Ruuka 3
3
Amëëghyö agha Yohana Omobhatiisya
(Mataayo 3:1-12; Maariko 1:1-8; Yohana 1:19-28)
1No-mooka ughwa ikömi na kataano ghwaarë, ughwa öbhötöngi ubhwa Kaisaari Tibhërio. Pontio Piraato nö-mötöngi uwa Yudea yaarë. Herode Antipa,#3:1 Herode Antipa. Maaha mo-faharaasa. we yaatonganga omokowa ughwa Ghariraaya. Firipö mura uwaabho Herode, we yaatonganga omokowa ughwa Iturea na ughwa Tiraköniti. Risania umwene yaatonganga omokowa ughwa Abhirene. 2Kayafa bhaana Anaasi, mbo bhaarë abhanene abha abhasëngëri.#3:2 Abhasëngëri. Maaha mo-faharaasa.
Mbe, enkaagha iyö, yo Yohana mumura uwa Zakaria yaahaaywë engʼana iya Waryobha ku-riköngö. 3Yohana akainaaranaara ikyaro kyonswe igho ikya ëngëghëni iya omooro ughwa Yorodani. Akabha araraarekera abhantö igha, bhahongore ëbhëbhë ibhyabho, bhabhitighe, bhabhatiisibhwi, okore Waryobha abhaabhere ëbhëbhë ibhyabho. 4Ni-igho amangʼana gharë kya bhono ghandëkirwë mo-ketabho ikya ömörööti Isaaya igha,
“Ömöntö arakonga ku-riköngö iyö igha,
‘Mösëëmëri Omonene Waryobha enshera.
Mokore bhuuya ahasë hano araahete.
5Amabhate ghonswe igho, ni-igha ghatubhiribhwi.
Singuku na ibhighuku, bherengʼaanibhwi.
Hano haisisirë, haröngëhibhwi, amatubhashë ghonswe igho, gharengʼaanibhwi.
6Hayö ho abhantö bhonswe igho
bharaamaahe Ömötöörya ono yaatomwa na Waryobha.’ ”#3:4-6 Maaha mo-ketabho ikya Isaaya 40:3-5.
7Ku bhuyö, Yohana akabha aratëëbhya abhantö bhano bhaaishirë okobhatiisibhwa igha, “Bhëënyu urwebhoro urwa inshoka! Kana nawë uyö abharömirë ökötwë igha mongʼose okorerra ukwa Waryobha kono kuriisha? 8Mokorenga amangʼana ghano ghakwörökya igha möhöngööyë ëbhëbhë ibhyënyu. Motakaakanya igha, Waryobha naraabhaikërri ko bhoora mökötëëbhania igha, ‘Bhëëtö m-bantö abha heene törë, ko bhoora igha nu-rwebhoro urwa Ibhurahimu#3:8 Ibhurahimu. Maaha mo-faharaasa. törë! Ndabhatëëbhya igha, Waryobha aratora okokorra Ibhurahimu abhaana ukurwa ko-maghena ghano.’ 9Ikisirë haangʼë kërë okogheesha ëmëtë. Na ömötë ghoghonswe ghono ghotaana sehagho sinshiiya, ngoraagheeshwe, ghobhotorwe bhotorwe, ghotabhutwe mo-morro.”
10Abhantö bhayö bhakamöbhöörya igha, “Kana bhoono iyakë tokaakora?”
11Akabhahonshora igha, “Ömöntö ono aana singibho ibhërë, atwenere ono ataana ingibho. Na uwa ibhyakorya wonswe akore ighoigho.”
12Abhaghööti abha righööti#3:12 Abhaghööti abha righööti. Maaha mo-faharaasa. bhonswe bhaaishirë ku-Yohana, okore abhabhatiisi. Bhakamöbhöörya igha, “Kana! Umwëghya uwëëtö, bhëëtö bho iyakë tokaakora?”
13Akabhahonshora igha, “Motakëngëryanga ekerengere ikya righööti, keno kyaatoorwa-ho.”
14Abhasirikare bhonswe bhakamöbhöörya igha, “Na bhëëtö bho tokore iyakë?”
Akabhahonshora igha, “Motakaaruusya abhantö seehera isyabho. Na ghwiki mutighe okohaamërrya abhantö keno bhatakörrë, mwiswe na ehoorohooro iyëënyu.”
15Abhantö bhaaighombanga okomaaha Kiristo, ku bhuyö bhakabha bharaibhöörya mo-metwe ighyabho igha, “Kasi Yohana ono, aratora okobha we Kiristo?”
16Yohana akabhahonshora igha, “Öni na-manshë nkobhabhatiisirya, kasi araasha ömöntö ono aana obhotoro konkera, kora öni tiningʼarëëyi okotashora siinuugha isya ebheraatö ibhyaye hë. Uyö narebhabhatiisya ku-Mwika Ömöhörëëru na omorro. 17Uyö naana orohongo mo-kobhoko ukwaye urwa ukwerorra. Narekomania ibhyakorya mo-ketara ikyaye, kasi umwiruro, nareghosamba mo-morro ghono ghotakurima!”
18Ni-igho Yohana yaabhakangʼasërryanga ko okobharëngërya ëbhërëngyö bhiyö, na ibhyëndë ibhyaru, akabha arabharaarekera Amangʼana Amaiya agha Waryobha.
Yohana arabheeha Herode
(Maariko 6:14-29)
19Kasi Yohana yaabhëëhirë Herode ono yaarë ömötöngi uwa omokowa ughwa Ghariraaya. Herode uyö, yaaruusiri mura uwaabho omokari ono yaabherekerwanga igha, Herodia. Yohana akamokaania engʼana iyö, hamwë na amangʼana aghandë amaghogho ghano yaakoranga. 20Ku bhuyö, Herode akëngërya öbhöbhë ubhwaye, akamotoora mo-kebhohe.
Yëësu arabhatiisibhwa
(Mataayo 3:13-17; Maariko 1:9-11)
21Urusikö urwöndë, hano waanyöörrë Yohana ataraaghootwa na Herode, abhantö m-baaru yaabhatiisyanga. Yëësu wonswe yaaishirë-ho akabhatiisibhwa. Hano yaarenga akesaasaama Waryobha, mu-ryobha hakahonyoka. 22Umwika Ömöhörëëru atuubhaini kya ikighuuti akamwitoomera na ukumwikarra. Engamba ekarwera mu-ryobha muyö, ekaghamba igha, “Uwe, nu-uwe Omoona uwaane omoghonshe ono ököntëghërya bhököngʼu.”
Oroghanda urwa Kiristo
(Mataayo 1:1-17)
23Hano Yëësu yaasimiri emeremo, yaarenga na imyoka kya merongo etatö. Abhantö mbaakanyanga igha, m-moona uwa Yusufu yaarë.
Yusufu uwa Ëri.
24Ëri uwa Matati.
Matati uwa Raawi.
Raawi uwa Mëëriki.
Mëëriki uwa Yanai.
Yanai uwa Yusufu.
25Yusufu uwa Matatia.
Matatia uwa Amöösi.
Amöösi uwa Naahumu.
Naahumu uwa Esiri.
Esiri uwa Naghai.
26Naghai uwa Mahati.
Mahati uwa Matatia.
Matatia uwa Shëmëini.
Shëmëini uwa Yöösëki.
Yöösëki uwa Yooda.
27Yooda uwa Yoanani.
Yoanani uwa Reesa.
Reesa uwa Zerubhabhëëri.
Zerubhabhëëri uwa Sheyaritiëri.
Sheyaritiëri uwa Nëëri.
28Nëëri uwa Mëëriki.
Mëëriki uwa Aadi.
Aadi uwa Kosaamu.
Kosaamu uwa Ërimadamu.
Ërimadamu uwa Ëri.
29Ëri uwa Yöshuwa.
Yöshuwa uwa Ëriyëzëëri.
Ëriyëzëëri uwa Yoriimu.
Yoriimu uwa Matati.
Matati uwa Raawi.
30Raawi uwa Simeoni.
Simeoni uwa Yuuda.
Yuuda uwa Yusufu.
Yusufu uwa Yoonamu.
Yoonamu uwa Eriyakimu.
31Eriyakimu uwa Merea.
Merea uwa Meena.
Meena uwa Matata.
Matata uwa Nataani.
Nataani uwa Daudi.
32Daudi uwa Yeese.
Yeese uwa Öbhëëdi.
Öbhëëdi uwa Bhowazi.
Bhowazi uwa Saarimööni.
Saarimööni uwa Naashööni.
33Naashööni uwa Aminadaabhu.
Aminadaabhu uwa Adimini.
Adimini uwa Arini.
Arini uwa Hëzirööni.
Hëzirööni uwa Përëësi.
Përëësi uwa Yuuda.
34Yuuda uwa Yaakobho.
Yaakobho uwa Isaaka.
Isaaka uwa Ibhurahimu.
Ibhurahimu uwa Teera.
Teera uwa Naahöri.
35Naahöri uwa Serughi.
Serughi uwa Raghau.
Raghau uwa Përëghi.
Përëghi uwa Ëbhëëri.
Ëbhëëri uwa Saara.
36Saara uwa Kainani.
Kainani uwa Arifakisadi.
Arifakisadi uwa Shëëmu.
Shëëmu uwa Nuhu.
Nuhu uwa Ramëëki.
37Ramëëki uwa Metusera.
Metusera uwa Henooko.
Henooko uwa Yaarëëdi.
Yaarëëdi uwa Mahararëri.
Mahararëri uwa Kainani.
38Kainani uwa Enoshi.
Enoshi uwa Sëëti.
Sëëti uwa Adamu.
Adamu ono yaabhömbirwë na Waryobha.
Currently Selected:
Ruuka 3: ssc
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2021, Wycliffe Bible Translators, Inc. All rights reserved.