GENESIS 28
28
Jacob Oyom Ŋwan Se Enye Ɔdidɔ
1NDIEN Isaac okot Jacob edi, onyuŋ ɔdiɔŋ enye, onyuŋ eteme enye ete, Kuda ŋwan ke otu nditɔ-iban Canaan. 2Daha ka ke Paddan-aram, ke ufɔk Bethuel ete uka; nyuŋ da ŋwan ke idem fo do ke otu nditɔ-iban 3Laban eyen-ete uka. Ndien Abasi Ibom eyediɔŋ fi, eyenyuŋ anam fi ɔtɔt, onyuŋ awak, ndien afo eyekabare akamba otu owo; 4ndien enye ada eridiɔŋ emi enye ɔkɔdiɔŋde Abraham, ɔnɔ fi ye nditɔ fo ŋko; kpaŋ afo ekpenyene isɔŋ emi afo edide oduduŋ ke esit, emi Abasi ɔkɔnɔde Abraham. 5Ndien Isaac ɔdɔŋ Jacob ete aka: ndien enye aka ke Paddan-aram ke ebiet Laban, eyen Bethuel Syrian, eyen-eka Rebekah, eka Jacob ye Esau.
6Ndien adaŋemi Esau okutde nte Isaac ɔkɔdiɔŋde Jacob, okonyuŋ ɔdɔŋde enye aka ke Paddan-aram, ndida ŋwan ke idem esie do; ke ɔdiɔŋ enye, onyuŋ owuk enye, ete, Kuda ŋwan ke otu 7nditɔ-iban Canaan; nte Jacob okonyuŋ okopde uyo ete esie ye eka esie, onyuŋ akade ke Paddan- 8aram; adaŋemi Esau onyuŋ okutde nte Isaac ete esie esede nditɔ-iban Canaan ke idiɔk; 9ndien Esau aka ke ɔtɔ Ishmael, akada Mahalath, eyen Ishmael, eyen Abraham, eyen-eka Ne-baioth aŋwan, adian ye iban esie.
10Ekem, Jacob adaha ke Beer-sheba, aka ke Haran. 11Ndien enye ediwɔrɔ ke ebiet kiet, onyuŋ adaŋ do, koro utin osopde; onyuŋ ada itiat ɔtɔ oro onim ke udoribuot esie, onyuŋ ana ke isɔŋ ke ɔtɔ oro. 12Ndien enye adaba ndap, ndien, se, udigukot eke adade ke isɔŋ, ibuot esie onyuŋ osim ke enyɔŋ; ndien, sese mme angel Abasi ke edɔk enyuŋ esuhɔre ke esit. 13Ndien, sese, Jehovah adada ke enyɔŋ, ete, Ami ndi Jehovah Abasi Abraham usɔ, ye Abasi Isaac nde: nda isɔŋ emi afo anade ke esit nnɔ fi ye ubon fo. 14Ndien ubon fo eyedi nte ntan isɔŋ; afo eyenyuŋ asiaha ke nnasia, ye ke ufien, ye ke edere, ye ke usuk: ndien edito ke afo ye ubon fo kpukpru oruk ke ererimbot ekut ufɔn. 15Ndien, sese, ami ndu ye afo, nyenyuŋ ŋkpeme fi ke kpukpru ebiet eke afo edikade, nnyuŋ nda fi nnyɔŋ ke isɔŋ emi; koro mmendikpɔŋke fi, tutu nnam se ntiŋde nnɔ fi.
16Ekem, Jacob edemere ke idap, ndien ɔdɔhɔ ete, Kakpan Jehovah odu ke ɔtɔ emi; ndien ami mfiɔkke. 17Ndien efehe ndik, onyuŋ ɔdɔhɔ ete, ebiet emi enyene ndik akan! emi idige eŋwen ibɔhɔke ufɔk Abasi, emi onyuŋ edi usuŋ heaven. 18Ndien Jacob adaha ke usenubɔk tuhi, ada itiat oro enye ekenimde ke udoribuot esie, owuk adaha onyuŋ ada 19aran ɔtɔhɔ enye ke ibuot. Ndien enye osio ɔtɔ oro enyiŋ Beth-el: edi Luz edi mbemiso enyiŋ obio oro.
20Ndien Jacob akaŋa akaŋa, ete, Ekpedi nte Abasi edidude ye ami, edinyuŋ ekpemede mi ke usuŋ emi ami ŋkade, onyuŋ ɔnɔde mi udia ndia, ye ɔfɔŋ-idem nsine, 21ami nnyuŋ mfiakde ndi ke ifure ke ebiet ete mi, Jehovah ama 22onyuŋ edi Abasi mi: ndien itiat emi ŋwukde ke adaha eyedi ufɔk Abasi: ndien nyesio ubak kiet ke itie duop kpukpru se afo edinɔde mi, nda ntomo fi.
Currently Selected:
GENESIS 28: ENA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Efik Old Bible With Sectional Headings © Bible Society of Nigeria, 2013, 2019.