Tabekacane 29
29
Ku Yakubu wakelanga ki daane ki Labange
1Ku Yakubu la pacungulu katwase, la kela kwini ki kadaengane ki swa talrawane. 2Kwini lasu sa ikai ubulane la drele ku vaeva ku dralremedreme, yakai ku taitulruane irubu ku lakiu ithili ki dralremedreme. Ku lataraagwagu lu paungulu ki lakiu ku acilai patwalai kai ki dralremedreme; kwini dralremedreme nilrilalrilabane arakai ku maadrau ku lrenege. 3Sana isarubunga ku lakiu, kwini lataraagwagu la mulrilabe kwini dralremedreme, si paungulu ki lakiu, ala lrilabe kwini ki dralremedreme.
4Ku Yakubu la kivaga kwini ki laumawmase, “Lawsai, twalai numi inu kela kai?”
Kwini lalasu la tubalre, “Twalai nai Harange.”
5Kwi lasu la iya kai, “Wathingale numi ki agane ki Nahure ka Labange?”
Kwini lalasu la tubalre, “Wathingale nai iniane!”
6La kivaga ku Yakubu, “La mudringadringai?”
Kwini lalasu la tubalre, “Mwadringadringai. Drela, kavai lalakeini ka ababai ka Rakile waililuku ki lakiu kaingananganai!”
7Ku Yakubu la iya kai, “Ka yabeelengeana ka vai, kaiyana ka saelelebe ki kiu, anu kai paungulu ki kiu, lani katwase siwlri mwa ki tapagwagwane kane ku ubulu?”
8La tubalre kwini lalasu, “Lu keela makanaelre ku lakiu, la urielre mulrilabe ki dralremedreme ku taraagwagu, kai lri maka paunguluana ki kiu.”
9Ku Yakubu sa kikawrivarivana ki taraagwagu, ku Rakile wailuku ku kiu ki tamaini kela, asi lwiyane kwi alisu amani saka taraagwagu ka ababai. 10Ku Yakubu sa drele ki Rakile si lakiu ki tamaini ka Labange, la katwase mulrilabe kwini ki dralremedreme, paungulu ki lakiu. 11La mwa tubarengerane ki Rakile si tubi. 12La pelaela ki Rakile, “Amaniaku ku lalake ki betakane ki tamasu, ka lalake ki Rebeka.”
Ku Rakile la katwase lailai mubalriu pelaela ki tamaini. 13Ku Labange sa kilalra ka wakela ku Yakubu ka lalake ki betakaneini, la katwase lailai mulatadre kidredresenge iniane, si kebere iniane, tubarengerane iniane, la iluku iniane pwa ki daane lini. Ku Yakubu la pelaela patuelre ki Labange ku tangilribataneini. 14Ku Labange la iya kai, “Amanisu ku karetesananeli!” Ku Yakubu la ikai kwini taradramare.
Ku Yakubu ngwalai ki Rakile si Lria pasikai kaungu ki Labange
15Yakai saka minakavalane, ku Labange la iya kai ki Yakubu, “Unu karetesananeli muswane, ai kaisu lri vwavutha pasikai nakwane kaungu. Ala pelaelaili, lri tupiasu ku takaunganesu ku paisu?” 16Ku Labange tadrusa ku lalakeini ku labaibai, ku takataka sia Lria, ku agiagi lasi Rakile. 17Ku maca ki Lria lrailraici, ku Rakile la kathariri turamuru ku tacebeaneini.
18Ku Yakubu la kadalame turamuru ki Rakile, ngwalai kikai la kitubi, “Alaiyasi palraingisu nakwane mwa ki agiagi ka lalakesu ka Rakile karudrange, lri lremeaku pasikai muswane kaungu tarapitu ka caili.”
19La tubalre ku Labange, “Palraingaku anatumane la pamwaku muswane karudrange amiamiaku iniane; lu pamwane muswane kadrwa ku lrika miyaiya! Ala ikaiya kai taelre nakwane!” 20Pakai ku akarudranganeini mwa ki Rakile, ku Yakubu la kaungu tarapitu ka caili, ai lu kidremedreme kai lasu mia ki makapiapiyaleana, asi lwiyane kai lasu madalame turamuru ki Rakile.
21Ku Yakubu la iya kai ki Labange, “Mwakesanga ku nipuvaiyane, ala nai karudrangenga ki lalakesu!” 22Ku Labange la padulru ku angitalekane ki akarudrangane, la dawlu kwini ki laswakai kwini ku laumawmase kipaelre. 23Ai kwini sakamaungu, ku Labange la malra ki lalakeini ka Lria si baai ki Yakubu; ku Yakubu la tadrusa iniane apece. 24(Ku Labange la malra ki ababai ka duri ka Zilepa baai ki Lria tuduri iniane.) 25Sakakaiyane ki mialrealre, ku Yakubu la thingale ala ka Lria, la silape ki Labange si iya kai, “Asu pia kikai nakwane? Amani ki Rakile ku pasikaili muswane kaungu. Asu tavuvulrucu nakwane?”
26Ku Labange la tubalre, “Lu singikaiyane ku kakudhane nai ka swakaikai, lu kai karudrangeana ku takataka kai paswalala ki agiagi. 27Alaiyasi la ubangalresu peelana pasikai nakwane tarapitu ka caili kaungu, lu ngilribatenga ku minakapitulane ka vai ku takarudrangane, lri baadhaku muswane ki Rakile.”
28Ku Yakubu la palraingi. Sa makapitulunga ki vai ku takarudrangane, ku Labange la malra ki lalakeini ka Rakile baai ki Yakubu pasitaelrelre. 29(Ku Labange la malra ki ababai ka duri ka Bila aduri ka sasiakawlu ki Rakile.) 30Ku Yakubu la tadrusa apece ki Rakile; ku dalamaneini ki Rakile silrialribate ku dalamaneini ki Lria. La pasikaiyana ki Labange kaungu tarapitunga ka caili.
Lalalake ki Yakubu
31Ku Tamatama wadrele ki Lria ka kaika paramia ku takikadalamaneini ki Rakile, la baai ki Lria ku atulalalakaneini, ku Rakile la kai maka tulalake. 32Ku Lria la katawbaliri, la tulalake ku vaeva ku sawvalai. Kai alisu amia kai, “Ku Tamatama wadrelenga kai sakwalrialrili, kikai ku tauwaneli lri tara kadaalame nakwane.” Lakamani ku sunagane kwini ki lalake pasi Riwbingi#29.32 “Riwbingi” ku pacugane “drela, vaeva ka lalake ka sawvalai” si “wadrele ku sakwalrialrili” amia.. 33Kai alisu la katawbaaliringa, la tulalake ku sakadrusa ku sawvalai. Kai alisu amia kai, “Ku Tamatama wabaainga nakwane kikai sawvalai ka lalake, asi lwiyane kialalra ka kainaku kiakadalame.” Ala sunagane ki lalake pasi Simiune#29.33 “Simiune” ku pacugane “kialalra” amia.. 34Kai alisu la katawbaaliringa, si tulalake ku sakatulru ku sawvalai. Kai alisu amia kai, “Kikai, ku tauwaneli lri tara kadaalame nakwane, asi lwiyane pasiakainga naku iniane tulalake pasangutulru ku sawvalai,” la sunagane ki lalake pasi Lrivi#29.34 “Lrivi” ku pacugane “maelre” amia, wadulru madu “wadakipi” si “madalame turamuru” iya.. 35Kwini alisu la katawbaaliringa, la tulalake ku sakasupate ku sawvalai. Kai alisu amia kai, “Kikai lri drengedrengeraku ki Tamatama”; lakamani ku sunagane pasi Yuda#29.35 “Yuda” ku pacugane “wadrengedrengere” amia.. Twalai kikai, la kai tulalakenga.
Currently Selected:
Tabekacane 29: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017