Sɩngre 8
8
Sa-kẽengã sɛɛbo
1Wẽnnaam tẽega a Nowe ne we-rũmsã ne yir dũmsã fãa sẽn dag n be ne yẽnda koglgã pʋgẽ wã yelle, dẽ, b kɩtame tɩ sobg fʋʋs dũniyã zugu, la koomã boogame. 2Zĩ-zulumsã ko-ninã ne saagã ko-ninã fãa lebs n pagame, la saagã yoogame. 3Koomã rag n fẽbgda bilf-bilf dũniyã zugu, la rasem koabg la pis-nu pʋgẽ, a boogame. 4Kiuug a yopoe soabã rasem piig la a yopoe daarã, koglgã tɩ yalsa Ararat tãngã zugu. 5Koomã rag n ket n boogdame hal tɩ ta kiuug piig soabã. Kiuug piig soabã pipi daarã, tãmsã zut pukame.
6La sẽn ta rasem pis-naase, a Nowe paka koglgã võor ninga yẽnda sẽn dag n maanã. 7A Nowe basa gãabg t'a yi, la a kẽngdame la a lebgd n watẽ, hal tɩ koomã wa kʋɩ dũniyã zugu. 8A Nowe basa manwall me t'a yi, sẽn na n ges koomã sã n yõbga tẽn-gãongã zugu. 9La manwallã ka paam zĩig n na n zaoond ye, la a lebg n waa a Nowe nengẽ koglgã pʋga, bala, koomã rag n ket n bee tẽn-gãongã zãng fãa zugu. La a Nowe tẽega a nug tɩ wallã zomb t'a kẽes-a koglgã pʋga. 10La a Nowe leb n yals gũume tɩ ta rasem a yopoe, n yaool n leb n bas wallã t'a yi koglgã pʋga. 11La zaabr sasa, manwallã lebg n waame, la ade, b mikame t'a yãka oliiv tɩɩg vãoog n zãad a noorẽ. Dẽ, a Nowe bãngame tɩ koomã yõbga dũniyã zugu. 12A Nowe leb n yaasa rasem a yopoe n paase, n yaool n leb n bas manwallã t'a yi. La wallã ka lebg n wa yẽnda nengẽ yɛs ye.
13A Nowe sẽn wa n tar yʋʋm kobs-yoob la a yembrã yʋʋmde, pipi kiuugã pipi daare, koomã kʋɩɩ dũniyã zugu. A Nowe paka koglgã limdã n ges n mik tɩ tẽn-gãongã zugã fãa kʋɩɩme. 14Kiuug a yiib soabã rasem pisi la a yopoe daarã, tẽngã zãng rag n yaa koɛɛnga.
15Woto, Wẽnnaam yeela a Nowe yaa: 16«Bɩ foom ne f pagã, la f kom-dibli wã, ne f bi-pagbã yi koglgã pʋga. 17Kɩt tɩ bõn-vɩɩlɩ wã buud fãa sẽn be ne foomã tũ foom n yi. Yaa bõn-yɩgdɩ wã, ne rũmsã la bõn-bãoonegã sẽn saagd tẽngã zugã. Bɩ bãmb doge, n fɩɩg n pid dũniyã.» 18A Nowe ne a kom-dibli wã, la a pagã ne a bi-pagbã yiime. 19Rũmsã fãa ne bõn-bãoonegã fãa, la bõn-yɩgdɩ wã fãa, la bũmb nins fãa sẽn saagd dũniyã zugã wa sẽn zems b buudã sẽn yaa to-to wã fãa yii koglgã pʋga.
20A Nowe mee tẽn-kugr Sẽn-Ka-Saab yĩnga. A Nowe yãka rũm-sõama wã buud fãa, la bõn-yɩgdɩ nins fãa sẽn yaa sõama wã, n kʋ n maan maoong sẽn yõogd bugum tẽn-kugrã zug Sẽn-Ka-Saab yĩnga. 21Sẽn-Ka-Saab wʋma yũ-noogã, la bãmb yeela b sũurẽ: «Mam ka na n leb n kãab dũniyã kãab-wẽng ninsaal yĩng ye. Bala, hal ninsaal yãadem wakate, a tagsda wẽng maaneg bal a sũurẽ. La mam ka na n leb n sãam bõn-vɩɩsã wa mam sẽn zoe n maanã ye. 22Dũniyã sẽn na n zĩnd tɛka,
bʋdb wakat ne tigsg wakat kõn kong ye.
Waood wakat ne tʋʋlg wakat kõn kong ye.
Sẽoog ne sɩpaolg na n zĩndame.
Wĩntoog ne yʋng na n kell n zĩndame.»
Currently Selected:
Sɩngre 8: MPBU
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Moore Bible © Bible Society of Burkina Faso, 2014.