Génesis 1
1
Ko tsyo'onë'ky tsyo'ontäky winë
1Ko tsyo'onë'ky tsyo'ontäky, Dios yë'ë ojts tyajkojy ëka'any tsajp ets naaxwiinyëtë. 2Yë naaxwiinyëtë ka'ap ënety tii ijxën oypyë tmëëtëty, je'eyë ënety kootspuknë wyimpakëxë'ëky yë mëjnëëmejy ets ja Dios ja myëk'ajtën y'oyajtën yë'ë ënety je'eyë yu'kxp nëëwinkëjxy.
3Ënet yë Dios y'ënäny: wä'än tjää'aty yë kutë'kxën.
Tää ja kutë'kxën ojts kyëxë'ëky. 4Ko ja Dios t'ijxy ko janty'oy kyëxë'ëky ja kutë'kxën. Ënet ojts tyajnewyä'kxyë mëët ja koots'ajtën. 5Ets tukxëëwajty, xëëny e ja kootsajtën tukxëëwajty koots. Jëtu'un ojts kyä'pxy ja mëtu'kxëëwpë. 6Ënet ja Dios jatëkok y'ënäny: Wä'än tjää'aty tu'uk yë niwits nijuux, mëti'ipë yaj'ëwä'kxy'itëpën yë nëë, jëtu'unts ëwä'kxyjyäty wyë'ëmtëty.
Ënet ojts jëtu'un tyuny jyätyë. 7Dios ojts tu'uk tjanty yajkojy yë niwits nijuuxy, mëti'ipë yaj'ëwä'kxy'ittëpën yë nëë. Tu'kpëky ojts ja nëë wyi'imy pa'tkë'p ets tu'kpëky nëkëjxy. 8Ja niwits nijuux jä'ä tyajxëëwpejty tsajp. Jëtu'un ojts ja mäjtsk xëëwpë kyä'pxy. 9Ënet yë Dios jatëkok y'ënäny: Ja nëë mëti'ipë të wyi'imyën pa'tkë'p, wä'än tnämyukyë tu'ukyë ets wä'än jëtu'un tnitëtstu'uty yë naaxwiinyëtë.
Jëtu'un ojts tyuny jyätyë. 10Ja mëti'ipë ojts nyitëtstu'utyën. Jä'ä ojts ja Dios txëëwmo'oy Naax. E ja nëë mëti'ipë ënety tu'ukyë të nyämyukyën jä'ä txëëwmooy mejy.
Ko ja Dios t'ijxy ko aak'oy mëti'ipë të tyajkojyën. 11Ënet y'ënäny wä'än tpu'uy yë aay ujts kanaakjëjp. Ujts mëti'ipë myëët'atëpën yë pyajk ets kepy mëti'ipë tëëmpätëpën.
Jëtu'un ojts tyuny jyätyë. 12Tää wyinmujxëtyääy wyinyo'onëtyääy ja naax mëët ja aay ujts, tam mëti'ipë myëët'ajtypyën yë pyajk ets aay kepy mëti'ipë tëëmpäjtpën. E Dios janty'oy t'ijxy mëti'ipë ënety të tyajkojyën. 13Jëtu'un ojts kyä'pxy ja mëtëkëëkxëëwpë.
14-15Ënet ja Dios y'ënaankojnëpë: Wä'än tjää'aty ja të'kxën jajën jam tsajpwinm ma niwits nijuuxën, mëti'ipë kyutë'kx kyujajëpën ja naaxwiinyëtë. Ets tyajnäywyä'kxëtëty ja xëënyajtën ets ja kootsajtën ets yë'ë yajtuk'ixëty ja xëëw jëmëjt, xëëw po'o ets ko jyää'atëty ja nyipo'o nyijëmëjt tiijaty tuunëp jajtëpën.
Jëtu'un ojts tyunyë jyätyë. 16Dios ojts tyajkojy mäjtsk yë kujaj kutë'kxën, tu'uk yë mëjpë mëti'ipë kujaj kutë'kxëpën xëëny ets mutskpë mëti'ipë kujaj kutë'kxëpën koots. Ojts näjyëtu'un tyajkojy maymyëtsa'a. 17Dios ojts tpëjktä'äky yë kutë'kxën jam tsajpwinm ma niwits nijuuxën, mëti'ipë kutë'kx kujajëpën yaa naaxwiiny, 18mëti'ipë kutë'kx kujajëpën xëëny koots, mëti'ipë yaj'ëwä'kxy'itëpën yë xëëny'ajt kootsajtën. E Dios janty'oy t'ijxy mëti'ipë ënety të tyajkojyën. 19Jëtu'un ojts kyä'pxy ja taxk xëëwpë.
20Ënet yë Dios jatëkok y'ënäny: wä'än tjää'aty winëjaty jëyujk jap nëëjoty ets wä'än tjää'aty näjyëtu'un yë joon jëyujk mëti'ipë kääkjëtijtëpën naaxwiinkëjxy.
Jëtu'un tyuunë jyajtë. 21Ojts yë'ë Dios yë jëyujk tyajkojy mëjatypë këjxmjatypë jap nëëjoty ets tu'kë'ëyë jëyujk jënu'un yaj'ixy yajpaatyën nëëjoty, näjyëtu'un yë joon jëyujk ojts tyajkojy.
Yë Dios aak'oy t'ijxy mëti'ipë ënety të tyajkojyën. 22Ënet ojts tkënu'kxy mëët ya'atë aaw ayuk: Wä'än mnimayëtë ets xyajwintuktëty yë nëëjot ets wä'än näjyëtu'un nimayë yë joon jëyujk naaxwiiny.
23Jëtu'un ojts kyä'pxy ja mëkoxk xëëwpë.
24Ënet yë Dios y'ënäny: Wä'än tjää'aty naaxkëjxy yë winë jëyujk: mëti'ipë ma jëën ma tëjk yajpaatëpën ets mëti'ipë aayjoty ujtsjoty yajpaatëpën, mëti'ipë myox tyukye'epyën.
Jëtu'un ojts tyunyë jyätyë, 25Dios ojts ya'atë jëyujk tyajkojta'ay ets janty'oy t'ijxy.
26Paaty y'ënäny: Tyam tsojk ënät nyajkojëm yë naaxwiinyëtë ja'ay. Jëtu'un y'ixë'atëty tä ëëtsajtëmën. Myëët'atëp yë ënä'ämën kuttujkën ma nëë jëyujkën, ma joon jëyujkën, ma ja jëyujkën mëti'ipë tsënaaytyëpën ma jëën tëjkën ets aay joty ujtsjotypë. Näyjyëtu'un myëët'atëp yë ënä'ämën kuttujkën ma ja jëyujkën mëti'ipë myox tyukye'epyën.
27Ko yë Dios ojts tyajkojy yë naaxwiinyëtë ja'ay,
jëtu'un ojts tyajkojy ijxtëm yë'ë kë'ëm y'ixëtyën,
ye'etyëjk ets to'oxytyëjk ojts tyajkojy.
28Tääts tmooy yë kyënu'kxën ets t'ënëmaay:
Mëët'atë ënät yë m'u'unk m'ëna'këty,
yajwintuktë yë naaxwiinyëtë ets xy'ënä'ämtëty.
Mijts m'ënä'ämta'atëp yë nëë jëyujk ets
yë joon jëyujk ets tu'kë'ëyë jëyujk
mëti'ipë myox tyukye'epyën.
29Tää jatëkok tjaakënëmaay: Ëk'ixtë, tyam mijts nmo'otë ets ntukë'ëtëkëtë tu'kë'ëyë aay ujts mëti'ipë naaxkëjxy yoonp ji'tspën ets myëët'ajtyp yë pyajk ets tu'kë'ëyë aay kepy mëti'ipë tëëmpäjtpën. Yë'ëts myajtuntëp ets xyjyë'kxtëty xypyëktëty, 30e yë jëyujkëty mëti'ipë tsënaaytyëpën aayjoty ujtsjoty, joon jëyujkëty ets tsa'anyëty, yë'ë jyë'kxtëp aay ujts.
Jëtu'un ojts tyunyë jyätyë, 31ënät yë Dios t'ijxy janty'oy tu'kë'ëyë mëti'ipë ënety të tyajkojyën. Jëtu'un ojts kyä'pxy ja mëtëtujk xëëwpë.
Currently Selected:
Génesis 1: QUETZMIXE
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Biblia Dc en Mixe de Quetzaltepec, Oaxaca México © Sociedad Bíblica de México, A.C.