meenae ing Tuvachii
7“Nenuw nengkaarna ruwrae amanriim achuw yngkheh mee ing changmahka jao acheer nemeenae inche ruwrae tanii ahungkae tahna ithupak ing huungnana amanche imaarnii nakhe ongla tanaka aningna riirvachii achuw omnachuw? 8Ama changdenna aningna ki ing savakachii thoraang jetu, aanuwnache nang ing sapeh inpeh vanata tamah niikhang? 9Ama ing meenae ningna chong ariirchu meenae inche amanjii khaena manpahmah niikhang? 10Chu-khaenache amavaangche nenuw ing vajeer chonghak ympeeh vasah vakhaechu tuchirnuwna, ‘Kenuwve ikaniimah meenaepung; kenuw ing tuvakenchii chupang kentusah vatah taruw.’ ”
Jesu ing Ynchor Mee suum Amandam
11Jesu ing Jerusalem ting avakraenche, Samaria re Galili ruwrakna ivasi. 12Amana Jesu ing khuwsung yngkheh nache avaruwhtah nache, ynchor ing ina ae pasar suum aechu yntuwhsae. Enuw ing laarkhehna ngiir aeka 13vokhehkho va-uungsae, “Aafhuw Jesu! Kenuwchu naning imanchuwhsara envechii!”
14Jesu ing enuwchu ajemutahna aeche eningna ariir, “Nenuw ing sinuwna nentaksah ing jaethiim ae ningna vandangruw.” Amana enuw ensinii baram ing manthiingsae. 15Chu-tahnache enuw engkaar tanii mee yngkheh ing damsing ichii amanghuw tahna hangiirka iruur yndang ing Thangnang chu amanpahsahpa; 16vokhehkho ama ing Jesu khiderna vakhupsaka amanpahsahpa. Atak ichuve Samaria meeva. 17Amana Jesu ing aningna chong ariir, “Nenuw mee suummeh kamanthiingmah vachuwkhang? Mee eekuw ae chucha utingpae? 18Marpah mee havimah naka Thangnang chu manpahnii khaena hunganri omahpae?” 19Amana Jesu ing aningna ariir, “Hangiir nana yngkaera; nang nathacha ing ymmandampa.”
Iruwngpaam Ijungtheng
(Met 24.23-28,37-41)
20Pharisi topoh aeng Thangnang iruwngpaamchu utaraenkhe juwng-vachiiva ta aeka Jesu ningna ensii. Ama ing eningna abasang, “Thangnang iruwngpaam chuve yndang ing ijuwngmahva. 21Achuw yngkheh ingkho enruw havane omna, changmahka amanase omna, tamahnii ae; akhaechuve Thangnang iruwngpaamchu neningna omna.”
22Aanuwnache Jesu ing asebok ae ningna ariir, “Mee Sapa aaniichu nenuw ing munungka takhang ta-nuwre, muhehmahva nenchii aaniichu hungsuwh vaata. 23Amanche mee aeng nening nache enruw, amanase omna, changmahka havane omna tavaatae. Changlaenche nenuw isikho simahruw, enganuwkho jiimah aeruw. 24Akhaechuve tenlungpa ing denkhehna aanlehrup tahna denkheh tingkho ireng vaangkhe, Mee Sapa inche ama aanii nache changche tavaata. 25Changvakonchu ama ing amaensana ijachaam aajaeh vokhehkho suwnthar havi inge arumahchu khaangvachii ting buksa. 26Noah ing apaarlae isuwh vaangkhe, Mee Sapa aanii nachenkho suwhvaata. 27Noah ing ruwkuwng sungting aruwhmahri raentaang vokhehkho chii iriim ing amamaangchir mahri ae raentaang rakhiinii kuurva iriim tu aeka ong ae. 28Amathohche aanghakjaeh ing Lot ing apaar laenkho isuwh; amachuve enuw ing ensah, engin, engarii, enjuwr, saangbaar emphin, vokhehkho een tu aeka ong ae; 29changvakonchu Lot ing Sodom tanii ahungsuwh inii nache thangbaen tanii mi inche enuw vakhaechu maangchirsae. 30Mee Sapa inche aandang inii nache havithoh aanghakjaeh vaata.”
31 #
Met 24.17,18; Mk 13.15,16 “Ama inii nache achuw yngkheh ing een phuchungting ong mee inche, eensungna apeehchae omchu jungchumsana jungrimah rasiing, vokhehkho ruwraena ong mee inche hunganrimah rasiing. 32Lot rumee kha ynsiiruw. 33#Met 10.39; 16.25; Mk 8.35; Luk 9.24; Jhn 12.25Achuw yngkheh ing alaetha ikarnii khaena amanjong mee chuve maangvaata, changvakonchu alaetha khaena imaang acheh mee chuve karpeeh vaata. 34Ki ing neningna kariirnah, ama jaen nache ijaarnii yngkhehna meenii jaarvaatae; yngkhehchu ruwvaata, amanche yngkhehchu mavaata. 35Rupanuw meenii ing haachang sukvaatae; yngkhehchu ruwvaata, amanche yngkhehchu mavaata.” 36(Ruwraena meenii ongvaatae; yngkhehchu ruwvaata, amanche yngkhehchu mavaata.) 37Amana enuw ing Jesu ningna enriir, “Aafhuw, unava?” Jesu ing eningna ariir, “Ithii sha omnii nache laangta yngkong vaatae.”
Currently Selected:
LUK 17: MOYO
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Moyon Naga New Testament - ITHAR CHONGHAK
Copyright © 2008 by The Bible Society of India
Used by permission. All rights reserved worldwide.