LUK 20
20
Jisu ka Otority piigo mi Takaniiñ
(Mt 21.23-27; Mk 11.27-33)
1 #
Mt 21.23-27; Mk 11.27-33. Allo lohe, mo miyu atañmi piniiude ho tonsḛrla ho ayapuyu mi tonsḛrkhenyo la dakele, nyibu burii atañ ho pagenii atañ amiabañ atañ agiñho chatii 2#Jn 2.18. ho mohmi lutii, Ngunumi lukope Nii otority la no siika drih atañmi miidu, malo hu niimi siimi miidopa otority bitii. 3Mo mohlumi lusitii, Ngo tiirḛ nunumi gonge taka talyi; siisi ngiimi lukope, 4Jon ka baptisma biniiñsi dariiganda hokii peha malo miyuatañ kokiipeha? 5Ho mohlu kone anyañ mi taka siitii, lubiidola, “Ngunu matiirḛ ludokoda, Dariiganda hokii, mo ngunumi lukiñdo, Hokoda niimpa nunu mohmi henje nyama?” 6#Mt 14.5; Lk 7.29. Ho ngunu matiirḛ ludokoda, Miyu kokii, hikha miyuatañ ngunumi yalañ kukiñdo; niimpalukoda mohlu Jon mi nyibuhenii hiila henyada. 7Hopa mohlu lusitii mohlu chima si nohkii hiila. 8Ho Jisu mohlumi lutii, Ngo tiirḛ nunumi luko tama nii otority la ngo siika atañmi miidu hiila.
Robalu Miidolyanii Atañ mika Lutiñnaniiñ
(Mt 21.33-46; Mk 12.1-12)
9 #
Mt 21.33-46; Mk 12.1-12. #Mt 25.14. Ho mo miyu atañmi siika lutiñnaniiñ mi lukotii: “Miyu kone robalu miitii, ho hiimi miidolyanii atañmi bipatii, ho ganda ponge yaho hatuñhe myodu pa intii. 10Myodu ahku kiile, mo miira mi kiiniñtii miidolyanii atañko, mohlumi mohmi ahee iche robalu hokii bike nendupa hiila; hojalo miidolyanii atañ mohmi miinetii, ho alah arapa mohmi kiiniñ tiiku. 11Ho mo koneya miira mi kiiniñtii; hiimi tiirḛ mohlu miine biido ho hiinyañ miipyutii, ho mohmi alah arapa kiiniñ nenku tiiku 12Ho mo rohiñniipa kiiniñtii; siika konemi mohlu une agiitii ho mompatii. 13Ho robalu ka atoh lutii, ‘Niihpe ngo miichi nii? Ngo ngiika heniiñja oho mi kiiniñ talyi; rongkoda mohmi mohlu khiinedo.’ 14Hojalo miidolyanii bo atañ mohmi kappa lala, mohlu mohluka apurho lusutii, ‘Siikasike atoh lyisi sanii bo, kiije mohmi ngunu mensa, siika pensi sanii atañsi ngunupa dokiñ doke.’ 15Ho mohlu mohmi robalu ka agoho jopa lintii ho mohmi mentii. Niihpe hokoda robalu atoh mohlumi miikiñ donii? 16#Miin 13.46; 18.6; 28.28. Mo ahla ho hiika miidolyanii atañmi pyadu lokiñdo, ho robalu mi tongelyami bikiñdo.” Siimi mohlu tapa lala, mohlu lutii, “Pinii hiilamiima kencho!” 17Hojalo mo mohlumi kaditii ho lutii, Hokoda nii hiila siika keto laka doniiñsi:
Ude miinii atañ nii yalañ mina khiipatiinii hii
rantu ka rali japa dukiñ dopeha?
18Koneabi huna hiika yalañ ho huha donii hii tache kendo; hojalo hii kone kojalo huha dokoda hiimi humii lokiñdo.
Biijokajo Biniiñ piigo mika Takaniiñ
(Mt 22.15-22; Mk 12.13-17)
19 #
Lk 19.47. Pagenii atañ la nyibu burii atañ mohmi hiika myodu jaho latu dupa miika tii; hojalo mohlu miyu atañmi biisotii; niimpalukoda mohlu helatii siika lutiñnaniiñ si mohlumi chekho la ludo hiila. 20#Mt 22.15-22; Mk 12.13-17. Hopa mohlu mohmi kahlyatii, ho taronii kiiniñtii, huna kakoho denki kappa tiinii, mohlumi halii dupa hiila niihna mo luchinii, niimpalukoda mohmi otority la govonor ka kagii ko lohe tiilii tiigiñ naniiñpa hiila. 21#Jn 3.2. Mohlu mohmi takatii, “Tonsḛrbo, ngunu chindo no jijemi ludo ho tondiko tonsḛrdo, ho khiingu khiirema, hojalo jijeloda Pinii ka lembo mi tonsḛrdo. 22Siikasi bidi kosu peha ngunupa Kesar mika biniiñsi, malo bikiñ mapeha?” 23Hojalo mo mohluka lyolyimi helatii, ho mohlumi lutii, 24“Ngiimi posa pere kakiñpe. Huka kapu hiiko miichinii giido siikasi?” Mohlu lutii, “Kesar kii.” 25#Rom 13.7; Lk 23.2. Mo mohlumi lutii, “Hokoda Kesar ka drih mi Kesar mi bito, ho Pinii ka drih mi Pinii mi bito.” 26Ho mohlu latu lamatii miyu atañka dapa mohmi mo luniiñ hokii; hojalo hemur dopaka mohka lusi niimi tala la mohlu adu matii.
Shiiniiñ hokii ka Turikuniiñ piigo mika Takaniiñ
(Mt 22.23-33; Mk 12.18-27)
27 #
Mt 22.23-33; Mk 12.18-27. #Miin 4.1-2; 23.6-10. Hiiko mohko Sadusi tonge ahtii, hutiina lutiinii turiturku du hiila nyima, 28ho mohlu mohmi takatii, lubiidola, “Tonsḛrbo, Mose ngunupa kebitola do miyu ka abañ matiirḛ siido koda, mihie busu lala hojalo oho nyimapa, hiika miyu mihie mi biisi kendo ho mohka abañ pa oho biibi kendo. 29Siisi midiñ kanuhe anuabañ dutola; kapyoja bo mihie biitii, ho hemme oho nyimapa shiitii; 30ho anyenii hiitḛr 31ho hingenii hii mohmi biitii, ho hii chulipa hikha midiñkanuhe hemme oho nyimapa ho shiitii. 32Kamikalo ho annii akha tiirḛ shiitii ku. 33Turiturku lyikuho, huka mihie pa annii akha lyikiñdo? Niimpalukoda midiñkanuhe mohmi mihie pa biitii.”
34Ho Jisu mohlumi lutii, “Siika santuñ ka oho atañ mihie lado ho mihie millo lahbi siida; 35hojalo hutiina khiiniiñpa lyidonii hiika ahlyinii santuñ anyañho ho turiturku kendo nii shiinii hokii, mihie tiirḛ lakiñma malo mihie millo tiirḛ lasu kema, 36niimpalukoda mohlu shiidu hiila shiila keñkuma, niimpalukoda mohlu miidopopi la Pinii ka oho atañ ka ahiñpa lyidoku, turiturku kuniiñ ka oho atañpa lyilyi kunii. 37Hojalo shiinii turiturku tiiku, Mose tiirḛ kappatii, tareapya ka piigo mika keniiñho, nohna mo Attoh Abraham ka Pinii ho Isak ka Pinii ho Jakob ka Pinii mi gyotiinii. 38Siisi mo shiinii ka Pinii make, hojalo turnii kiike; niimpalukoda hikha mohko sando.” 39#Mk 12.28. Ho pagenii tonge lusitii, “Tonsḛrbo, no ludiko ludo.” 40#Mk 12.34; Mt 22.46. Hopa mohlu mohmi hang taka dupa haro kumatii.
Masiah ka piigo mika Takaniiñ
(Mt 22.41-46; Mk 12.35-37)
41 #
Mt 22.41-45; Mk 12.35-37. Hojalo mo mohlumi lutii, Niihtañ pa mohlu lula kendo Kristo David ka Oho hiila? 42Niimpalukoda David mohlya ludo Assañbiisie ka kheta ho,
Atoh ngiika Atoh mi lutii,
Ngiika lahbi alah ho duto,
43nii dahepa ngo niika ahha banii atañmi niika alih data naniiñpa miitema.
44David hopa mohmi Atoh hiila gyotii; ho niihtañpa mo mohka oho pa lyila kendo?
Jisu Dapo ka Tonsḛrbo Atañ mi Luluñ Biido
(Mt 23.1-36; Mk 12.38-40)
45 #
Mk 12.38-40; Mt 23.6-7; Lk 11.43; 14.7-11. Ho hikha miyu atañka tapa dopa mo henjeajiñ atañmi lutii, 46“Hendinyato pagenii atañ kokii, huna harmi obyo pa giitola inya danii, ho biijḛr liipa ho khiiko nando nii ho sinagog ho ayaja duko ho dunañ donii ho butii apiñ diikoho khiiniiñ ho dunañ donii, 47huna hiimie atañka ude mi kalyi-kabyo danii ho lukañdo kayapa obyopa kuniiñ mi lukañ donii. Mohlu uroyapa halii kokiñ do.”
Currently Selected:
LUK 20: APATBSI
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Apatani New Testament - NITI GONTU
Copyright © The Bible Society of India, 2014.
Used by permission. All rights reserved worldwide.