IINDUMISO 94
94
Umthandazo wokucela ukuphindezelelwa nokuhlangulwa
1Thixo wempindezelo, Yehova,
Thixo wempindezelo, bengezela!
2Phakama, Mgwebi wehlabathi!
Bábuyisele impatho yabo abanekratshi.
3Kunini na abangendawo, Yehova,
Kunini na abangendawo bevuyelela?
4Balephuza amagwebu, bathetha ngokusa,
Bayandolosa bonke abasebenzi bobutshinga.
5Batyumza abantu bakho, Yehova,
Bacinezela ilifa lakho.
6Babulala umhlolokazi nowasemzini,
Bancinitha inkedama.
7Bathi ke, Akaboni uYehova,
Akagqali uThixo kaYakobi.
8Qondani, nina bazizityhakala ebantwini;
Nina zinyabi, niya kuqiqa nini na?
9Omilisele indlebe, akayi kuva na?
Obumbe iliso, akayi kukhangela na?
10Umthethisi weentlanga akayi kohlwaya na,
Ulofundisa abantu ukwazi?
11UYehova ngumazi weengcinga zabantu,
Ukuba zingumphunga.
12Hayi, uyolo lwendoda oyithethisayo, Yehova,
Oyifundisayo ngomyalelo wakho;
13Ukuba uyizolise eziminini zobubi,
Ade ambelwe isihogo ongendawo.
14Ngokuba uYehova akabalahli abantu bakhe,
Akalishiyi ilifa lakhe.
15Ngokuba isiko liya kubuyela ebulungiseni,
Balilandele bonke abantliziyo zithe tye.
16Ngubani na oya kusukela phezulu kubo abanobubi, ngenxa yam?
Ngubani na oya kumelana nabasebenzi bobutshinga, ngenxa yam?
17Koko uYehova abe luncedo lwam,
Umphefumlo wam unge uhle msinya, waya apho kuthiwa cwaka khona.
18Ukuba ndithi, Lwatyibilika unyawo lwam,
Isuka inceba yakho, Yehova, indixhase.
19Ebuninzini beengcinga-ngcinga zam ngaphakathi kwam,
Iintuthuzelo zakho ziyawuyolisa umphefumlo wam.
20Ingáqhelana nawe na itrone yolweyeliselo,
Ebumba ububi ngommiselo?
21Bahlanganyela umphefumlo welungisa,
Baligwebe igazi elimsulwa.
22Kanti ke uYehova uyingxonde kum,
UThixo wam liliwa endizímela ngalo.
23Úbubuyisela phezu kwabo ubutshinga babo,
Ubabhangisa ngobubi babo;
Uya kubabhangisa uYehova, uThixo wethu.
Currently Selected:
IINDUMISO 94: XHO75
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Bible Society of South Africa 1975. Used with permission. All rights reserved.