Mariko 6
6
Yesu naremwa mu ca:ro ca:bo
(Mt. 13:53-58; Lk. 4:16-30)
1Naso:ke:yo, nagenda mu ca:ro ca:bo. Abe:igisibwa bae nibagenda nage. 2Mbe isabato wejire ye:ya namba okwiigisya mu rikofyanyisyo. Ba:fu nibongwa nibataŋaŋara, niba:bu:sya ati, ?Unu ebyo abiso:sisye a:ki? Ka ni bwenge ki bunu ayabirwe unu? ?Kakora ebya managa na maboko gae kutiki? 3?Tari unu niwe omubuya, Omwana wa Maryamu, no mumura wabo Yakobo, na Yose, na Yuda, na Simoni? ?Na bayara babo citari nabo anu eweswe? Nabasinirira. 4Yesu nababwira ati, Omuragi atakuburwa cibaro, tari mu:si ya:bo na mu ruganda rwabo na mu nyumba ya:bo. 5Mbe ataturire kukorerayo eca managa co:ne, tari ateeko amaboko gae ku barwae bato:to, nabaosya. 6Narugu:ra kurwo bute:kirisya bwebwe. Ne:singa mu misi ne:igisya.
Yesu natuma abe:igisibwa bae
(Mt. 10:1-42; Lk. 9:1-6)
7Nabirikira abo ekumi na babiri, namba okubatuma babiri-ibiri, nabayana amanaga okuiga emisambwa emijabi. 8Nabaragirira basige kugega ci:nu co:ne ca mu njira, tari simbo era, nakabee iri tanda, nakabee iri nsagwa, nakabee jiri mpirya mu nsagwa jebwe. 9Nawe bafware bikwirya, ka basige kufwara kanju ibiri, 10Nababwira ati, Nyumba yo:ne inu murengiragamo, jemubega omwo kukinga anu muriso:kerayo. 11Anu wo:ne barirema okubakuma, amwi kubongwa, wora mwaso:kayo, mwekununa oruteri runu ruri mu bigere byemwe, rube rusingiro ku bene. 12Nibagenda nibasimurira ba:nu ati, mute. 13Nibakusya emisambwa myafu, nibabambaga barwae ba:fu amafuta nibabaosya.
Okwitwa kwa Yoana Omubatija
(Mt. 14:1-14; Lk. 9:7-9)
14Mbe omukama Erode nongwa, okuba risi:na ryae ryakumukire. Na:ika ati, Yoana Omubatija a:ma:su:ka mu bafu:ye. Nikwo kutyo amanaga ganu agakora mu mwene. 15Nawe abandi niba:ika ati, Ni Eliya. Abandi niba:ika ati, Unu ni muragi, rwo umwi ku baragi ba kara. 16Nawe Erode ejire ongwa na:ika ati, Yoana unu natemereko omutwe niwe amasu:ka. 17Okuba Erode omwene ariga atumire aba:nu nagwata Yoana, namuboya namuta mwiboyero kurwa Erodia, omugasi wa Filipo omumura wa:bo Erode, okuba ariga amutwae. 18Okuba Yoana ariga abwiriye Erode ati, Ni musiro awe okuba no mugasi wo wa:nyu. 19Kwakorere Erodia namunyigaarira nenda okumwita, natamibwa, 20okuba Erode o:bayaga Yoana, okuba ariga amumenyere ati, ni murengeresi na mweru, namurinda. Wora amungwa nawa Omwoyo muno, nawe namungwa nakonderwa.
21Mbe orusiku rwo mwanya gwae niru:ja. Erode nakora amarya ku rusiku rwo kwiburwa kwae, nabate:kera abe cibaro, na bakuru ba basirikare na bakuru be ca:ro ca Galilaya. 22Mbe omuyasya wa Erodia omwene naja nabina, nakondisya Erode na banu bariga benyanjire nage nibarya. Mbe omukama nabwira omuyara ati, Nu:sabwe ci:nu co:ne eco owenda, eni-kuyana. 23Namwiraisisya ati, Mbe co:ne co:ne cinu urasabwa enikuyana, nakabee riri eba:ra ryo bukama bwani. 24Mbe nauruka, nabu:sya nyiramwene ati, ?Nje nisabwe ki? Na:ika ati, Omutwe gwa Yoana Omubatija. 25Aonao nengira bwangu ku mukama, nasabwa na:ika ati, Enenda unane omutwe gwa Yoana Omubatija woryanu ku rutuba. 26Omukama nasurumbara muno, nawe atendere kumwima, kurwe biraisyo byae na banu bariga nibarya nage. 27Aonao omukama natuma omusirikare, naragirira okure:ta omutwe gwae. Mbe nagenda namutemako omutwe mwiboyero, 28Nare:tera omutwe gwae ku rutuba, naguyana omuyara. Omuyara naguyana nyiramwene. 29Mbe abe:igisibwa bae wejire bongwa, nibaja nibagega ecitundu cae, nibacisi:ka mu:fwa.
Jintumwa nijisuba ku Yesu
(Lk. 9:10)
30Jintumwa nijikofyanyisya ku Yesu. Nibamubwira emisango jo:ne jinu bakorere na jinu be:igisisye. 31Nababwira ati, Mu:je emwe abene:ra mwibara bwitebe, mwisye Omwoyo kuto:to. Okuba barigao ba:fu banu ba:jaga na banu bagendaga, ndijei omwanya gwo kurya one nigubura.
Aba:nu 5,000 mbari:sibwa
(Mt. 14:15-21; Lk. 9:10-17; Yo. 6:1-14)
32Nibagendera mu bwato mwibara bwitebe. 33Aba:nu nibabarora nibagenda. Ba:fu nibamumenya, nibabirimira aamwi okuso:ka mu misi jo:ne, nibaribata maguru, nibabatangira. 34Wejire asyoka mu bwato, narora ebise byafu, nabafwira ecigongo, okuba bariga rwa jina:ma jinu jitana mure:fi. Namba okube:igisya misango myafu. 35Mbe risu:ba ryariga ryagendere, abe:igisibwa bae nibamu:jako nibamubwira ati, Anu ni ibara na woryanu risu:ba ryagendere. 36Nubaku:re, bagende mu nguyo na mu misi jinu jisijene be:gurire ebiryo. 37Omwene naindura nababwira ati, Mubayane ebiryo emwe. Nibamubu:sya ati, ?Cigende cigure mikate ja siringi magana gabiri cibayane barye? 38Mwene nababu:sya ati, ?Murina mikate eringa? Mugende mujirore. Wejire bamenya niba:ika ati, Ni:ta:nu na swi ibiri. 39Nabaragirira benyanje bo:ne ku nenda ku nenda, ku bunya:si obubisi. 40Nibenyanja ku nenda ku nenda, ja egana:gana na ja makumi gata:nuta:nu. 41Nagega emikate eta:nu na swi ibiri, narore:rera inguru mu rwire, najisabirwa ribando, nabeganyamo emikate nayana abe:igisibwa bae, bajite imbere ya ba:nu. Na jiswi ibiri ejo one nabajigabira bo:ne. 42Nibarya bo:ne nibe:guta. 43Nibakofya ebiba:ra binu byasigae nibe:jusya bibo ekumi na bibiri, ne bya jiswi one. 44Banu bari:ye mikate bariga barume bisira bita:nu.
Yesu naribata ku nyanja
(Mt. 14:22-23; Yo. 6:15-21)
45Aonao nasinyirisya abe:igisibwa bae okusyabara mu bwato, be:rabe ku ngego ya Betesaida, omwene atangate okuraga ebise. 46Wejire amara okubaraga, nagenda ku ci:ma okusabwa. 47Wejire kwaba kegoro, obwato bwariga ku busiba, nawe omwene ariga:ri ku ca:ro enyere:ra. 48Mbe wejire abarora nibanya:ka okufuga, okuba omuyaga gwariga gwe butwe, mbe naba:jako mu cifuro ca kana ca mu ngeta, naribatira ku manji, naja okube:isiŋanyako. 49Nawe wejire bamurora naribatira ku manji, nibatoga ati ni:ungisi, nibakunga. 50Okuba bamurorere bo:ne nibawa Omwoyo. Aonao na:ika nabo, nababwira ati, Musimbi:re, nanye, musige ku:baya. 51Narinya mu bwato aamwi nabo omuyaga nigufwa. Nibataŋaŋara muno mu mitima jebwe, 52okuba batasombo:keywe ebye mikate, nawe emitima jebwe jariga mikome:e.
Yesu naosya abarwae abende Genesareti
(Mt. 14:34-36)
53Wejire baunguka nibakinga ku ca:ro ca Genesareti, nibagoba ku mwaro. 54Wejire basyoka mu bwato, aba:nu nibamumenya aonao. 55Nibabirima nibagenda mu ca:ro eco co:ne, nibamba okababaturira abarwae ku mariri nibabare:ta wo:ne wo:ne anu bonguywe ati, ario. 56Ne:nu wo:ne ajaga, mu nguyo amwi mu misi, amwi mu ndimiro, batu:raga abarwae mu maka:niro, nibamuremberesya bakunieko ku mufunjo gwo mwenda gwae. Na banu bamukuniagako nibaora.
Currently Selected:
Mariko 6: KIJ1960
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Kijita New Testament © The British and Foreign Bible Society and The Bible Society of Tanzania, 1960.