GENESIS 22
22
Abasi Ɔdɔhɔ Abraham Ete Emen Isaac Anam Uwa Ɔnɔ Imɔ
1EDIKEM ke ŋkpɔ oro ama ekebe, Abasi odomo Abraham; ndien ɔdɔhɔ enye, ete, Abraham. Ndien enye ete, 2Se ami mi, Ndien Enye ete, Da ndien eyen fo, eyen fo kierakiet, Isaac emi afo amade, ka ke isɔŋ Moriah; nyuŋ wa enye do ke uwa ke akamba obot kiet eke ndidɔhɔde fi. 3Ndien Abraham abak ke usenubɔk adaha ke enyɔŋ, ɔdiɔŋ ass esie, onyuŋ ada mkparawa esie iba ŋko, ye Isaac eyen esie, onyuŋ asiak ifia uwa, ndien enye adaha ke enyɔŋ, aka ke ebiet oro Abasi ɔkɔdɔhɔde enye. 4Ekem ke ɔyɔhɔ usen ita, Abraham emenere enyin esie okut ebiet oro nsan-nsan. 5Ndien Abraham ɔdɔhɔ mkparawa esie, ete, Mbufo etie mi ye ass nnyin; ndien ami ye eyen mi iyeka ko ikɔbɔŋ akam, ndien ifiak itiene mbufo. 6Ndien Abraham ada ifia uwa odori Isaac eyen esie ke idem; ada ikaŋ ye ikwa ke ubɔk, ndien mmɔ mbiba esaŋa ɔtɔ kiet. 7Ndien Isaac ɔdɔhɔ Abraham ete esie, ete, Ete mi; ndien enye ete, Se ami mi eyen mi. Ndien Isaac ɔdɔhɔ ete, Se ikaŋ ye ifia; 8edi enye eyen erɔŋ uwa? Ndien Abraham ɔdɔhɔ ete, Eyen mi, Abasi eyeyom eyen erɔŋ uwa ɔnɔ idem esie; ntem ke mmɔ 9mbiba esaŋa ɔtɔ kiet. Ekem mmɔ edisim ebiet oro Abasi ɔkɔdɔhɔde enye; ndien Abraham anam itie-uwa do, onyuŋ otim obon ifia, ndien ɔbɔp Isaac eyen esie emen odori ke itie-uwa ke enyɔŋ ifia. 10Ndien Abraham anyan ubɔk esie, ada ikwa ete iwot eyen esie.
11Ndien angel Jehovah etie ke enyɔŋ okot enye, ete, Abraham, Abraham. Ndien enye ete, Se ami mi. 12Ndien enye ɔdɔhɔ ete, Kuda ubɔk fo utuk eyen oro, kunyuŋ unam enye baba ŋkpɔ kiet: koro ke emi ke mfiɔk nte afo efefehe Abasi, afo unyuŋ usinke mi eyen fo kierakiet. 13Ndien Abraham emenere enyin esie ese, ndien, sese okukim ke edem, emi nnuk esie ɔkɔmɔde ke mfuhɔ ikɔt: ndien Abraham aka okomum okukim oro, onyuŋ awa enye ke uwa ke itie eyen esie. 14Ndien Abraham osio ebiet oro enyiŋ Jehovah-jireh: nte emi edɔhɔde ke eyo mfin emi, Ke obot Jehovah ke eyekut.
15Ndien angel Jehovah etie ke enyɔŋ ɔtɔŋɔ ntak okot Abraham, 16onyuŋ ɔdɔhɔ ete, Jehovah ɔdɔhɔ ete, Mmotomo idem mi, nte Koro afo ama akanam ŋkpɔ emi, mukonyuŋ usinke mi eyen fo, 17eyen fo kierakiet; nte nyediɔŋ fi akamba, nyenyuŋ nnam ubon fo ewak eti-eti nte ntantafiɔŋ enyɔŋ, ye nte ntan emi odude ke mben inyaŋ; ubon fo eyenyuŋ enyene enyin-usuŋ mme asua mmɔ: 18kpukpru mme idut ke ererimbot eyenyuŋ ekut mfɔn eke otode ke ubon fo, koro afo ama okokop uyo mi.
19Ekem, Abraham afiak etiene mkparawa esie, ndien mmɔ edaha ke enyɔŋ, esaŋa ɔtɔ kiet eka ke Beer-sheba; ndien Abraham oduŋ ke Beersheba.
20Edikem ke ŋkpɔ oro ama ekebe, etiŋ enɔ Abraham, ete, Sese, Milcah ŋko ama onyuŋ aman 21nditɔ ɔnɔ Nahor eyen-uka; Uz akpan esie, ye Buz eyen-eka esie, 22ye Kemuel ete Aram; ye Chesed, ye Hazo, ye Pildash, ye Jidlaph, 23ye Bethuel. Bethuel onyuŋ obon Rebekah: owo itiaita emi Milcah aman ɔnɔ Nahor, eyen-eka Abraham. 24Ŋwan esa esie ŋko, emi enyiŋ esie ekerede Reumah onyuŋ aman Tebah, ye Gaham, ye Tahash, ye Maacah.
Currently Selected:
GENESIS 22: ENA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Efik Old Bible With Sectional Headings © Bible Society of Nigeria, 2013, 2019.