LUKAS 9
9
Yesus sok nihyet ei yo di igya kui Noni ibou simnaibrimigcan dip
(Mat. 10:5-15; Mrk. 6:7-13)
1Lene Yesus nduk yo di igya kui Noni ibou simnaibrimigcan kwei biyai nisindemti biyok leu binhyepo ijji ninnei rom nya ba, ibindei yo di inggwen nya bikei hanyen. 2Lene Noni pinak yok biyuug bindei yo di inggwen nya bikei hanyen. Lene itri tut Allah ninyeng tak kepti. 3#Luk. 10:4-11 Noni cuk yok bipai “Jiba nehei he bimbut. Ma jittei tom kin minai kin njita kin mitiei kin sinsun di jijuk nggre dip nggre jou au. 4Tirigi juug krau minu ttou nsi gom lene ma jitou kep no di cigit je kui ig lene ma jibit bong. Ma jibong ser ig gom ngat dima hak ba, jibimbut kep. 5#Kis. 13:51 Gino tungwatu nya igya um je bi lene ma jingkwei nyahan leu minu ttou nsi dima bijikit jimig jou tut ide dihyei ndung di dimbos hak nok mun di biki ingon a.”
6Yo di igya kui Yesus imbut bidem minu dima hagom bitri tut Nihyet Di Kei lene ibindei ba, tungwatu nya ikei hanyen.
Herodes ningon kiowi niti
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 Tirigi Herodes di ninyeng tak kep hanjop Galilea miap tut mun di pek kep mem tungwatu nya dima lene ningon kiowi niti. Lewo bihi ipai bipia Yohanes di tur tungwatu nya ei minyeiti kiju hanyen leu nimai eisi tu. 8Hiter ipai bipia Nabi Elia kiju hanyen bittau kep yok tu. Hiter ipai bipia igom leu nabi di nipou nya kiju hanyen leu nimai eisi tu. 9Herodes pai “Sicuk tentara nya birop Yohanes nibou leu nipou su noro no dini ne tou rin i? Lewo simiap ninghapti tut mun di bon nya mang bibor.” Gima rino noni nggok puig mem gima ngat Yesus bou niyai him.
Yesus kwas njita tut tungwatu nya ibou sribu muhwi
(Mat. 14:13-21; Mrk. 6:30-44; Yoh. 6:1-14)
10Yo di igya kui Yesus ingkwei hanyen bipui sut mun di ibibon hagom bak Noni. Noni buwak yok biyuug ei minu ndig Betsaida biyongkom. 11Tirigi tungwatu ningot ndig ikan tut Yesus nimbutti lene ijop bram. Yesus pigo yok bitri tut Allah ninyeng tak kepti biyok lene bindei ba, yo di inggwen ikei hanyen.
12Mpia jinjui su lene yo di igya kui Noni ikwei pai bak “Ma akes yo dini bingkwei hanyen ba, inggok njita di igyem kin ig di ibongti ei minu mien di gahai dini kou lewo mpia dini ne ha ngunti ri.”
13Noro Yesus pai biyok “Ma jikwas jide njita tut yok hak ug.”
Lene ibuhup “Nyende roti nindak muhwi kin wau can he. Suar nuug pek njita mem nibitri yok e?” 14(Gino ikwop yo di igyem njita dima pinai nya he lene imangti ibou sribu muhwi.)
Yesus pai biyok “Jicuk yok leu binhyepo ikwas yam bigwam bibon nimpung nya ba, bikwop nimpung gom nok ibou ningot muhwi lene ma igwam hak jug ei dihyeisi.”
15Yo di igya kui Yesus igyai hagom bit leu nok nicuk yoti. 16Lene Noni krau roti nindak muhwi kin wau can bitou kep ginyo kug bipai sigyo kep bak Allah. Leu api Noni ki roti kin wau biyai bak yo di igya kui Noni ba, ibitri tungwatu nya. 17Yahagom igyem njita bindei yok leu api yo di igya kui Yesus imbus niken ei bansi simnaibrimigcanti ba, hagom ut.
Petrus mbot kep Yesus ninyeng
(Mat. 16:13-19; Mrk. 8:27-29)
18Mpe di gom bu tirigi Yesus ngat nadi biNongkom lene yo di igya kui Noni induk yam bingwig ttai Noni. Noni hig ser yok “Tirigi tungwatu nya ihig yam tut Dani lene ipai Dani ne tou rin i?”
19 #
Mat. 14:1-2; Mrk. 6:14-15; Luk. 9:7-8 Yoni ibuhup “Bihi ipai Nani ne Yohanes di tur tungwatu nya ei minyeiti ri. Bihi ipai Nani ne Elia ri. Bihi ipai Nani ne igom leu nabi nitimiei di kiju hanyen leu nimai eisi ri.”
20 #
Yoh. 6:68-69
Yesus hig ser yok “Noro bit leu jeni ne jipai Dani ne tou rin i?”
Petrus mbot kep “Nani ne Nibou Ndig di teu tungwatu nya biyai niyaijo nijep biyok di Allah preu ei mem nye pima ri.”
Yesus pai sut Nonti ninghuisi niweisi kin nimaisi
(Mat. 16:21-28; Mrk. 8:31–9:1)
21Lene Yesus sok kep yok bingkiem ser “Ma jipui sut dinyeng Nibou Ndig di teu tungwatu nya biyai niyaijo nijep biyok bak nindigsi nya au.” 22Yesus pai bu “Ei nidipti bu lene suar nibou mben Yahudi nya kin imam nindig nya kin guru Puig Yahudi nicukti nya igyai ninghuisi wei bak Munggwom Tungwatu Nipmot bikou sut Noni. Leu api Noni miyai nimai noro njap ningai bu lene Noni mikiju hanyen leu nimai eisi.”
23 #
Mat. 10:38; Luk. 14:27 Lene Noni pai bak yo di idem yam ei mpia dima yahagom “Bikwop no di joi sut bit Dani lene ma ningon hek tut mun di bon ninyeng mem nonti au. Noro kon nide biei salib bikwop njap-njap bibit Da. 24#Mat. 10:39; Luk. 17:33; Yoh. 12:25 Lewo bikwop no di ningon hek tut nonti bikan bipia niyaisi bon ninyeng mem nonti lene niyaisi misar. Noro no di kes niyaisi ei mem Da minyohou niyaijo di jo kikau. 25Buhun bibor mem no di nyeng tut ndigban hagom ei dihyeisi dini noro cut bak nide siceu ba, bimangkrei nide niyaijoti! Gini kei mem noni e? 26No di mmai sut Da bitut Ditde ningginausi nya lene Munggwom Tungwatu Nipmot cem mimmai sut no dima tirigi Noni kwei sut Nide nisindemti kin Nicig Nide nisindemti kin malaikati di dia-diau nya ide nisindemti! 27Ma jiyok ngon kep bipia je di jingat rin ei mpia dini jibihi mijiyai nimai bi bibou jingat Allah ninyeng tak kepti bou jiyai him ug e.”
Yesus luei nitta
(Mat. 17:1-8; Mrk. 9:2-8)
28 #
2Ptr. 1:17-18
Niabiati ari gom kep Yesus ningginau tungwatu nyati pima leu su lene Noni buwak Petrus kin Yohanes kin Yakobus bikui sut yok ug ei mbigdip gom leu binhyepo ngat nadi. 29Tirigi Yesus ngat nadi lene Noni luei nitta ba, Nide sinsun sieng-siau bitiei kei. 30Ibou can di Musa kin Elia ittau kros ei ikieti bimbrap bit Yesus. 31Nikei-kau-keisi leu gwamti piga yahacem. Yoni imbrap bit Yesus tut nimaisi di jei bi Noni mibindei mbut ei Yerusalem bit leu nok Allah ningon kanti mem Noni. 32Mpe dima lene Petrus nya ibong mai leu su noro tirigi ida igyai lene ingat Yesus bitut nikei-kau-keisi kin ibou can di igya simiak Noni cem yo rinaha. 33Tirigi yo cin pima itin ei bikes Yesus rin lene Petrus pai bak Yesus “Andigpoi e, ningon llei sut gi ningat rin bit je! Nnaba, minohok ig jibei ningai ba, hi mem Nani hi mem Musa lene hi mem Elia.” (Petrus ba ningon di kiowi niti bipai nihyet dima.)
34Hammi tirigi Petrus pai nok rino bumbuhui ttou gom juk kwei binggai yok lene gima bindei ba, inghuisi mpig sut. 35#Yes. 42:1; Mat. 3:17, 12:18; Mrk. 1:11; Luk. 3:22 Leu api nihyet gom tibim kwei leu bumbuhui dima bitri tut “No dini ne Dipmot rin ba, didimig Noni ei su. Ma jimiap kep Noni nihyet!”
36Tirigi nihyet dima kes hon tu lene yoni imian ser lo, Yesus no rinaha biNongkom. Ibou ningai di igya kui Noni iku mun di pek kep mem yok ei ingonti bitri tut mun di ingat bou igyai him dima bak hiter bi.
Yesus jji ninnei rom leu mot gom ningonti
(Mat. 17:14-18; Mrk. 9:14-27)
37Njap di hyep bu lene Yesus kin ibou ningai di igya kui Noni ijuk kwei leu mbigdip lene tungwatu ningot ndig ikwei ya um Noni. 38Lene no di ya srig ikieti hara Yesus “Guru e, akwei ngat dipmot di nimig gom ngat dini ug e! 39Lewo ninnei rom ya ningonti bibindei ba, noni ba nihyet nindig bahara tirigi ninnei rom dahat kukwei noni leu api nirai tas kep niji nghuisi. Ninnei rom dima hwen bit noni kikau bikou sut gima hei leu ningonti! 40Dahara yo di igya kui Na leu binhyepo ijji ninnei rom dima leu ningonti noro bit bon igyai kan bi.”
41Yesus buhup “Mei! Jiba jingon com Da haigtu bi ba, jingon tindak e? Diya tut je njap pig bu i? Doom dingon tut je njap pig bu i? Ausap apmot kwei biDa.”
42Tirigi mot dima mbut ndam Yesus lene ninnei rom dahat kukwei noni binjei noni ug ei dihyeisi. Noro Yesus cuk ninnei rom dima ba, hei leu mot dima lene noni kei hanyen leu api Yesus kes noni bak nicigya. 43Tungwatu ningot ndig pima yahagom inggap leu tut Allah de nisindemti di nindig bibor dima.
Yesus pai sut Nonti nimaisi mbigom kin bu
(Mat. 17:22-23; Mrk. 9:30-32)
Tirigi yo dima inggap leu tut mindur di Yesus bibon dima lene Noni pai bak yo di igya kui Noni, 44“Ma jiyok ngon kep dihyet dini lene ma jingon prion ser au! Lewo tungwatu nya mikes Munggwom Tungwatu Nipmot ei yo di isindem nya indati.” 45Noro yo di igya kui Noni ingon kiowi tut nipaisi dima lewo gima jo nding leu yok leu binhyepo bit bon ingon hukti tut kan bi. Noro ihig ser Yesus tut nipaisi bi lewo ingwes mien tut.
Ningginausi tut no di ninyeng jei bibor
(Mat. 18:1-5; Mrk. 9:33-37)
46 #
Luk. 22:24
Lene yo di igya kui Yesus iba ighyet bidahat yam tut gi hi dima ninyeng jei njiriek nindigsi nya. 47Yesus kan tut ingon kanti. Gima rino Noni krau munggwom mien gom biya simiak Noni. 48#Mat. 10:40; Luk. 10:16; Yoh. 13:20 Lene Noni pai bak yo di igya kui Noni “Bikwop no di ya um munggwom di nok gini drek dip Dani lene gima dem kep nok gi noni ya um Dani cem. Bikwop no di ya um Da lene gima dem kep nok gi noni ya um No di cuk Da kwei cem. No di srig jikieti di bon ninyeng bi rino ninyeng jei dor njiriek nindigsi nya.”
No di srep tut je bi dima tti kin je tu
(Mrk. 9:38-40)
49Yohanes pai bak Yesus “Andigpoi e, mpe di gom ningat no di ba anyeng bijji ninnei rom leu tungwatu nya ingonti lene niggai ser noni lewo noni tti kin nye bi.”
50Yesus buhup bak Yohanes kin yo di igya kui Noni nindigsi “Ma jiggai ser noni au. Lewo no di srep tut je bi dima tti kin je.”
Timiei nya leu minu mien gom ei hanjop Samaria ikou sut gima icigit Yesus kui ig
51Son dideu tto bou mem Yesus kui hanyen ug ei gwamti lene Noni kos tut bipia ngkwei hanyen ug ei Yerusalem. 52Gima rino Noni cuk ibou poi bibie leu Noni. Yo dima imbut bicoi ug ei minu mien gom ei hanjop Samaria leu binhyepo itin ei mem Yesus nitausi. 53Noro timiei nya ei minu mien dima ikou sut gima Yesus kwei bong bit yok lewo jo nibreisi bipia Noni kak puig buug ei Yerusalem. 54#2Raj. 1:9-16 Gima rino Yakobus Yohanes nya di igya kui Yesus ikan tut mun di pek kep tu lene ihig ser Noni “Tuhan e, gino ajoi sut ne nahara Allah leu binhyepo Noni mikes hum di cig-cai leu gwamti biyem yo dini bingwig ug e?”
55Yesus kiek No bigga yok. 56Gima ngwig leu lene yuug kikau ug ei minu mien hiter bu.
Yo di ikan bipia ibit Yesus noro ingon gom bi
(Mat. 8:19-22)
57Tirigi imbut biyuug ei puig sinon lene tungwagom kwei pai bak Yesus “Andigpoi e, dibit Na kikau bidem ambutti nya hagom.”
58Yesus buhup “Nsien bigbehei nya ibong kikepti nonaha lene ha nya cem ibas nonaha noro Munggwom Tungwatu Nipmot bon nibongti hi bi.”
59Lene Yesus pai bak hiter “Akwei bit Da.”
Noro no dima buhup “Andigpoi e, gino ace tut ne duug tig dicig nimai nipou ug e. Leu api midikwei bit Na.”
60Yesus buhup “Nna ba asindui sut ba, yo di imai nya itig ide nimai nya. Noro tut nani ne ma aug tri tut bipia Allah ninyeng tak kepti sindi tau kep tungwatu nya tu.”
61 #
1Raj. 19:20
Tungwagom bu pai “Andigpoi e, dijoi sut dibit Na noro ma ace tut bidingkwei hanyen ba, dipigo dide bat nya bidikes yok nipou leu ug e.”
62Yesus buhup “No di kinyon ei midyaiti tu lo, kiek no kep ninghim dip biningon ngkwei nyahan leu lene no dima dem mem gima nggre kin Allah ninyeng tak kepti bi.”
Currently Selected:
LUKAS 9: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena