Tabekacane 15
15
Ku Twaumase kiaketekete ki Aberame
1Sangilribatenga kikai kwidra, ku Aberame yakai ki takipadrelaneini kilalra ki Tamatama iya kai iniane, “Aberame, madha mukuludru! Lri palakebaku muswane, baai muswane kwidra maadrau ku pakalreva.”
2Ai ku Aberame tubalre iya kai, “Abebeelengenga ka Tamatama! Kikai kadrwa ku lalakeli ku sawvalai, lu baaisu nakwane ku pakalreva manemane ku paluludane? Ku kathane ku lri mucungulu nakwane yai swa Damasekuse ka Ilriezere. 3Kaisu wabaai nakwane ku lalakeli ku sawvalai, lakamani, kudra yakai naiyanane kitulalake kwidra tangeea ka duri lri kamani ku mwacungulu kai tacekecekelaneli.”
4La pacungulu, la kilaalranga ki Tamatama iya kai iniane, “Kwini duri ka Ilriezere kai lri kamani ku mwacungulu muswane; kathane kwidra kalalakanesu ka sawvalai ku lrika patengatengane ka lri mucungulu muswane.” 5Ku Tamatama la iluku iniane mulatadre, la iya kai iniane, “Ala masiasirara subelebelenge, thaininu kai latariau? Ku mwabaibalrithi muswane lri mia ki tariau ku kalrane!”
6Ku Aberame masalru ki Tamatama, ku Tamatama la tumadringelrese iniane ka umawmase.
7Ku Tamatama la peelanga iya kai iniane, “Tamatamaku, waililukaku muswane katwase kavai Babilunia ka Ure. Lri baadhaku kikai kadaengane muswane, ka amani ku lrika tacekecekelanesu.”
8Ai ku Aberame kivagana, “Abebeelengenga ka Tamatama, lri tumanaku si thingale ala ka lri tara maalraku kikai kadaengane?”
9Ku Tamatama la tubalre, “Kusu iluka ku vaeva ku taratulrunga ka caili ku tina ka lwange, si vaeva ku taratulrunga ka caili ku tina ka kiu, si taratulrunga ka caili ku balase ka nikiubawbalane ka kiu, si vaeva ka tavagu vaeva ka penai mwa kai nakwane.” 10Ku Aberame la mailuku kikai lawaudriwdripi mucucubungu ki Tamatama, la malra nguvavaeva gelregelre paudrusa, la paececebe sarare tusipusale; ai kudra laadhadhame kai pawadrusa gelregelre. 11La kela lredepe mulebe ku lakwau, makitu ibelenge ki lanibutulane, ku Aberame la sisau kwini ki lakwau.
12Sa lriwlriwgu ku vai, ku Aberame la ererereke; la ikai ku matiukukuludru ku dradrimitane kela mwa iniane. 13Ku Tamatama la iya kai iniane, “Tara thingaala, ku mwabaibalrithi muswane lri acaicali mwa ki maelane ka cekele, si lri kituduri ki umawmase, lai lri kitudreadrekase ki umawmase tara 400 ka caili. 14Ai, lri tara pathavungaku kwidra twaduri liniane ka kuni; kwi lalasu lu katwase kikwini lri tara mailuku ku thathatha ku tacekecekelane katwase. 15Ala kusu, lri kalragi kwi niakesu, si kasulivaliivate katwase kawmasane, sutelrai kidralreke. 16Luka sakasupatenga ku mwabaibalrithi, ku lagaganesu ala lri maka dulru siwlriwlri mwa kikai; asi lwiyane lri mukalavaku lu suetenga ku pasalrivane ki swa Amuri, si kaika apikakwakwanenga kai pathavungu, ala lri pakatwasaku liniane.”
17Sa lriwgunga ku vai si kadradrimitinga, la kiriimu ikai ku twaebebelre ku talabwane si kwadaladalai ku taliwlare. Ngukakai kabicelrakane kwini ki nipawvagadhane ka labeate. 18Ku Tamatama la ikai kwini ki vai kiketekete ki Aberame iya kai, “Lri baadhaku kikai kadaengane ki mwabaibalrithi muswane, kikai kadaengane twalai ki kadravane ki swa Izipiti daruru kavai kadravane Yuparati, 19paelre ki lakadaengane ki swa Keni, swa Kenizi, swa Kademuni, 20swa Hite, swa Perizi, swa Ripaime, 21ki swa Amuri, swa Kanange, swa Giregasi si swa Yebuse.”
Currently Selected:
Tabekacane 15: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017