Mt 2
2
Bëyëm bazu yen Yesus mòngò
1Abyali hm Yesus angabyali a Betleem, a nnam Yudea, hala Herodès atoa nkukuma, ndò bëyëm bësòò a nnam kidi bëngasuan a Yerusalem#2,1 Bëyëm ya basò a nnam kidi bëngabë bod ya babò mvigi ai atitie ya yob. Bëngabë toa a minsëṅ minkukuma, bëvaa bò mëlëbëga ai esye mvigi dzaban, bëboe ngam asu daban. 2bò na: «Nkukuma Yuden ondëm byali onë ve? Biayen otitie woe a nnam kidi, ndò bisò nyè lugu.» 3Nkukuma Herodès angayi wog nala, wòṅ obii nyè, ai nguma edzëdzala Yerusalem fufulu ai nyè, 4ndò hm azu koan bëfada bënen ai bësaṅa bëkalara bësë ya nnam, angasili bò e hom Kristus angabë na abyali. 5Ndò hm bazu nyè kad na: A Betleem ya Yudea. Amu anë ntilan abë profèt na: 6Mfa woe, a Betleem, si Yuda, wasëki ntòg a minlo mi bod ya Yuda, amu abë wa ngò ndzoe ayi byali, ṅnyè ayi baala ayòṅ dama Israel#2,6 Mi 5,1.3. 7Ndò hm Herodès azu loe bëyëm a omomoa, angatoan bò sili abog otitie ongayenëban, 8alomo bò a Betleem, nyè ai bò na: «Kaṅan, mitoan yëm dzam ya abë mòngò te.» Nyè na: «Eyòṅ miyen ya nyè, mibòò na ma fë mëyëm, asu yë na ma mëkë nyè lugu.» 9Amana bëngamana wog nkòbò nkukuma, mbò bakë ba; antëm na, otitie ya bëngayen a nnam kidi ongawulu bò osu, akële kui anë wazu kom etoa e hom mòngò angabë a yob. 10Ayen bëngayen otitie ndò bëngatag eyëgan. 11Ndò bazu nyian a nda, bëntala mòngò ai Maria nyia woe, ndò bëngalaban a si, bëngalugu nyè, bëyaa mimfëg miaban, bëngavë nyè bifaè: mvòd ai otu ai mbòn mira. 12Ndò bëngayen a nlo ai alu na të badugan abë Herodès, ndò hm bëngadugan a nnam waban ai zen fë.
Yosef atub ai Yesus mòngò a Egipten
13Adugan bëngadugan, ndò englès Nti angayene Yosef a nlo nyè na: «kodogo a si, onòṅ mòngò ai nyia otub a Egipten, otòbò we akui anë mayi wa kad; amu Herodès ayi dzëṅ mòngò na awoe nyè.» 14Akodo fò a si, anòṅò mòngò ai nyia ai alu, ndò akë a Egipten, 15ndò angatòbò we akui a awu Herodès; asu yë na ebug Nti ya anyu profet etoban na: «Mëngaloe mòn wama a Egipten.»#2,15 Os 11,1.
Herodes awoe bibobòg bi bòn
16Ndò Herodès azu yen na bëyëm bëngadug nyè, awogo hm olun eyëgan, ndò azu lom na bëwoe bibòbòg bi bòn bisë ya Betleem ai minkol misë ya ngòdò te, atarigi a mimbu mibè a siigi, akyaè abog angasili bëyëm. 17Eyë hm ebug profèt Yeremias engatoban nala na: 18Bawog kiṅa Rama, miṅyon ai mëlunga eyëgan; Rashel ayon bòn boe, të yi na bëfolo nyè, amu basëki fë#2,18 Ye 31,15. Rashel angabë nyia Benyamin ai Efraim a kalara osu ya Bibel. Bëngadzëb nyè a Rama, dzam bò kilomera mwom a watye a Yerusalem..
Mfufub nda-bod wadugan a Israel
19Awu Herodès angawu, ndò englès Nti angayene Yosef a nlo a nnam Egipten 20nyè na: «Kodogo a si, onòṅ mòngò ai nyia woe okë a si Israel: Amu e ba bëmbë dzëṅë enyiṅ#2,20: Nala watyan na e bod ya bëdzëṅë na bawoe mòngò. mòngò bëwu ya.» 21Ndò angakodo a si, anòṅò mòngò ai nyia, akëlë a si Israel. 22Eyòṅ angawog na Arkelaus adzoe Yudea a mëyian më esya Herodès, ndò angambara kë we. Bëkada hm fë nyè a biyëyëm, ndò angakë a ngòdò Galilea 23akë tòbò e dzal anë dzoe na Nazaret, asu yë na ebug bëprofèt etoban na: «Ayi loeban na man Nazara».
Currently Selected:
Mt 2: NTE12
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
MKPAMAṄ AMVOE Nouveau Testament en langue Ewondo © Bible Society of Cameroon, 2012.