MARKUS 15
15
Yesus ya ei Pilatus noho bei
(Mat. 27:1-2, 11-14; Luk. 23:1-5; Yoh. 18:28-38)
1Njap bigyoti lene imam nindig nya kin nibou mben Yahudi nya kin guru Puig Yahudi nicukti nya ibisau ba, induk yam bit Nikei Puig Yahudi nindigsi nya leu binhyepo isimbot kep Yesus ninghapti biyam. Iba lante biteu Yesus leu api ibuwak bikes ei Pilatus nindati. 2Pilatus hig ser Noni “Nani ne Nibou Ndig mem mben Yahudi rin e?”
Yesus buhup “Bit leu nok apaisi dima.”
3Imam nindig nya ikkin kep Yesus ninghapti tut mun nyeng mang bibor. 4Gima rino Pilatus hig ser Noni mbigom kin bu “Abirop ighyet bi e? Amiap mun nyeng mang bibor di ikkin kep anghapti tut bi e?”
5Noro Yesus buhup ighyet bi. Apino Pilatus nggap leu tut Noni.
Pilatus jem nimai gau Yesus
(Mat. 27:15-26; Luk. 23:13-25; Yoh. 18:39–19:16)
6Bikwop mpe dino mben Yahudi ibon pesta kep Njap Ndig Paskah lene Pilatus kes tungwagom leu ig bui nsi mem yok bit leu yonti ikos tutti. 7Mpe dima lene Barabas no sima bit yo di yaham imbuk kep nibou ndig lewo noni hwen mun tu. 8Tirigi tungwatu ningot ndig idem yam lene yahara Pilatus leu binhyepo noni kes tungwagom leu ig bui nsi bit leu nok niyai kepti. 9Noni buhup “Jijoi sut bipia dikes Nibou Ndig mem mben Yahudi leu nisima eisi bijeni e?” 10Pilatus pai nok lewo kan bipia imam nindig nya ikes Yesus ei nindati drek dip ingon di kinei sut Noni.
11Noro imam nindig nya ikes ingon di mbuk tut Yesus bak tungwatu ningot ndig leu binhyepo yahara Pilatus bipia kes Barabas leu ig bui nsi mem yok. 12Gima rino Pilatus hig ser yok mbigom kin bu “Dinggon ndei Yesus di Nibou Ndig mem mben Yahudi i?”
13Ibuhup “Apek Noni ei biei salibti hak ug!”
14Noro Pilatus hig ser yok mbigom kin bu “Noni yai mun tunggwei nok mindei i?”
Lene iba ighyet di kui yam bimbrua ser noni bipai “Apek Noni ei biei salibti hak ug!”
15Pilatus joi sut gima tungwatu nya ingon kwes kin noni. Gima rino noni kes Barabas leu ig bui nsi bit leu yo dima ingon kanti. Leu api kes Yesus biyok leu binhyepo imbas Noni nipou leu api ipek ei biei salibti.
Tentara nya iba ighyet bicig Yesus
(Mat. 27:27-31; Yoh. 19:2-3)
16Tentara nya ibuwak Yesus ug ei nibou Roma de biyati bihig tentara nindigsi nimpung gom kwei bidem yam. 17Lene ijuk sinsun ngwoi di jei di ndok ei Yesusti lene inghau cibou nggwen ba, ibijuk nibou bittin nok topi. 18Gima ngwig lene ipigo Noni bipai “Nibou Ndig mben Yahudi e, ma ayaijo kikau ug!” 19Iba tom bibui nibou bitrai ndei Noni cem leu api ikuk yok ei nimig him ba, iba Noni bikek. 20Tirigi iba ighyet bicig Noni bingwig leu lene ijuk sinsun ngwoi di jei di ndok leu Noni leu api ijuk Nide sinsun ei Noniti hanyen. Lene yehei sut Noni leu binhyepo ipek Noni ei biei salibti.
Tentara nya ipek Yesus ei biei salibti
(Mat. 27:32-44; Luk. 23:26-43; Yoh. 19:17-27)
21 #
Rm. 16:13
Imbut biyuum Simon leu minu ndig Kirene tirigi noni jo leu ngoi dumti kwei. Ikat noni bikes Yesus de biei salib ei ninghat dip bittei. (Simon nitimieisi leu minu ndig Kirene ba, nipmot bat cin inyeng rino Aleksander kin Rufus.) 22Yoni yuug sut Yesus ug ei mpia ttou nsi di ninyeng Golgota. Gi ikiek nihyet dima ne nibimbiti pai “Gumihyep Nimbiam Bou.” 23Yuhug ba anggur ngei kin mun di mpo-mpam srigsi biNoni bidut noro Noni kou. 24#Mzm. 22:19 Leu api ipek Noni ei biei salibti lene iko bibinggok tut gima ikwas Nide sinsun tut yam. 25Jam di ipek Noni ei biei salibti dima lene mpia ngket ba, jam muhwindatai. 26Ipek srat meng gom di ipas Nide hukum eisi ei anai nibou. Nipas kepti pai “No dini ne Yesus Di Nibou Ndig Mben Yahudi ri.” 27Ipek yo di isibut nya ibou can kin bu ei ide biei salibti bitas hi ei nite bei Yesus ninda com lene hi ei nite bei ninda prak. [28#Yes. 53:12 Tug hon nisinati dima lene Allah nihyet nipaisi dini pek kep mem Noni. “Ikwop Noni kin yo di ipigau hanjop nya.”]
29 #
Mzm. 22:8, 109:25; Mrk. 14:58; Yoh. 2:19 Yo di injiriek mpia ttou nsi dima iba ighyet bicig Yesus leu api ikit-kit nyen ibou leu#15:29: Nipas kep ikit-kit nyen ibou leu: Mben Yahudi igyai kepti di ndo bipia ingwes pri gau tungwatu. Noni bipai “Na po apai bipia alet Tuhan De Ig leu api angot hanyen ei njap ningai pima rin e? 30Ateu Nanti ba, ajuk kwei leu biei salib hak ug.”
31Nok gima cem imam nindig nya kin guru Puig Yahudi nicukti nya iba ighyet bicig Noni bu bipai “Noni teu yo di hiter noro bit bon teu Nonti biningwes ngun kan bi. 32Nnaba, Nibou Ndig di teu tungwatu nya biyai niyaijo nijep biyok di ijem ninyeng Nibou Ndig Mben Israel dima juk kwei leu biei salib nogindini leu api nyeni ningon jo kep Noni.”
Yo cin di isibut di ipek yok ei biei salibti simiak Yesus cem iba ighyet bicig Noni bu.
Yesus nimaisi
(Mat. 27:45-56; Luk. 23:44-49; Yoh. 19:28-30)
33Ug ei mpia huk pijum rino mmun ken nggai kep minu dima hagom lene mpia njap com bi kikau mem jam nitindur ningai. 34#Mzm. 22:2 Bui jam ningai rino Yesus ba nihyet nindig bahara “Eli, Eli, lama sabakhtani.” Gi ikiek nihyet dima lene nibimbiti pai “Ditde Allah e, Ditde Allah e, akes Da ei leu binggoni?”
35Ibou poi di igya nyen ei mpia dima imiap naharati dima lene ipai biyam “Jimiap e, Noni hig Nabi Elia kwei!” 36#Mzm. 69:22 Tungwagom brim nimig bidor buug yai aigmui mbom tut ba anggur ngei di hyenha di joti kwei lene hak ei pikati bisu bak Yesus leu binhyepo muhun bipai “Itou kep Nabi Elia mikwei cug Noni leu biei salib.”
37Lene Yesus ba nihyet nindig bahara leu api ninnei kimbas.
38Ban mbrawin di ipindur ei Tuhan De Ig rik hacan bipek guhu bipek gimu. #Kel. 26:31-33 39Tirigi nibou tentara ngat gi Yesus ninnei kimbasti dima lene pai “Ningat ne No dini ne Allah Nipmot nijit-jau ri!”
40 #
Luk. 8:2-3
Ei mpia dima cem sop nya ibou poi yo rinaha ba, icap leu minu ting. Sop dini yok inyeng rino Maria Magdalena kin Maria di Yakobus di pilei yo kin Yoses nya ipmem kin Salome. 41Sop dini yok ibit Yesus binyohou Noni ei hanjop Galilea nipou su. Ba, sop nindigsi imang bibor di ibit Yesus kwei ei Yerusalem ingat rin bit yok.
Itig Yesus
(Mat. 27:57-61; Luk. 23:50-56; Yoh. 19:38-42)
42Njap dima ne njap di itin ei mem Njap Nigwam Kep Ninghuisi rin lo, mpia mmun tu. 43Lene Yusuf di nitimieisi leu minu ndig Arimatea kwei brim ningkek kep Pilatus bahara noni leu binhyepo kes Yesus ningut binoni. No dini ninyeng jei bisrig Nikei Puig Yahudi nyati cem lo, yok ningon mem nijam di Allah Ninyeng Tak Kepti nikweisi. 44Tirigi Pilatus miap tut Yesus di mai su lene nggap leu sut. Gima rino sok nihyet bak nibou tentara bihig ser noni “Yesus mai njehep tu e?” 45Tirigi noni miap nibou tentara nibuhupti lene sindui sut ba, Yusuf cug Yesus ningut leu biei salib. 46Leu api noni ug pek sre jep di iba minghas linen bibon leu api ug cug Yesus ningut lene ba sre dima binggai nimai ngut leu api kon bikes ei hak mihyeti di itu ei tring behei. Leu lene noni rim tig mma nindig bibor bitas ser jui nuhuigya. 47Mpe dima lene Maria Magdalena kin Maria di Yoses nipmem ingat rin ba, icap hak mihyeti di Yusuf kes Yesus ningut eisi.
Currently Selected:
MARKUS 15: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena