YOHANES 4
4
Yesus mbrap bit sop timiei hanjop Samaria
1Mpe dima lene nimpung Farisi nya imiap Yesus ninghapti tut tungwatu nya imang bibor di itti kin Noni leu api ibit midut nitur yok ei minyeiti noro ibou poi he itti kin Yohanes. (2Ningat ne Yesus tur tungwatu nya ei minyeiti bi noro yo di igya kui Noni rino itur yok ei minyeiti a.) 3Tirigi Yesus kan tut bipia Farisi nya ikkin kep ninghapti lene Noni jo leu hanjop Yudea bingkwei hanyen ug ei hanjop Galilea. 4Nimbutti dima ne suar mbut ba, njiriek hanjop Samaria. 5#Kej. 33:19; Yos. 24:32 Yesus ug krau mpia di birok kik minu ndig Sikar ei hanjop Samaria di jo dideu mpia ttou nsi gom di Yakub pek bak nipmot Yusuf. 6Mpia ttou nsi dima bon minyei bousi Yakub de nipou su. Yesus mbut nimig wer ninno bitig dino Noni gwam kep ninghuisi simiak minyei bousi dima mem mpia huk pijum.
7Mpe dima cem sop timiei hanjop Samaria gom kwei tau minyei leu api Yesus hara noni “Ahug minyei hi biDa bididut ug e?” 8Yo di igya kui Noni yahagom ikes Noni ei su biyuug coi ei minu ndig dima binggok ser njita.
9 #
Ezr. 4:1-5; Neh. 4:1-2 Lene misop dima buhup “Andigpoi e, Nani ne mben Yahudi lene dani ne mben Samaria. Nggon rino ahara da tut minyei mem gima adut i?” (Buhup nok lewo mben Yahudi inghek mben Samaria.)#4:9: Nipas kep inghek mben Samaria cem kei lene nipas kep idut leu gi mokti gom bit yam bi cem kei.
10Yesus buhup “Gino akan igbit tut mun di Allah yai bak tungwatu nya ba, angat igbit Da di dahara na tut minyei dini lene nanti ma ahara Da leu api duhug minyei niyaijo nijep hi bina ba, adut.”
11Misop dima pai “Andigpoi e, aba mindei bitau minyei i? Minyei yaisi dini jo jui nsi di jut bibor. Atau minyei niyaijo nijep leu sirigitou i? 12Niba nyekep minyei bousi dini leu Yakub di nok pung di nintun him ba, noni kin nimunggwom bat nya kin nide mindhe-ndhe nya yahagom idut kikep leu minyei bousi dini habiei su. Akan bipia anyeng jei dor njiriek Yakub e?”
13Yesus pai “No di dut minyei dini mporo nggobiau hanyen. 14Noro no di dut minyei gi Da duhug binoni nggobiau hanyen bi sren. Lewo minyei gi duhug binoni rinok minyei bousi gom di biam tut minyei niyaijo nijep ei ningonti bijo kikau.”
15Misop dima hara Noni “Andigpoi e, ma ahug minyei dima hi bida bididut! Leu binhyepo dinggobiau bu bi ba, suar dikwei tau minyei ei minyei bousi dini bu bi sren.”
16Yesus cuk noni “Aug hig ajjep ba, jahacem jikwei.”
17Misop dima buhup “Diwak dijjep hi ei nijam dini bigyo.”
Yesus pai “Gino apai sut awak ajjep hi ei nijam dini bigyo dima ne igbit ri. 18Lewo awak ajjep nya ibou muhwi nipou su ba, sisip ayem njita tut pinai hiter mem nijam dini noro noni ne ajjep nijit rin bi.”
19Misop dima buhup “Andigpoi e, jo nibreisi bipia Nani ne no di nabi ri. 20Pung di nyeni nintun him nya ikuk yok bak Allah kikep ei nungug tou dini noro je di mben Yahudi jitri tut bipia minu ndig Yerusalem ne mpia ttou nsi gom ngat mem tungwatu nya ikuk yok kikep bak Allah eisi ri.”
21Yesus pai binoni “Ma ayok ngon kep bipia ei nidipti bu ne tungwatu nya mikuk yok bak Icig Allah ei mpia ttou nsi dini kin minu ndig Yerusalem cem bu bi. 22Je di mben Samaria jikan igbit tut mun di jikuk je bak bi. Noro nye di mben Yahudi nikan igbit tut No di nikuk nye bak. Lewo niyai niteu leu sisarti kin niyaijo nijep tug hon mben Yahudi. 23Tungwatu nya iba Allah Ninnei de nisindemti bibikuk yo bak Icig di nok Allah di nijit-jau mem nijam di nidipti bu kin nijam dini cem lewo Noni joi sut yo di iba ingon gom bibikuk yok biNoni. 24Lewo Allah ne Ninnei ri. Tungwatu nya igyai nisindemti leu Nonti Ninnei leu binhyepo iba ingon gom bibikuk yok biNoni.”
25Misop dima pai bak Yesus “Dikan tut bipia Nibou Ndig di teu tungwatu nya biyai niyaijo nijep biyok (di ninyeng Kristus) mikwei ri. Gino Noni kwei lene Noni mitri tut mun nyeng hagom brei binye.”
26Yesus buhup “Dani ne Nibou Ndig di teu tungwatu nya biyai niyaijo nijep biyok ri. Dani ne No dima rin ba, dingat rino dimbrap bit na nogindini.”
27Yesus pai nok rino yo di igya kui Noni ittau hanyen kwei bingat lo, No mbrap bit no di sop leu api inga leu tut. Noro hi gi hig ser no di sop “Ahig ser Yesus tut mindei i?” Hi gi hig nok bi. Lene igihig ser Yesus “Nggon rino ambrap bit no di sop dini i?” Nok cem bi.
28Gima rino misop dima kes nide dibijig bijo ei leu api ngkwei hanyen bipai bak timiei nya, 29“Jikwei ba, yuug ngat tungwagom di ndat kep diyai munti nya hagom brei bida ug e. Mpaba Noni ne Nibou Ndig di teu tungwatu nya biyai niyaijo nijep biyok rin e?” 30Gima rino ittei yam bijo leu ide minu ndig bibisau kwei ngat Yesus.
31Mpe dima lene yo di igya kui Yesus ipai biNoni bipia “Guru e, ma ayem njita dini.”
32Noro Yesus buhup “Diyem njita hi di jikan tut bi tu.”
33Gima rino sindi ihig yam “Tungwa hi kwas njita hi tut Noni biyem tu e?”
34Lene Yesus pai biyok “Gino dibit Allah di cuk Da kwei ningon kanti bidiyai Nide midyai nya cem biput lene gima ne njita di diyem ri. 35Jitri tut biyam bipia bed bitai bu api tto bou dem mem gima ibiang njita kwei leu beisi. Noro Dani dipai bije bipia ma jimian ser beisi nogindini lewo njita hagom len tu. 36No di biang njita kwei sindi tug ndei nimuhup bibiang njita di bit bon pror yon kan bi kwei ndam niyaijo nijep di jo kikau. Gima rino no di ndim ningan kin no di biang njita kwei leu beisi yahacem igyai nillei noyam. 37Nihyet nibiti nindati dini cem igbit bipai ‘Tungwagom ndim ningan leu api hiter biang njita kwei.’ 38Dicuk je ba, juug biang njita kwei leu beisi di jicom jahanggwap tut bi. Yo di hiter icom yahanggwap tut nipou su leu api jiyai ningat di kei tug hon yoni.”
39Timiei hanjop Samaria di ibong ei minu mien Sikar imang bibor iba ingon com Yesus drek dip misop dima di pai biyok “Noni ndat kep diyai munti nya hagom brei bida.” 40Gima rino ikwei tigtai Yesus mem gima kwei bong bit yok. Apino Noni bong bit yok mem mmun-njap can.
41Jei bi lene yo di hiter ei minu mien dima imang bibor iba ingon com Yesus lewo imiap nihyet di tibim ei Nonti nuhui him. 42Gima rino ipai bak misop dima “Nogindini niba ningon com Noni tug hon ahyet di atri tut Noni he bi noro tug hon nihyet di tibim kwei leu Nonti nuhui him. Nikan tut bipia Noni ne No di teu tungwatu nya leu ide sisar biyai niyaijo nijep biyok ri.”
Yesus bindei ba, tungwagom di ya kui nibou ndig nipmot kei hanyen
43Yesus bong bit timiei minu mien Sikar mem mmun-njap can bingwig leu lene mbut ug ei hanjop Galilea. 44#Mat. 13:57; Mrk. 6:4; Luk. 4:24 Yesus Nonti pai nipou su “Nindigsi yahagom ikon no di nabi ninyeng noro gi mbun yo di ninttig-tta nya kin nide ig bei nsi nya ikon ninyeng bi.” 45#Yoh. 2:23 Tirigi Noni ug krau hanjop Galilea hanyen tu lene tungwatu nya iba ingon di llei biya um Noni. Lewo tirigi ingat rin ei Yerusalem bibon pesta kep Njap Ndig Paskah lene ingat mun di Noni bibon hagom bou igyai him ei sirima tu.
46 #
Yoh. 2:1-11
Leu api Noni ngkwei hanyen buug ei minu mien Kana ei hanjop Galilea. Bibon jau minyei binok ba anggur ngei ei mpia ttou nsi dima. Mpe dima lene tungwagom di ya kui nibou ndig no rima ba, nipmot nggwen nindig ei minu ndig Kapernaum. 47Tirigi noni miap Yesus ninghapti tut gijo leu hanjop Yudea bikwei krau hanjop Galilea hanyen tu lene noni ug ngat Yesus bitigtai Noni mem gima ug ei minu ndig Kapernaum leu binhyepo bindei nipmot di nggwen di ningon tai-tai bou ba, kei hanyen. 48Yesus pai binoni “Gino jingat bindo kin mindur bou jiyai him bi lene jiba jingon com Da bi sren.”
49No dima buhup “Andigpoi e, ma sibipbur ba, suug ngat dipmot nipou tirigi mai bigyo.”
50Yesus buhup “Nnaba angkwei hanyen hak ug lewo apmot kei hanyen tu.”
No dima ba ningon com Yesus tut nipaisi dima leu api ngkwei hanyen hak. 51Tirigi noni ug ei puig sinon lene nide awak nya ikwei um bipai bak noni “Andigpoi e, apmot sindi kei hanyen tu.”
52Lene noni hig ser yok jam pig rino nipmot sindi kei hanyen i. Leu api ibuhup “Ningkek hem hanyen ei njap di annani mem mpia huk pijum nok jam gom.” 53Lene mot dima nicig yok ngon kep bipia cut igbit jam dima rino Yesus pai bipia nipmot kei hanyen. Gima rino noni kin nide ig bei nsi nya yahagom iba ingon com Yesus.
54Gima ne mindur nican di Yesus bibon niabiati Noni jo leu hanjop Yudea bikwei krau hanjop Galilea hanyen tu ri.
Currently Selected:
YOHANES 4: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena