Matyê 6
6
No lə̂ ŋə́ zə̂u mbó pəpûŋ
1«Yěso kə̂ ncí ndáʼ ngô: Pei lə̌i mə́ ngwô ngʉ zə̂u yi ləpə̌ʉ* Sê pə́ ntúŋú, pei páa lə̂ ntə́ʉ pə́ mbi lâʼ mboŋə́ ghʉ̌ zêi zə̂u, lə̂ ndâghʼ ńdǒu ńgó pə́ jwó wéi. Pei lə̌i ngʉ́ yə́rə́, mə́i Tə́ wei yi a pə́ tʉ̌-lə́pû ghʉ̌ tsôʼ yé faʼ zéi po. 2O lə̌i mə́ ngwô ŋə̂ zə̂u mbó mbûŋ, koo o mâʼ wâr ə́ ndaghʼ ńdôu ńgó pə jwó. Ə̂ ghíʼ pəsap-ndwô-fʉ́ŋ ghʉ yə́rə́ məndə̂ cûʼtə*, mbaa mətû laŋə́, ə́ ndaghʼ ńdôu ńgó pye ŋə́ məkuʼ máp. N ndaʼ wéi, kwaʼ lə́nə́ʉ ńgó gháp mpfú mə́ gháʼa zâp ntsoʼó-faʼ. 3Lə́ ngwǒ lə́ gho, mə́i o lə̌i mə́ ngwô ŋə̂ zə̂u mbó mbûŋ, o pâa lə̂ ngʉ́ tə mboŋə sə̌u gho jî. 4Ə̂ lêitə́ yə́rə́, zə̂u yi o ŋə̂ pə́ pə́ cər ntsəm, Tə́ gho Sê yi a jwô zə̂u yi pə́ ŋə̂ cər ntsəm ghʉ́ ntsóʼ faʼ zô.»
Mbə̂u yi mboʼ pə́ laghʼ ńsʉ́ʉtə́ Sê
5Pei lə̌i mə́ sʉ̂ʉtə Sê, koo pei ghʉ̂ ghíʼ pəghaŋə nkoŋə mənyôghʼ, gháp koŋ lə̂ ntə́ʉ məndə̂ cûʼtə* mbaa mətû laŋə́-ndə̂u mboŋə́ sʉ́ʉtə́ Sê ə́ ndaghʼ ńdôu ńgó pye pə́tsəm jwó gháp. N ndaʼ wéi kwaʼ lə́nə́ʉ ńgó gháp pfú mə́ gháʼa zâp ntsoʼó-faʼ. 6Lə́ ə́ ngwǒ lə́ gho, mə́i o lə̌i mə́ ngwô sʉ̂ʉtə Sê, o kə̂u cər lûm ndə̂, ə́ nkhʉŋə́ ntsʉ ndə̂, ə́ nyáŋ ləlwǒ mboŋə́ sʉ́ʉtə́ Tə́ gho yi a pə́ yʉʼ ləlwǒ. Zʉ́ yi a jwô zə̂u yi o ghʉ yʉʼ ləlwǒ, a ghʉ̌ tsóʼ faʼ zô.
7«Pei lə̌i mə́ sʉ̂ʉtə Sê, koo pei lâʼ no pə̂ zʉŋə zʉŋə́ ghíʼ pye pi kâa gháp pə́ njî gháp Sê, gháp kwaŋ záp pə́ ńgó gháp wo lâʼ no pə̂ nzʉŋə zʉŋə́ ə Sê poŋə́ zúʼ. 8Koo pei fəiʼi gháp, ńté no Tə́ wei pə̌ njî zə̂u yi ə́ pə́ mbûŋ mbó pei, tə pei ghí lóu yé, mə́i a pə mə́ njí.»
9«Pei lə̌i mə́ sʉ̂ʉtə Sê pei lâʼ ngô:
“Tə́ waghʼ yi o wə́ tʉ̌-lə́pû.
Ghʉ̌ pye-mə́soŋ jí ńgó ə̂ ndaʼ gho ə́ mbə́ Sê.
10Ghʉ̌ ləfou zô tó.
Ghʉ̌ pə pə́ nzûʼ ntsʉ ghô ndəu ndesé, ghíʼ pə́ pə̂ nzûʼ tʉ̌-lə́pû.
11Ŋə́ wághʼ məzʉ̂ mi ə́ kǔʼ lə́ paghʼ lə́ yo leʼé,
12lyə́ghʼə́ məfaa waghʼ ńŋə́ lə́ paghʼ, ghíʼ paghʼ lyəghʼə zághʼ ŋə̂ lə́ pye pi gháp fǎa no mbó paghʼ.
13Koo pə̂i ńgó paghʼ pfúŋ cər nkwaʼtə, pfû wághʼ mbó Sə́tə. [Ńté no gho lə̂ pə̌ fou, mətəʉ mə́tsəm pou mbə́ pə̂ mô, pə́ pou mə́ ngúʼtə pə̂ ndaʼ ghô lə̂ mənguʼ mənguʼ. Ámeŋ.]”»
14«Ə́ pə̂ yə́rə́, ə́ mbə́ ńgó pei lə̌i nyáa ndyəghʼə́ məfaa pəcó pye ńŋə́ lə́ páp, mə́i Tə́ wei yi a pə́ tʉ̌-lə́pû ghʉ̌ kə́ lyəghʼə́ yé wei ńŋə́ lə́ pei lə́wó. 15Lə́ pei kə́ ndə́iʼ lyəghʼə́ məfaa pəcó pye ńŋə́ lə́ páp po, mə́i Tə́ wei ghʉ̌ kə́ lyəghʼə yé wei yé lə́wó ńŋə́ lə́ pei po.»
Ə kôŋ nkoŋə́ nyáŋ nji ńsʉ́ʉtə́ Sê
16«Pei lə̌i mə́ nkôŋ koŋə́ ńnyáŋ nji ńsʉ̂ʉtə Sê, koo pei shʉ́ŋə sʉ̂ wéi ghíʼ pəghaŋə nkoŋə mənyôghʼ. Gháp shʉ́ŋə sʉ̂ gháp, ə́ ndaghʼ ńnyárə ńgó gháp pə́ nyâŋ nji lə̂ sʉ́ʉtə́ Sê. N ndaʼ wéi, kwaʼ lə́nə́ʉ gháp yaa mə́ ndáʼ ngwô gháʼa zâp ntsoʼó-faʼ. 17Lə́ ə́ ngwǒ lə́ gho, mə́i o lə̌i mə́ nkôŋ koŋə́ nyâŋ nji ńsʉ́ʉtə́ Sê, o ghʉ̂ sʉ̂ ghô lêi, ə́ sǎp tû zô. 18Ə̂ lêitə́ yə́rə́, lə́u cǒ ŋuu jî yé ńgó o pə̌ nyâŋ nji ńsʉ́ʉtə́ Sê po. Tə́ gho zə́ghʼə́-zʉ́ yi káa pə pə́ njwô yé yé lə̂ jí. Zʉ́ yi a pə̌ njwô zə̂u yi o ghʉ ləlwǒ ghʉ̌ tsóʼ faʼ zô.»
Pei loʼó məzə̂u lətəi-ndwuŋ méi mbəʉ Sê
(Lks 12.33-34)
19«Koo pei kəitə məzə̂u lətəi-ndwuŋ méi ndəu ndesé, ə́ yʉʼ yi saa gháp wə́rə́káa wo zʉ́; ə́ yʉʼ yi pətsǒŋ wo pwôʼ ndə̂, ə́ khwǒr. 20Pei kəitə məzə̂u lətəi-ndwuŋ méi pə́ mbəʉ Sê, ə́ yʉʼ yi káa saa gháp wə́rə́káa pə́ ncôŋ gháp zə̂u wó; lə́u pətsǒŋ pôu kuʼ gháp lə̂ mbwóʼ ndə̂ ńkhwǒr po. 21Ńté no məzə̂u lətəi-ndwuŋ mô lə̌i mbə́ pə́ ghó, pó mə́i ntə̂ʉ ghô wo kə́ pə̂ yé pə́ yʉʼ wó lə́wó.»
Ləjôghʼ ŋuu ə̂ lâm yi a laghʼ ńjwô yʉʼ
22«Nyôghʼ mô gháʼá mbə́ mbó gho, ə́ mbə́ ghíʼ lâm yi a keʼ mbəʉ zô. Nyôghʼ mô lə̌i mbə́ shʉʼʉ, mə́i mbəʉ zô ntsəm wo pə́ cər nkeʼ. 23Lə́ nyôghʼ mô lə̌i ndə́iʼ pə̂ yé shʉʼʉ po, mə́i o wo cʉ́ʼ pə́ pə́ cər nzə̌m. Nyôghʼ mô lə̌i mbóu nděi tə fwôghʼ, mə́i o wo cʉ́ʼ pə́ pə́ cər mou-nzə̌m!»
Ə́ poŋ lə̂ ncóghʼ ntə̂ʉ lə̂ Sê
(Lks 16.13)
24«Mboʼ có puʼ zûʼ yé ntsʉ pətə́-faʼ pə́pwô po. Tə ə́ kə́ mbə́ yə́rə́, mə́i a wo zúʼ ntsʉ tâʼ, ə́ tə̌i tû ńŋə́ lə́ cǒ. Mə́i a wo kǒŋ tâʼ, ə́ paa cǒ. Mboʼ pei côghʼ wéi ntə̂ʉ wéi lə̂ nkâp, ə́ mbou nkə́ ncí ncóghʼ lə̂ Sê po.»
25«N ndaghʼ ńdâʼ wéi ngô: Koo pei nyâŋ mbûʼ mbəʉ zéi ngô: Paghʼ wo zʉ́ hó? Paghʼ wo jwó nci ghó ə́ nó? Paghʼ wo jwó ndǐ ghó mǎʼ? Ləcǐ-mbî wei kâa lêi məzʉ̂ mo? Mbəʉ ŋuu kâa póu mbə́ zə̂u lətəi-ndwuŋ ə́ nděi məndǐ mo? 26Pei náŋ pəshʉ̌ŋ ńjwó, gháp lə̌i mbî gháp zə̂u po, káa kə́ pə́ pyê gháp məzʉ̂ ńŋə̂ ndə̂, káa ghwo gháp ntaŋ, Sê yi a pə́ tʉ̌-lə́pû lə̂ zághʼə gháp. Pei pə́ mbó Sê, ə́ mbə́ zə̂u lətəi-ndwuŋ ə́ nděi pəshʉ̌ŋ. 27Wǒ ŋuu pə́ lə́ pei yi mboʼ a laghʼ mbə̂u yi a laghʼ ḿbûʼ mbəʉ ye, ə́ nkǔʼ lə̂ nkʉʼʉ́ tâʼ leʼé lə̂ məleʼé mbi mé?»
28«Tə pei pûʼ mbəʉ zéi lə̂ no məndǐ gháʼa ńté hó? Pei náŋ pətə́toŋə́ pi ə́ pə́ lə̂ ləghěi nkâʼ ńjwó. Ləghěi lə̌i fâʼ yé po, káa kə́ pə́ pâʼ yé məndǐ. 29Pei cʉ́ʼ n ndâʼ wéi, fou Salə́məu lə pə́ tə ngwô zə̂u gháʼate, lə́ káa láʼ mâʼ yé ndǐ tə ə́ sêi ghíʼ cǒ tə́toŋə́ wêi. 30Tə Sê lə̌i máʼ ndǐ shʉʼʉ lə̂ ləghěi yi a jôghʼ nkâʼ leʼé wo, nzʉ̂ fôghʼ pə́ khwôʼ ńtôu mǒghʼ, mə́i a wo ghʉ gháʼá ə́ pǒu títə́ mǎʼ ndǐ lə́ pei yi ə sěi ńděi zêi zə̂? No pə́ pə́ ngô: káa pei pə́ ncôghʼ wéi ntə̂ʉ lə̂ Sê mpfu tsəm! 31Koo pei jôghʼ mbûʼ mbəʉ zéi, ə́ ndâʼ ngô: “Tə paghʼ wo zʉ́ hó? Tə paghʼ wo jwó nci ghó ə́ nó? Tə paghʼ wo jwó ndǐ ghó ə́ mǎʼ?” 32Pətəpə̌i-no Sê lə́ nyâŋ ngwô zêi mbə̂u məkwaŋtə. Ə́ ngwo lə́ pei, mə́i Tə́ wei Sê pə̌ njî məzə̂u mi ə́ wo pfútə́ wéi. 33Pei tsə́mbi ndôu pə́ no Ləfou Sê*, gháp zə̂u yi Sê pə̌ nkǒŋ, a cʉ́ʼ ŋə́ mêi məzə̂u ńdaghʼ ńkʉ́ʼʉ́ kʉʼʉ́. 34Ghíʼ ə́ kə́ mbə́ yə́rə́ lə́, koo pei pûʼ mbəʉ zéi ńté leʼé mbi yi zou. Leʼé mbi yi zou ghʉ̌ laghʼ mé məno tó. Zarə́-zarə́ ngwôʼ kuʼ lə̂ yé leʼé mbî.»
Currently Selected:
Matyê 6: NLA
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena