JON 8
8
Annii akha mi Ipfyo Dopa Latutii
1Hojalo Jisu Olives Putoo ho chatii. 2Arokonchi ho hiira mo piniiude ho ahtii; hikha miyuatañ mohko ahtii, ho mo duhatii ho mohlumi tonsḛrtii. 3Pagenii atañ la Parisi atañ annii akha kone ahgii bitii humina ipfyo dopa latutiinii, ho mohmi liipa jaho atiitii 4mohlu mohmi lutii, “Tonsḛrbo, siika annii akha mi ipfyo la dopa latutii. 5Siisi Mose ka lujubiniiñ dapoho ngunumi sitañmi yalañ kuto ludo. No nii hiilape mo piigo ho luchinii?” 6Siikasi mohlu mohmi tenka la lutii, niimpalukoda mohlu mohmi halii dupa hiila. Jisu chuki hala ho mohka lacheelo kiiddiho ketii. 7Ho mohluka mohmi takala dorañpa, mo guritii ho mohlumi lutii, “Kappyojapa hiimi yalañ kupyo kiineto mohmi, nunuka punko hokii huna ingyamiigya giimanii.” 8Ho rongeta mo chuki hala ho mohka lacheelo kiiddi ho ketii. 9Hojalo mohlu siimi tapalala, mohlu intiiku, kone kone irila, abañ jaho hokii impyo rigiila, ho Jisu kontiisii dasu tiikunii, mo hata hoka annii akha danii agiñho. 10Jisu nyari biila ho mohmi lutii, Annii akha, mohlu nohna? Niimi kone hetḛr khiilii kumapo? 11Mo lutii, “Ma Kone hetḛr khiilii ma, Attoh.” Ho Jisu lutii, “Ngotiirḛ niimi khiilii make; ingeku, ho hiira ingyamiigya kulyayo.”
Jisu Dohadolo Ka Hutoh
12 #
Jn 9.5; 12.35; 1.4. Hiira Jisu mohlumi lukotii, lubiidola, “Ngo dohadolo ka hutoh ke; huna ngiimi imbo monchinii hii kamo ho ingkiñ make, hojalo sango ka hutoh mi giikiñdo.”
13 #
Jn 5.31-39. Parisi atañ ho mohmi lutii, “No atoh atoh hakipa lyisuda; niika pyakonii hii jije make.” 14Jisu lusitii, “Ngo atoh atoh hakipa lyisu dojalo, ngiika pyakonii jijeke, niimpalukoda ngo chindo ngo nohkii ahnii ho ngo no inkiñdo, hojalo nunu chima ngo nohkii ahnii malo ngo noh inkiñdo. 15#Jn 7.24; 3.17. Nunu asiialyo ka ayakacho kachañ ho kado, ngo kone mitrḛ ayakacho kaliima. 16#Jn 5.30. Ngo matiirḛ halii doja lopa, ngiika ayakacho kanii hii kadikoke niimpalukoda hii ngo kontii ayakacho kamake, hojalo ngola hiinyike huna ngiimi kiiniñ tiinii. 17#Mt 18.16. Nunuka dapo ho hiila ketola do miyu anye ka pyakonii hii jije hiila; 18Ngo atoh mi haki bisutii, ho Aba ngiimika kiiniñ bo ngiipa haki lyibido.” 19#Jn 14.7. Hopa mohlu mohmi lutii, “No niika Aba?” Jisu lusitii, “Nunu ngiimi tiirḛ malo ngiika Aba mitrḛ chima; nunu matiirḛ ngiimi chintii koda, nunu ngiika Aba mitrḛ chintiido.” 20#Mk 12.41; Jn 7.30. Siika aguñ atañmi alḛrdrih atii koho lutii, piniiude ho mohka tonsḛr nii chulipa; hojalo kone hetḛr mohmi latu matii, niimpalukoda mohka myodu hii ahma tiirañ.
Nunu ila Kema Ngiika Inko Ho
21 #
Jn 7.33-36. Hiira mo mohlumi lutii, “Ngo inchikuke, ho nunu ngiimi mekiñdo ho nunuka ingyamiigya ho shiikiñdo; noh ngo inchi, nunu ahla kema.” 22Ho Jew atañ lutii, “Mo atoh mensu payuha, mo ludonii, Ngiika inko ho, nunu ahla kema?” 23#Jn 3.31; 17.14; 1 Jn 4.5. Mo mohlumi lutii, “Nunu akañ hokiike, ngo ayoh hokii; nunu siika dohadolo hokii, ngo siika dohadolo hokii make. 24#Jn 8.28; 4.26; 13.19; Mk 13.6. Ngo nunumi lukodu nunu nunuka ingyamiigyanii atañ ho shiikiñdo, niimpalukoda nunu shiikiñdo nunuka ingyamiigyanii atañ ho nii dahepa nunu henjetama ngo hii hiila.” 25Mohlu mohmi lutii, “Hu no?” Jisu mohlumi lutii, “Ngo nunumi lotu jaho hokii luko siidu. 26Ngiiko abuje nunu piigo mi lusa do ho abuje ayakacho kasa niitrḛ; hojalo ngiimika kiiniñ bo jijeke, ho dohadolo mi lukodu niihna ngo mohkokii tapa dunii.” 27Mohlu tachiñ lamatii mo mohlumi Aba ka piigo mi ludo hiila. 28#Jn 3.14; 12.32. Hopa Jisu lutii, “Nunu miyu ka Oho mi yucha kulala, ho nunu chinkiñdo ngo hii hiila, ho ngo ngiika attoh otority la hang miima hojalo hiimi sii lusu dunii Aba ka ngiimika tonsḛr niimi. 29Ho mo huna ngiimi kiiniñ tiinii hii ngiika agiñho da; mo ngiimi kontii apama, niimpalukoda ngo kiirañ hiimi sii miisu dunii niihna mohmi hempyo giidonii.” 30#Jn 7.31; 10.42; 11.45. Mo hiila lukele, abuje mohmi henje nyatii.
Jije Hii Nunumi Tupya Kendo Ke
31 #
Jn 15.7; 2 Jn 9. Jisu ho Jew atañmi lutii hutiina mohmi henje nyatiinii, “Nunu matiirḛ ngiika luniiñ talii takañ dokoda, nunu jijeloda ngiika henjeajiñ atañ ke, 32#2 Kor 3.17; Gel 5.1. ho nunu jije mi chinkiñ do, ho jije hii nunumi tupya kendoke.” 33#Mt 3.9; Gel 3.7. Mohlu mohmi lusitii, “Ngunu Abraham ka ohoasi, ho ronge hetḛr mika miirapa biikola duka ma. Niihtañ pa no ludu, ‘Nunumi tupya kendoke hiila’?”
34 #
Rom 6.16; 2 Pit 2.19. Jisu mohlumi lusitii, “Jijeloda, jijeloda, ngo nunumi lukoso, hujalopa ingyamiigya da hii ingyamiigya ka miira ke. 35#Gel 4.30. Miira hii ayu dahepa ude ho dupe momma, oho sii ayu dahepa dupe monsu dunii. 36Hopa Oho matiirḛ nunumi tupya doku koda, nunu tupya koku nii lodake. 37Ngo chindo nunu Abraham ka ohoasi hiila; hojalo nunu ngiimi mendupa mela do, niimpalukoda ngiika luniiñsi nunupa tadiñma. 38Ngo ludu niihna ngo ngiika Aba agiñho kapa tiinii, ho nunu miido niihna nunu nunuka aba kokii tapa tiinii.”
39Mohlu mohmi lusitii, “Abraham ngunuka aba.” Jisu mohlumi lutii, “Nunu matiirḛ Abraham ka wiinga koda, nunu Abraham nii miitii hiimi miikiñdo, 40hojalo siisi nunu ngiimi mendupa mela do, hiika miyu huna nunumi jijemi luko donii nii mina ngo Pinii kokii tapa tiinii; si chitañ Abraham miimane. 41Nunu miido niihna nunuka aba miitiinii.” Mohlu mohmi lutii, “Ngunu datuapu pula buko make; ngunu kii aba konesii, Pinii tiirḛ.” 42#Jn 13.3; 16.28. Jisu mohlumi lutii, “Pinii matiirḛ nunuka Aba koda, nunu ngiimi henkiñdo, niimpalukoda ngo irito ho ahdu Pinii kokii; ngo attoh pa ahsuma, hojalo mo ngiimi kiiniñtii. 43Niimpa nunu tachiñ nyama ngo nii hiila ludo? Si niimpalukoda nunu pigii lama ngiika aguñmi. 44#1 Jn 3.8,15; 1 Jn 2.4; Mt 12.34. Nunu nunuka aba igii kokii, ho nunuka heniiñ hii nunu aba ka henko ho miichi hiila. Mo lotu jaho hokii miyumenii, ho jije agiñho hang miisa nyimake, niimpalukoda mohko hang jije giima. Mohka amuh lyiho, mo ludu mohka atoh henju jaho, niimpalukoda mo gollunii ho golluka aba. 45Hojalo, niimpalukoda ngo jije mi lukodu, nunu ngiimi henjema. 46#1 Jn 3.5; Jn 18.37. Hu nunu kokii hu halii lakiñdo ngo ingyamiigyanii hiila? Ngo matiirḛ jije mi luko dokoda, niimpa nunu ngiimi taje nyama? 47Mo huna Pinii kokiinii hii Pinii ka aguñmi tadu; niimpa nunu hiimi tama lukoda nunu Pinii kokiima.”
Jisu La Abraham Nyi
48 #
Jn 7.20; 10.20; 4.9. Jew atañ mohmi lusitii, “Ngunu ludiko luma siiha ehna no Samarita hiila ho igii giido hiila?” 49Jisu lusitii, “Ngiiko igii giimake; hojalo ngo ngiika Aba mi khiila sii, ho nunu ngiimi khiima. 50Hojalo ngo attohmi assañ kodupa mema; Kone du huna siimi medonii ho mo ayakacho kanii bopa dukiñdo. 51Jijeloda, jijeloda, ngo nunumi lukoso, hujalopa matiirḛ ngiika aguñmi atiibiichi, mo shiigo mi kapa kema.” 52Jew atañ mohmi lutii, “Siisi ngunu chindo niiko igii giido hiila. Abraham shiine, hii chulipa nyibuhenii atañ tiirḛ; ho no luda, ‘hujalopa matiirḛ ngiika aguñmi atii biichi, mo shiiniiñ mi kapa kema.’ 53#Jn 4.12. No ngunuka aba Abraham mi kaye ya ehna, huna shiine kunii? Ho nyibuhenii atañ tiirḛ shiine! No hu hiila lusudu?” 54Jisu lusitii, “Ngo matiirḛ attohmi assañ siido koda, ngiika assañ siiniiñ hang ma; siikasi ngiika Aba ke ngiimi assañdonii, humina nunu nunuka Pinii hiila ludu nii. 55Hojalo nunu mohmi chimake; Ngo mohmi chindu. Ngo matiirḛ ludo koda, ngo mohmi chima, ngotiirḛ nunu chuli gollu kendo; hojalo ngo mohmi chindu ho ngo mohka aguñmi atiibiidu. 56#Mt 13.17; Hib 11.13. Nunuka aba Abraham hempyo ne mo ngiika allo mi kapa kendo hiila; mo kapa biine ho hempyo ne.” 57#Jn 2.20. Ho Jew atañ mohmi lutii, “No siisi lyihepa nyang alyañlyango marañ, ho no Abraham mi kapato hiila?” 58#Jn 1.1; 17.5,24. Jisu mohlumi lutii, “Jijeloda, jijeloda, Ngo nunumi lukoso, Abraham mi kapyo yapa, ngo dato.” 59#Jn 10.31; 11.8. Hopa mohlu yalañ tutii mohmi kudupa; hojalo Jisu mo achugiitii, ho piniiude hokii ago lintii ku.
Currently Selected:
JON 8: APATBSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.