Лука 18
18
Мисала, ашкӀин хьирахъасна суттихъас
1ЮркӀвар пушмал дахьуна, гьемишан дуьгӀебур акьурай пуна, Ӏисайи ахъакьуная Учин ученикарис мисала.
2– Са шагьурдиъ ахьуная я Аллагьдигьас дагучӀа, я инсанаригьас неч гӀадава са сут. 3Гьеге шагьурдиъ ахьуная са ашкӀин хьира, ге ашкӀин хьир ягъди вей, агъай хьуная суттис: «Кумак акье зас дузвел арайилди аттивас!» 4Ппара гагь хьуная сут рази девей гис кумак акьас, ахирара, сутти уч учикди пуная: «Зас я Аллагьдигьасра дагучӀайчира, я инсанаригьасра неч гӀадавайчира, 5ме ашкӀин хьира зун сакинди атас, зун мин кар дуз акьасе, ягъди ме заалди вей, зун бизар дакьас».
6Ӏисайи пуная гебурис:
– Чвас унихьунев ге нехӀекь сутти фи пичин? 7Аллагьди хӀекьвел аттивас кумак акьастту, Учикес ягъдира Ӏуьшттира тӀалаб аркьа Учин инсанарис? Ппара гагьди ахъутӀанас атасттавахи Ли гебур Учин кумакихъ? 8Зун чвас агъая, Ли кьана дакьуна, кумак акьасе гебурис. Амма Инсандин КӀиркӀ джилилди адегуна, ахьасегьан джилил гишттин хъугъувел?
Мисала, фарисеяхъасна лукар завал аркьаттихъас
9Са чаб дала дузди даргвай, сасрабур хӀисаба ккидава инсанарис кетӀурай пуна, Ӏисайи ахъакьуная мишттин мисала:
10– Ӏу инсан адиная Аллагьдин хулади дуьгӀе акьас. Сад хьуная фарисей, сад – налукар завал аркьаф. 11Фарисея, гъузуна, учи учихъас миштти агъай аркьай хьуная дуьгӀе: «Е Аллагь, зун вас шукур аркьая зак сасра инсанарик суман хъаттрикӀвелар, Ӏемалар аркьавелар, къехӀппавелар кидавахӀела, я магьме налукар завал аркьа суманф зун давахӀела. 12Зун хӀефттайи Ӏугелай сив ухӀа, зе гьер къазалмишттикес йицӀудпе пай Аллагьдин хулади ирцӀанде». 13Ппай налукар завал аркьатти, вархайил гъузуна, завариккди кӀил гъадивасра кехӀей нечтти, учи учин мухурис атай, агъай хьуная: «Е Аллагь, язукъ ухь зе, гъил гъушен зе гунагьарилас». 14Зун чвас агъая: фарисей дава, налукар завал аркьаф э гунагьарикес мертт хьуна ушуф учин хулади. Учи учин хӀа гафар аркьа инсан, ге Аллагьди кейхьасе, уч бицӀи аргва инсан, ге Аллагьди кегъдивасе.
Ӏисана бицӀи шиникквар
15Ӏисайилди гъай хьуная бицӀи шиникквар, Ӏисайи гебурил Учин гъил алихьурай пуна. Ученикарис агугуна, ученикар алурхӀанди ахьуная магъа агъай шиникквар Ӏисайилди. 16Ӏисайи, гьучафайдина Учигьди шиникквар, пуная:
– Вей акьурай Заалди шиникквар, мушат маркьа гебурис. Аллагьдин Паччагьвел ме шиникквар суманттаринф э. 17Зун чвас агъая, Аллагьдин Паччагьвел шиникквди суман кьабул дакьу инсан, Лисади фишттира ачавесттава.
Девлетлу хӀеким
18ХӀекимвелдиъ ая са инсанди хабар гъушуная Ӏисайифас:
– Е идже МегӀелим, фикьуна кканде Зун, зас ккидиркӀва Ӏуьмур ес?
19Ӏисайи пуная гис:
– Фас агъаф э вун Зас иджеф? Иджеф садра дава, са Аллагь дала. 20Аллагьдин васиятар вас ягӀая: «КъехӀппавел маркьа», «ЙирхӀуна малуькӀе», «ХъадмиркӀена», «Дава кардин шигьидвел маркьа», «Ве дадасна бабас хӀуьлмат акье».
21Ге инсанди пуная Ӏисайис:
– Зе наши вахттарилас мич зун аркьаттар э джалла лебур. 22Ге унихьугуна, Ӏисайи пуная:
– Са кар э вас гьудуркӀаяф. Джалла ве хъаяттар масса йина, пул пай акье касибарис, хаб вахъ девлет ле заварил хьасе. Хуппай вун захъай шаб.
23Ге гафар унихьугуна, ге инсан ппара Ӏайи пушмал хьуная, ге девлетлу инсан хьуная. 24Ге пушмал хьуна агуф, Ӏисайи пуная:
– Девлет хъая инсанарис фидегьен четин э Аллагьдин Паччагьвелдиъ ачавес. 25Девейис рубун гӀуниас аттвес рехӀет э, девлетлу инсандис Аллагьдин Паччагьвелдиъ ачавес дала.
26Ге гафар унихьуттари пуная Ӏисайис:
– Давайчин гьинафас хьасе ккейчӀвас?
27Ӏисайи пуная гебурис:
– Инсанарифас акьас девеф, Аллагьдифас акьас вереф э.
28Петтруйи Ӏисайис пуная:
– Магьа чин кӀилди че атуна, Вахъай ушуне.
29Ӏисайи гебурис пуная:
– Зун чвас дузди агъая, Аллагьдин паччагьвел бадала учин хал, я хьир, я чуппар, я дадар бабар, я шиникквар атуттис, 30сасрабурилас алтухъди агьал есе, хаб вере дуьнйайи, ккидиркӀва Ӏуьмур есе.
Ӏисайи хьибудпегелай пуная Уч кӀесе пуна, хаб Учик джан керхьасе пуна
31Багулихъди гьаттивуна, Учин цӀеӀу вакилас Ӏисайи пуная:
– Магьа хьин вея Ерусалимдиди, тисаъ алуркьасе кӀилди Инсандин КӀиркӀахъас пайгъамбарари ликӀинаттар. 32Инсандин КӀиркӀ гавурарин гъилиъ ихьасе, Гик келхъенди ахьасе, Ге уджуз аркьай ахьасе, Гил туьтуь алчихьай ахьасе, 33ахира, зулумдалди йирхӀуна, Ге кӀесе. Амма хьибудпе ягъас Гик джан керхьасе.
34Амма вакилар петтарин фиттина гъавурдиъ архьуна адава, Ӏисайи пе гафарин мегӀна ахъарукьуна адава гебурихъди.
Ӏисайи сукъур инсандин Ӏекв алгьадес акьуная
35Ӏиса Ерихун агъа шагьурдигьди гьучарукьагуна, рекъуьн багулихъ экьуна ахьуная гъил ккедикӀуна са сукъур. 36Багулифас халкь вей унихьуна, сукъура хабар гъушуная: «Фи э хьунаф?» 37Гис пуная: «Назаретарин Ӏиса вея». 38Сукъура вевер акьуна пуная:
– Е Давударин кӀиркӀ Ӏиса, язукъ ухь зе!
39Удигьаттари буӀ, агъай хьуная гис, амма ги хъара Ӏайи гьараяр аркьай, агъай хьуная:
– Е Давударин кӀиркӀ, язукъ ухь зе!
40Ӏиса гъузуна, гьучафаша пуная Училди те сукъур. Сукъур гьучадегуна, Ӏисайи хабар гъушуная гифас:
41– Фиркьа Зун вас? Фи ккандея вас Закес?
Сукъура пуная:
– Е ХӀаф, зе уларил Ӏекв алгьадина ккандея зас.
42Ӏисайи пуная:
– Алгьадесе ве Ӏекв! Ве хъугъувелди ухӀуне вун.
43Гьеге сеӀетти алгьадиная сукъуран Ӏекв. Ге ушуная Ӏисайихъай, шукур аркьай Аллагьдисра. Гьеге кар агу инсанари, джаллабури шукур аркьай хьуная Аллагьдис.
Currently Selected:
Лука 18: AGU
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Библия тарджума аркьа институт, Москва, 2005