Tabekacane 20
20
Aberahame si Abimileke
1Ku Aberahame la twalai ka Mamere taluela mwa ka tali lrawdru ka Kanange, ikaikai kwini kabicelrakane ki Kadise si Sure. Kwi lasu sa ikai kwini Gerare yai, 2agili amia ki taelrelreini ka Sara ki laumawmase; lakamani, ku talialalai ki swa Gerare ka Abimileke la sikawlu ki umawmase mwa malra ki Sara. 3La ikai sakamaungu, ku Twaumase la kidrele ikai ki sipi ki Abimileke, la iya kai, “Lri pacaisu! Kikai ribicisu kai ababai taelrelre ki palrapalra!”
4Sakamani kwidra ku Abimileke kaiyana kiaelre kwini ki Sara; kwi lasu la iya kai, “Tamatama! Kainaku pasalriu! Lri amudusu nakwane si mapapangaleli? 5Amani kai Aberahame ka ngiakakamani pelaela nakwane, kikai ababai agili amia, kikai alisu ngiamia kwini la iya. Kai tapianeli kikai mabuula kai kidremedremeli; kainaku pasalriu!”
6Ku Twaumase la ikai ki sipi tubalre iniane iya kai, “Unu, wathingalaku kai tapianesu kikai ka mabula kwi kidremedremesu, lakamani ku ruthukuli muswane si kai pasalriu nakwane, kai mwa kielre ki alisu. 7Kaiasasane, lri malrasu kikai ki alisu baai ki taelrelreini; kwini lasu yai yuginsia, lri dulru pasikai muswane inulri, ku kaika apacadhanesu. Ai lri pakipapawlringavaku muswane, alaiyasi kaisu baai sawlri kai ki alisu baai ki taelrelreini, kusu si mapapangalesu lri pacai makanaelre.”
8Sakakaiyane ki mialrealre, ku Abimileke la sarubu ki lakiacapili si sasiakawlu makanaelre, la pelaela liniane patuelre kikai tangimiane, kwini lalasu la makitu mukuludru turamuru. 9Ku Abimileke la dawlu ki Aberahame, la kaelaela kivaga iniane, “Asu piya kai naiane? Yainu ku tapasalrivaneli muswane, la malrasu kikai amatikurwane iluku baai nakwane si kunili? Paiyasu kudra kaika apiapiane, 10asu piya kikai?”
11Ku Aberahame la tubalre, “Lu kidremedremaku kai laumawmase kai, alau kai mwasakene mukuludru ki Twaumase amiaku, kai lalasu lri ngwalai ki aribicane ki taelrelreli si papacai nakwane. 12Ku patengatengane, ka alisu patengane ka agili. Makakaela ku tina nai ka agili, ala mwa nakwane karudrange. 13Lakamani, ku Twaumase katwasa ki cekelesu, si mwa ki drumane ka cekele acaicali sa iya nakwane kwini, la pelaelaku ki alisu, ‘Adravane lu muinuta kidruanga, kaka lri iyasu nakwane, kikai yai amani ku akilibakanesu nakwane.’ ”
14Ku Abimileke la malra ki Sara sawlri baai ki Aberahame, si la patupalrana baai ku lakiu, lalwange si laduri. 15Kwi lasu la iya kai ki Aberahame, “Drela, kikai yai kadaenganeli, singikaiya ku takadalaamanesu si ikai.” 16Kwi lasu la iya kai ki Sara, “Wabaadhaku ku kudrulu ka gingi ki taka, sapathingalane ka mabulasu, sapathingalane mitane makanaelre ka kadrwa ku tapasalrivanesu ki naaneanenga.”
17-18Ngwalai ku takipadradresengane ki taelrelre ki Aberahame ka Sara, ku Tamatama la pakapulathe kwini yakai ki daane ki talialalai ka lalabaibai ki Abimileke. Ku Aberahame la papia ki Twaumase inulri, ku Twaumase la pawdringai ki Abimileke si kwini ki yakai ki daaneini ka lalabaibai, la dulrunga tulalake kwini lalisu.
Currently Selected:
Tabekacane 20: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017