Ntandiko 3
3
Kwoheb̯wa na Ku̱gwa kwa Muntu
1 #
Kuwonekerwa 12:9; 20:2 Mu bisolo byensei̱ byamwirungu Mukama Ruhanga bi̱yaahangi̱ri̱, mpiri gyali gi̱gezi̱gezi̱ hoi̱. Kandi mpiri gyab̯u̱u̱li̱i̱rye mu̱kali̱ nigikoba yati, “Mu mananu Ruhanga yaabageeni̱ kudya byana bya misaali myensei̱ mya mu musiri gugu?”
2Mu̱kali̱ yei̱ri̱ri̱mwo mpiri naakoba yati, “Tukwikirizib̯wa kudya byana bya misaali mya mu musiri gugu, 3bei̱tu̱ Ruhanga yaakobi̱ri̱ yati, ‘Mutalidya byana bya musaali guli hakati̱ wa musiri, nab̯ukilibba kubikwataho b̯u̱kwati̱, ki̱tali̱ki̱kyo mu̱li̱kwa.’ ”
4Mpiri gyaweereeri̱ mu̱kali̱ nigikoba yati, “Haahi, mu mananu ti̱mu̱li̱kwa. 5Bei̱tu̱ Ruhanga akyegi̱ri̱, b̯umulidyaho byana byagwo mei̱so geenyu̱ gaalib̯uluka, mwisane Ruhanga, mwege b̯urungi na b̯ubiibi!” 6Mu̱kali̱ b̯u̱yaaweeni̱ byana bya musaali nibili birungi kubidya, byasemeera mei̱so gaamwe kandi musaali gu̱gwo gukugyenda kwi̱rya muntu wamagezi̱, yaanokola byana byagwo, yaadya. Bindi yaabihaho i̱baawe gibaalinayo, yoodede yaadyaho. 7Hei̱nyu̱ma gya kudya, mei̱so gaab̯u gaab̯u̱lu̱ki̱ri̱, beetegereza nka kubaalingi b̯usa. Baasu̱ngi̱ri̱ nkaahi kuruga ha musaali mu̱ti̱i̱ni̱ beekoora byakulwala.
8Adamu na mu̱kali̱ waamwe b̯u̱beegwi̱ri̱ iraka lya Mukama Ruhanga naakulibata mu musiri na mahehu ga joojolo, beebi̱sa mu misaali mya mu musiri gu̱gwo, aleke Mukama Ruhanga atabawona. 9Mukama Ruhanga yeeta Adamu, yaamu̱b̯u̱u̱lya naakoba yati, “Oli hanya?”
10Adamu yei̱ri̱ri̱mwo naakoba yati, “B̯u̱nyeegwi̱ri̱ nookulibata mu musiri nyaati̱i̱ni̱ri̱, nyeebi̱sa, hab̯wakubba ndi b̯usa.”
11Ruhanga yaamu̱b̯u̱u̱lya naakoba yati, “Naani yaaku̱weereeri̱ nka kwoli b̯usa? Odi̱i̱ri̱ ku byana bya musaali gu̱nyaku̱geeni̱ otadya?”
12Mudulu yei̱ri̱ri̱mwo naakoba yati, “Mu̱kali̱ gi̱i̱wampeeri̱ kwicala nagya, yooyo yampeeri̱ kyana kya musaali gu̱gwo, gyedede nyadyaho.”
13 #
2 Bakoli̱nso 11:3; 1 Ti̱mi̱teo 2:14 Hei̱nyu̱ma, Mukama Ruhanga yaab̯u̱u̱li̱i̱rye mu̱kali̱ naakoba yati, “Kyani ki̱kyo kyokoori̱?”
Mu̱kali̱ yei̱ri̱ri̱mwo yati, “Mpiri gyogyo gyangobeerye, nyaadya.”
14Hei̱nyu̱ma Mukama Ruhanga yaaweereeri̱ mpiri naakoba yati,
“Ofu̱bi̱i̱rwe hab̯wa ki̱kyo kyokoori̱,
mu bisolo byensei̱ weewe okyeneerwe kukiraho.
Mu kulibata kwamu okwi̱za ku̱li̱bati̱syanga nda,
kandi cuucu gyogyo waadyanga biro bya b̯womi b̯wamu b̯wensei̱!
15 #
Kuwonekerwa 12:17
Kandi nteeri̱ho b̯unyanzigwa hakati̱ gyamu na mu̱kali̱,
hakati̱ wa beizukulu baamu na beizukulu baamwe,
mwizukulu waamwe, alikukuuta mu̱twe,
kandi we olimuluma kigulu ku nkolokoojo.”
16Kandi Ruhanga yaaweera mu̱kali̱ naakoba yati,
“Mu kubyala baana wababyaliranga mu b̯u̱ru̱mi̱ b̯unene,
oliicalanga ni̱wendya hoi̱ i̱baawu̱
kandi yooyo yakufuganga.”
17Kandi #Ntandiko 2:17 Ruhanga yaaweereeri̱ Adamu naakoba yati,
“Hab̯wakubba weegwi̱ri̱ bigambu bya mu̱kali̱ waamu,
waadya byana bya musaali
bi̱nyaku̱geeni̱ kudya,
nsi gi̱kyeneerwe hab̯wamu,
biro bya b̯womi b̯wamu byensei̱, olidyanga bikuruga mu kwekamba kwamu.
18Itehe lyaku̱mereeryanga mahwa na mutala,
kandi olidyanga bimera bya mwirungu.
19Olidyanga bidyo bya mu ntu̱u̱yo zaamu
ku̱doosya b̯woliku̱bayo mwitehe
hab̯wakubba lyolyo li̱waru̱gi̱ri̱mwo,
oli itehe
kandi mwitehe lyolyo olikubamwo.”
20Mudulu yaaheeri̱ mu̱kali̱ waamwe ibara Haawa hab̯wakubba yooyo maa bantu bensei̱. 21Mukama Ruhanga yaakoleeri̱ Adamu na Haawa bilwalu kuruga mu bikuta, yaabalwalya.
Adamu na Haawa Nibabingwa Mu Musiri
22 #
Kuwonekerwa 22:14
Mwomwo Mukama Ruhanga yaakoba yati, “Hab̯wakubba muntu abbeeri̱ nkoomwei̱ hali twe, yeegi̱ri̱ kirungi na kibiibi, leka tumugaane atanokola ha byana bya musaali gwa b̯womi akabidya akoomeera biro byensei̱.” 23Nahab̯waki̱kyo Mukama Ruhanga yaamu̱bi̱ngi̱ri̱ mu musiri gwʼEdeni̱ agyende alime nsi gi̱bamu̱toori̱mwo. 24Yaabi̱ngi̱ri̱mwo mudulu yogwo, ha b̯uhulukalyoba b̯wa musiri gwʼEdeni̱, yaatayo bakeru̱u̱bbi̱ na mpirima gi̱kwakab̯waki̱ ginyaakwicalanga nigyelogoolya hensei̱ kulinda muhanda gukugyenda ha musaali gwa b̯womi.
Ekhethiweyo ngoku:
Ntandiko 3: LUGUNGU
Qaqambisa
Yabelana
Kopa
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2025, Wycliffe Bible Translators, Inc. All rights reserved.