Matiyə̈ 24
24
Jezü tö pö ndə̂kə̂ ndɨ ndə̂ gbölö nda Ndjapä
(Mar 13.1-2; Luk 21.5-6)
1Jezü wütu lə̂ gbölö nda Ndjapä kə̈ rô etə̂. Adjisîpili ndə̂ yê nə̂ ndola tchë ndə̂kə̂ nyisə̂ köbo ndə̂ a mbô rə̂ la gbölö nda Ndjapä. 2Käko Jezü tô rə̂ ndə̂nə̈ sə̈ andjê päkëdə̂: «Nyë wûn rə âtə nə̂ gbɛ̂? Ɛn-ɛn, tə̂ lëge nə̈ më tö rə̂ sə̈ nyê: Ngâ täme balë kä wa bata pâ ngâ yê tee-a, ârə̂ âtu me tü gbɛ̂ ëbêche.»
Arə yûkü la arə gbôgbô
(Mar 13.3-13; Luk 21.7-19)
3Jezü sə̈ bêche bhâlə̂ küma aga ndə̂ a-Olivï, adjisîpili ndə̂ yê nə̂ pu tchë. Ndə̂ andjë sə̂ la kütû andjê, andjë yû tchë päkëdə̂: «Amö to rə̂ sə̈ ârâ, dalatchêbâ kä ndə̂ rə âtə wutu? Sɨ̂nyî rə giamâ kä ndə̂ ânyisə̂ lo kə̂ ka ndə̂ zə̈ la sə̂nə̈ ndə̂ tchîsûwu krʉ tâ?» 4Jezü tô rə̂ ndə̂nə̈ sə̈ andjê päkëdə̂: «La nyê gbö-ê, ngâ akrə böloabô nyê bôlo-ê. 5Bëte angbängbä azü ânəadje la rə̈ mê lakə̂ to rə̂ päkëdə̂: ‹Mëmê kä ndə̂ âdə Krîsiti!› Ânyë andjê boloadje azü tə̂ gbölösə̂nə̈. 6Nyê djeadje pö ndə̂ akʉ̈ʉ̈ ndrotə̂ nyê la apö ndə̂ akʉ̈ʉ̈ ngrɨ̈, wawa mböäbô nyê mbô-ê. Äwäpä rə lâme wutu dokʉ̈tchê. Praâbalë tchîsûwu nə̈ wâbo ndə̂kə̂ ka angangaâtə-a. 7Bëte angâ azü gö âadje lafô ndə̂kə̂ mbo kʉ̈ʉ̈ la angâ azü gö. Ngâ gbölö gö-gbïɛ̈ âadje lafô ndə̂kə̂ mbo kʉ̈ʉ̈ la ngâ gbölö gö-gbïɛ̈, kulə̂ angâ agö, gʉ âmboadje azü tə̂ gbölösə̂nə̈, acho âtroadje katchôgbɛ̂. 8Arə nə̈ lâme wadje batə̂ dokʉ̈ kə̂ ka tchə̂lə̂ ɛ̈chë ndə̂ tche wâ ndə̂kə̂ zɨ. 9Käko azü âyoadje sə̂ nyê ëtchânə̂ angâ azü ndə̂kə̂ pa andjë mbo nyê la yûkü, kə̂ won-adje nyê. Azü gbɛ̂ ndə̂ andjë wâbô wâtə̂ ajuîfu koadje sə̂ nyê bëte mê. 10Sə̂nə̈ lâme azü gboadje tə̂ köbo Ndjapä tə̂ gbölösə̂nə̈, andjê yoadje sə̂ angâ andjê, kə̂ koadje sə̂ angâ andjê lə̂ gbâtə̂ andjê. 11Akpûlû a-earə̂ ndə̂ma Ndjapä ndə̂ yepa ânəadje ndə̂kə̂ bolo azü tə̂ gbölösə̂nə̈. 12Bëte angbongbo arə ndə̂ ârô masə̂nə̈ lâme, kə̂ nyində̂ ngâ lə̂ gbâtə̂ andjê wabô tee-a. 13Praâbalë akrə ndə̂ tche rʉatə̂ su yê ndjoa tə̂ manə̈, tchê tchadje lə̂ kuzü. 14A âmuadje Tchôtchô Pö ndə̂ Gbölö gö-gbïɛ̈ ndə̂ tchêlafô kupâ cho gbɛ̂ ndə̂kə̂ pa azü gbɛ̂ ndə̂ andjë wâbô wâtə̂ ajuîfu dje rə̂, pânə̈ ânyë ma arə gbɛ̂ krʉ.»
Lö yûkü ndə̂ azü
(Mar 13.14-23; Luk 21.20-24)
15«Bëte rə̂ kä ndə̂ nyê wun-adje tchanə̈ ndə̂ a ê rə̂ tə̂ yê päkëdə̂: ‹Gbölö ngbongbo rə ndə̂ ândɨ rə gbɛ̂.› Danïɛ̈le earə̂ ndə̂ma Ndjapä tö pö ndə̂ yê alême päkëdə̂: Gbölö ngbongbo rə lâme eadje kə̂ sə bhâlə̂ tchô ndə̂ âdâka gbɛ̂ ânyë kə̈ wâ ngbî bëte Ndjapä. (Äwäpä akrə ndə̂ tche dɨ rə̂ dje tchə̂lə̂ nə̈ djîrə̂!#24.15 Nyë dɨ̈ Dan 9.27; 11.31; 12.11..) 16Käko azü ndə̂ andjê səadje lə̂ gö ndə̂ Judë, äwäpä andjë kpe âtə̂lə̂ küma aga. 17Âwâbo pä akrə ndə̂ tchê səadje dəpâ küma nda jre ndə̂kə̂ za rə bhâ tchâalê ndə̂ yê-a#24.17 Dokʉ̈tchê bhâ Jerûzalêmo atchêpâ anda wä batə̂ krɨ̈, azü wä ndə̂kə̂ sə ëpânə̈: Nyë dɨ̈ Luk 17.31.. 18Akrə ndə̂ tche ê atə̂lə̂ kɨ̈ndɨ̈, âwâbo pä tche gu ndə̂kə̂ za lə̂ba ndə̂ yê-a. 19Lə̂ alö nə̈ lâme, nyonyo kä tə̂ aɛ̈chë ndə̂ andjë wâ la güzu la andjanə̈ ndə̂ andjê zadje ngo ma bechë! 20Nyë tö pö sə̈ Ndjapä ndə̂kə̂ pa lo kə̂ kpe ndə̂ nyê nə̈ wabô wâ lə̂ zöngö âdəndjë lə̂ lö sabäa-ê. 21Lə̂ lö nə̈ lâme, yûkü âwatə̂ gbölösə̂nə̈, yûkü ndə̂ âtô tə̂ lo nə̈ ndə̂ a mbô tchêbêche zoo ëtə̂ tchô angêta, ngâ akrə balë wûn-âbo ngâ yûkü käko-a, la tchêngbâ nə̈ ngâ akrə balë kä wun-abô ngâ yûkü käko balë tee-a. 22Âdə Ndjapä âjîâbô angâ alö yûkü lâme nyɛ̂-ɛn, dëkë akrə balë ndə̂ tche wâ ndə̂kə̂ tcha lə̂nə̈ sə̂âbo-a, praâbalë tche jï angâ alö nə̈ bëte azü ndə̂ tche dɨ̂ andjê. 23Âdə ngâ akrə âto rə̂ sə̈ nyê päkëdə̂: ‹Krîsiti kä tchâtə,› âdəndjë ‹Təbhâ,› nyë gämbabô pö ndə̂ yê gâmba-ê. 24Bëte angâ amesï ndə̂ yepa la a-earə̂ ndə̂ma Ndjapä ndə̂ yepa nəadje. Andjê mboadje asɨ̂nyî rə la arə ndə̂ âropâ küma azü, ndə̂kə̂ bolo azü, âdə köbo âwa, andjë bolo ndjë azü ndə̂ Ndjapä dɨ̂ andjê. 25Më tô rə̂ sə̈ nyê dokʉ̈tchê nə̂.
26«Âdə a âto rə̂ sə̈ nyê päkëdə̂: ‹Tche kä bhâlə̂ kpaɛ̈gâ›, nyë ëäbô ê atêe-ê. Âdə nyë âdje rə̂ päkëdə̂: ‹Tche azâtə̂ yê wü təbhâ›, nyë gämbabô rə̂ gâmba-ê. 27Batə̂ rə̂ ndə̂ nyïvrö sro kpôlə̂nyä ânyë ngbänga nə̈ to dəsə̂nə̈ ndə̂ lo wutu tâ kə̂ wutu bhâ sə̂nə̈ ndə̂ lo li tâ lâme, kə̂ ka ndə̂ Modô ndə̂ Akrə âwa me käko. 28Sə̂nə̈ ndə̂ akrʉkrʉ wa tâ, sə̂nə̈ lâme akânda paladje tə̂ andjê tâ.»
Lö kə̂ ka ndə̂ Modô ndə̂ Akrə
(Mar 13.24-27; Luk 21.25-28)
29«Kpro la tchêngbâ arə yûkü lâme gbɛ̂, tchêla lo âbuadje, nyîpï kä ta bata tee-a, akêkêrə̂ toadje bhâ lafô kə̂ sə lakə̂ tu atə̂ bêche, arə gbôgbô ndə̂ tchêlafô troadje katchôgbɛ̂. 30Ngâ sɨ̂nyî toadje bhâ lafô ndə̂kə̂ nyisə̂ kə̂ ka ndə̂ Modô ndə̂ Akrə. Azü pâ amawo tchêbêche gbɛ̂ dɨadje tchə̂lə̂ ma andjê, andjê wun-adje Modô ndə̂ Akrə ndə̂ tche ka lə̂ ndrö la gbôgbô ndə̂ yê gbɛ̂ lə̂ golowäre ndə̂ Bha nə̈. 31Ndə̂ gbölö tätälîtä âsə̈ kɨ, Modô ndə̂ akrə wan-dje aânje katchôgbɛ̂ lə̂ angongo cho voanə̈ ndə̂ tchêbêche ndə̂kə̂ pala azü ndə̂ tche dɨ̂ andjê#24.31 Nyë dɨ̈ Det 30.4; Zak 2.10; Neh 1.9..»
Ndoka pâ yö ndə̂ fîge
(Mar 13.28-31; Luk 21.29-33)
32«Äwäpä nyë dje tchə̂lə̂ ndoka pâ kə̂ nyisə̂ rə pâ yö ndə̂ fîge: Âdə nyê âwun amatö yö ndə̂ âmbôtə̂ yê tə̂ bhiɛbhiɛ nə̈, ânyë akʉ̈kʉ̂ nə̈ sə̂ lakə̂ ta tâ, nyê wunsə̂ nə̈ pä lo kə̂ lu andjî rəgʉ ndô nə̂. 33Käko ndjë nyënyê ndjë gbɛ̂, âdə nyë âsə̈ wun arə lâme ndə̂ âwutu, äwäpä nyë wunsə̂ nə̈ pä Modô ndə̂ Akrə ndô nə̂, tche kä pâ manda ndə̂ nyê. 34Ɛn-ɛn, tə̂ lëge nə̈ më tö rə̂ sə̈ nyê: Azü ndə̂ tchô angêta tchuabô gbɛ̂ tee-a, dokʉ̈tchê ndə̂kə̂ pa rə lâme gbɛ̂ wutu. 35Tchêlafô la tchêbêche âroadje, praâbalë apö ndə̂ mê roabô tee-a.»
Ndjapä balë kä âkə̈ wûnsə̂ kə̂ ka ndə̂ lö nə̈
(Mar 13.32-37; Luk 17.26-30,34-36)
36«Âdə andə̂ pö ndə̂ lö nə̈ âdəndjë dalo nə̈, ngâ akrə balë wûn-âbo sə̂nə̈-a. Âdə̂âbo ndjë aânje ndə̂ tchêlafô-a, âdə̂âbo ndjë Modô-a, praâbalë kütû Ndjapä balë. 37Rə ndə̂ âmbô losə̂ Nowë alême mboadje käko tə̂ lo kə̂ ka ndə̂ Modô ndə̂ Akrə. 38Bëte tə̂ lo nə̈ lâme, dokʉ̈tchê ndə̂kə̂ pa gbölö nyïvrö nyi kə̂ za tchô gbɛ̂, azü sə̈ alême lakə̂ zɨ rə, lakə̂ ndjo rə, lakə̂ totə̂ andjê, azü kʉ̈ aɛ̈wünrə ndə̂ andjê sə̈ aköchë zoo âwûtu tə̂ lö nə̈ ndə̂ Nowë lî lə̂ âreche. 39Su andjê wâbo pânə̈-a, zoo ngû rô la andjê gbɛ̂. Kə̂ ka ndə̂ Modô ndə̂ Akrə âwa me käko-ë. 40Aköchë bïchuû âsə bhâlə̂ kɨ̈ndɨ̈, a âzadje ngânə̈ balë, kə̂ gbotə̂ balë nə̈. 41Aɛ̈chë bïchuû âsə lakə̂ nu kändä, a âzadje ngânə̈ balë kə̂ gbotə̂ balë nə̈. 42Käko la nyê gbö-ê, bëte nyë wûn-âbo sə̂ lö kə̂ ka ndə̂ Gbölö Gbïɛ̈ ndə̂ nyê-a. 43Nyë djë tchə̂lə̂ pö âtə: Âdə earə̂ nda âwunsə̂ dalo ndə̂ earə̂ ngbä nə la rə̂, tchê loabô tee-a, ânyë kə̂ gbotə̂ earə̂ ngbä lâme ndə̂kə̂ pa tche li atə̂ tchâalê ndə̂ yê-a. 44Bëte rə̂ kä, nyënyê ndjë gbɛ̂, äwäpä nyë sə tchêtchêtchê, bëte Modô ndə̂ Akrə âkadje ngbâ yê lə̂ dalo ndə̂ nyê wun-abô sə̂nə̈ tee-a.»
Tchôtchô earə̂ kua
(Luk 12.41-48)
45«Earə̂ kua ndə̂ tche mbo rə lə̂ köbo nə̈, ânyë kə̈ wûnsə̂ rə də̈ tchanə̈bâ? Tche də̈ akrə ndə̂ gbölö akrə ndə̂ yê zâ tchë pâ azü lə̂ nda ndə̂ yê ndə̂kə̂ kʉ kɨ̈zɨ̂ sə̈ andjê lə̂ adalo nə̈. 46Mômô kä tə̂ earə̂ kua lâme ndə̂ gbölö akrə ndə̂ yê kângbâ yê kə̈ gbô tchë tə̂ ma kua nə̈. 47Ɛn-ɛn, tə̂ lëge nə̈ më tö rə̂ sə̈ nyê, gbölö akrə nə̈ âgbotə̂ arə ndə̂ yê gbɛ̂ ëtchânə̂ earə̂ kua nə̈ lâme ndə̂kə̂ pa tche wun tchô pânə̈. 48Praâbalë âdə tche âwatə̂ ngâ ngbongbo earə̂ kua, ânyë kə̈ tô rə̂ bhâtə̂ su yê päkëdə̂: ‹Gbölö akrə ndə̂ mê ndôâbo ndə̂kə̂ ka-a›, 49ânyë kə̂ jetə̂ kə̂ bhi adɨ̂ angâ yê a-earə̂ kua nə̈, kə̂ zɨ rə, kə̂ ndjo rə la azü ndə̂ pî mbo andjê. 50Gbölö akrə ndə̂ ngbâa lâme âkadje ngbâ yê kə̂ tro tchë, ânyë dalo ndə̂ tche ka la rə̂, tchê wûn-âbô sə̂nə̈ tee-a. 51Gbölö akrə nə̈ âgroadje earə̂ kua nə̈, kə̂ mbo rə̂ tə̂ yê batə̂ rə̂ ndə̂ a mbo rə̂ tə̂ azü ndə̂ kə̂ mbo rə ndə̂ andjê wâ ngbî tə̂ pö ma andjê; bhâye, kütû kɨ̈ lakə̂ zɨ tchə̂lə̂ da jï.»
Currently Selected:
Matiyə̈ 24: lnl
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© Wycliffe Bible Translators, Inc.