Kîam 12
12
Ngai Nîwetire Aburamu
1 #
Ciîko 7.2-3; Ahib 11.8 Ngai-Mûnene nîwerire Aburamu atîrî, “Uma vûrûri ûyû wenyu, ûtige andû enyu, mûciî wa aguo, na ûthiî vûrûri ûrîa ngaakwonia. 2Nanie nîngaakûva njiarwa nyîngî nacio nîigaatuîka rûrîrî rûnene. Nie nîngaakûrathima na ndûme rîîtwa rîaku rîgîe îgweta. Nawe ûtuîke kîrathimo.
3 #
Agal 3.8
Nie ngaarathimaga andû arîa onthe magaakûrathimaga,
nwatî ngaarumaga arîa onthe magaakûrumaga,
na andû a mavûrûri monthe makaarathimagwa na njîra yaku.”
4Rîrîa Aburamu aarî na ûkûrû wa mîaka mîrongo mûgwanja na îtano (75), nîwaumire Harani wata ûrîa Ngai-Mûnene aamwîrîte eke, na makîthiî na Loti. 5Aburamu nîwocire mûka Sarai na Loti mwana wa mûrwang'ina, ûtonga wao wonthe, ngombo irîa maagîte nacio marî Harani, na makîthiî Kanaani.
Na rîrîa maakinyire vûrûrirî wa Kanaani, 6Aburamu nîwavîtûkîrîre gatagatî ka vûrûri ûcio na agîkinya Shekemu vandû vatheru mûtîrî ûrîa mwamûre wa More. Vîndî îo Akanaani nîo maatûûraga vûrûri ûcio. 7#Ciîko 7.5; Agal 3.16 Nake Ngai-Mûnene nîwaumîrîre Aburamu na akîmwîra atîrî, “Vûrûri ûyû nîngaaûvecana kûrî njiarwa ciaku.” Kwoguo Aburamu nîwatumîre Ngai-Mûnene ûcio wamumîrîrîte metha ya kîgongoona vau. 8Vuva wa ûguo Aburamu nîwathiîre irîmarî irîa irî mwena wa îrathîro wa Betheli, na akîamba îgema rîake gatagatî ka Betheli na Ai. Betheli yarî mwena wa îthûîro, nayo Ai mwena wa îrathîro. Nake Aburamu nîwatumîre Ngai-Mûnene metha ya kîgongoona vau na akîgooca Ngai-Mûnene arî vo. 9Nake Aburamu nîwathiîre na mbere na rûgendo rwake erekerete Negebu.
Aburamu arî Misiri
10Nakuo kûu vûrûrirî wa Kanaani nîkwagîre na yûra rînene. Kwoguo Aburamu nîwathiîre Misiri gwîkara kuo. 11Na arî vakuvî gûtonya vûrûri wa Misiri, Aburamu nîwerire mûka Sarai atîrî, “Nîmbicî we ûrî mûndûmûka mûthaka. 12Na wonwa nî andû a Misiri, makaauga atî we ûrî mûka wakwa; kwoguo makaambûraga nwatî magûtige ûrî mwoyo. 13#Kîam 20.2; 26.7 We ûkaamera atî wî mwarwaiya, na nîûndû waku o makaambîka maûndû maro na matikaambûraga.” 14Na rîrîa Aburamu aatonyire Misiri, andû a Misiri nîmoonire atî mûka aarî mûthaka mûno. 15Nao anjaama a mûthamaki wa Misiri moona Sarai nîmeerire mûthamaki ûrîa Sarai aarî mûthaka. Kwoguo Sarai nîwavirirwe mûciî kwa mûthamaki. 16Mûthamaki nîwekire Aburamu maûndû maro nîûndû wa Sarai. Mûthamaki nîwavere Aburamu ndîthia ya ng'ondu, ng'ombe, mbûri mvunda, ngamîîra na ndungata cia arûme na cia aka.
17Nwatî Ngai-Mûnene nîwatûmîre mûthamaki wa Misiri na andû ake mûrimû mûcûku mûno nîûndû wa gwoca Sarai mûka wa Aburamu. 18Kwoguo mûthamaki nîwetire Aburamu na akîmûria atîrî, “Ûmbîkîte û nîkî? Waregire kûmbîra atî ûyû aarî mûkaguo nîkî? 19Nîndûî gîatûmire uuga atî ûyû nî mwarwanyûkwe, na ûgîtûma nîmwoca atuîka mûka wakwa? Mûkaguo nîke ûcio, mwoce mûthiî!” 20Nake mûthamaki nîwathire andû ake akîmeera moce Aburamu na mûka makîmumagarie vamwe na indo cionthe irîa aarî nacio.
Currently Selected:
Kîam 12: KKB
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
©Bible Society of Kenya, 2019