KEJADIAN 6
6
Bulalut na'ko mansian
1Leka mansian nane ansato ma namfau ma nasitbon anbi pah pinan funam natef, ma nahonis li'anfeto sin, 2Uisneno In anah-anah sin sufan nit nak li'anfeto nane amasat kun. Oke te sin naiti li'anfeto-li'anfeto le sin anlomi. 3Es nane te Uisneno namolok nak, “Au of ka u'none fa mansian nane hen moni talantia nabal-bal; sin amonit le namle'u, ma of sin mes hen mate. Naubon na'ko tabu le i sin uan of ka nesi fa na'ko ton 120.” 4Anbi batan nane, ma namuni na'kone amsa, anmu'i atoni-atoni ao naek anbi pah pinan. Nane anbife na'ko mansian le naiti Uisneno In anah-anah sin sufan. Atoni-atoni ao naek nane anfani meo naek ma atoni-atoni mateka anbi batan ahunut.
5 Uisneno ankiso maufinu na'ko atoni-atoni pah pinan nane nae le'uf kun, ma ale sin tenab nahenu nok maufinu amsa. 6In antofon natuin In anmepu nalali sin ma antao sin anbi pah pinan. In nekan naen, 7talantia In namolok nak, “Of Au ule'un mansian le Au mepu ulali nane, ma ale kolo amsa, ma ale mu'it bian, Au tofok natuin Au mepu ulali sin.” 8Mes Nai Nuh in antom nek Uisneno.
Nai Nuh
9-10Le i nu'an antom Nai Nuh. In anah sin mone tenu, esle' Nai Sem, Nai Yafet ma Nai Ham. Nai Nuh kan mo'e fa sanat, ma in le nane atoni nek alekot anbi batan nane. In anmatalu anbi monit nok Uisneno. 11Mes anbi Uisneno In kisot ale atoni anmo'e maufinu ma bulalut anbi me-me. 12Uisneno nail pah pinan le nane ma le In nit nane alkun maufinu, natuin ale mansian anmaufinu anbi in monin.
13Oke te Uisneno nak neu Nai Nuh nak, “Au aiti ulali fekat he nati' ule'un ma usopu monit na'ko ale amonit. Au of ule'un ani sin nok pah pinan, natuin pah pinan nane nahenu nalali nok maufinu. 14Anmo'e bnao mese neu ko na'ko hau alekot; anmo'e ke'an-ke'an anbi in nanan, ma amboto meki ter na'ko in nanan ma in kotin. 15Enao nane in amnanun meter 133, in manuan meter 22, ma in latan meter 13. 16Nalali te amtobe bnao le nane, ma mufetin sona le in manuan centi 44 anbi obet ma nesat in atnanan. Anmo'e bnao le nane ktuta tenu ma amtao eno mese anbi in kabenan. 17Au of usanut noe sako he nale'un ale amonit le anmoni anbi pah pinan. Ale sa' anbi pah pinan of anmate, 18mes neu ko Au he mo'e ani Au fef bela oke ko. Amtam nai meu bnao le nane in nanan mok ho fenai, ma ho anah sin es-es nok in fenai. 19-20Meki neu bnao nane in nanan naif mese ma ainaf mese na'ko ale kolo ma ale mu'it bian, he nati' kaisa sin nok namle'un. 21Meki ale mnahat human namtis neu ko ma neu ale mu'it-mu'it nane.” 22Nai Nuh nanaoba ale sa' le Uisneno naplenat nalali neu in.
Currently Selected:
KEJADIAN 6: AOZ
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena