Matayo 19
19
Yesu nasuba Bayaudi
1Ejire Yesu amara emisango ejo, naso:ka Galilaya nagenda mu ca:ro ca Buyandi, ku ngego ya Yorodani. 2Ebise byafu nibimuru:ba, nabaosisya eyo.
Inyaruba yo buta:ni
(Mt. 5:27-32; Mk. 10:2-12; Lk. 16:18; 1 Bakor. 7:10-15; Bar. 7:1-3)
3Abafarisayo nibamu:jako nibamusaka, nibamubu:sya ati, ?Omu:nu e:kirisibwe okuirisya omugasi wae kubwe cifuno co:ne co:ne? 4Naindura na:ika ati, ?Mutakusoma ati, unu abakorere ku bwambiro akorere omurume no mugasi? 5Na:ika ati, Omu:nu kwarakoraga nasiga esemwene na nyira agwatane no mugasi wae, na babiri bo:ne barabaga mubiri gumwi. 6Batakuba babiri rindi, nawe ni mubiri gumwi. Mbe, binu Nyamuanga agwatanyisye omu:nu atarija kubita:nya. 7Nibamubu:sya ati, ?Kubaki Musa aragiriye okumuyana inyaruba yo buta:ni, korereki amusige? 8Nababwira ati, Kurwo bukomee bwe mitima jemwe Musa kwakorere ne:kirisya okuirisyaga abagasi bemwe, nawe kuso:ka ku bwambiro bitariga kutyo. 9Anye enibabwira ati, Unu arairisyaga omugasi wae tari bamugwatire no murume oundi, akatwara oundi, kaba muromesi. Na oyo katwara unu airisibwe one kaba muromesi.
10Abe:igisibwa bae nibamubwira ati, Ebigambo byo mu:nu no mugasi wae bikaba kutyo, kutakondere okufwara. 11Nawe nababwira ati, Aba:nu bo:ne batakutura kwikirisya omusango gunu, tari banu baciyabirwe. 12Okuba bario abajigaru banu be:buywe bari kutyo kuso:ka munda ja banyiramwene. Bario abajigaru banu banauywe na ba:nu. Ka bario abajigaru banu be:jiga:si-sye abe:ne kurwo bukama bwa mu rwire. Unu katura okwikirisya e:kirisye.
Yesu nabayana aba:na ribando
(Mk. 10:13-16; Lk. 18:15-17)
13Mbe niwo nibamure:tera aba:na abato:to korereki abateko amaboko, asabwe. Abe:igisibwa bae nibabagonya. 14Nawe Yesu na:ika ati, Mubasige aba:na abato:to ba:je kwanye, mutabaganya, okuba abe:ja:bo banu, obukama bwa mu rwire ni bwebwe. 15Nabatako amaboko, naso:kayo.
Omumura omuni:bi
(Mk. 10:17-31; Lk. 18:18-30)
16Mbe rora, omu:nu umwi namu:jako namubu:sya ati, Omwiigisya wo bwana, ?nikore musango ki gwo bwana korereki nibone obuanga bunu butakuwao? 17Namubwira ati, Ountogera ki wo bwana? Atario wa bwana tari Nyamuanga era. Nawe ukenda okwingira mu buanga, gwata ebiragiro. 18Namubu:sya ati, Ni bi:ya? Yesu namubwira ati, Ute:taga, Utaromeraga, Ute:baga, Utabeeresyaga. 19Ubarega esomwana na nyokomwana, Umwendega omwikasyanya wao rwa kutyo owiyenda omwene. 20Omumura oyo namubwira ati, Ebyo byone ndabigwatire kuso:ka ku buto:to bwani. ?Niki cinu cangerukako rindi? 21Yesu namubwira ati, Araba owenda okuba unu aku:miye, genda uka:ne binu unabyo, ugabire abataka, uriba no buni:bi mu rwire. Niwo u:je undu:be. 22Omumura oyo ejire ongwa omusango ogwo, nagenda asurumbae, okuba ariga na buni:bi bwafu.
23Yesu nabwira abe:igisibwa bae ati, Ni cimari enibabwira ati, kukomee omuni:bi okwingira mu bukama bwa mu lwire. 24Nababwira rindi ati, Ni kwangu ingamira okuitiŋana mwiundu rya insinga kukira omuni:bi okwingira mu bukama bwa Nyamuanga. 25Abe:igisibwa bae bejire bongwa nibarugu:ra muno, niba:ika ati, ?Ka niga unu katura okukisibwa? 26Yesu nabarore:rera, nababwira ati, Ku ba:nu eco cita:mi:sye, nawe Nyamuanga katura byone. 27Petero naindura na:ika ati, Rora, eswe casigire byone nicikuru:ba. Mbe ciribonamo:ki? 28Yesu nababwira ati, Ni cimari enibabwira ati, Mu kwiburwa kwa kabiri, orwo Omwana wo mu:nu ariyanja ku citebe ca rikusyo ryae, emwe one banu mwandu:bire muriyanja ku bitebe ekumi na bibiri nimutemera eci:na jiŋanda ekumi ne:biri eja Israeli. 29No mu:nu wo:ne unu asigire inyumba, amwi bamura ba:bo, amwi bayara ba:bo, amwi esemwene, amwi nyiramwene, amwi ba:na, amwi busi, kurwa risi:na ryani, ariyabwa kwiya egana, no kurya omwandu obuanga bunu butakuwao. 30Nawe aba:fu abo kwamba nibo bariba aba inyuma na ba inyuma nibo bariba abo kwamba.
Currently Selected:
Matayo 19: KIJ1960
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Kijita New Testament © The British and Foreign Bible Society and The Bible Society of Tanzania, 1960.