Tabekacane 32
32
Ku Yakubu padulru ku amadradresengane ki Isau
1Ku Yakubu pacungulu katwase ku kadalrananeini; sa ikadalranane, wakela ku lasasiakawlu ki Twaumase kidrele iniane. 2Ku Yakubu sa drele liniane la iya kai, “Kikai yai kwapingi ki Twaumase!” Lakamani ku pasi Mahanaime#32.2 “Mahanaime” ku pacugane “taidrusane ka sakaredele ka kwapingi” amia. kwini ki kadaengane.
3Ku Yakubu siakawlu ki lasasiakawluini paswalaala mwa ka tali Idume kikawriva ki takaini ka Isau, 4la cunu liniane, “Kunumi lri iya numi ki tamatamali ka Isau, ‘Ku sasiakawlusu ka Yakubu amia kai: Maulaingaku taelre ki Labange, ala kamani ku tawsiwlriwlrili kainganai kaiasasane. 5Yakainga kai lalwangeli, laruba, lanikubawbalane ka kiu, lakiu, si sawvalai si ababai ka lasasiakawluli. Kikai la paswalaalaku sikawlu ki umawmase kela ki tawkili, pakai ku akikiragadhane muswane.’ ”
6Ku kiasikawlu la kela, si pelaela ki Yakubu, “Kiapadradresenge nai ki taka ka Isau; kwi lasu kaingananganainga, mailuku ku tasupate ka idai ku umawmase, lri kela kidredresenge muswane.” 7Ku Yakubu la kathathiburu kathekelre. La malra kwini ki rededelaneini tutaidrusane, la malra kwini ki lakiu, lalwange, lrakeda mialri tutaidrusane. 8Kwi lasu lu kidremedreme, “Alaiyasi ku Isau la pwalra ki aswalala ka taingeane, kwini taingeane alau lri dulrwana mubere.”
9Ku Yakubu wainulri iya kai, “Twaumase ki umu ka Aberahame, Twaumase ki ama ka Isake, kilalra! Tamatama, nawacunusu nakwane ku asiwlrianeli mwa ki cekeleli, mwa ki lawacekecekeleli, si lri pakasulivaliivataku patuelre iyasu nakwane. 10Kainaku swadalepe tarumara kwini papiasu ki sasiakawlu padrelane kwini thalradhane si patengatengane patuelre. Ku siaswalane, kathane ku vaeva ku ukudru ku ilukuli talubalre kadravane Yuredange; kikai, la mailukungaku kai taidrusane kai umawmase kainganai. 11Kiatubiaku muswane palribulaili pakidaili ki alrima ki kaka ka Isau. Mwakuludraku iniane lu kela kikaruburu nakwane, si papacai ki taelrelreli si lalalakeli. 12Kiatubiaku muswane ngulringava ku tapuvaganesu, pwakawnusu nakwane ku akasulivalivaataneli patuelre, lai lri patarumarasu ku mapaangale ku lamwabaibalrithi nakwane, mia ki enai babiabila ki laveke, ku pangalane kadrwa ku umawmase ku lri maka asipi.”
13-15Ku Yakubu la ikai kwini sulai makavale ku awngane. Kai lasu la patwalai ki lanilapulapwane pilri ku bekeelane tusaceacebe ki takaini ka Isau: 200 ku tina ka kiu, mapusale ku balase ka kiu; 200 ku tina ka nikiubawbalane, mapusale ku balase ka nikiubawbalane ka kiu; matulrulu ku pathuthuthwana ku lrakeda, la iluku ku lrulai ka lrakeda, ku tina ka lwange masupatele, ku sawvalai ka lwange mangeale; ku tina ka ruba mapusale, ku sawvalai ka ruba mangeale. 16Kai lasu la malra kikai lanilapulapwane tutaidrusane apawvagavagai, ku taingeane la pakadrenge ki tangea ka sasiakawlu. Kai lasu la cunu liniane, “Aswalala iya! Ku sakaredele la madaidaila.” 17La pelaela kwini ki aswala sangiluku ka sasiakawlu iya kai, “Lu kipadradresengesu ki kaka ka Isau yai, alaiyasi kivaga muswane, ‘Aneane ku tamatamasu? Lri papiasu inu? Kikai yacucubungu muswane kikai lanilapulapwane laka aneanane?’ 18Tubalreanga, ‘Kikai patuelre sasiakawlanesu ka Yakubu; ka abadhane acebe ki tawkini ka Isau. Kwi lasu abilrili naiane.’ ” 19La tuthadaalrane pelaela ki mwasakadrusa si mwasakatulru, si kwini ki maililuku ki lanilapulapwane, “Lu kipadradresenge numi ki Isau makitu iyanga kai tubalre, 20tara iya kai, ‘Ku sasiakawlusu ka Yakubu abilrili.’ ” Ku Yakubu lu kidremedreme, “Lri arakaiyaku kikai saceacebe si kikiragai iniane, lu madradrele nai yai, alau lri kirimu pacepe nakwane.” 21La paswala pakatwase kwini ki siasaceacebe, la asurwana ikai kwini sasuladhane sulai makavale ku awngane.
Ku Yakubu maulucu ikai Penuile
22Kwini sakamaungu, ku Yakubu ngiadrakale, si iluku ki tadrusa ka taelrelreini si tadrusa ka labaibaini si ta 11 ka lalalakeini talubalre ki kadravane Yabuke. 23Samaka talubalre kwi lalasu makanaelre, la salri patueelre kwini lamanemane patalubalre, 24la asuru tangeangea.
La ikai ku tangea ku wakela maulucu ki Yakubu, maulucu pakeela ki malialiare. 25Kwini umawmase la ngithathingale ka kai lri maka akaci iniane, la pwa lrumai pakai ki paithithaneini, kwini vagisi la ngipathulrai. 26Kwini umawmase la iya kai, “Malialiarenga, ala pakatwasangaili!”
Ku Yakubu la tubalre, “Lu kaisu subulrubulru nakwane, kainaku lri pakatwase muswane!”
27Kwini umawmase la kivaga, “Sia aneanesu?”
Kwini lasu la tubalre, “Yakubu.”
28Kwini umawmase la iyanga kai, “Twalainga kai, kaisu lri si Yakubunga. Maulucusu ki Twaumase si umawmase, la taraakacisu, lakamani kwini naganesu lri pabalrithi si Iseraylri#32.28 “Iseraylri” ku pacugane “kwi lasu maulucu ki Twaumase” si “waulucu ku Twaumase” amia..”
29Ku Yakubu la kivaga, “Ala pelaelaili, sia aneanesu?”
Kwini umawmase la tubalre, “Asingithanga kivaga ku naganeli?” Sa maka iyanga kai kawriva, la subulrubulru ki Yakubu.
30Ku Yakubu amia kai, “Maicubungaku drele ki Twaumase, si panianianiakeana!” Lakamani ku pasi Penuile#32.30 “Penuile” ku pacugane “lringau ki Twaumase” amia. kwini ki kadaengane. 31Ku Yakubu sa katwatwase Penuile yai, walrawlraunga ku vai. Ngwalai ku tathulradhane ki vagisi, kwi lasu la driadrikalrane dadavace. 32Pakelanga kaikameane, ku mwabaibalrithi ki swa Iseraylri kai wakanekane ku uvace ki vagisi, asi lwiyane ku uvace ki paithithane ki Yakubu ngiabathulrai.
Currently Selected:
Tabekacane 32: NDV
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© The Bible Society in Taiwan, 2017
All rights reserved
© 臺灣聖經公會版權所有，2017