MARKUS 8
8
Yesus kwas njita tut tungwatu nya ibou sribu bitai
(Mat. 15:32-39)
1Jei bi lene tungwatu ningot ndig induk yam kwei kep Yesus noro ipwoi njita hi kwei bi. Gima rino Noni hig yo di igya kui Noni kwei bipai biyok, 2“Dingondut tungwatu ningot ndig dini lewo igwam bit Da mem njap ningai su ba, njita ngwig leu yok tu. 3Gino dikes yok ba, iba inghop di ngwak bingkwei hanyen ug ei ide ig ne mimai inggum hapuig lewo ibihi ikwei leu minu ting.”
4Yo di igya kui Noni ihig ser “Ninggok njita ei hantou bibitri tungwatu ningot ndig dini yahagom ei ha ngunti dini i?”
5Yesus hig ser yok “Jide roti di jipwoi kwei nindak pig i?”
Lene ibuhup “Nindak muhwindacan.”
6Gima rino Yesus cuk tungwatu ningot ndig dima yahagom bigwam jug ei dihyeisi lene Noni krau roti nindak muhwindacan bipai sigyo bak Allah kep leu api ki kukiau bak yo di igya kui Noni leu binhyepo ibitri tungwatu nya. Lene yo di igya kui Noni igyai mun bit leu nok Yesus nicuk yoti. 7Ide wau mimien poi mien cem jo biyok. Yesus pai sigyo kep wau cem leu api kes bak yo di igya kui Noni ba, ikwas tut tungwatu nya. 8Yahagom igyem njita bindei yok leu lene yo di igya kui Yesus imbus niken ei bansi muhwindacanti ba, hagom ut. 9Yo di igyem njita imangti ibou sribu bitai. Lene Yesus kes yok ba, ingkwei hanyen. 10Leu api Yesus bisau bibri ut hanyen bit yo di igya kui Noni ba, iba ut bitot minyei ngwa dip kikau ug ei minu mien Dalmanuta.
Farisi nya yahara Yesus mem gima bon mindur
(Mat. 16:1-4)
11 #
Mat. 12:38; Luk. 11:16 Mpe dima lene Farisi nya ibou poi ikwei ngat Yesus lene iba ighyet bidahat Noni bipi bibingon Noni lene yahara Noni tut mindur di bindo bipia Allah cuk Noni kwei. 12#Mat. 12:39; Luk. 11:29 Noro Yesus hi ninnei bibuhup “Nggon rino tungwatu nijam dini ibidip huk Da mem dibon mindur i? Ma jiyok ngon kep bipia midibon mindur di nok gima bak yo dima bi!”
13Lene Noni kes yok ei bibri ut hanyen leu api ba ut bitot minyei ngwa dip ug ei igpong nite dinyo ug.
Farisi nya kin Herodes ide roti ninjep
(Mat. 16:5-12)
14Noro yo di igya kui Yesus ingat lo, ipwoi roti di dem mem yok hi kwei bi ba, ingat niken nindak gom ngat di jo ei ut nsi. 15#Luk. 12:1 Yesus pai biyok “Ma jingon sok kep jenti tut roti ninjep di Farisi nya kin Herodes ide.”
16Lene yoni isimbot kep biyam bipai “Noni sok kep nye nok lewo ipwoi roti hi kwei bi.”
17Yesus kan tut mun di isimbot kep tut biyam dima leu api hig ser yok “Jisimbot kep biyam tut roti di jipwoi kwei bi tut nggon i? Jingon ngat ba, jingon dorti bi e? Jingon tindur yo e? 18#Yer. 5:21; Yeh. 12:2; Mrk. 4:12 Jibon jiyai noro jingat bi e? Jibon jitingou noro jimiap bi e? Jingon prion ser tu e? 19Tirigi diki roti nindak muhwi mem tungwatu nya ibou sribu muhwi pima lene jimbus niken kui bansi nuut pig i?”
Ibuhup “Nuut simnaibrimigcan.”
20“Tirigi diki roti nindak muhwindacan mem tungwatu nya ibou sribu bitai pima lene jimbus niken kui bansi nuut pig i?”
Ibuhup “Nuut muhwindacan.”
21Noni hig ser yok “Nggon rino jingon dorti bigyo i?”
Yesus bindei ba, no di niyai tu kei hanyen ei Betsaida
22Tirigi Yesus nya yuug krau Betsaida lene tungwatu nya ibou poi icen tungwagom di niyai tu kwei bibidip huk Yesus leu binhyepo Noni bindei ba, no dima kei hanyen. 23Leu api Yesus krau no di niyai tu ninda bicen noni ter ug ei minu ndig dima nisai ma kwei. Leu api Noni trai ndei niyai njep bikes ninda ei niyai mpau dip bihig ser noni “Angat mpia tu e?”
24No dima kiek no bitou kep mpia lene buhup “I, dingat tungwatu nya di imbut-mbut nyen noro idem kep nok biei njem he.”
25Yesus kes ninda ei niyai mpauti mbigom kin bu leu api no dima tou kep mpia nggilun lo, niyai da bikwes kei hanyen. 26Lene Yesus kes noni bingkwei hanyen ug ei nide ig lo, sok kep “Ma angkwei hanyen ug ei minu ndig dima au.”
Petrus simbot kep tut Yesus ninyeng
(Mat. 16:13-20; Luk. 9:18-21)
27Mpe dima lene Yesus nya yuug ei hanjop nsi di jo dideu minu ndig Kaisaria Filipi leu api Noni hig ser yo di igya kui Noni ei puig sinon “Tirigi tungwatu nya ihig yam tut Dani lene ipai sut Dani ne tou rin i?”
28 #
Mrk. 6:14-15; Luk. 9:7-8 Ibuhup “Bihi ipai Nani ne Yohanes di tur tungwatu nya ei minyeiti ri. Bihi ipai Nani ne Nabi Elia ri. Bihi ipai Nani ne nabi nitimiei nya igom ri.”
29 #
Yoh. 6:68-69
Noni hig ser yok “Noro bit leu jeni ne jipai Dani ne tou rin i?”
Petrus simbot kep “Nani ne Nibou Ndig di teu tungwatu nya biyai niyaijo nijep biyok ri!”
30Lene Yesus sok kep yok bingkiem ser “Ma jipui sut dinyeng bak nindigsi nya au.”
Yesus ningginau yokti tut ninghuisi wei kin nimaisi di micut igkep Noni
(Mat. 16:21-28; Luk. 9:22-27)
31Gima ngwig lene Yesus kindi ngginau yo di igya kui Noni bipai “Suar Munggwom Tungwatu Nipmot yai ninghuisi wei nindig bibor ba, mben Yahudi ide nibou nya kin imam nindig nya kin guru Puig Yahudi nicukti nya mikou sut Noni. Tungwatu nya migyai nimai biNoni noro njap ningai bu lene Noni mikiju hanyen leu nimai eisi.” 32Yesus pai gini hagom brei biyok leu api Petrus buwak Noni ter ba, kindi srep “Guru e, apai nok au.” 33Noro Yesus kiek noho ttai leu lene tou kep yo di igya kui Noni bisok kep Petrus “Na di Bilis e, aug hak leu mpia dini! Angon kanti dima kwei leu Allah bi noro kwei leu tungwatu nya he!”
34 #
Mat. 10:38; Luk. 14:27 Leu api Yesus hig tungwatu ningot ndig dima kwei bit yo di igya kui Noni bipai biyok “No di joi sut bit Dani lene ma ningon hek tut mun di bon ninyeng mem nonti au. Noro suar kon nide biei salib bibit Da. 35#Mat. 10:39; Luk. 17:33; Yoh. 12:25 Lewo bikwop no di ningon hek tut nonti bikan bipia niyaisi bon ninyeng mem nonti lene niyaisi misar. Noro no di kes niyaisi ei mem Da kin Nihyet Di Kei di kwei leu Allah minyohou niyaijo di jo kikau. 36Notou mem no di nyeng tut ndigban hagom ei dihyeisi dini noro bimangkrei nide niyaijoti i? Gini kei mem noni e? 37Lene noni miba mindei bipek niyaijoti hanyen leu gi misar i?
38No di mmai sut Da bitut Ditde ningginausi nya mem nijam di mpung tut tungwatu nya di ingon rom bingkek ndok cem dini lene Munggwom Tungwatu Nipmot mimmai sut no dima tirigi Noni kwei sut Nicig Nide nikei-kau-keisi kin malaikati di dia-diau nya.”
Currently Selected:
MARKUS 8: HAD
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena