San Mateo 18
18
Sota mengibeba ni bakdang to, si‐katoy engato ali shi pantoshayan Apo Shiyos
1Idi nontan met laeng, sota ira too nen Jesus, dimaw ira son si‐kato jet sha inbag‐an ja kowan sha son si‐kato ey, “Sipa emoy engato ali i saad to shi pantoshayan nen Apo Shiyos?”
2Jet si Jesus, ena‐ẃal ni nga‐nga jet inpaledjat to nodta nankinaw‐an ira nonta too to, 3jet kowan to son si‐kara ey, “Podno iya ikowan ko son si‐kayo. No eg jo i‐onod ja ingesen iya nga‐nga, eg kayo mayda‐kam shi pantoshayan nen Apo Shiyos. 4Sota mengibeba ni bakdang to shorog ja inges toy kepesing niya nga‐nga, si‐katoy engato et ngo mowan i saad to shi pantoshayan nen Apo Shiyos.
5“No sipa ken too ja mapteng i pesing mo so ni inges niyay ya nga‐nga maypangkep ni semek mo son si‐kak, si‐kak met laeng i tinoshong nonta inpasing mo. 6Nem sota istay mengi‐kan ni panbesolan ira niya nankebaben emati son si‐kak, say panmaptengan nontan na too ket ma‐ono‐an koma ni ebadeg ga bato jet en mayteb‐ok shima debeng nga baybay. Sotan i panmaptengan to ta engka‐jas sotan na keshosa to nem say sota penosa nen Apo Shiyos son si‐kato ja pengikesho to no istay itoloy ton panbesol sota kait to. 7Ara, ngaaw i itsora ni tood ja dobong ja emengi‐kan ni panbesolan ni kait sha! Ẃaren kenshat i onsabin panbesolan ni too, nem kakaasi sota toon mengi‐kan ni panbesolan ni kait to.
8“Isonga no bilang ey sota sakey ya takday mo, ono sota sakey ya sedim i mengi‐kan ni panbesolan mo, potol mo et ibong mo. Ta no pa‐onong mo, si‐katoy kayteknalan mo shima apoy ya shosa‐an ingkatod ingka. Mapmapteng sota ka‐enshi ni sakey ya takday mo ono sakey ya sedim, no sotan i kesalbaran mo. 9Kasta met sota sakey ya matam: no si‐katoy mengi‐kan ni panbesolan mo, okit mo jet ibong mo. Ta no pa‐onong mo, si‐katoy kayteknalan mod impiyarno ja kad‐an ni apoy. Mapmapteng sota ka‐enshi ni sakey ya matam, no si‐katoy kesalbaran mo.
10“Karejo damsisen ira ja toon nankebaba, ta si Apo Shiyos, eg to ira damsisen. Waray anghil iren jay ya nankebaba jet kepatki ira nen Amak shi dangit. 11Ta si‐kak ja naypadton Anak ni Too, say kabol la dinaẃan ko alid ja dobong ket nak ira isalakan sota imaraẃi son Apo Shiyos.
12“Piyan kon amta‐an i joka pannemnem niya ikowan ko. No bilang ey ẃaray toon nankalniro ni sandasos, nem sota sakey imaraẃi, aliẃa ngaten sotan na too ket idekjas to sota siyam ma polo tan siyam shima shontog jet pilit ta to enapen sota sakey ya imaraẃi? 13Jet no sepolen to, man‐imdeng nga pasiya ni insapol to so nonta sakey ya istay imaraẃi, nem say sota siyam ma polo tan siyam ja eg imaraẃi ja ẃara ni olay. 14Sajay i arig ni nemnem nen Amejo ja ẃared dangit, ta eg to ngo kosto ja ẃaray angken sakey so nonta ira took ja nankebaba ja on‐araẃi son si‐kak.
Sota pesing no ẃaray nanbasol son si‐kam
15“No bilang ey ẃaray basol nonta kait mo son si‐kam, mo ikowan son si‐kato no abos jo. Jet no itenengan to sota ikowan mo son si‐kato, may‐odi mowan ma sota joka pesing nga singa san‐agi ja istay esharal nonta inpanbasol to son si‐kam. 16Nem no eg toka itenengan, pangodop ka ni sakey ono showa ja kadẃam jet daw kayo son si‐kato, say emin na ikowan jon showa, ẃaray mengitneng. Ta say naysolat ja esel nen Apo Shiyos nonta bayag da, kowan to ey mesepol i showa ono tedo ja onpaneknek so. 17Jet no eg to pay laeng itenengan ja eg memati son si‐kara, ikowan mo ma so nonta ira emati no mesa‐nop ira. No iso met laeng ja eg to itenengan sota ikowan sha son si‐kato, say pesing mo ma son si‐kato, aliẃen mo i‐inges so nonta ira eshom ma kait mod pamati, no diket pasing mo son si‐kato sota moka pesing so nonta ira eg maka‐amta son Apo Shiyos, ono sota para singil ni bowis ja nankekedsel.
18“Agpayso iya inkowan ko son si‐kayo. No ngarantoy iparit jo ono ipalobos jo shiya dobong, itolok nen Apo Shiyos ja ẃared dangit ja si‐katoy medeka.
19“Iyay pay i ikowan ko son si‐kayo. Sota showen too shiya dobong, no nan‐inges i nemnem sha maypangkep ni shaka pan‐ishawat so nen Apo Shiyos ja Amak shi dangit, sota kekshawen sha, si‐katoy medeka. 20Ta sota showa ono tedo ja esa‐nop pangkep son si‐kak, ẃara‐ak son si‐kara nontan na inkasa‐nop sha.” Sajay den emin, inkowan nen Jesus.
In‐arig nen Jesus sota baga‐en ja eg to pinekawanan i kait ton baga‐en
21Si Pedro dimaw son Jesus et kowan to ey, “Apo, meminpiga ja pekawanan ko pay laeng sota kait ko no manbesol son si‐kak? Angken meminpito?”
22Simongbat si Jesus ja kowan to ey, “Aliẃen meminpito bengat, no diket meminshakel ja eg mebidang: meminpiton polon pito i pemekawan mo ni kait mo. 23Ta say kay‐eshigan ni kaasi nen Apo Shiyos shi pantoshayan to, sajay ya istoriya. Nontan da, ẃaray ari ja piyan ton tabtabalen sota ira baga‐en to maypangkep nonta otang sha son si‐kato say man‐i‐inawatan ira. 24Isonga sota ira baga‐en to ja ẃaray otang sha son si‐kato, inpa‐odop to ira. Jet ẃaray sakey ali ja indaw sha son si‐kato ja diniboy otang to. 25Nem sajay ya baga‐en, eg to posi‐en i bayad nonta otang to so nonta apo to. Isonga sota apo to, inkowan to ey maydeko iren san‐aseẃa, pati sota ira annak sha, tan angken pay sota kokowa sha, say bayshan sha sota otang sha son si‐kato. 26Nem sota baga‐en, nantalimokod shi sango‐an nonta apo to, ja ekikaasi son si‐kato, ja kowan to ey, ‘Kaasi‐imak apo! Emin sota otang ko son si‐kam, bayshan ko.’ 27Jet nontan ma, kinaasi‐an nonta apo to sotan na baga‐en; isonga inkowan to ey angken ondaw ja angken eg to bayshan sotan na otang to. 28Nem sotan na baga‐en, idi bimo‐day, inaspol to sota kait ton baga‐en ja engotang ngo son si‐kato ni otik ka pilak. Jet to inshel et sin‐el to, ja kowan to ey, ‘Bayshim niman sota inotang mo son si‐kak!’ 29Jet sotan na kait ton baga‐en, nanshomog shi sango‐an to ja ekikaasi son si‐kato, ja kowan to ey, ‘Kaasi‐imak ta sota inotang ko son si‐kam, bayshan ko!’ 30Nem sotan na baga‐en ja engotangan ni kait to, memasig, jet to et inbalod sota kait ton baga‐en ja ẃaray otang to son si‐kato ingkatod kowan to ey bayshan to sotan na otang to. 31Idi inon‐an ira nonta eshom ma baga‐en nonta ari iyay ya inpasing nontan, ngaaw i deknara jet sha inkowan so nonta apo sha. 32Jet sota apo sha, to inpa‐odop sota baga‐en ja engibedod ni kait ton baga‐en jet kowan nonta apo to ey, ‘Si‐kam ma makedsel la baga‐en! Pinekawanan taka ni emin na otang mo son si‐kak ta ekikaasi ka son si‐kak, 33jet istay pekawanan mo koma ngo sota kait mon baga‐en ja engotang son si‐kam, ja inges to ngoy inpasing ko son si‐kam!’ 34Isonga sota apo to, bimonget jet inkowan to so nonta emanbantay ni badoran ey ibalod sha sotan na baga‐en to ingkatod eg to bayshan na emin sota otang to.
35“Sajay i arig ni kepesing nen Amak shi dangit son si‐kayo no eg jo pekawanan sota kait jo ja manbesol son si‐kayo. Jet mesepol pay ya podnoy pesing jon memekawan.” Kowan nen Jesus.
Currently Selected:
San Mateo 18: DMP
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 1978, Wycliffe Bible Translators, Inc. All rights reserved.